foodieswonderland的个人专页

做完運動口渴想飲嘢，又唔想飲肥仔手搖令自己嘅努力白費，今次俾我發現咗依間主打果酪嘅小店—天然好味嘅飲品加上簡約小清新嘅店面，感覺好舒服。士多啤梨果酪係人氣推介之一，用新鮮士多啤梨同希臘乳酪打成，外面睇一層層咁好靚，比想像中流質但易入口，天然嘅果香甜味同微酸帶奶香嘅乳酪，係零負擔嘅滿足感呢～木瓜唔係人人鍾意食，但打成木瓜奶就一定更易接受。我就好鍾意台灣夜市賣嘅現打木瓜牛奶，所以就試試依杯濃滑木瓜奶奶回味下。木瓜同牛奶嘅比例剛好，口感濃稠得嚟入口滑順。除咗果酪同鮮果奶之外，小店亦有大路嘅純茶、果茶選擇。芝士奶蓋鹹鹹甜甜夠濃厚，一定要打開蓋大啖飲先最滿足～…查看更多

發覺喺希慎食飯嘅話多數都係去Food Court好少去餐廳🤣 最近去過見到依間以曼谷著名市場命名嘅泰菜，大路菜式價錢合理，係連鎖店外一個唔錯嘅選擇。我最鍾意食Pad Thai，而依度嘅Pad Thai正合我心意，炒得乾身唔會太油膩，鮮蝦彈牙，仲有齊花生粒、辣椒碎、白糖，撈勻後辣度剛剛好，帶少許茄汁味。菠蘿炒飯唔係原個菠蘿上但好夠份量，除咗肉鬆菠蘿粒外仲有好多雞柳，望落簡單但食落好香口。最驚喜嘅都係串燒雞，燒得靚唔洗講，仲要幾嫩幾juicy，加埋靈魂沙嗲醬，超推介👍🏻 沙嗲醬偏甜唔辣有花生粒，淨食個醬都lamlam脷😋見到熟悉嘅泰國手標茶葉罐就知道要揀泰式奶茶飲，跟餐價抵飲～…查看更多

鐵花村係我同妹妹都好喜歡嘅一間台東料理店，無論堂食外賣每次都食到好滿足，係令人掛念嘅台灣味道同人情味～| 台東米苔目 |米苔目原來係台東必吃傳統美食之一，即係香港嘅銀針粉，口感QQ軟軟。配料有滷蛋、貢丸、肉碎、白蘿蔔，仲有帶出湯頭味道嘅木魚絲。| 綜合麵線 |麵線裏面有筍絲、紅蘿蔔絲，加埋蒜同油蔥酥嘅香，比起米苔目口味更重。蠔仔鮮嫩大腸滷得入味，揀綜合麵線就兩樣都食到。| 松露起司蛋餅 |Fusion蛋餅加入黑松露醬，香氣十足冇違和感，趁熱食最正。| 鹽酥雞 |最經典嘅椒鹽鹽酥雞，外層酥脆內有肉汁，夾埋炸九層塔同蒜泥一齊食冇咁膩。| 手搖飲料 |食台灣野唔飲番杯手搖感覺一定爭咁啲～芋香珍奶半糖甜度剛好，冇好假嘅香精味；百香果烏龍飲落亦好清新。| 台東海浪冰 |平時食開有芋圓、仙草、紅豆嘅傳統冰品，今次就試試依度嘅招牌—台東海浪冰。淺藍色嘅海浪冰面頭唧上忌廉扮浪花，外型先加分；食到裏面有藍莓醬同星形嘅芒果蒟蒻，好似尋寶咁呢。剉冰顆粒感、冰感較重，但食落就冇咁甜，消暑一流～…查看更多

