Uncle Prince的個人專頁

錦田天空之城不斷開新餐廳, 呢間素食店開左幾個月, 即管去試下。內部簡約裝修, 以白色為主調; 大約坐到14人, 算寬敞; 門口外面也有相當大的地方, 適合吸煙及有寵物的客人, 感覺幾寫意的。店舖有手沖及奶啡, 也有各式蛋糕小食, 主食則以意粉, 飯, 漢堡飽, All day breakfast 為主, 選擇都算多。點了一客炸南瓜, 配蜜糖, 味道好夾, 略嫌南瓜有點散; 芝士素肉醬紅腰豆意粉賣相無乜特別, 但味道有驚喜, 素肉醬的味道調得好好, 又夠多, 食完意粉都仲有醬汁剩👍最後叫左一杯黑芝麻latte, 芝麻係杯底, 所以要攪勻才好飲, 否則只飲到好重的奶味。原來黑芝麻同牛奶唔係好夾😥…查看更多

來一次飲食習作! -「生活就是每天的習作」 深水埗呢間日本家庭式料理店好出名, 仲要預約先有位。最近體驗了一次午餐定食, 坐在近門口靠窗既位置, 太陽射進室內, 戴住太陽眼鏡用膳實不為過😂定食基本已有枝豆水雲沙律, 水果乳酪, 北海道七星米; 之後再揀2款或以上既主菜 (每款主菜價錢不一)。食物質素中上, 店舖是簡約的日系, 木系。如果跟朋友談天說地, 猶如置身家中一樣舒適。牆壁上貼了兩張畫(或圖), 分別配上小文字。如果必要選擇其一, 寧願繼續裝模作樣...成熟:「真正的成熟, 不是被現實磨平稜角後的世故, 而是自我的發現與正確的期待這個世界」 裝傻:「當現實很鋒利, 我們需要一點迷糊, 才能生還於殘酷的世道」 …查看更多

今朝去荃灣做身體檢查, 血壓有少少超標, 應該係Uncle 食得太唔節制😢 開始要注意一下, 希望大家都繼續飲和食德!朋友之前已經介紹呢間, 佢上網見到的, 無親身試過; 就等我黎試食啦！由南豐行去聯仁街, 未夠12點, 驚未開門。好彩去到剛開始營業, 唔駛白行一轉。由於時間尚早, 只得我一個客人, 又到隨便揀位坐既遊戲😁 呢間舖隔離都係車房; 但入到去就感覺到好舒服, 配合日本/台灣既流行曲, 跟外面形成強烈對比。店舖裏面近啡枱的位置, 有幾張高枱, 靠著牆鏡的, 我就坐在其中一張。因為做檢查前不可進食, 急不及待點了我的brunch!¤ 酸甜姬菇沙律: 開胃前菜, 酸酸帶點辣, 不錯; 但份量少左d😁¤ 牛肉壽喜燒: 材料豐富, 擺放亦好有層次 - 芋絲, 姬菇, 牛肉, 豆腐都係Uncle喜愛的, 大蔥有點硬, 但整體味道很好¤ Flat white: 幾日無飲啡, 來杯熱小白即時止癮, 奶夠熱👍回頭指數非常高👏…查看更多

橫風橫雨既日子, 又蕩左去港島。西營盤附近有唔少特別既食肆, 避雨既時候無意中見到對面的這間麵包店, 最吸引的就是近門口的bar枱, 可以坐係呢個位置望住馬路, 欣賞街景同雨景。佢地主打手製麵包, 餡料有好多選擇。我想清淡一些, 點了牛油果蓉吞拿魚沙律包, 配粟米杯, 看似好健康😅 吞拿魚沙律味道不錯, 非常清新; 略嫌牛油果蓉少左d。太健康又是不行的, 結果還加了一份日式餃子, 蘸上秘製餃子醋汁, 非常滿足!Uncle 入去食既時候, 一個客人都冇。隔一陣就多了不少熟客仔幫襯。性價比很高, 下次再試其他口味!…查看更多

