hygn的个人专页

訂咗位同朋友食呢間滷水熱店，最初朋友擔心會貴，但其實晚餐都有孖寶，會有個燉湯和一個餸，我哋選擇左菜膽雞，當晚燉湯係蟲草花燉雞。個湯本身有隻細雞，蟲草花都唔少，好足料。菜膽雞個汁好好味，好重花調酒味，雞肉都幾滑，唔鞋口，比較失望係菜嘅份量少左啲。滷水墨魚好好味，本身個滷水汁已經好香，墨魚又淋又滑值得推介。我哋叫左個滷水鵝片飯當係一個餸一個飯。鵝片完全唔刃，又係必食推介之一，好彩個飯都有跟菜，所以夠菜食。建議晚飯先打去訂位。…查看更多

太耐無去台灣，今日經過中環就去左呢間熱店食牛肉麵。星期日接近兩點，雖然係小店但都即刻有位。牛肉麵當然先試下個湯底。牛肉麵嚟講，個湯底偏香、淡，唔會太鹹，啱我口味。除左牛肉味，蘿蔔味都好香，牛肉方面，算係俾較足料，大大件，而且有好多件，唔似有啲舖頭得薄薄三片。味道方面，算係比較細緻同複雜，食到係落左幾款香料醃製，但講唔出係邊種。大家見到個餐本身就跟左沙律、醋木耳、泡芺。跟餐可以特價$12加飲品，我叫了仙草豆漿，本身係微甜。呢間可以再食。…查看更多

上次試完個壽司餐，之後念念不忘，唯有去食多次。今次帶埋朋友嚟食，介紹左佢食壽司餐，我自己試下角切魚生飯。先講下個湯，有好多蜆肉，而且好鮮甜，似係飲緊蜆湯，而唔係麵豉湯。唔好以為角切就俾啲頭頭尾尾你，大家見到佢有幾款魚生，每粒個大少都好均勻，而且仲有隻蝦，仲有個玉子有舖頭名。佢嘅芥末又係靚嘢，係即磨會散開嗰種，唔會太攻鼻。每款魚生都好有魚味，上面仲鋪滿飛魚子添。朋友食完個壽司餐，都讚不絕口。好彩早到，我哋走時已經無枱。…查看更多

呢間小店以前喺對住大街，當時已經想食。無諗過佢今年重開。見到佢有個二人威靈頓牛柳餐，好想試，仲可以係外賣。佢個餐好多嘢食，包括：餐湯、麵包、沙律、威靈頓牛柳、蜆肉手工意粉、甜品、餐飲，基本上係full set西餐。餐湯、沙律、麵包就比較大路，算係中上。當然主力要評價個威靈頓牛柳。最初切開以為好靭，原來係用左外賣膠刀切。一食就知好正，首先個味道好好，rosemary香草個味好濃，然後就係好淋好軟，當然係因為佢個火侯做得啱啱好。個意粉係手工意粉，所以係偏軟，最重要係個味道一流。見佢間小店得幾個位，如果堂食應該仲好食。大家留意，因為製作需時，所以呢個餐一定要預訂，最好至少預早幾日或一星期。…查看更多

兩個人突然想食中菜，但好難叫餸，諗起呢間有套餐。佢哋其中一個主打菜係蜜汁叉燒，仲有啲秘製蜜汁黃豆伴碟。叉燒真係燒得好好食，又香又軟，燒到外面有少少燶，所以賣相都好好，係必食菜式。個海皇羹大家可以見到好多料，唔係就咁開個漿，好好飲。百花釀蟹鉗係二人餐，所以係得兩件，建議用第二款碟，改善賣相。不過炸到好香口。XO醬炒蝦仁帶子，兩款海鮮都好彈牙，火侯控制得宜。整體嚟講佢哋所有食品都好夠鑊氣，尤其個炒飯，師傅真係炒得好靚，而且份量夠，大家唔需要擔心。糖水係送嘅。…查看更多

