MY15的个人专页

終於有機會試呢間新開越南餐廳，平時鍾意食凍檬，不過政寒地凍梗係食湯河啦！生牛肉湯河，河粉夠滑，牛肉鮮味，湯頭夠濃，但略略有點過咸，都係可接受範圍內既!份量都夠一個大男人食既!小食仲揀左蒜香牛油雞翼，嘩，不得了，一上碟蒜香同牛油香味撲鼻而來，雞翼大大隻，但肉質鮮嫩，炸得脆，外脆內滑，又入味，非常出色!甜品有班蘭千層椰汁糕，班蘭香就一般，椰香比較重，個人口味就覺得有點過甜，可能係食左個湯河之後既反差影響! 整體值得推介，可以再試!…查看更多

天氣寒寒地，最好就係食麻辣暖身。中環要搵高質午餐唔難，但要相對經濟既午餐就有點難，難得呢間瘋狂小面店面寬敞，坐位夠多，唔使排大龍，價錢中等，味道都適中。要搵個食得辣既飯腳同樣唔易，但原來可以揀白湯(唔辣)架!我地2個人嗌左2個午餐，有主食(面)、小菜、飲品同甜品，98蚊起! 詳情見餐單啦！我食個瘋狂牛肉湯面bb辣，正常麻，呢個係伙計教既食法，食落辣味剛剛好，有味同時唔會搶fo,麻香唔係死咸，鍾意食麻辣既人一定滿意。我加左酸菜，但冇驚喜。伙計介紹招牌餃子，可惜賣晒，蒜泥青瓜頂上，正常貨色。甜品:紅棗銀耳湯，呢個有驚喜，好香紅棗同杞子味，銀耳不是太稔，有口感，湯又唔會太甜，幾好幾好!至於同事就食左撈面，bb辣bb麻，加埋熏旦，佢既comment係，面質有口感，唔會太稔太糊。蒸旦好滑,反而甜品釀糟粉子，因為係大糰子，就有點太飽食唔落，d杞子一樣大大粒!如係釀小丸子會好好多。…查看更多

之前經過汕頭街，見到有人龍等位，好奇想試下呢間主打和牛越式湯河既新店(好似開左半年咋)。咁啱上星期2點幾經過見唔使排隊就試左，本身想試佢個期間限定，鴨絲半熟牛肉湯河，不過買晒，咁就試下個火炙半熟和牛湯河啦！座位周圍貼左「賞味指引」，教人點樣食出滋味，不過我就無特別去跟喇!先講講湯頭，足料夠濃，應該冇味精，食完唔覺口渴。火炙牛肉，份量都唔少，唔係求其三兩片，應該都有五六塊，大大片，好腍，本身都好夠味，唔使外加其他越南調味料! 佢既自家芽菜，好香麻油味，但又唔會搶左本身個湯底味。整體份量都夠飽一個下晝!…查看更多

最近同媽咪行過新墟見到呢間餐廳，唔知係咪新開，定之前冇為意，喺門口望到個店面都乾乾淨淨，就入去試下。賣點一，原來飲品無限添飲，有凍檸茶、薄荷橙水，熱飲就有杞子桂圓薑茶! 我餐前飲左杯薑茶，有薑味同淡淡杞子味，都幾好飲，唔會好辣! 飯後我就飲左杯橙水，好香橙味好清新!睇下個menu,都幾多野揀，除左lunch 仲有daily set。 我同媽咪就揀左2個lunch set 加兩個小食!我點左鮮茄大蝦意粉加泰式蝦餅!個大意粉非常抵贊! 大蝦爽口鮮甜，食得出唔係下價雪藏蝦，彈牙好味!仲有新鮮什菌，而意粉都係軟硬適中! 絕望可以encore!泰式蝦餅，上台時熱辣辣，好香香茅味，微辣，開胃小食!媽咪就點左白汁海鮮焗飯!配蒜蓉炒什菌。睇個樣都見到d汁同芝士均勻鋪係飯上，未食之前擔心會太膩，食落又唔係喎!仲有少許拉絲添!海鮮就都係例牌餸，不過重點係有約6隻青口，有大有細，爽口!同埋佢塊炸魚柳，嫩滑入味!炒什菌，好似普普通通咁，佢香口得嚟唔會油膩膩!兩份餐既份量十足，我地仲要打包走!店面裝修簡潔清新，好舒服!侍應人數唔多，但都好好禮貌!抵贊!如果lunch時間(約12點)人比較多，我見都坐滿架!…查看更多