這是平日上班日子, 因為某種原因請了半日假, 做完正經事後, 想起南豐紗廠呢間 cafe。周末必定滿座, 難得平日早上黎hea一下!入到去馬上被中間的兩張大圓枱吸引住, 要上梯級才可以坐下。如果四人同行, 應該揀呢張枱, 既有"高高在上"既感覺😂, 朋友圍住傾計又好溫暖, 我突然想起主題樂園的"咖啡杯"之類☺其餘的座位則圍住中間這兩張圓枱擺放, 各具特色。非繁忙時間可以慢慢揀 (人多的話...🙈🙈)呢篇主要講cafe既空間感, 至於食物就不過不失。有時間嘆杯奶啡, hea下, 係唔錯既選擇!…查看更多

歌賦街有好多日本料理店, 每想到吃拉麵都會黎呢度。最近經過發現多左唔少新食肆, 拾味係其中一間。店舖名叫正宗刀削麵館，店內電視都係重點介紹刀削麵的，但是我太肚餓, 結果點了菜飯。呢個菜飯都好特別的, 加了少許冬菇, 有別於其他上海店舖。東坡肉最重要夠"林", 呢舊稍為"硬"了一點, 但味道非常出色, 點少許麻辣汁已經夠送整碗菜飯😂熱飲可以解辣, 蜂蜜柚子茶係唔錯既選擇! 可能係周末晚上, 人流不算多! *原來總店係灣仔, 希望都同樣出色…查看更多

最近多左去火炭, 因為時間太趕, 每次都去幫襯泰式海南雞飯, 已食厭😂 今次有多d時間, 決定去沙田商業中心搵好野食! (沙田商業中心係火炭囉…)經過門口裏面無人, 只有一個人正在叫外賣, 我以為準備打烊, 好彩還未。 入到去地方唔算細, 有一邊近玻璃窗, 都坐得幾舒服; 好快要決定食咩, 呢個和風滑蛋特級豚肉飯又幾特別喎, 配豚肉既係燒汁, 但我食到鰻魚汁味🙊 豚肉好嫩, 配合滑蛋黎食口感剛剛好。點了一杯菊花蜂蜜綠茶, 真係有幾粒菊花係面, 唔太甜, ok!…查看更多

同朋友一齊黎練功😂 門外望入去以為只有幾個座位, 原來入到去柳暗花明, 都算寬敞。但有些座位距離洗手間太接近, 感覺不衛生, 所以我地調左位置, 如果洗手間外隔一屏風會好好多!講返食物, 主要有麵食, 包類, 甜點, allday breakfast... 最特別莫過於佢地既名字: 赤煉神掌 (茄汁意粉), 桃花島 (忌廉三文魚意粉), 獨菇劍法 (黑松露雜菇意粉) 等等, 三分形象七分想像😬我地點左草上飛 (大啡菇蕃茄粒意粉)及挪威北斗陣 (煙三文魚沙律醬貝果), 嗰bagel 有驚喜喎, 青瓜同忌廉芝士好夾, 包又好軟, 雖然唔係好食到芥末味😌 飲品就點了六脉神劍 (我最愛既flat white)同埋化骨綿掌(cappuccino), 隨即來個評啡會議, 朋友好認真試, 又同咖啡師反應了我地一些意見, 能夠互相交流才是練功既真諦！…查看更多

放工去左荃灣搵野食, 呢間約半年前見住佢裝修, 近月終於開張, 每次經過都被半開放式既設計吸引住。店舖位於角位, 善用多邊設計, 加上特大玻璃窗, 客人可以一邊欣賞街上風景, 一邊享用美食咖啡, 絕配!平日晚上客人不算多, 我坐近門口的靠窗bar枱。我點了波隆那肉醬手工千層麵, 唔好睇佢份量好似比較細, 由於佢既主要材料係白醬, 麵皮, 乳酪同埋肉醬, 所以都叫肥膩😬😬 焗出來表面金黃香口, 加埋配菜裏面既麵包糠粒, 又真係好夾!小白香滑剛剛好, 但我已經無位放甜品, 唯有下次😉…查看更多

今日行經北角, 入黎呢個從來未踏足既商場 - 北角滙，分開三期, 食肆分佈尚算平均。經過一田, 上1/F, 無意中發現呢個意大利雪糕店。其實Mamma Mia Gelato 係香港已經有幾間分店, 北角呢間只開了2星期, 即管試下有幾特別!佢地雪糕種類好多, 分為無糖及低糖兩大類, 係晒貪吃既Uncle😎 今次我揀左3色香蕉船: 雲呢拿 + 黑芝麻 + 熱情果! 唔好睇少呢三種味道, 全部都好濃郁, 真材實料。Uncle 特別推介黑芝麻味, 好似食緊芝麻糊!😉老闆娘歡迎大家試食, 我好想試朱古力味, 估唔到佢請左我食埋雪糕筒😋 70% 比利時朱古力, 配合粟米片做既雪糕筒, 我會比101分!其實仲有好多其他口味, 例如貓山王榴槤 (我接受唔到呢隻味😤), 適合小朋友食既益力多, 仲有頂級酸既青檸味, 同埋日式清酒啤梨。但我真係食唔落, 唯有留待下次😋…查看更多

