Onions01的个人专页

最近見到富臨又有片皮鴨團購賣喎！會唔會頻密咗d呀？ 事原我哋一家人喺四月已食過，當晚仲食到一肚氣添！講番隻片皮鴨，當晚侍應遞上檯時，真係嚇咗一跳！ 就咁比碟燒到 "黑嗎嗎" 嘅鴨皮，同兩碟蒸嘅餅皮我哋，望真d燒鴨皮，燒到又黑又焦，仲有成層肥油喺底，每片鴨皮都冇肉嘅，完全食唔到燒鴨嘅香味，有d皮仲好似係鴨頸皮喎！個個夾咗一件嚟食就停手啦！:( 至於夾住鴨皮嚟食嘅餅皮就好厚，雖然幾熱，但黃黃哋顏色，味道好似饅頭多d囉！一睇就知係d急凍餅皮，有人客落單，咪馬上蒸熱囉！其實，我哋平時都有嚟飲吓茶，佢嘅點心，好似腐皮卷、一般蒸點、甜品、下午茶嘅燒臘飯，同炒粉麵都0K架，特別係鮑汁雞腳，用嘅係新鮮雞腳，做得幾正架！估唔到晚飯會係咁！都明白$38係冇可能食到正嘅片皮鴨，但一心以為富臨會用呢個優惠吸引客人，喺晚飯時多點其他正價食品，但咁嘅片皮鴨質數.... 真係唔想幫襯咁多囉！最後我哋多點一個鮮魷炒通菜, 同酸甜排骨就算, 雖然呢兩個餸嘅味道都可以接受，但份量就好少囉！***最嬲係佢大字宣傳 ----> (( $38富臨脆皮片皮鴨！足4斤重！即燒即食！)) 保證即叫即燒？？？真係笑大人個咀呀！莫講話冇見到佢片隻鴨比你睇，就連隻鴨都冇見過呀！咁又點知幾大隻呀？所謂$38片皮鴨, 仲有茶芥及加一架！ …查看更多

最近喺美心MX食滿$40送咗一張抽獎券，再上fb讚佢嘅page，咁就送咗個打冷鹵水鵝餐，心想...MR.個廣告講到鬼咁吸引，睇到人人流哂囗水咁，以為今次免費食正嘢啦！點知？？ 真係出事啦！不過，好慶幸冇哂錢去買呢個餐囉!!:( 個餐係外賣返嚟，包括一碗胡椒豬肚湯，一杯中國茶及一碗白飯，當然梗係有碟所謂打冷鹵水鵝啦！ 打冷鹵水鵝 ：得幾片有皮、冇肉連骨、超霉嘅所謂鵝塊舖面，下面墊哂豆腐，勁多好咸嘅汁！幾乎可以話.. 揾唔到有一舊肉嘅鵝塊可以放落口！！！ 完全食唔到鵝肉, 最後倒哂落垃圾桶囉！佢應該改名叫打冷鹵水豆腐餐就啱！ 胡椒豬肚湯：得一舊豬肚，幾小片咸菜，半碗湯，仲要辣死人！！！ 飲唔到，要倒！ 估唔倒咁大間美心快餐，質數每況愈下！ 應該以後都唔會再幫襯啦！ …查看更多

唔知係咪牛肉越來越貴，金星嘅沙爹牛肉通粉已經不復以前好味，仲每況愈下:(終於放棄咗佢嘅沙爹牛肉通粉啦:( 由於佢嘅小菜,炒粉麵不嬲都唔錯( 雖然份量出名係少！)，但上星期都嚟食吓炒粉麵下午茶。 我哋叫咗個芙蓉蛋飯，份量當然少又唔夠熱添，但味道還可以。 另外一個係星洲炒米，都係少少份量，但一食...竟然見到有一細堆鐵絲呀 ....咁我哋當然要換啦！於是馬上同侍應呀姐反映，但佢就用d好差嘅態度幫我哋換囉:( 換咗一碟豬扒炒意粉，但就仲激氣 嗰塊豬扒凍冰冰架！意粉少得可憐又係凍嘅！咁點哽呀:( 簡直冇辦法食落去, 唯有放棄呀！ 實在太嬲，唔記得影相添！ ~~~~食客食到咁谷氣，但間餐廳就毫無反應兼無歉意，乜仲可以再幫襯咩 ?? …查看更多

傳統港式茶餐廳獨有嘅沙爹牛肉, 真係唔少香港人嘅喜愛, 呢間金星茶餐廳小廚就係我嘅至愛啦。每星期我都會嚟光顧佢嘅早餐二至三日, 因為太好味啦! 此終覺得用沙爹牛肉配通粉就最啱key, 因為通粉可以吸哂d沙爹味, 同埋佢嘅牛肉係唔會有梳打味。 由於佢唔會似其他d茶餐廳, 用即食麵嘅味粉嚟做湯底, 所以食落特別正! 當然, $23個早餐係包括埋自選:腸仔/火腿/蛋/煙肉等等, 同埋飲品。(凍飲加$2) 除咗早餐, 偶爾我都會到嚟食吓晚餐, 佢哋嘅小炒套餐味道頗不錯, 如涼瓜鮮魷丶粟米魚塊及蒸肉餅等, 仲有中西式炒粉麵, 但份量就比較少啦! 。…查看更多