ข้อมูลส่วนตัวร้าน ktsiu

今日去開茘枝角D2，寶寶話小帶小弟食好西，就嚟到呢間喺地鐵站附近嘅紅米，睇到個門口，餐廳類似茶餐廳，但又有少許年青格，應該都唔錯。一坐低掃QRcode落單睇menu，款式花多眼亂，寶寶話蛋包飯出名，就叫咗碟板燒雞扒蛋包飯；我就未諗好食咩㗎，但見到雞髀腸仔碟頭優惠價$45咁抵，就揀咗呢個轉白汁粟米配意粉。另外，大食寶寶叫多個白汁白草孖芝焗薯條。食物上菜都相當快，見到個擺盤都覺得吸引！雞髀腸仔係白汁，意粉本身就茄底，少許茄汁醒醒胃，我又幾鍾意！雞髀就少許乾身，但都唔錯，啖啖肉！寶寶個蛋包飯都幾精緻！至於焗薯，有拉絲芝士嘅配搭係唔會失望！同埋呢間有凍檸蜜飲，都係加3蚊，幾好喎。總結而言，茶餐廳嘅價錢，有質量！叻啊寶寶，帶小弟食好嘢！…ดูเพิ่มเติม

今日小弟去太古辦公，真係好口渴，行經Aeon，咪諗住求其搵間台式茶飲吓囉。點知求其搵就中伏。花斑茶社喺康怡地下嘅一角，款式都係普通台式茶，就咪求其叫杯阿薩姆紅茶，平日小弟就好鍾意食珍珠，呢到無珍珠㗎叫仙草。走糖健康生活，冬天咪走埋冰。等咗5分鐘，有嘢飲喇。一入口，哇，咩料，酒樓陳年普洱味嚟，澀囉！唔係紅茶味嚟，果啲仙草，真係呃我唔到，係罐頭涼粉嚟，又散又細粒。題外話，呢間鋪擺滿Anson Lo同張敬軒，Fans 可以睇吓，飲嘢就不必了。飲咗咁多年台式茶，第一次想寫食評，就係為咗負評。一search仲要咁多間分店，嗯，祝君好運。…ดูเพิ่มเติม

小弟作為（間中）素食主義者，最近帶寶寶去呢間地道素食朝聖吓。一嚟到，果然好地道，唔熟地頭都唔識叫餸，友善嘅姐姐即刻上前介紹有咩食同點樣叫，呢到嘅三餸飯，先同姐姐叫餸，再自助飯、湯，姐姐仲好細心咁問我地食唔食辣，再做推介。食物預備好，寶寶叫咗素腸、鹵味、薯絲，我叫咗2種素鴨、茶芯，食落口，食物稍涼，但素鴨有西檸汁嘅加持，甜酸適中，清清地，幾好。嚟朝聖，梗係叫最出名嘅春卷，但由於晚市，姐姐話已經賣曬，蘿蔔糕煎嘅都無，不過可以幫我地即蒸，暖笠笠，蘿蔔粒口感十足，正。唯一有意見，就係份量好少，每餸得3件，不過白飯任添嘅。小弟食完唔太飽，寶寶返到屋企都要搵嘢食。不過，店員態度都令素友有愉快體驗，讚…ดูเพิ่มเติม

小弟同寶寶又出擊去尋找美食，呢間華記其實第二次去食，的確係食過翻尋味，食埋今次，真係要嚟開飯稱讚下呢間實而不華、大件夾抵食嘅車仔麵。呢間好店，撞手神今日唔使排隊直入。坐低左用qr code落單，寶寶就食牛雜麵、小弟要豬雜，過癮係呢間店叫多腸、腩汁都唔做加錢，大食寶寶要多碟通菜、我就叫多碟鳳爪。唔使幾分鐘，先嚟一碟鳳爪，一食、即刻畀like鳳爪唔係普通得個辣嘅泰式鳳爪，而係微微辣小小酸嘅開胃鳳爪，仲好細心地第一碟上，認真開胃，正正！再嚟兩碗麵，大大碗，夠飽肚，真係真材實料，好有誠意，小弟碗豬雜，果然多腸，配上清湯唔會膩！最吸引係寶寶牛雜果啲牛腸，粒粒都肥嘟嘟，入口即化，果種油脂嘅香味，食完令人有幸福嘅感覺。再食多碟生菜，解脂，滿足。食咗咁多嘢，再叫多杯汽水，百六蚊有找，滿足一整天，超值！繼續做常客…ดูเพิ่มเติม

