blackhole.foodie的个人专页

Outback以黑糖包而聞名，聽講啲人去係為左食黑糖包而唔係當中嘅主菜🤣堂食仲可以無限追加🉐講到咁犀利，即管試下到底有幾好食！不過因為我一點Lunch Hour去到太多人，所以最後嗌左外賣。▪️香辣燒蝦飯 黑糖包跟主菜加$10蝦用左香辣嘅配料去燒，生熟度岩岩好，好彈牙！而且辣辣地嘅調味配埋炒得乾身嘅炒飯，惹味非常！重點嘅黑糖包用錫紙焗製非常軟熟，帶有甜到適中嘅黑糖味，配埋佢跟包嘅牛油，牛油質感非常creamy好特別，簡直係一試難忘！外賣都已經咁好食，堂食一定更正！下次一定要堂食！📍Outback Steakhouse九龍灣偉業街33號德福廣場二期六樓601號舖…查看更多

▪️鹽焗雞髀飯套餐配湯 $45鹽焗雞髀嘅雞肉非常嫩滑，食落仲帶有肉汁，醃料嘅味道非常鹹香惹味！另外值得一提係個白飯。白飯似用蒸嘅方式去烹調，米飯粒粒分明，濕度啱啱好唔會太濕似爛飯，又唔會乾爭爭👍🏻套餐配嘅湯可以揀有湯料或者係冇湯料。唔同湯嘅價錢有啲要補差價。有湯料同冇湯料嘅湯款加埋大概有二十款，選擇非常多，總有一款會啱飲👍🏻我今次揀左瑤柱猴頭菇無花果雞湯。湯料足，聞落有非常重嘅猴頭菇香味，瑤柱就唔係好食到，而無花果令到個雞湯更加清甜，呢個價錢有湯、飯同餸黎講非常抵！另外，原味家作有會員卡可以購買，每次幫襯會再有折。所以我買左$800會籍，仲送左一啲湯券同小食券，今次埋單可以即時88折！📍原味家作港鐵九龍灣站KOB 3 號店(A 出口)…查看更多

因為屋企人生日，去酒樓食晚飯慶祝。經過太子餅店，見到蛋糕款式好靚！蛋糕嘅size有大有細，款式又靚，選擇多到眼花撩亂，最後左揀右揀，買左棉花糖脆米朱古力蛋糕。▪️棉花糖脆米朱古力蛋糕 $118呢款蛋糕本身附帶生日牌，唔洗加購。蛋糕係朱古力味海綿蛋糕，外層係mousse，甜度適中。Topping非常豐富，有macaron、棉花糖、士多啤梨、黑白朱古力牌、同脆米。Macaron外脆內軟，士多啤梨亦非常鮮甜，而黑白朱古力牌略嫌有啲甜。底部嘅脆米豐富左成個蛋糕嘅口感，香口非常！📍太子餅店港鐵九龍灣站KOB2號舖…查看更多

係附近石龍拱行完山，搭車出返市中心搵食。因為行到體力透支嘅關係，想快快買啲野返屋企攤住食。見到呢間一豚豬手專門店，諗住豬手係佢地嘅鎮店之寶啦，即管買佢返去加料。▪️原隻黑椒豬手 $88呢間舖頭啲黑椒豬手明顯煮唔夠時間，豬皮應有嘅骨膠原彈牙口感完全冇，仲要係韌到唔係點咬得開👎🏻豬手嘅肉質鞋口，連鹹味都冇，莫講話黑椒味。成隻豬手好似係未煮完咁，最後食左兩舊食唔落掉左！📍一豚豬手專門店荃灣南豐中心1樓A060號舖…查看更多

呢日經過大埔，見到大明里個邊好多餐廳，口痕想搵小食，見到呢間啲小食幾特別，有咖哩小食、煮炸食品、麻辣小食。最後我揀左麻辣牛脷。▪️麻辣牛脷 $36牛脷用上牛脷芯，而且煮得非常腍，一啲都冇平時食開嘅牛脷咁又韌又多渣。麻辣汁香辣得黎又帶點麻，非常好食！另外出乎意料之外嘅係$36原本以為份量會少，始終係街食牛脷都唔平。但係打開盒發現竟然有成7大舊，仲要每一件都係厚切，非常抵食！📍生龍茶餐廳大埔廣福里12號地舖…查看更多

最新德福平台開左間Pret A Manger，見有好多唔同種類嘅麵包、沙律、鮮果杯、鮮果汁、乳酪、粥品、三文治等等。淨係乳酪款式都有十幾款，千挑萬選之下揀左香蕉蜜糖香脆麥片乳酪。▪️香蕉蜜糖香脆麥片乳酪 $27麥片同乳酪中間有隔開，所以麥片食落依然脆卜卜。麥片本身混合左一啲瓜子，豐富左個口感。乳酪質地非常濃厚，似希臘乳酪嘅口感。乳酪味道冇特別酸或者特別甜，反而撈埋蜜糖食味道就偏甜。呢個味道就麻麻地，揀其他口味可能會好啲。📍Pret A Manger九龍灣德福廣場1期P18號舖…查看更多

