TracyTOHC的个人专页

好耐無去過駱駝漆了，見到有未食過嘅藥饍雞（無雞不歡😆），呢間睇相好似幾開心，而且仲可以轉上海麵（本人唔太like米線）。藥饍雞一黎就有好大陣川弓白芷味，有好幾件大雞，湯色算ok，仲有幾條蟲草花點聚。湯飲落又唔大藥材味，飲多啲都唔怕鹹。係上海麵有點過火，比較淋，佢話係自家製，其實又唔係好食得出有咩分別。花膠好似有4, 5舊，唔係好大舊，似係一般桶膠仔，呢個價錢有咁多舊俾你都唔錯，比其他單單買個花膠雞湯仲多花膠。最好係啲雞，真係好滑，雞胸都好滑，而且好有雞味。雖然雞好出色，仲有咁多花膠，呢個價錢都幾正，可惜湯同麵差少少，如果湯再濃啲，麵唔好咁淋就更好（或者下次才都係食返米線🙈）。…查看更多

難得知道有間香港現燒鰻魚又唔係貴就膽粗粗去試下。叫左1個三重鰻魚丼(包括生燒和蒲燒鰻魚，穴子)和1個厚玉子鰻魚丼，另外叫多左個鰻魚芝士玉子燒，叫做試晒所有款式。生燒真係好正，肉厚皮脆有油香！而蒲燒呢，就薄啲，有少少泥味，醬汁唔係好遮到，或者咁先唔會太重醬汁味，而肉質就係一般鰻魚質地。穴子就麻麻地，唔係我杯茶。跟飯嘅果舊厚玉子真係夠厚夠滑，散叫果客玉子燒內有半條鰻魚，又有芝士，又滑，又拉絲，鰻魚汁又香，其實好好味🤤所以綜合黎講，下次我會叫生燒鰻魚丼，加個鰻魚芝士玉子燒。…查看更多

無食到放題，試左一個$198嘅鹿兒島和牛餐同一個$88豬雞餐。和牛好簿，但都幾大塊，配壽喜燒汁（有蛋，醬油&黑松露醬），其實幾好味，有滿足的感覺！牛舌有4塊簿同2塊厚，兩種口感，又香又彈牙，仲有碗鹽葱一齊燒，本人幾鐘意食。壺漬嘅牛肋肉，都係有啲筋，但肉本身都好食。以$198黎講，我覺得真係唔錯。而豬雞都ok, 有豬腩片，豬頸肉同雞脾肉，腩片無肉臭味，唔係解凍左好耐/雪左好耐嘅肉，同牛角我覺得差不多。係有樣嘢美中不足，就係要2人share一個燒爐，而燒爐係一人燒肉款，真係有啲迫。…查看更多

想試左好耐嘅拉麵店，今日得一個人，一點鐘黎到有吧枱，終於可以試到了！叫左魚介豚肉沾麵，直接交單俾廚房，等一等就有得食。滿滿的一個小碗的麵，麵上面有一點點像蕎麥的粿粒，麵上平放著的並不是叉燒，而是兩塊炙燒過的五花腩片，半隻半熟蛋，幾片筍，還有一小瓣青檸。麵本身已經有味道，像是醬油煮過，有淡淡鹹香味。(變左語體文，好似有味道啲😝！)（變返口語先）沾麵湯比平時食開嘅無咁杰，似係好濃嘅日式豚肉菜湯，即係日本早餐食飯糰跟嘅果碗豚肉湯，湯好香濃，見到有大葱同洋蔥，仲有兩舊煮到好𣺉嘅五花腩！面頭有魚介醬。就咁飲都好好味😋，不過未係好食到魚味。再同麵一齊食，食到魚味喇！因為湯唔杰身，其實似湯麵，因為濃，所以都掛到上麵度，麵質適中，唔硬唔𣺉，有少少彈牙，加埋啲湯，滑捋捋，口感一流！試下個炙燒五花腩，因為燒過，中間嘅肥膏有少少溶，充滿油香！唔敢食肥野嘅就走寶！雖然唔係好知粒青檸點用，點都唧少少落麵同五花腩上試下。落左之後腩肉無咁油，清新左啲，麵就有啲酸，但沾啲湯食，魚味又濃啲喎！係另一種味道。最得我飲晒啲湯，雖然真係有啲鹹😅，但成碗麵每一啖都好好味，好享受，好滿足的一餐！😋…查看更多

