食飽就瞓的个人专页

新蒲崗有一間默默耕耘嘅隱世小店，名叫41B。41B係一間充滿人情味，有老香港冰室感覺嘅茶餐廳。我細細個就食佢，十幾年嚟依舊好食，而價錢亦十分相宜。可惜嘅係好多介紹小店嘅報章雜誌電視節目都冇訪問過佢。可能呢件係一件好事，因為有啲舖頭一出名業主就加租然後就要執。亦有可能個舖位係老闆嘅所以唔憂做哈哈！冇謀體介紹唔代表佢食物質素唔好。相反，41B嘅野食係比好多連鎖快餐店都好。我最鍾意食佢嘅沙嗲牛肉煎蛋麵（蛋牛麵），豉汁豆腐蒸鯇魚飯，同凍檸茶。呢度嘅蛋牛麵有別於一般嘅茶餐廳出品。出面嘅沙嗲牛肉好多跟麵上嘅時候都會配以一pat沙嗲醬，彷彿係要用嗰pat醬去掩蓋牛肉嘅唔新鮮。至於41B，佢地嘅沙嗲牛醃得夠時間就唔使跟麵嗰陣用醬去俾味。牛肉夠味而不咸，食得出牛肉依然有鮮味。麵嘅湯底有煮牛肉嘅牛肉味同沙嗲味，有別於一般嘅普通湯然後自己用pat醬撈個沙嗲湯底。41B嘅蛋牛麵一定係全香港最好食嘅其中一間。除左蛋牛麵，佢地午餐嘅有餸飯亦都好好食。其中我推介豉汁豆腐蒸鯇魚飯。餸同飯係分開，唔要例湯可以轉野飲。即使本身嘅份量已經好夠，但係飯唔夠亦可以添，人情味十足。豆腐滑而不散，鯇魚好滑而唔腥，配以蒸魚豉油餓起上嚟真係可以食三碗飯！凍檸茶亦都係一間茶餐廳嘅靈魂。感覺上好多茶餐廳嘅凍檸茶都係冰比較多檸檬較少，而41B嘅凍檸茶檸檬同茶同冰比例適中。值得一提嘅係佢地嘅茶澀得嚟唔苦，溝出嚟嘅比例亦唔會好水，我形容為有重量嘅凍檸茶。41B係一間唔起眼但估佢唔到咁好食嘅舖頭。今時今日三十蚊以下食到一餐嘅餐廳真係唔多，而好似41B呢種平得嘅個水準又高嘅就真係少之有少。講真我有時都懷疑佢到底有冇錢賺。我文筆唔好，可能有錯字，請見諒。不過希望大家睇完呢篇食評之後可以支持下默默耕耘嘅小店，去下41B，感受下香港買少見少嘅人情味。…查看更多

好鍾意喺世貿會飲茶，個環境舒服，靜靜地，又有得高空望住個海，全部食物嘅水準都好高。特別推介豉油皇炒麵。我每一次去到都會食。佢炒得好乾身但唔會乾到硬，豉油味好夠但食完唔會咸到喺咁飲水，麵好有咬口但唔會好似橡筋咁。芽菜，葱段，食落爽得嚟唔會太生。每一條麵同配菜都有足夠嘅豉油包住。呢個豉油皇炒麵真係世界級。…查看更多

去到銅鑼灣突然想食粥，但係本來諗住去嘅粥鋪都執晒，就諗住求其搵間茶餐廳食啦。行下行下，俾我搵到間叫做「一碗」嘅餐廳，見佢有粥食就入左去。先講餐廳格局，鋪頭裝修都幾新，枱同櫈屬簡約設計，整齊企理，光線充足，大約有五十個位。一入到去，侍應嬸嬸就好有禮貌咁招呼我，服務態度幾好。佢有粥餐全日供應。我嗌左個鮮豬潤粥配炸兩，好好食。粥以沙煲上，豬潤整齊咁鋪喺粥上面，粥面配以蔥同瑤柱作裝飾，賣相精緻。粥底並非一般嘅「味精粥底」，就算係佢都係瑤柱味精粥底。瑤柱味好香，但係個粥唔會今你覺得好咸要不停咁飲水，粥底調味恰到好處。如果你係啖粥度加上一兩條瑤柱絲一齊食，個味會更香更濃更好食。豬潤係另一驚喜。一碗粥有四大塊豬潤。豬潤比較厚切，色澤偏淺，因為佢完全冇煮老。咬落去好鮮好爽，豬潤味好重。嗰種鮮嘅感覺係由個心發出唻，真係好好食。咬每一啖都會覺得意猶未盡，呑左都會覺得齒脥留香。炸兩亦都好好食。一碟九舊，甜醬蔴醬另上。豉油係自己落嘅，想落幾多隨你選擇。油炸鬼由我食第一舊去到食最尾嗰舊都好脆，唔會話凍左淋左豉油就棯晒。粥配腸粉承為$52，份量充裕，我覺得抵，值得推薦。…查看更多