話說前排同寶寶同到美食推介，睇到呢間鋪好名蛋牛治，滿心歡喜一於試下。深水埗有兩間新香園，一間新一間舊，呢間堅記，外貌認真古色古香。一點鐘，lunchtime要等位，阿姐話入得，點知入到去，要等上手客畀錢走，噢，即是趕客服務，急住食急住走，唔好諗住長坐。坐低就畀餐牌價錢價錢嚇親，無套餐，散叫，一麵一包一杯飲品，自制常餐預咗$50-60，貴過茶記少少。寶寶叫我發板，兩個人叫咗蛋牛、西多、豬手麵、沙爹牛、熱奶茶。一上豬手麵，豬手淋膩剛剛好。不過，啲麵好重鹼水味。寶寶就話沙爹牛係生牛，食得出唔係普通料，杯奶茶好似都滑啲。萬眾期待嘅蛋牛，都冇其他人影到咁厚，食落就係沙爹牛嘅牛嚟。個人認為西多好食啲，食得出係靚牛油整嘅。整體而言，食物ok，環境一般，價錢略貴。值得朝聖，朝聖一次夠皮啦～…ดูเพิ่มเติม

承上篇同寶寶繼續油麻地地道覓食，上網搵油麻地平價美食，呢間雞味濃就榜上有名，個店鋪名鬼馬得嚟又地道！一於試一試！ 呢間店喺正油麻地站A出口，極易搵，不如店就好細得3、4張枱，好彩早食飯，搭枱有位。餐牌選擇就唔多，得燒味、住家小菜，嘢飲得汽水、豆漿。小弟叫咗沙薑雞拼叉燒，寶寶叫霸王雞，一齊加3蚊轉菜飯。一上餐，寶寶話好大碟都幾抵。食落d雞都好新鮮、好滑，叉燒半肥瘦啱啱好。不過我就食唔出霸王雞同沙薑雞嘅分別。但要加分係，小弟無要求下畀咗雞髀，睇餐牌要求轉髀係要加十蚊！真係多謝晒！最後，店鋪此終太細，都唔好意思坐得耐，用咗廿分鐘食完即走，仲有嘢飲唔啱飲。嘢食好味，但唔係聚腳之選。不過我見到門口叫外賣仲平，喺附近嘅朋友不妨考慮吓！…ดูเพิ่มเติม

小弟同寶寶一齊去油麻地搵食，先覺得原來油麻地係搵食好地方，之前同寶寶講想食清清地，又行過見到素食店，啊，好似都幾出名，就入去品嚐品嚐。坐低睇餐牌，幾得意喎，係有素食壽司，又有小菜粉麵飯，唔講以為去咗大牌檔。寶寶話食咩都無所謂，咁就小弟發板。兩個人叫咗三樣嘢，先上菠蘿咕嚕肉，舊「咕嚕肉」一咬就知係菇嚟。老實講，係1d都唔似咕嚕肉。但係舊菇都煎到好香口，食菇都好味嘅。跟住係上乾炒牛河，素牛食落都唔錯嘅，河粉就好有牛河味，小弟我就好鍾意。跟住就上軟殼蟹壽司，呢碟我同寶寶都畀滿分，原因係軟殼蟹香口鬆脆，口感似真壽司。總結，呢間瀛素食尚算合我心意，好味。寶寶就話咕嚕肉麻麻，其他都ok，埋單又唔貴，三百蚊有找。鍾意素食嘅你，可以試吓。…ดูเพิ่มเติม

尋晚同寶寶喺荃灣談心，聽聞呢間莎樂美都出名，出名特別貴，所以就嚟咗幫襯吓。餐廳都full 咗，要等一陣，估唔到咗咁多人。打開餐牌，其實價錢西餐都唔貴，但以我同寶寶喺懷舊西餐廳縱橫多年，相對下係小貴，仲要加一！寶寶就滿懷希望點咗精選特餐，小弟就叫左夏威夷雞扒餐！先上紅湯，飲落係微辣，開胃嘅！再上寶寶嘅沙律，都幾豪氣，有煙三文魚，食落ok。再上法式田螺酥盒，個盒好鬆，同d汁幾夾！到主菜，寶寶七成熟牛仔骨扒，啱啱好！份扒又大份！到小弟份雞扒，有兩大舊，食唔曬，贏份量！夏威夷汁仲要有菠蘿，正！上埋餐飲同雪糕，滿足。咁多嘢食，寶寶話唔貴，所以都唔錯嘅！不過都係因為太多客，趕客服務，唔會坐得耐…ดูเพิ่มเติม