自從幫襯過灣仔Freshlane之後都幾欣賞依個疫情下嘅餐廳運作模式👍🏻 今次叫嘅Bali Bowl就喺北角Freshlane入面，門口一樣有點餐機，不過喺餐廳官網落單更抵，有幾款食物on sale，自取仲有20% off～食印尼菜必點印尼炒飯Nasi Goreng，揀咗Balacan版，拌勻印尼辣椒醬更香口。辣醬可以另上，按自己口味加唔怕辣過頭。炒飯裏面嘅雞肉係雞柳嚟，幾嫩唔柴。另一碗炸雞飯就係on sale item，原價$100特價$64，當然要試下～炸雞外賣番到屋企仍然幾脆，重點係Sambal Embe—一種峇里參巴醬嘅煮法，混合炸乾蔥、洋蔥、蒜、辣椒粒、蝦醬，非常惹味，所以配白飯已經一流。兩碗飯都有跟蝦片同太陽蛋，蝦片都keep到脆卜卜唔太油。小食薯餅睇落普通但又幾好味，薯仔蓉加咗蔥再沾上蛋汁，外面脆脆地唔會太濕軟。食物整體嚟講係唔錯，食連鎖餐廳食到悶叫下特色印尼菜都係個幾好嘅選擇呢～…查看更多

作為打工仔其中一樣最關心嘅事當然係午餐食咩—最近公司附近開咗間刺身丼專門店，同事們大讚，值得推介～海鮮五式丼分別有三文魚、油甘魚、呑拿魚、池魚、季節魚，今期嘅季節魚係蜜柑鯛，名副其實帶淡淡果香，肉質比另外幾款刺身爽口。刺身新鮮厚切，飯係用日本珍珠米，醋味唔會太重，仲會配中華沙律同味噌湯添。相比之下角切櫻花丼嘅性價比更高—切粒什錦魚生比較特別嘅有希靈魚，加上蟹籽、蟹柳絲、櫻花蝦，口感豐富。除咗大路嘅配搭之外，佢地仲推出咗好有特色嘅創意丼，例如有麻辣醬刺身、黑松露醬油漬刺身、白桃三文魚等，要幫襯多幾次先試得晒呢～…查看更多

食泰菜大家會諗起九龍城，但嚟到市區大商場亦有得獎現代泰菜，包埋靚靚環境俾你打卡，又係另一種味道呢！坐低先有蝦片食，脆卜卜帶點胡椒味，幾香口好易食唔停～食泰菜必點嘅生蝦，有成十隻唔洗爭；生蝦新鮮彈牙，加埋辣椒、蒜片、海鮮酸辣汁先perfect！豬頸肉邊位微燶燒得幾靚，個汁可能混合咗羅望子醬所以帶少少甜味，點埋醬汁惹味得嚟又唔膩；青木瓜沙律唔辣但爽口開胃。菠蘿炒飯粒粒分明呈均勻嘅金黃色，除咗面頭開半嘅大蝦外，仲有小粒帶子青口同新鮮菠蘿粒，撈埋肉鬆一齊食更好味。而家嘅天氣最啱飲沙冰，三款沙冰類特飲都標榜100%鮮果製造。今次試咗少見嘅菠蘿薑汁，新鮮菠蘿汁有天然嘅甜味，薑汁唔辣比想像中易入口，飲落好清新～…查看更多

想食馬拉菜一定會諗起蘇媽.蘇媽，銅鑼灣分店夠晒大，熱鬧得嚟食得舒服。| ᴄᴜʀʀʏ ᴍᴇᴇ • ʀɪᴄᴇ ᴍᴀᴄᴀʀᴏɴɪ |湯咖哩嘅辣度唔可以睇少，米通同豆卜薯仔都索晒啲精華，湯底入面酸柑汁嘅酸味慢慢滲出嚟，越食越濃；配料方面煙煙韌韌嘅魚肉卷都唔錯。| ᴘᴇɴᴀɴɢ ᴡʜɪᴛᴇ ᴄᴜʀʀʏ ᴍᴇᴇ |相比起嚟白咖哩嘅湯底冇咁濃厚，但就有種令人想不斷飲嘅魔力，撈咗帶點鹹鮮味嘅特色參巴醬後味道更香；白咖哩麵有大粒彈牙白魚蛋，豬紅亦嫩滑唔腥。| ʜᴀɪɴᴀɴᴇꜱᴇ-ꜱᴛʏʟᴇ ᴋᴀʏᴀ ᴛᴏᴀꜱᴛ |多士烘得好脆，夾住厚厚一層牛油同咖央醬，邪惡但令人好滿足，同朋友分享最啱，唔係會食唔到主菜呢～| ᴛᴇʜ ᴛᴀʀɪᴋ |拉茶有得嗌少甜，熱嘅香滑仲有綿密嘅泡泡，凍嘅香料味更突出。餐牌：…查看更多