敏華嘅早餐去到12點，啱晒平時晏左又想食早餐嘅我！呢日嗌咗忌廉雞湯火腿通粉拼炒滑蛋烘多士，跟餐包熱飲一杯。▪️忌廉雞湯火腿通粉拼炒滑蛋烘多士套餐 $39因為我係嗌外賣，通粉同火腿會分開上，唔會浸到淋哂👍🏻湯底係用上香濃忌廉雞湯，通粉索晒雞湯嘅味道，食完一口接一口😋略嫌通粉嘅份量有啲少，食完都係唔夠飽。炒滑蛋非常嫩滑有蛋汁，而且有濃郁嘅蛋香，一流👍🏻烘多士好特別，係厚身嘅白麵包，面頭烘到脆一脆，入面非常鬆軟，搽埋牛油食非常香口！📍敏華冰廳Men Wah Bing Teng九龍灣偉業街33號德福廣場一期1樓F28號舖…查看更多

早幾日有同事離開，所以有散水餅食。今次係Crazypie嘅散水餅。款式多賣相亦都非常討好，只可惜味道欠奉。云云嘅撻入面我揀左OREO麻糬同埋鐵觀音朱古力。▪️Oreo麻糬Oreo下面係綿花糖，食落超甜。撻入面有麻糬餡，口感唔算軟糯，不過都唔係實的的，不過不失。至於中層食唔出係咩黎，淨係食到好甜好甜，食左半個已經太漏食唔落。▪️鐵觀音朱古力朱古力撻最正路。面頭係一舊生朱古力，口感似Royce入口即溶，好食。入面都有麻糬，同Oreo個款一樣，而中層係鐵觀音朱古力餡。但老實講茶味真係冇乜，淨係食到朱古力味，而且都係偏甜。總結，呢間散水餅名過於實，不外表冇內涵嘅食物比我就唔會蹝錢買。📍CRAZYPIE觀塘開源道60號駱駝漆大廈3座8樓U室…查看更多

每次去開元朗都會專登去佳記買馳名嘅B仔雞翼尖同糖水。今次黎到當然唔可以錯過啦😋見好多人係門口等外賣，拿拿林行埋去落單。今次同樣係嗌左蒜蓉辣雞翼尖，另外嗌左個鮮什果黑珍珠。▪️蒜蓉辣雞翼尖 $22蒜蓉辣雞翼尖俗稱「B仔雞翼尖」，煮得非常入味，雞翼尖非常淋身，好輕易就可以吐到啲骨出黎。撈埋佢嘅蒜蓉辣汁非常惹味，蒜蓉份量多，而且辣度對於我黎講岩岩好，過癮！▪鮮什果黑珍珠 $40侍應姐姐好貼心，將椰奶分開裝起，話如果即日唔食放雪櫃第二日食，唔落椰奶就唔會變壞👍🏻不過我都係即日就食🤣什果有芒果、西瓜、哈密瓜同火龍果。每款生果都好新鮮，其中西瓜夠哂甜仲起沙添！芒果亦都好清香冇酸味👍🏻糖水底唔會太甜，唔會遮蓋左什果本身嘅甜味👍🏻️📍佳記甜品Kei Kee Dessert元朗教育路大坑渠側…查看更多

Foodeli間間食店款式唔同，見到呢間快餐店賣特色炸雞翼，價錢都唔貴，一於試下。▪️雞翼拼盤套餐 (配薯條連汽水）$52五款雞翼味道包括：原味、鹹蛋黃、玫瑰楓糖、青檸同埋避風塘。雞翼本身冇咩醃漬過，只靠外面嘅調味。炸雞翼勝在外皮炸得鬆脆，冇粉漿口感，又重牛油香味。略嫌有點太過油，食完個碟底勁多油！原味係牛油味，因為雞翼冇醃嘅關係，變相成件雞翼都冇咩味。咁多款口味黎講以鹹蛋黃口味最惹味。鹹蛋黃醬包住成件雞翼，帶有流沙嘅口感。玫瑰楓糖食落只有糖漿味，玫瑰味欠奉。青檸口味就冇咩特別，唔太食得出有青檸嘅香味。避風塘嘅炸蒜則非常香口，不錯👍🏻小食我揀左薯條。薯條係粗薯，岩岩炸起，熱辣辣又重薯味，正！▪️辣汁蘑菇飯 $8追加蘑菇飯嘅味道帶少許胡椒嘅辛辣，蘑菇份量亦都非常多，醬汁夠撈勻成碗飯！比起KFC嘅蘑菇飯呢間質素真係高幾班！米飯用咗珍珠米，食落香軟煙韌有咬口，仲要熱辣辣！📍Chicken 852 九龍灣偉業街33號德福廣場二期5樓501B號舖Foodeli S8號舖…查看更多