本身約左朋友銅鑼灣lunch, 突然被甩底，好彩表妹係附近返工，可以陪我食飯，大肚婆想食台灣野，咁就試下呢間啦！我地一人點左一份lunch set, 再加一份宜蘭蔥煎餅，午餐加小食半價，即14蚊有4件!抵食!台灣古早味係咩，我就唔知，不過依間都啱我口味既!印象最深梗係宜蘭蔥餅，一份4件，細細件，比五蚊銀大d咁，口大d都可以一口一個既! 宜蘭蔥香十足，香口惹味! 最重要係餡料足，湯汁更足! 食既時候要小心被裡面的湯汁燙到舌頭，更要小心唔口一口咬落去，搞到d汁彈到周圍係，好難言語形容到d湯汁點多法，大家自己去試下啦！ 絕對唔會乾爭爭，好好味!lunch set 我要左個台南擔仔麵，湯底味道唔太濃，面質似係台灣食既一樣! 份量適中，女生剛好! 表妹就叫左個肉燥雞扒飯，雞扒炸到脆卜卜，絕不油膩，肉燥都係好台灣風味! 每個set 都跟三小碟前菜，飯餐仲有例湯跟!飲品我地都係揀桂圓紅棗茶，唔係甜到傻既糖水，好香紅棗味，非常滿意!…查看更多

好耐冇係中環食lunch, 以往總覺得中環午餐選擇又少又貴人又多，今日約左舊同事係中環lunch, 發現利源西街開左幾間新野，揀左係街頭既呢間，專做日式卷物既餐廳。餐廳鋪面細細，簡單乾淨，坐位唔算多，但有吧枱位置。雪櫃除左飲品，都有些pack好既壽司便當，外賣返公司好方便。除左餐牌上各款，客人可以自己配搭自制卷物!由於第一次食，就跟餐牌揀左幾款自己鍾意既卷物。揀左一份牛肉卷 (no. 2)、一款辣味卷 (no.3 饀料有泡菜帶子鰻魚等)同埋C Dragon天婦羅卷物 (no.10),另加帶子壽司。帶子好新鮮，壽司飯亦夠軟熟，醋味適中，唔會散開架! 有日本壽司店既水準!卷物方面，份量十足， 用料豐富。牛肉卷既配料有青瓜、牛油果、腐皮，仲有炸蒜片，夾埋特製醬汁，真係一流，食到停唔到口! 3號既Spice me up, 以辣味為主，主要係泡菜同帶子碎同鰻魚，仲有青瓜同紫菜，配辣味蛋黃醬，味道分明又夾! 最特別既係外面配搭蘋果味既啫喱，為本來濃味既卷物帶來一點清新味道! 整體唔算好辣，係微辣程度，易入口!C Dragon 有別上面兩款，每件size較細，但有8件...主要材料有炸鰻魚同山藥天婦羅，搭魚子，醬汁係鰻魚汁! 口感豐富，特別鍾意山藥天婦羅，香口又有益! 呢餐兩個人食，都飽到捧住個肚走! 下次會再試下其他自選配搭!…查看更多

聖誕節前夕，同嗜辣姐妹放工去左灣仔四姐川菜。上到見到覺得有點似私房菜格局，我地6點半上到去，當時客人唔多，食到8點幾，都未滿座，所以環境都算靜，唔似一般中菜廳嘈到不得了，可以邊食邊傾計。呢度原來係按人頭計，來決定你可以點幾多菜，都計得幾準，我地2個人，每位340，可以點2個涼菜3個熱菜，飲品另計，飯等主食另計。食川菜少不了口水雞，同埋蒜泥白肉(麻辣既)， 我好鍾意個蒜泥白肉，惹味稔熟，味道開胃，令人忍唔住夾完一塊又一塊!至於口水雞呢，有點普通，可能係雞件骨大，而懶惰既我喜歡食肉!熱盤就揀左川式椒鹽蝦，香口唔油，脆卜卜，可以連殼食，營養豐富! 重點係泡椒鴨血，香港好難食到真鴨血，辣度(小辣)適中，鴨血真係甘香又滑口，唔同一般豬紅雞血咁「鞋」口。仲有就係干煸牛肉，牛肉切絲，干身有咬口，微辣，送飯好選擇!原來仲有蒜蓉唐生菜送，炒得香，唔老!…查看更多