喺銅鑼灣做完運動發現依間新開burger外賣店—漢堡小食選擇多，仲有台式飲品添！第一次食叫咗店長推介嘅Gustoso牛堡～漢堡扒用美國牛打成，混入洋蔥粒增添口感；配料都係基本嘅車打芝士、蕃茄、生菜，但我鍾意佢加肉醬而唔係普通茄汁，令個牛堡味道更豐富。漢堡可以升級唔同套餐，最貴嘅都只係加$29，可以揀蕃薯條/吉列蠔/蜜糖烤雞翼，仲有價值$18嘅飲品。吉列蠔唔算大隻但炸得好脆，咬落去咔嗞聲然後就食到爆汁嘅蠔肉，好夠鮮味。限定推出嘅菠蘿綠茶好refreshing，啱晒而家熱辣辣嘅天氣，嗌半糖剛好，補差額加$8就飲到喇～順帶一題佢地嘅外賣盒都好貼心，有開窿疏氣，唔怕倒汗水令漢堡同炸物淋晒，盒入面仲有間隔分開唔同食物添👍🏻Menu：…查看更多

疫情期間餐飲業多咗好多營運方式，其中Freshlane就提供咗「雲端廚房」俾唔同餐廳，令外賣、外送更方便。今次吸引到我嘅係灣仔Freshlane入面嘅Dirty Burger，OpenRice/ 幾個平台都有，現場外賣機order價錢最優惠，滿$100仲有減$20！| ᴅᴏᴜʙʟᴇ ᴅɪʀᴛʏ ʙᴜʀɢᴇʀ |自家製嘅十字包，比平時軟熟嘅漢堡包更有咬口；雙層新鮮手打牛肉幾juicy夠肉味，配上焦糖洋蔥、車打芝士同大量醬汁，每一啖都好豐富。| ꜱᴡᴇᴇᴛ ᴀɴᴅ ꜱᴏᴜʀ ꜰʀɪᴇᴅ ᴄʜɪᴄᴋᴇɴ ʙᴜʀɢᴇʀ |比招牌漢堡更陀地嘅炸雞堡，甜酸醬還原咕嚕肉嘅味道；炸雞好大塊、炸粉亦唔厚，加上菠蘿同洋蔥天然嘅甜味，細食嘅分分鐘會食唔晒呢～| ᴡʜɪᴛᴇ ᴄʜᴇᴅᴅᴀʀ ᴄʜᴇᴇꜱᴇ ꜱᴀᴜᴄᴇ ᴡɪᴛʜ ᴄʀɪꜱᴘʏ ᴛʜɪᴄᴋ ꜱʟɪᴄᴇᴅ ꜰʀɪᴇꜱ |普通嘅波浪薯條，點咗濃郁嘅白車芝士醬味道即刻提升幾倍，沾上醬汁依然脆口，芝士迷必點！| ꜰʀɪᴇᴅ ꜱʜᴜᴍᴀɪ |最陀地嘅當然要數炸燒賣—燒賣炸過後加咗少許辣椒碎，食落更香口，煙煙韌韌幾過癮。…查看更多