諗住歎個靚景午餐，揾到呢間cafe，無諗過喺旺角正中心，都可以對住靚景食飯。同一幢大廈有其他cafe, 唔好去錯。個餐湯係南瓜湯，又香又creamy，飲到一滴都無剩。我叫左三文魚忌廉什菌天使麵。除左上面有芝士外，本身個汁好似都有芝士。可能佢用左一款偏鹹嘅芝士，個汁都係偏鹹。天使麵煮得啱啱好，另外有好多什菌，我好鍾意。個三文魚砌成一朵花，襯埋個靚景，真係可以成為打卡熱點。朋友食嘅牛肉飯，都係偏鹹，不過就焗得好香。我見佢有另一邊有個轉角位，個景仲闊，可能要預早訂定。…查看更多

星期日去銅鑼灣購物，想食啲開胃嘢，呢到啱晒。周日佢都有午市套餐，當然要叫，抵好多，不過見隔離左右都係叫餸食。可能因為人少，所以食物都好快到。黃咖哩雞飯基本上香而不辣，套餐嚟講都算好足料，好多雞肉，並無將貨就價。青咖哩魚就微辣、帶甜，個汁送飯真係好好食。魚肉應該有炸過，所以唔會一夾就散哂。同雞肉一樣，有好多件。其他蔬菜都足料，正常都應該夠飽。午市套餐包飲品，星期日銅鑼灣呢個價錢，真係無得輸，可以考慮晚市再去試其他食品。…查看更多

疫情傳入但又想食好嘢，唯有去高級食府，貪佢坐得夠疏，好安全。雖然攞米芝連嘅菜式並非點心，但都好好味。蝦餃係一絕，皮薄得嚟唔穿，啲蝦肉係天然爽，又有鮮味。叉燒包當然唔係大批預先做好嗰啲，有返以前細細個食叉燒包嗰種味道。帶子腸啲帶子好鮮甜好大粒，唔係啲普通茶樓嗰種細細粒或者只係得啲碎。灌湯較個上湯好鮮，食得出個湯底又有金華火腿、乾瑤柱等高級食材。涼拌茄子完全無渣，個汁好開胃。夾小籠包無穿，連入面個豬肉都好鮮味，高級食府係唔同啲。其實啲茶都好好飲，只係無影相。食點心都好滿足，食唔到佢地最出名嘅叉燒。…查看更多

天氣太熱無胃口，食個班戟甜甜哋易人口啲。好多人以為佢得拉麵，但原來呢間有甜點食。舖頭喺百貨公司入面，位於二樓。班戟唔一定係高卡路里，佢地有個吞拿魚沙律班戟，入面好少忌廉，啱晒怕肥或者想食得健康啲嘅人。個班戟皮好軟，有蛋味，幾好食。班戟入面好足料，大家都見到佢漲卜卜。上面白色的係沙律醬，如果你嫌沙律醬高卡路里，可以試下叫佢走醬（我無叫），咁就再健康啲。加理杯嘢飲，當係late lunch或者下午茶最啱。…查看更多

今日放假可以趕在下午6點前食左飯先，順便推介一下本區街坊最愛嘅飯堂之一，當然又喺太安樓入面。除左粉麵、湯飯（係一個有餸嘅湯加個白飯嗰種）外，佢都仲有碟頭飯，圖中所見就係其中一個我嘅私人推介，咖哩牛腩飯。堆介得一定有原因，佢個咖哩唔辣，但就好有牛味，淨係攞個汁撈飯都已經好好食，牛腩唔韌但又有啲咬口，做得好好，真係牛味同咖哩味完美融合。佢個湯雖然只係街坊湯水，但夠足料，湯料可以食埋，唔需要驚唔夠飽。另外佢有個咖哩豬扒飯，雖然當日無食到，但都係推介，一定要試，豬扒係有香茅味，加埋有牛味嘅咖哩汁，真係好食到暈。…查看更多