唔講咁多！Lunch放題就係乜都叫啲試吓！啱食就叫多幾次，食得晒先好嗌！今次食得最多嘅係極品金枕頭榴槤燒！正呀！原粒燒完熱辣辣，外層少少脆，入面香甜軟滑！真係好好味！仲有D24榴槤蓉，配奶香雪糕，奶香唔會遮左榴槤味，又有少少奶香，就係名付其實嘅榴槤雪糕，亦有好多人就咁食榴槤蓉！D24榴槤味好重，好香，喜歡榴槤嘅一定好鐘意！但記住要食左燒榴槤先好食D24榴槤蓉！唔係燒榴槤就無咁香甜！…查看更多

因為有夜饗樂，有機會試下呢間日本菜。可能近新年，又係星期四，並唔多人，我哋book左7:30，入到去有一半吉位，侍應帶我地去到玻璃窗前四人位，很舒適嘅環境，仲有個無敵維港景！當晚有二人餐優惠，係唔想諗食乜好嘅前提下，個二人餐乜都有啲，唔洗考慮所以好快就落左單。很快有魚生到。魚生有油甘魚、蝦同帶子。帶子好甜，蝦比帶子更甜！可能係我食左帶子同蝦先，油甘魚就無咁香，不過就係新鮮、厚切、彈牙的。然後上嘅係蟹肉沙律、魚乾同雞軟骨。我就覺得雞軟骨較好味，味道啱啱好，即炸，香口，魚乾係正常的，蟹肉沙律明明見好多蟹肉，唔知點解無乜蟹味🤔串燒係我最喜歡嘅一道菜，有雞翼，燒得好香脆！豬腩肉非常好食，有油香，牛肋肉又香又軟又滑，雞肉剛剛熟，有肉汁😋仲有清酒煮蜆同炒雜菜，正常野，蜆係甜，但同行朋友話有砂喎🤔還有主食鰻魚飯同豬肉烏冬。呢兩款係我最唔喜歡嘅菜，鰻魚淋晒又唔熱，一啲都唔香，就算鰻魚汁撈飯都無乜味，唔明點解唔燒下先上菜。豬肉片有好重嘅雪味，但湯底係清湯，仲要無乜味（我都食唔出係白開水定係淡嘅木魚湯🙁），嘥左啲手打烏冬😔最後仲有甜品，係兩粒好精緻嘅和菓子，第一次食，都幾好味，好特別。呢個價錢其實唔應該啲飯同烏冬唔好食囉，希望會改善下啦。如果有下次，食串燒算了⋯⋯…查看更多

本人有啲餃子控，難得一次路過堅尼地城，唔知食咩好，又見到有餃子舖，就試下佢先。其實佢嘅素餃同松茸餃都想試，但有招牌魚湯做湯底嘅就係普通餃，今日又唔太肚餓，想試湯多啲，就叫個雙拼普通餃試左先，必叫嘅韮菜，加較少見嘅雲耳椰菜。餃子唔算大，中等size吧，足料，飽滿，皮簿，夠滑，味道係中規中矩，應有嘅味道。反而喜歡佢嘅菜脯辣醬，有辣味但又唔會蓋過餃子餡嘅味。至於魚湯呢，都好香濃，奶白色，不透底，我都飲晒了😅。可惜佢分店得太子同港島，唔知幾時先有機會再食第二次Lu😗。…查看更多

因為節目推介關係，專登去元朗搵呢間餃子店試食。唔知佢份量咁大隻！我叫左9隻雜錦拼盤，食到第6隻已經好飽！但當然要食埋佢，唔可以嘥野😤！清清地，叫左粟米冬菇、香菇木耳&沙葛。沙葛係預期味道，爽甜的。本身好喜歡香菇嘅食物，佢嘅餃的確好香，不過係咪太香呢？有啲膩🤔，之後食返平時無乜興趣嘅粟米冬菇，反而又覺得粟米冬菇好好味，又香又甜喎！其實呢個清清地嘅配搭係咪諗過呢😜都幾夾。而個湯呢，係正常吧。諗返佢啲餃咁大隻，價錢又唔貴，其實幾抵食。如果我住係元朗，買啲返屋企看門口都幾好！等我搵日試埋煎餃同其他味先😋…查看更多