每次行過亨環天后見到樓下「美食街」Food Loft都覺得好吸引，有唔同小店進駐成為附近學校學生嘅聚腳點，作為街坊都要買外賣支持下！今次揀咗標榜為全港第一家星馬沙嗲專賣店嘅Satay Pop，未食已經好期待～點餐位旁嘅凍櫃可以見到醃咗並分類放好嘅沙嗲串燒，嗌完即叫即燒，包衛生又熱辣辣。輕食．簡餐有齊我想食嘅串燒同主食，可以自選配搭好flexible，第一次食我就嗌晒四款沙嗲串試試。串燒好入味，燒到微焦點埋秘製辣沙嗲醬夠晒惹味（個醬都係精華所在🤤）！我比較喜歡雞串同豬串，肉質juicy又tender。撈麵可以揀Indomie或者真正馬拉風味嘅美極牌Mi Goreng Cili Kampung，老闆話專登從馬來西亞進口架！我覺得佢比起Indomie嘅麵條幼身啲但更彈牙，帶少許辣味，夾埋串燒一流。唔講唔知原來套餐撈麵仲可以免費加底，因為老闆話驚啲學生唔夠飽，好有心呢😆當我心思思諗緊揀邊款米糕時老闆又好好話可以要晒三款🤪 米糕其實都係飯嚟所以都幾飽肚，經典、班蘭、薑黃味之中我最鍾意班蘭，佢獨特嘅香甜味令米糕食落冇咁漏，而經典味就點花生醬最啱。除咗食物外仲有馬來西亞飲品，又點少得紙盒裝美祿呢！最後仲有個貼心位：由於串燒要熱食先好食所以外賣都會準備依個高質保溫袋（同包裝紙巾添！），值得一讚可以再幫襯呢👍🏻…查看更多

放工後沿住海濱行到去鯉景灣海旁，一整排餐廳各有特色，喺街尾見到半開放式嘅The Blind Pig感覺特別chill，好多人趁happy hour飲番杯🍻鍾意有anchovy嘅Caesar Salad，鹹鹹香香同新鮮爽脆嘅羅馬生菜好夾，加埋啲finely grated parmesan，係最穩陣包好味嘅沙律🥗分享拼盤差唔多有齊餐牌上嘅小食，啱晒有選擇困難嘅人。比較出色嘅有juicy嘅肉丸，酸甜嘅蕃茄醬令大大粒嘅肉丸食落冇咁膩。炸雞翼外層裹滿秘製香料，十分惹味。迷你牛肉漢堡以漢堡扒、芝士同酸瓜嘅簡單配搭滿足到我嘅burger crave，按個人口味加啲茄汁又得🍔我地一致認為最好食嘅item：Bacon Mac & Cheese！Mac & Cheese好creamy同cheesy，應該加咗少許白酒吊味，聞落食落都咁香，有thick cut bacon同洋蔥粒味道更出，雖然係sides嘅portion但好滿足呢🥓更邪惡嘅仲有雪糕新地，兩球朱古力雲呢拿雪糕、原條香蕉、棉花糖、M&M’s、whipped cream都唔夠，最驚喜係個waffle，外層caramelized脆脆地甜甜地，真係perfect嘅甜品🍨…查看更多

質素一向有保證嘅李家再開新店，今次嚟到西灣河，餐廳比起其他分店感覺更寛敞同光猛，亦適合一家大細用餐，可以吸引更多客源。西灣河店嘅半半炸雞有得自選配搭，而我都係揀番我最鍾意嘅原味同甜辣，要無骨炸雞可以大啖食好方便。李家嘅炸雞真係做到皮脆肉嫩嘅效果，特別係甜辣炸雞，外面裹滿醬汁裏面仲要有肉汁，十分滋味。海鮮蔥餅都係喺李家必嗌嘅下酒菜－蔥餅加上魷魚、蝦同蜆肉，口感豐富，蔥餅唔易散開，點埋韓式醋醬更好味。午餐時段飲品有優惠，罐裝柑橘汁幾好味唔會好甜；特飲彩虹梳打冇優惠但幾大杯，西柚味酸酸甜甜唔錯，食完炸雞飲係爽呢～…查看更多

