jellybunnyyy的个人专页

韓國知名烤雞品牌Goobne Chicken登陸香港，陸陸續續開咗好幾間分店，繼上次同友人一闖中環分店，今次決定帶父親母親大人一同攻陷呢間餐廳，測試吓銅鑼灣V Point店嘅水平！位於V Point25樓嘅呢間分店比起中環嗰間明顯寬敞同靚d，落地大玻璃令陽光完全灑入餐廳，大大增加空間感。服務員安排我地坐喺餐廳的一隅，自成一角，一邊享受炸雞，一邊欣賞銅鑼灣嘅美境，簡直就是食烤雞嘅最高享受！！！！食物：我地叫咗兩個菜，分別為gochoo basasak(香辣烤雞)同埋砂鍋魚糕湯，兩個都好好食，香辣烤雞可以話係我喺香港暫時食過最好食的，特別出色。Goobne Chicken 嘅香辣烤雞以韓國獨有嘅青陽辣椒烹調，唔好睇少佢得一隻辣椒仔，食落真係好好好辣。食完會識得噴火roar！香辣烤雞附送兩個醬汁：千島醬同辣椒醬，沾千島醬食可以中和個辣味，不過沾辣椒醬食就更加好味，本人建議食得辣嘅朋友可以一嚐呢個烤雞，絕對值得！至於個魚糕湯，我覺得個湯煮得幾好，配烤雞一流，水平可以話係above average啦。魚蛋種類大概有3-4款，本人覺得半圓形嗰隻最好食，不過相比潮州白魚蛋，韓式魚糕真係無咁好食，仲差一段距離。服務：落單點菜要按鈴，waiter好快就會行過嚟，不過無乜笑容，服務態度除咗門口嗰個好好之外，其他都只屬於不過不失。…查看更多

銅鑼灣向來都係foodie嘅天堂，而登龍街嘅永安中心更係美食嘅集中地，中日韓三地嘅美食通通都可以喺呢度搵到！小妹誤打誤撞發現咗藤之宮誠太郎商店，因而決定一試，無諗過竟然會有驚喜！一撘升降機去到22樓，見到門口嘅大menu就俾佢吸引，另外見到有鐵盒蒸生蠔食，咁誘人嘅蠔又點可以錯過呢，唔食真係對唔住自己！哈哈點知一食就食上癮，而家呢度就成為咗我嘅飯堂同埋見朋友的聚腳點。食物：呢度嘅lunch set係星期一到星期六都有供應，包茶碗蒸、沙律、漬物、味噌湯，唔收加一，白飯更係任添，每款$100。本人覺得以咁高嘅食物質素同服務態度而言，$100真係值得。小妹同屋企人額外叫咗鐵盒蒸生蠔 (每隻$38，最少叫3隻），店員哥哥隨即攞咗個好似月餅盒嘅鐵盒出黎，將四隻蠔放入去，再加少少聞都已經覺得好香嘅清酒調味，合埋個蓋蒸三分鐘就有得食！由於用嘅蠔係兵庫縣一年蠔，所以呢d都依然蠔BB，食落好嫩，好creamy，食完隻蠔再飲埋d汁，好清甜好贊。本人覺得清酒係提升咗蠔本身嘅鮮味，令呢隻熟咗嘅蠔變得比生蠔更加好食，絕對值得一試！至於另外喺大餐牌叫嘅（北海道產）燒赤魚一夜干亦非常不錯，鹹香鹹香，魚肉質感實得嚟又幾彈牙，配蘿蔔蓉同白飯／佐酒一流。半條價錢為$88。環境：餐廳採用半開放式的廚房，客人可以望住日籍廚師一手一腳咁燒魚、煮飯，感覺不錯。除此之外，由於餐廳喺22/F，所以景觀相對比較開揚，環境舒適，適合同朋友、屋企人傾計享受。服務：店員好親切，好有禮貌，同時亦好醒目，自動自覺加茶同埋解釋食物的做法，貼心得嚟又好專業。…查看更多