既然夜晚不是員工都食得，今晚有機會一班人食飯，就試下呢間同事話大件夾抵食嘅餐廳。特色菜色要早幾日預訂，但要去現場落訂，係附近住就會方便啲。先黎一個大蝦沙律，見好多人叫，不過都其實只係一盤大蝦加生果，當係飯前果吧。再黎就係黑蒜海底椰燉竹絲雞，好甜，無味精，係屋企煲足料嘅味道。即場叫左沙薑豬手，呢個好味，入味，豬手爽！然後上枱嘅係羊架，同枱有人曾經食過，推介必食，無錯！好冧，只得少少羊羶味，不錯，係有少少涼左，再熱啲上枱更好！跟住一次過上埋燒鵝同牛腩煲加蒜蓉包，成枱都係野！燒鵝新鮮，我無點醬都好好食，有少少肥，有油香，皮脆肉嫩！至於牛腩呢，係普通好味嘅咖喱腩，係無驚喜姐，但蒜蓉包就好好味！大大件，外脆內軟，蒜蓉香，就咁食已經好好味，索埋啲咖喱汁仲好味！我哋仲叫左薑蔥炒蠔，蠔好大隻！又入晒薑蔥味，都幾正！最後係紅燒龍躉旗，超大份！賣相贏晒！不過我個人覺得有啲老，同事就話龍躉係咁，唔會好滑，而且要連皮食先好味，好多骨膠原，哈哈！有人識食就好了！:)仲叫左個菜，唔多講。八餸一湯，八個人，盛惠每人$370。…查看更多

呢日放假，行到奧運站，又未到lunch time,見呢間未有人排隊，就入去試下先！菜式唔多，其實都係得3款丼，主菜有啲唔同，分別有穴子，赤金鯛同本菰天婦羅，再加大蝦，蛋，甜豆等天婦羅配菜嘅飯。另外還有迷你天丼加冷/熱烏冬。本人喜歡炸菰菰，咁就要炸菰嘅天丼，橫掂都係試，梗係一次過試晒飯同烏冬。唔洗諗，「天丼加熱烏冬呀唔該！」一會後，店員奉上一個大盒，話係熱烏冬嘅配料，有溫泉蛋，有木魚片，有葱，有炸天婦羅碎，有海帶。嘩！咁大個盒！好誇呀！我仲以為係餐具盒添！😅到丼同烏冬黎到了，當然係趁熱食左個天丼先！先試飯，再試蝦同本菰！嗯！飯很好，日本珍珠米，粒粒分明，醬油唔鹹，天婦羅粉唔厚，蝦算係正常size，唔係大，但都唔細，菰菰係預期中的味道。拮爆隻天婦羅蛋，同飯撈勻，有蛋香濕潤嘅日本珍珠米係最好味的！其實驚喜係烏冬！烏冬比一般的幼，未落配料前先試一試湯底，味道已經很足夠，係醬油湯底，幼麵很吸味。落晒啲配料落湯，湯就更香，分開溫泉蛋打落飯碗中，夾起一「住」烏冬，撈溫泉蛋汁一齊食，烏冬有湯味，又有蛋香，非常好食！呢個烏冬絕對係必食之選！一次過試晒想食嘅！正！可以再去！…查看更多