台灣俾人嘅印象一直都係滿滿的人情味（和美食！）。最近屋企附近開咗間來自台東嘅小店，以台東景點鐵花村命名，店內有好靚嘅彩繪熱氣球燈、手繪牆畫同台東旅遊景點介紹，加上熱情嘅店主招待，令人感覺好親切，食完更加掛住台灣啊～下午茶時段嚟到有抵食茶餐，有多款台式小食揀仲附送指定手搖飲品（其他飲料有半價優惠）。滷肉飯嘅半肥瘦豬肉滷得入味，入口即化，拌飯一流！依度嘅滷肉飯特別在加咗台灣肉鬆，米飯以珍珠米混合紅藜，香口得嚟更有營養價值。肉鬆起司蛋餅餅皮厚薄適中口感軟Q，配上簡單嘅餡料，熱辣辣食特別好味～店主亦推介咗兩款小吃－五味醬白肉甜甜辣辣幾開胃，薄片白肉配上秘製醬汁一啲都唔覺肥膩。臭豆腐係夜市嘅味道（好懷念！），豆腐由台灣入口，炸出嚟金黃酥脆，醬汁唔落太多，配埋台式泡菜，十分回味。手搖飲料走健康路線，味道天然甜度易接受－鳳梨奶蓋烏龍嘅甜味嚟自鳳梨汁，奶蓋輕盈絲滑帶奶香，珍珠奶茶都係回憶中嘅味道。最後唔少得一份九份芋圓－芋圓地瓜圓Q彈軟糯，配搭粉圓、仙草、紅豆，淡淡嘅甜味加上桂花點綴，賣相更靚。店主話夏天會推出剉冰，好期待呢！…查看更多

以「小賭城」命名嘅人氣樓上cafe，由裝潢到餐牌設計都充滿色彩同玩味，用餐環境係令人放鬆嘅 🎲🃏食物選擇幾多元化，今次我地分別試咗pasta同pizza～我好鍾意明太子忌廉天使麵creamy嘅醬汁，加上木魚絲同雜菇，食落好有飽足感。Pizza更有特色－喇沙海鮮、避風塘魷魚、沙茶風味依啲無諗過可以出現喺pizza上嘅味道都有，所以我地就叫咗可以任選兩款口味嘅孖寶pizza。Pizza係薄脆批底，唔怕份量太多share食最啱。穩陣派嘅黑松露野菌香氣十足，見到面頭嘅黑松露醬就知！pizza亦加咗大量芝士，如果用新鮮蘑菇相信會更香～至於北京填鴨風味其實係用煙鴨胸做材料，搽上甜麵醬還原番個味道，食落真係幾惹味！Cafe設最低消費每人一杯飲品加一份食物，飲品選擇好多包有一款啱你，咖啡／朱古力／抹茶類更加有兩杯優惠價。同我一樣嗜甜嘅可以試試綿花糖或者朱古力咖啡，雖然咖啡味唔算突出但有心思呢😋…查看更多

幾欣賞餐廳嘅概念－Better Burgers for Everyone，將有質素而又affordable嘅漢堡帶入灣仔依個小社區，等大家喺連鎖快餐店外有多一個抵食嘅選擇。餐廳有懷舊美式快餐嘅vibe，打卡able～最搶眼都係牆上嘅吉祥物Bobby仔，仲有變成漢堡材料嘅牛雞魚仔🤪最平嘅Beef Burger只係HK$28，可謂平靚正，但因為塊beef patty較薄身，所以我更鍾意雙層漢堡，食落更滿足更回味。今次食嘅Bacon Double Cheeseburger用咗切粒煙肉，beef patty同芝士都係double上，patty大概煎到七成熟，軟嫩得嚟肉香十足，唔會俾芥末醬同茄汁蓋過。全新漢堡系列之中我地仲試咗Seoul Burger，喺burger裏面夾泡菜搽韓式秘醬夠創新。漢堡包 keep到軟熟嘅口感，唔會因為加咗泡菜而太濕。Popcorn Chicken除咗炸雞粒外仲混入咗炸雞皮，一口size雖然唔會juicy，但食啖脆口小食飲啖汽水係過癮嘅～Skinny Fries一樣香口，落咗鹽好夠味唔洗點茄汁。睇番餐廳介紹，佢地採用可持續採購、可追溯來源嘅優質食材，加上漢堡都係即叫即整，追求健康美味之餘亦食得安心👍🏻…查看更多