今日想食泰國菜回味下去旅行的味道， 行過尖沙咀就選擇了新泰呢間餐廳。一踏入餐廳就感受到濃厚既泰國風味，全餐廳都係以木為主調，另外等位的位置放了一些泰國特色的裝飾品， 有象、 有燈籠等等， 如果要等位都可以睇下d裝飾品打發下時間。店員都係泰國人， 態度親切，而且上菜速度十分快。今日，我地2個人食，叫左3餸一飯一甜品，食完飽到上心口。 我地分別叫左炭燒豬頸肉、馬拉盞通菜、牛油雞翼、 南瓜焗海鮮飯同食泰國菜一定唔小得既芒果糯米飯。 豬頸肉肉質不錯，而且都幾大碟，有炭燒的香味，醬汁一唔會太濃味蓋過炭燒嘅香味。牛油雞翼，十分香牛油味，而且件數都合理，有6 件，配料都好香。 馬拉盞通菜相對起上嚟冇乜特別，最後呢一定要講下南瓜焗海鮮飯，呢個南瓜焗海鮮飯用原個南瓜殼去焗的，十分之香，而且好美觀，口感好好十分creamy，真係色香味俱全。 食完成餐飯梗係要食個芒果糯米飯㗎啦，佢個芒果糯米飯呢係熱嘅，plating 好靚，佢將個糯米飯返成一個心形🧡，椰漿味濃郁，一個甜品都夠兩個人食。整體來講，呢間泰國菜都算幾有泰國味道。…查看更多

前晚同好朋友預祝聖誕節，專登訂左公司附近既呢間西餐廳。可能我地訂得早，6點半就到，當時餐廳內得一兩枱，環境好寧靜，適合兩個人撐枱腳傾下計，裝修簡單得嚟有格調，雖然暗暗地，但都感覺好乾淨，放心用餐。晚餐有面包、前菜、湯、主菜、甜品同餐飲。我地今次前菜就揀左Tuna Tata 同蒜蓉白酒煮法國藍青口， 個Tata 配埋泰國金柚好，味道甘甜清新，好醒胃!藍青口，蒜味同白酒真係好夾，而青口都比平時食到既急凍貨色要高質，爽口啖啖肉，雖然唔係隻隻都肥美，平均來講都係高質級別! 湯就係磨菇湯，好香濃，而且細滑!主菜，就係安格斯西冷同西班牙豚骨，兩份肉都好Juicy, 西冷仲有3款醬汁選擇，自選加或唔加既，我就鍾意原汁原味! 豚骨既醬汁似沙律醬，同ribs 好夾，仲有伴碟既大啡菇，個汁惹味得嚟又唔到搶左菇本身既味，配肉食可以refresh 下，唔會"膩滯"。重點我要推介甜品，窩夫必食!!香脆甜! 只係隔離枱拎過都已經聞到好香，而且一咬落去，脆到估佢唔到! 個雪糕又滑又濃，唔知係咪自家制呢！窩夫絕對係Encore 之選! 另外，個自家制Cheese cake 都好出色!仲要提下服務質素，侍應會每上完一個菜主動幫你換碟，上菜速度都適中，唔會太慢要你坐係度等，又唔會上得太快，好似催你走咁。 綜合食物質素同服務，都係好愉快既用餐經驗!…查看更多

今日閒逛尖沙咀，朋友突然話想食麻辣燙，咁就行左入呢間小店。呢間麻辣燙似車仔面店，畫紙點餸，再等上枱，唔係一串串自己係雪櫃揀完俾佢淥。睇到餐單，好多樣都想食，就諗住揀8淨餸啦，咁食麻辣燙又點少得可樂，不過淨餸加汽水係收正價10蚊，好似唔係好抵喎，所以最後揀左6餸粉面餐，加可樂，成惠59蚊! 湯底小麻小辣，餸有千頁豆腐、萵荀、粟米筍、白蘿蔔、黑豚肉片同肥牛，配紅薯粉。個人覺得小麻小辣係唔辣，而好似豆腐呢類食材，形同無味...有點失望...好彩肥牛同黑豚肉片，唔太差，ok既。粉既份量唔算多，過下口隱都得既~…查看更多

尋晚諗住去石澳睇流星雨，點知等到9點，眼見越來越厚雲，又開始肚餓，唯有敗興而歸，返出筲箕灣搵野食。本身諗住搵間正經餐廳食個晚飯，點知原來東大街last order 係9點半，又俾我地行行下見到呂仔記，門口已經好熱鬧，記得有港島區朋友提過去筲箕灣要食魚肉燒賣，咁應該係講呢間喇!我叫左碗兩溝(碗仔翅加魚肉)同埋燒賣，可惜魚旦已售罄。兩溝足料，但我都係比較鐘意生菜魚肉湯! 而燒賣，28蚊8粒，好似有d貴，但真係大大粒!濃郁魚味，朋友話有點腥，不過都係可接受範圍。可能太大粒既關係，食左兩粒已經覺得夠，唔想再食喇! 好彩我地3個人share 8粒，冇浪費。喜歡魚肉既朋友不妨一試。…查看更多