Staycation package 包晚餐，本來無乜期待，但原來都有驚喜喎！晚餐有前菜、餐湯、主菜、甜品。餐包有三款，今晚有甘荀、芝麻、法包🥖，包就一般，甘荀無乜味，芝麻就ok，法包普通啦。前菜有蟹肉沙律、火腿芝士沙律。蟹肉🦀沙律好重蟹味！有少少酸味，我諗係有檸檬汁，開胃、清新、蟹味濃而不膩，會好想食完再食！火腿不會太鹹，配水牛芝士，想講講佢個沙律，我本人不太喜歡香港嘅沙律，因為大多數餐廳賣嘅沙律菜不是最新鮮，會有苦味和青味，但呢度嘅菜很甜，而沙律汁都好好味，好夾，好啱我胃口！真係俾貴啲係有原因！餐湯有雜菜湯同蘑菇湯。雜菜湯足料，唔係平時茶餐廳嘅紅湯，我諗係有黑水欖，仲有啲青椒味。蘑菇🍄湯就好正！超濃！有少少黑松露油係面增加香氣，飲落無粉漿感，仲有粒粒蘑菇碎，好好味！到主菜，叫左羊鞍同龍蝦。七成熟羊鞍表面上係就咁煎香，好香油脂味，但脂肪真係有啲羶，連肉一齊食還好，而肉外邊好香脆，入面就好嫩，火候啱啱好。而龍蝦🦞，當然只係波士頓龍蝦，不過佢原來係釀龍蝦，而且釀埋落蝦頭，結果每一口都食到龍蝦肉，不再好似平時食波士頓龍蝦咁無乜肉，得個好細嘅身，個頭無乜好食，反而而家就可以由頭食到尾，感覺很滿足！😋到甜品，係香蕉🍌芝士撻，個撻入面有好多香蕉肉，好香，又有焦糖香蕉伴碟，都很好。飲埋杯奶茶🫖，好飽！大滿足！👍🏻…查看更多

月頭，同同事到觀塘行完街，試下去YM2睇下有咩野好食，當時呢間舖無乜人，又見到係食fusion菜，就去試下，試左個貴啲嘅二人餐，有驚喜喎！加錢叫左龍蝦湯，唔會杰撻撻，又夠香濃，都不錯，最難忘係個小食韓式炸雞同最後甜品蜜瓜雪糕，雞肉嫩滑有肉汁，同柚子醬好夾，蜜瓜雪糕味道濃鬱，真係好好味！今晚，再食多次，點左個平啲嘅二人餐，因為上次實在太大份！好飽，今次唔要小食了。雖然無得再食韓式炸雞，但個餐都好好味！首先係個蘑菇湯，好濃，好香，仲有好多蘑菇碎，好似自家屋企整一樣足料。再黎兩個主菜：三文魚炒飯同軟殼蟹risotto。飯好大碟，至少比一般西餐廳大份。三文魚炒飯嘅三文魚唔係碎上，而係切塊、香煎、放飯面，賣相很好，飯好香，夠乾身，入面除左有雞蛋，仲有鹹蛋碎，食到陣陣鹹香，如果飯入面仲有啲三文魚碎就更好！軟殼蟹risotto有原隻軟殼蟹放飯面，而飯又有大量雜菇，好香菇菇味，香而不腬！最後當然要整返個蜜瓜雪糕啦！而同行就揀左牛奶雪糕。個牛奶雪糕真濃到呢～好似2杯牛奶濃縮落一杯仔咁！勁濃！鐘意牛奶味嘅朋友仔一定要試！有湯，有主菜，有甜品，食到好飽！大滿足！…查看更多

今日早放lunch，試下德福新開拉麵店（其實都開左一段時間，係未有機會試），門口買飛就入去坐，得巴枱，每個位上面都有水杯同水壺，好日式呀！仲有個籃俾你放野，好細心呀！咳咳！都係講返野食！佢得四款拉麵，我買左黑蒜豚骨拉麵，來的一碗，黑黑的黑蒜油蓋滿了成碗麵，只見上面有木耳絲同蔥花，一大塊紫菜，仲有一磚豬肉，嗯！係一磚，方型五花腩，皮有焦，應該係燒過或者煎過，湯中隱約有一團暗紅色的，似係香辛料，還有淡黃色的拉麵，唔好忘記仲有原隻流心蛋。先試一試湯，撥開黑蒜油，下面係奶白色的豬骨湯。嗯！好香濃嘅豬骨湯！但面嘅黑蒜油入口就有啲油膩。再打散辛香料，再試一口湯，無左油膩感！而且微辣仲令濃湯同黑蒜油味道更加特出！然後試下麵，麵係正常size, 有啲煙韌，好掛湯，無怪味，連埋湯，木耳絲同蔥一齊食，好好食。平時拉麵嘅蛋係開半嘅，而且通常都會醃左醬油，上左色，但呢度就係原隻上，無上到色，咬開就見到流心蛋黃流出！好吸引！連湯一齊食，有蛋香，有濃湯，口感豐富！最後講下果磚豬肉，我覺得係唯一不足之處。肉其實都淋，但方型肉磚，肉嘅纖維太長，除非煮到好似東坡肉咁淋，否則有啲難咬斷，攪到食完要用牙籤。肉係有肥肉的，但唔肥膩，入口溶化，有油香。皮燒焦增加了肉香。所以其實佢再煮淋啲就會好好。整體上我係幾喜歡呢個豚骨拉麵，下次可以試另一款。…查看更多