因為疫情反覆, 去年已訂位既私房菜, 要到農曆新年期間才可以試到。餐廳位置銅鑼灣閙市, V Point 曾經有唔少不同種類既餐廳, 但搭升降機上去時, 發現好多都做唔住已結業。飲食業早已處於生死邊緣, 但政府繼續無為而治。其實今次係慕名而來, 朋友安排好訂座, 非常感激, 就當係新春午餐團拜! 餐廳格調稍為遜色, 跟普通的中菜館相差不大。我地一早訂左套餐, 整體來說都算高水平, 但就沒有太大既驚喜; 反而侍應既服務態度唔錯, 例如我地發現枱布有少許污漬, 佢地已馬上安排替換; 雖然話呢d係應有既態度, 但絕對值得認同。…查看更多

行完山異常肚餓, 想在大圍站附近食埋野先返屋企。腦海中馬上閃過呢間cafe, 再search下仲有個半鐘才打烊, 就碰碰運氣睇下有冇位。對上一次黎已經一年有多, profile pic 既紫薯包就係呢間cafe既signature之一。行入舖頭已經滿坐, 店員話係門口等一陣, 應該安排到座位。不到幾分鐘, 就被安排坐到最入近牆壁既位置, 效率值得讚許。呢間cafe推出好多不同口味既麵包同bagel, 今次我就試左XO醬玫瑰臘腸貝果, 可能靈感來自茶樓既臘腸卷?!😂 雖然呢個配搭未必人人接受到, 但欣賞佢會嘗試。又可能行完山勁肚餓, 食完呢個有少少肉既麵包, 感覺好滿足!…查看更多

新年期間好多舖頭都休息, 勤力既老闆年初一至初四都開門做生意, 等我地d早餐控唔駛餐餐食蘿蔔糕!😂😂唔想等位梗係要排頭位, 11am開門時已經有6人等候, 好好彩還有一個bar枱位, 仲可以望住街上風景!之前已試過英式早餐, 今次就試水牛芝士蕃茄豆腐牛角包, 果然同樣出色! 脆脆的牛角包, 不會太熱, 溫度剛剛好;蕃茄加上豆腐帶出清新既感覺。再加一杯熱latte, 足以令人整天都維持靚心情!😎呢度主要由老闆一人製作, 所以即叫即整, 客人須要耐心等候。(沒有充裕時間享受早餐, 我就唔建議佢地黎了😬)…查看更多

新正頭, 趁住仲未開工, 去食下生野, 新一年就生生猛猛。食好野要睇緣份? 其實係睇下識唔識預時間, 明知午/晚市多人, 一定要排隊等位, 咁就盡量避開! 我既"一人之境"係咁建構😎唔想食丼, 一於試下壽司·梅。呢間壽司店要用QR code點餐, 好快就黎左麵豉湯, 沙律同茶碗蒸; 咁我梗係等埋主角先影相啦！梅有10件壽司, 每件size 適中, 佢唔係以大大件作為賣點, 但咁多件壽司舖埋一齊, 諗起將會有10次點芥末放入口既體驗, 已經好滿足!😂下次可以升le食其他丼!…查看更多

呢間cafe係元朗知名度甚高, 每次經過都大排長龍。裏面只有幾個座位, 滿座就要坐門口, 所以一直未試到。今次決定再碰下運氣, 室內只剩下bar枱, 也不錯! 可惜長長的枱沒有掛鉤, 我又不想把背囊放在枱上, 結果只能放在地上!呢間cafe出名烤酸種麵包, 我追加了牛油果泥，另點一杯white。五分鐘左右先送來咖啡, 接著就來了主菜。麵包烤過, 皮脆內軟, 但沒太大驚喜; 反而牛油果泥值得一試。我本身唔好牛油果的, 但佢呢個牛油果打爛到成蓉, 再加上辣椒調味和果仁, 效果出奇地好。…查看更多