呢間高興都真係喺觀塘響曬朵，之前同朋友嚟都未寫過食評，今晚帶寶寶就寫吓。嚟高興，最好就book定位！就一定有位！寶寶要我幫佢發板，我幫佢叫意式芝士烤雞薯菜、我叫左磨菇雞肉意粉，另外叫左水牛雞翼！等左無耐就上菜，水牛雞翼微辣，但醬係好味，令我薯條唔點蕃茄汁點醬！烤雞係大大塊雞扒，肉質一般般，呢個價錢都唔求咩架啦，但份量同賣相要讚！至於意粉，忌廉味重，個人超鍾意！嘢飲方面，跟餐有水果茶，寶寶杯青蘋果疏打唔錯！不過今晚失策，三碟都係雞，有d膩！整咗嚟講，唔使加一，大部分嘢又好食！推介！…ดูเพิ่มเติม

嚟到觀塘，早聞駿業熟食中心，呢d地方一聽就知有好嘢食！今日同寶寶嚟到觀塘搵食，上到一樓，隨手搵咗呢間bbq店，有驚喜！同寶寶一坐低，見到餐單，兩眼對望，唔係啊嘛？咁鬼平？！我叫咗芝士牛肉漢堡，寶寶蟹肉虎蝦卡邦尼，另叫多碟墨西哥芝士薄餅！等咗無耐，餐湯先上，飲落幾忌廉！唔係罐頭野，d磨菇極足料！然後漢堡先上，目測塊漢堡扒有半吋厚，食落啖啖肉肉，都幾juicy！塊煙肉又唔乾，正不過我就唔係好食酸青瓜，食咗舊，ok嘅，唔識評:)寶寶碟意粉就真係童叟無欺！蟹肉虎蝦係落足料蝦食得出係新鮮，蟹肉都好足秤！另外件薄餅，幾特別，買相同食落幾墨西哥薄餅脆剛剛好！中間夾住拉絲芝士，點埋醬，微辣呢間店晚市唔太多人，員工又少，樓面位靚姐落單上菜收碟洗碗一腳踢，依然可以保持速度，簡直係發揮香港人精神！而且價錢相宜，凍飲唔使加冰錢，小弟喺度特此表揚！我見之前食評大家講到好出名，但食評只得幾篇，嗯⋯⋯大家真係可以支持吓呢間小店，好嘢嚟架！…ดูเพิ่มเติม

小弟我一向對食都好寬鬆，自問自己都抱着「搵啖飯啫 是旦啦」嘅精神，我過往嘅食評一向都鮮發負評，呢間尚風問鼎「腐皮」寶座。我同寶寶路經天后，求其搵間餐廳食個飯。隨手就點左呢間，一入去坐低，哇，2人座位超逼。打開餐牌，呢間野都唔平，五六十蚊一碗飯/麵，加十五蚊有野飲同湯，我叫左香腸炒飯，寶寶叫左牛肉麵，仲叫多碟八十八蚊嘅滷水拼盤。寶寶叫左杯珍珠奶茶，試左啖，典型味，好鬼甜。上埋碗肉丸湯，哇，咸到跳舞，飲左啖就放棄。上埋碟香腸炒飯，寶寶話做咩炒飯咁濕，食落普普通通。再上牛肉麵，咸。最伏係滷水拼盤，蛋係正常、但豆腐、牛肉咸到我喊。老闆，俾d良心！成餐都勁咸！小弟幫襯過黃店都唔少，但求價值觀相近，我都唔會俾負評，但呢間味道真係咸，除左咸之外真係無野形容到，仲要收加一，埋單二百四...老闆你俾我啊？最憎d店舖掛黃店號，d質素鬼死咁差...劣啊…ดูเพิ่มเติม

久未上水，小弟今晚就做個懷舊扒房系列。呢間餐廳門口同環境都充滿懷舊氣氛，啱晒我啲咁老派嘅人，令人有所期望。寶寶同我都叫左2份晚餐精選，價錢都叫大眾化。話說今晚特別肚餓，寶寶叫左西冷意粉，我叫左羊鞍薯條，紅湯配蒜蓉包。紅湯略嫌太辣，不過蒜蓉包就脆卜卜幾好味。:)飲完碗湯，等左半個鐘先上主菜，真係餓到暈。最驚訝係，呢到扒餐都係用碟上，唔係鐵板。薯條有些少放涼，好彩羊鞍足秤，配蒜蓉汁咬落juicy，仲唔騷，攞返分。:)不過寶寶份七成熟西冷，un 左小許，普普通通。好彩，套餐有甜品送，寶寶話加返分，可以揀布甸或啫喱，有趣係我同寶寶都揀左布甸，但上左啫喱...侍應就似乎發緊夢...總結而言，不過不失，性價相乎。蒜蓉包、羊鞍都算唔錯，好評，不過下次都係食清湯腩好喎。…ดูเพิ่มเติม