今晚同老公慶祝生日，加入左如心個Vivva會員，有買一送一優惠，梗係要試吓啦！一去到confirm會員優惠後，就可以落單點主菜，本來想揀A4和牛西冷，可惜無貨，為有轉返普通澳洲肉眼，另外揀左羊膝，太約半個鐘上菜。等上菜嘅時候當然係去拎前菜啦！冷盤海鮮唔算多，但係好啱胃口，有本地肉蟹，好滑好鮮甜，瀨尿蝦，中等size, 好甜！麵包蟹（我個人喜歡肉蟹，啖啖肉）仲有青口，海蝦，蜆同螺。還有魚生，大大片切俾你，很生鮮，無筋。配埋生日優惠嘅白酒，好正！餐湯有好濃嘅磨菰湯，濃到好似屋企煮咁，另有雪耳椰子煲豬𦟌，足料！當然仲有沙律！食完海鮮主菜就到！牛扒叫左5成熟，很好，有肉味，無筋，𣺉，肉面有少少焦香。羊膝正，超𣺉，有羊味，但唔羶，好味！食食下，會有鐘仔響，通知你出去拎，今晚總共拎左4次，有青酒煮海蝦，辣酒煮花螺，卡邦尼意粉，芝麻湯圓糖不甩，有驚喜！甜品慕士蛋糕比較多，還有大福，蛋撻，生果，movenpick雪糕，維記雪米糍，仲有啱晒小朋友嘅果汁軟糖！生日當然有蛋糕，係tiramisu, 係少左少少酒味，整體都好味，而且幾大件。食到好飽，好滿足，只係5百幾蚊就食到2人半自助餐超值！會員仲有2000分儲！真係抵到爛！好值得推介，希望下次有機會食到和牛！係服務差少少，想搵人加水好耐都搵唔到人⋯⋯希望會改善！…查看更多

最後一日長假期，想搵個地方relax下，準備明天忙碌嘅工作。走到中環大館，可能係星期一，本來就係工作日嘅關係，很多餐廳都坐滿了午飯中嘅打工仔，於是在半開放嘅大館中閒逛，直到1點半，大部分打工仔都回去上班了，揀了茶樂軒，一個人飲下茶，嘆下一盅兩件。早前也曾經試過係觀塘嘅一間茶館試過品茶，這裡嘅品茶價格比較相宜，平嘅$40幾蚊就有交易，有小茶壺，公道杯，小茶杯，仲有一個熱水壺方便你加水。我見2-4人枱還有熱水煲！今次揀了老欉水仙，茶味清香，甘甜，唔苦，亦都唔嚡口，有了公道杯，即使我一個人飲，都唔怕浸住啲茶，保持茶嘅品質。嘢食方面，叫左芝士菠菜牛肉卷和蘿蔔香菰水晶餃。芝士菠菜牛肉卷賣相好有西餐上菜特色，還有rosemary 裝飾添！呢個牛肉卷食落非常可口，香濃牛肉味，加上芝士，即使牛肉係全熟，有啲焦香，但都唔會乾，很juice, 亦都食到菠菜嘅味道。伴碟還有蔬菜煮成嘅酸甜汁和辣汁，可按個人喜好添加，加左之後更覺甘香美味！蘿蔔香菰水晶餃也很好，爽脆蘿蔔絲配濃香香菰絲，青爽，香甜。我本身唔太喜歡粉粿那款水晶皮，怕會黐牙，但呢個水晶皮很好，就算放涼左先食都無黐牙，應該係加多左少少油，食完係有少少油膩，但有茶清一清口，感覺還是不錯！最後加多左個莉花湯圓，一上枱，一陣幽香嘅茉莉花味撲鼻而來！糖水係用茉莉花煮出來，加上皮簿嘅湯圓，滿滿嘅芝麻餡，一口咬下，係芝麻香和淡淡嘅莉花香，呢個莉花湯圓令呢一餐好完滿！…查看更多