之前兩次想食呢間lunch, 都因為要等位所以放棄。今次又唔死心再去搏一搏，諗住冇位先改地點。點知咁好彩，俾我地唔使等就有位!除左普通粉面，仲有豬油撈飯架，不過最近肥左好多，豬油撈飯留返下次! 我揀左黑豚肉餃，魚片頭拼銀針粉! 同埋合隆自家製既辣菜圃，小心注意佢地既菜真係好辣架，唔小心會辣到咳! 加入湯中中和一下再入口，好就啱晒!我重點要介紹佢個黑豚肉餃，呢款係我必食之選，皮薄餡靚，好爽口，又多肉汁，同事都好like呢隻餃子!仲有牛柏葉，次次去到都沽清，今次終於可以試(偷同事個碗!) 都係爽口甜美!…查看更多

尋日Friday lunch, 梗係要食好d啦! 三個同事一齊去左耀華街呢間泰國餐廳，呢度用餐環境清靜乾淨，員工都好有禮貌，服務好，環境好，成功將我地由繁忙既工作中抽離一小時，令人心情好，總之就係一個愉快既用餐經驗!午餐牌既價錢唔貴，而且多選擇，淨係小食都有4款揀。而主餐牌既選擇更多，除左海鮮類係時價，其他都算合理價，對比食物質素，我覺得都抵食!我地點左2份午餐(泰式炒金邊粉、豬頸肉飯)加2份小食(泰式蝦餅、泰式春卷)，仲有一個細冬陰功，同埋一隻火焰燒雞!三杯飲品包括耶汁冰、凍檸茶同珍多冰(午餐要加8蚊)。先講兩份小食，雖然係午餐優惠加配，但擺碟都一點唔馬虎，而且份量十足，絕對唔係hea 做! 味道都好好，春卷餡料有木耳絲，粉絲等，口感唔錯，略嫌油左少少! 蝦餅炸到脆卜卜，外脆內軟，味道幾好，食得出係新鮮炸，唔係炸定夾出來。金邊粉，呢個金邊粉好多蝦，蝦肉爽口，而味道都似係泰國食既味道，好好味! 豬頸肉飯，我只食豬頸肉，白飯就擺埋左一邊，豬頸肉都算正常中上質素，如果個醬汁再辣少少就好!冬陰功，好足料，有一隻大蝦，好多菇類，酸酸辣辣，好開胃! 最後就係隻火焰燒雞，原隻上枱，係我地面前淋上酒精，再點火，淨係睇都覺得正，仲要加埋陣陣燒雞香飄出，急不及待想動手喇! 之後，侍應都拎返份廚房斬件再上枱，斬完仲淋埋佢地既醬料，甜甜地咁，好夠味，雞肉都仲好嫩，皮脆肉嫩! 大力推介!…查看更多

有好耐一段時間冇返過長沙灣，以前見松記晚晚都坐滿人，門口等位等外賣既多到出馬路，仲有好多車專登車黎食架。今晚專登同2個朋友由旺角行返長沙灣食，竟然唔使等位!Summer 一向都係我既必食之選，但同日晏晝先食左雪糕，咁就乖乖地食幻彩明珠算啦！同以前一樣既份量，不過今次d芒果酸左少少，西米同珍珠依舊有咬口，涼粉好似切細粒左，其他水果都好新鮮!我個碗有奶，朋友A就走奶!朋友B就揀左咖啡木糠布甸配綠茶雪糕，但佢話覺得麻麻喎! …查看更多

朋友上星期話呢間炸豬扒飯好正，強烈推介，咁我尋日就同埋另一同事去試下先。估唔到兩點九去到都仲要等位，要等兩張枱，好彩都係10分鐘左右。店面唔大，放到二十幾個位左右，睇落係迫d但都乾乾淨淨，唔會坐得唔舒服，開放式廚房，同單邊日式吧枱。本來一心係想試咸蛋炸豬扒飯，但係原來星期日last day....咁我只好轉食炸豬扒肉燥飯加配厚切午餐肉啦，呢碗飯夠晒份量!先講講午餐肉，本身煎午餐肉已經好香口，加上輕輕炸過，咬落去脆卜卜，實在太邪惡，好彩有飯腳share 一半! 塊午餐肉唔會太咸，我俾佢85分!主角豬扒，炸得通透適中，上碟時熱辣辣脆卜卜，肉質嫩，唔un唔太稔，仲好厚肉。本身塊豬扒應該經過調味! 配角，肉燥汁，肉燥汁偏甜，配白飯同炸豬扒都幾夾。同事都係嗌豬扒肉燥飯，佢就加配滑蛋，都ok唔錯!…查看更多