荃灣係小弟成長嘅地方，今日舊地重遊，同寶寶去普洱食晏，懷念下先普洱當然要飲經典嘅朱古力普洱，一飲...嗯...寶寶問我乜有普洱味咩？小弟飲到開頭第一啖有少少茶味，飲多幾啖就變咗朱古力，的確比八、九年前遜色咗！雖然係食雲南嘢，過往小弟極喜歡普洱嘅焗飯/意粉！小弟叫咗焗薯仔咖喱雞意粉，大不如前，過往極香濃嘅咖喱味，今日嘅咖喱食落只覺得甜，即使係日式咖喱都太甜！而且無誠意，咖喱cover唔曬成碟意粉！不過份量足夠，要讚！小弟幫寶寶叫咗豬軟骨米線，嗯，不過不失，米線冧咗少許。同埋又係趕客服務，見到食完就拿拿林執嘢，一副唔想你久坐嘅樣，明明又無客整體嚟講，唔知係記憶有錯定普洱真係遜色咗？！以前小弟覺得普洱別具特色，d嘢又好食，今日只有普通餐廳水準，勝在份量，依然好評，但奉勸別具期待啦各位…ดูเพิ่มเติม

小弟聽聞金鐘呢間burger 好有名，聽到都由一間鋪做到咁多間分店，一日終於一試！呢間應該係美國餐廳，自助快餐式叫餐，收銀都係外國人，都係英文點餐。（唔知點解小弟最近去親都係英文點餐嘅？）好彩有寶寶幫我叫，叫完佢就俾個bibi 機，坐低咗部機響先去攞餐！呢間鋪都幾大，行到最入可以坐喺窗旁望住金鐘道旁，等咗陣就拎得。我叫咗shack single burger ，幾好食，塊肉勁juicy ！寶寶叫咗smoke burger，有d辣，食落煙肉乾咗d，唔值呢個價。cheese fries係好食嘅，薯條同芝士醬本身就好夾嚟到試埋香港獨家milk tea shake，一飲，哇！甜到嘔，d嘢又口渴，夾硬飲完，好罪疚，糖份超標！間嘢都唔平，但食物一般般，寶寶話金鐘係呢個價.....好啦 念在milk tea shake係新嘢 勉強好評，不過無下次啦…ดูเพิ่มเติม

小弟四月試過帝苑越南菜，實在係食過返尋味，今次同寶寶去帝苑意大利餐廳sabatini ，哇！超高水準啊！去呢間餐廳，一定要book位，雖然疫症時間，但午膳期間亦坐滿七成，果然香港嘅皇牌酒店，犀利犀利！溫提呢間餐廳有外藉侍應，撞正外國人serve嘅話，要用英文點餐！小弟讀書唔成，英文麻麻，好彩有寶寶幫我點餐叫咗個2份set lunch ，侍應都好熱情推介架，服務一流埋位之先，已經奉上一籃麵包，注意係一大籃，基本上用嚟點湯都已經好飽！麵包份量十足，不過un咗少少，可能意大利口味！soup of day係洋蔥忌廉蘑菇湯，同金寶湯完全唔同，好香忌廉味！pasta分別就叫咗Risotto 同Potato,呢個小弟真係唔識食，食咗咩都唔係好知道，Potato果個食落甜甜地，口感幾特別、Risotto咸咗少少，唔係幾識欣賞到Main course 嘅Lamb chop,medium 熟度剛剛好，咬落落滿口肉香，1d都唔騷！到Dessert,呢到會推架甜品車去客人隔離俾人揀，蛋糕size啱啱好，仲要俾人揀2件，可以試多樣。小弟叫咗cheesecake 同chocolate cake ,cheesecake 香而不膩，chocolate cake香濃朱古力cream 配上酥餅，食完極有滿足感!可再配茶或咖啡，中和甜膩，另外再附帝苑極出名嘅蝴蝶酥，出名當然有原因，甚有層次，口感鬆化！小弟再次盛讚帝苑甜品，果然係皇牌，名不虛傳！小弟食開大排檔，意大利pasta 真係唔識欣賞，不過帝苑呢種高檔西餐，Main course 同Dessert值得一試！見侍應又咁熱心！如果想振興吓香港酒店業，小弟在此誠心極力推薦帝苑嘅餐廳！…ดูเพิ่มเติม