行完街又熱又攰，最好食個冰凍馬蹄露，點知真係見到有！佢地個潮式腐竹馬蹄露，好清甜，唔係嗰種只係識落糖嘅糖水。有啲馬蹄露會將啲馬蹄切到好細，咁會失去左馬蹄夾口嗰種口感，但佢地做得好好，馬蹄個大小適中，配合地啲腐竹，個賣相同個口感都好好。見佢地雖然主打傳統糖水，但都係加左唔少心思，例如佢地有遠年陳皮紅豆沙，下次去要試下。食得出係好用心做。舖頭都有好多小裝飾，成個感覺好舒服，而且亦唔算貴。我哋入去嗰陣佢啱啱開舖，到食完已經枱枱都有人。…查看更多

中西區出名多特色小店，放假過嚟揾食，經過呢間門口好似好抵，8pm前都有個特價漢堡餐，有薯條（加rosemary），漢堡飽，汽水，加$9仲可以轉啤酒。薯條上先，又香又脆，但又唔覺熱氣，加左rosemary原來好好食，當然要點埋茄汁啦。個漢堡飽好似細細個，但其實入面件牛肉都夠份量，有哂肉汁。啲酸菜好好食，其實唔係份量細，只係啲酸菜太開胃。我哋去得早，之後見到不斷有人入去。要留意，個老闆係外國人，唔催得，佢會答你”we are not fast food”。舖頭唔大間，如果坐近個廚房會比較大味。…查看更多

最近愛上小店，間間都有驚喜。這間曾經想去吃晚飯，但如果試菜食晚餐的話好似好貴，所以特登午餐時段嚟試。因為係商住大廈，要㩒門鐘先入到去。環境雖然唔算好高級，但景觀開揚，對面剛好有一排大樹，感覺唔錯。雖然係小店，但座位唔算密。我們點了慢煮雞肉配卡邦尼汁、慢煮牛面頰。慢煮的確唔同，肉質真係好滑，仲完全保留到啲肉汁，而且本身個調味同汁都做得好好，真係汁都撈埋。因為好食所以我哋先再後加蜜糖雞翼和雪菊茶。雞翼好香，味道剛好，唔會太甜，。個茶好好飲，飲完仲可以叫佢哋加水。以呢個質素，真係唔算貴。…查看更多

收工經過條橫街，見到竟然有間西式餐飯，通常越難搵就越好食，食完就決定要推介。我叫左一個午市套餐，紅酒牛面頰意大利粉，午餐跟飲品，加錢可以加沙律/湯，特飲要加錢。首先個沙律份量都唔細，夠哂膳食纖維。見隔離枱飲磨菇湯好香。主食意大利粉，以西餐嚟講，個份量好夠，唔係細細碟或者輕食嗰種西餐。個味道真係好好食，牛肉又淋，食到停唔到口。我叫左特飲洛神花茶，好驚喜，原來唔係茶包，係一朵乾花，夠哂味。我見好多人都係食all day breakfast，下次試。午餐會經常轉，大家留意。另外上到去會先經過一間小型幼稚園，行到最尾先係餐廳，真係同個店名一樣好隱蔽。建議先打去問下有無位。…查看更多

放假去海邊吹下海風，見到這間拉麵店，落地玻璃，座位比一般的拉麵店寬敞，所以就入左去試下。我們點了蝦味噌拉麵（蝦魂）和麻辣拉麵。蝦魂有兩隻蝦，而且都幾大隻，有蝦味，仲有日式叉燒，感覺好抵食，個湯底都好有蝦味。麻辣拉麵就有豬肉粒，見到上面有一層麻辣油，好香，不過若果減肥就要選其他了。兩個拉麵的份量都比一般的拉麵店多，所以應該夠飽。相反，如果嫌太多，可以叫半份，好有彈性。剛好我們坐在落地玻璃旁邊，好光猛好舒服。…查看更多