有日Lunch想食個快飯，見太興冇人排隊，就入去睇下有咩食。入到去見到menu有蠔仔泡飯，就嗌黎試一試。▪️蠔仔泡飯太興嘅蠔仔泡飯當中落左蠔仔、豬肉碎、醃菜、芫荽、冬瓜粒同冬菇。其中蠔仔嘅份量比起平時出面食嘅多，仲要粒粒肥嘟嘟，鮮味十足😋另外因為落左醃菜，令成碗泡飯嘅味道更加有層次，帶有鹹鹹酸酸嘅味道！冬菇同冬瓜粒嘅份量亦都十足，冬瓜粒索咗蠔仔嘅香味，而且切成四方粒食落好方便！提外話：呢間太興分店嘅員工服務態度係好差，好之前要有心理準備🤣📍太興Tai Hing九龍灣偉業街33號德福廣場第二期5樓520-523號舖…查看更多

第一次食鮮芋仙係幾年前返大陸嘅時候食嘅，選擇多，好多唔同嘅拼法已經pre-set左，方便心大心細嘅人揀款。而且配料又可以加配，價錢仲要好平，大大碗先至係講緊$30港幣。早排鮮芋仙係香港開分店，超高人氣，次次經過無輪外賣定係堂食依舊超多人排隊。有次落雨經過見到外賣居然冇人龍，即刻衝去買黎試下！▪️仙草4號 $45仙草4號係有仙草、紅豆、芋頭同珍珠。仙草正常冇特別，紅豆用糖水煮過但過甜，而且碗糖水底都係過甜，一路食一路瘋狂飲水！珍珠就冇咩味道，成碗糖水唯一食得落係個芋頭，香甜蜜味又軟綿，最緊要係唔會過甜！▪️珍珠雞蛋布丁 $10雞蛋布丁同平時日本便利店買到嘅布丁一樣，滑嘟嘟又重蛋香，性價比高！▪️日式Q麻糬 $32入面有兩款麻糬，兩款嘅口感都唔同。兩款麻糬面頭都有啲黑糖漿，白色個款質地比起黑色個款煙韌，黑色個款口感係淋滋滋。單憑味道坦白講，食唔到兩款有咩分別😅📍鮮芋仙尖沙咀厚福街3號華博商業大廈地下2-3號舖…查看更多

Pepper Lunch既鐵板牛肉飯性價比極高。價錢適中，學生價更加抵食（所以見到好多學生排隊買🤣）除咗牛肉，多左好多唔同嘅款式：三文魚、雞肉、明太子。第一次試九龍灣呢間，試一試經典主打—牛肉。▪️大盛黑椒牛肉飯 $55 平時食普通size既牛肉覺得唔夠喉，今次專登揀x 1.5倍嘅大盛。份量明顯比起正常size多一倍，價錢只係加$5，好抵食！牛肉口感唔肥，而且好有牛味，生熟度自己掌控岩岩好！另外可以自己加醬汁，分別有燒烤汁同蜜糖汁。不過我覺得就咁黑椒牛油味已經夠哂好味，所以冇落任何醬汁。📍Pepper Lunch九龍灣偉業街33號德福廣場二期5樓501B號舖Foodeli 11號舖…查看更多

夜晚喺灣仔做完facial，經過見到呢間舖頭食燒味，價錢又平，當然要試一試！入去之前見到送是日小食一客，點知入到去先話冇晒，其實喺門口貼定講聲會好好多！餐廳嘅間格同座位唔太舒適，店舖衛生都一般般，好彩啲嘢食搭救。▪️蜜汁叉燒拼脆皮燒腩仔飯 $69叉燒蜜味香濃，咁啱比左叉燒頭我，成舊燶邊好正🔥脆皮燒腩仔果然名副其實，雖然唔係岩岩出爐，仲要係臨收舖嘅時間，個皮都keep到脆到食落卜卜聲！簡直係唔簡單！下次一定要試埋其他燒味！📍黃金燒味Golden BBQ灣仔軒尼詩道68號新禧大樓地下B號舖…查看更多

以前細細個，屋企附近長期會停泊富豪雪糕車。聽到富豪雪糕車嘅音樂，就會扭媽媽買雪糕比我食👶🏻只要乖乖地，媽媽收工就會帶雪糕返屋企比我食💕大個左之後，越黎越少見到富豪雪糕車。所以每次見到雪糕車都會停低買返杯回味一下。▪️橙冰橙冰嘅味道充滿住童年回憶，大概只有係富豪雪糕車先會搵到😊味道酸酸甜甜唔會有藥水味，而且夏天食真係消暑一流！夏天食橙冰嘅好處係夠凍，唔會好快就溶哂▪️雲呢拿味雪糕雲呢拿味雪糕好重奶香，雲呢拿味唔算好重，食落香滑冇冰粒，水準依然！📍富豪雪糕車尖沙咀天星碼頭對出巴士站(各區流動)…查看更多