klnbaggio的个人专页

今次已經係第三次幫襯！啱啱個星期六夜晚幫朋友媽咪慶祝生日，總共11個大人。預早book定間房(冇min. charge)！你睇我個menu，位位$450去邊度揾？ 其實樣樣都好食，但真係要推薦的話，我會揀個芝士焗龍蝦，同埋個豉油王炒海中蝦，呢兩樣我覺得係必食之選！！仲有嘢要讚就係，呢度除咗食物質素好之外，佢仲唔收加一，唔收茶介，唔收開瓶，唔收切餅！服務又好位置又好！又送生果又送甜品，真心覺得應該支持吓，唔好吓吓走去深圳消費！…查看更多

Three On Canton 係我近年最喜愛嘅buffet，無論食物質素，食物嘅種類，餐廳環境，以致服務，我每次幫襯完都好滿意！仲會介紹比其他朋友！但尋日個tea buffet 就令我大失所望，食物種類選擇少唔在講(尤其係冷盤)，仲要冇乜邊樣好食！真係要揾樣最突出嘅，我會揀個喇沙湯底…… 仲有，d橙都好甜，同埋Häagen-Dazs 雪糕囉，我食咗3杯！其餘，真係冇乜邊樣嘢係好食嘅。價錢又唔係特別平！你話死唔死！？ …查看更多

一個人揾地方食lunch, 唔使多講梗係要揾黃店！經過青花亭，二話不說就走入去！叫lunch set $68, 餐湯，燒雞胸沙律，餐飲，另加$20有個黑松露薯條。個薯條好味但太大份，一個人食唔晒！我盡晒力只食到一半😅！建議有2個人以上先好加。埋單$104好似冇加一！…查看更多

上星期六晚, 同老婆去o左呢間香港風情, 專誠去試試佢d小菜. 之前已經試過佢d茶餐, 水準一般. 但又有friend介紹話佢晚飯ok喎, 咪再比次機會佢o羅.7點去到, 只有兩三台客. 不過工業區晚市靜英英都好正常. 我就最like去d靜靜地o既地方食飯, 貪佢唔使等位.餐牌製造都幾精美, 即係有好多彩色相果隻. 小菜價錢都唔平, 平均要成六七十蚊一個, 仲要無套餐. 雖然無收加一, 但以茶記價錢o黎講都相當昂貴!最後決定, 叫o左個魚翅撈飯, o者o者雞煲, 同埋竹笙上素.魚翅撈飯用大玻璃碟上, 飯係炒飯底放碟中間, 賣相唔錯. 當然唔expect佢真係有魚翅, 但材料都算豐富, 有魚有蝦, 仲有d假翅. 獻汁厚薄都算幾適中.o者o者雞煲煮得好夠香, 豬潤無話熟過龍. 雞就無計啦, 一般香港食d雞都係無雞味. 先天缺陷非戰之罪.竹笙上素相對較為淡口, 但總算不過不失.D嘢都唔算細碟, 但由於無叫白飯, 兩個人都可以食曬三味. 埋單二百零幾, 個人認為算係頗貴. 而質素又唔及大排檔, 似乎定位有d問題.…查看更多

上星期六同老婆去海港城行街, 行到差唔多晚飯時間, 又要傷腦筋諗食咩.海港城實在太多人, 所以一心諗住轉移陣地. 又因為天時暑熱無乜胃口, 突然好想食撈檬, 於是主力search 尖沙咀越南o野. 最後決定去呢間PHO24. 穩陣起見, 先打去book定位.準時7:30出現. 大約只有一半full. 好奇怪, 成個i-square d 餐廳都偏靜, 不過o甘都好, o岩晒我地呢d奉旨唔等位o既人.餐牌選擇唔算少, 沙律小食拼盆檬枌麵飯咖哩豬牛羊雞樣樣有, 仲有set. 2人set 要3舊幾, 唔算太貴但我諗我地食唔晒. 散叫要o左個鮮蝦豬肉米紙卷, 越式炒通菜, 另外我要炸蝦餅撈檬, 老婆就要蟹肉蕃茄鮮蝦湯檬.先o黎米紙卷, 無乜味, 要加大量魚露先ok.通菜有d老, 同埋我個人認為通菜如果唔用蝦醬炒, 好食極有限.:(撈檬幾好食, 不過始終都係低技術o野. 蝦餅ok, 有蝦味夠香亦唔油膩.:)個湯檬就認真麻麻. 主要死因係個蟹肉味太假, 假到令人有唔開胃o既感覺.Overall 食物算係不過不失. 但價錢一d都唔平, 兩位埋單$260. o甘o既價錢, 我諗我下次會選擇試o下呢個商場其他餐廳.…查看更多

又到星期六晚, 係時候出動搵o野食. 睇o左一大輪openrice, 最終揀o左呢間迎月小菜館.決定o左就拿拿聲出發. 因為要ja車去, 所以事前要check定carpark資料. 最近可以泊mikiki, 響正對面. 另外有個空地車場, 行兩三分鐘, 但就平d, $10個鐘.7點正去到, 比我想像中多人. 無乜吉位但亦唔算噓陷, 無訂位但兩位即有. 餐牌食物選擇都幾多, 但兩個人叫送食飯確實係有d難度.最後叫o左: 椒鹽鮮魷, 豉椒炒聖子, 豉油皇中蝦, 同je je唐生菜煲.椒鹽鮮魷, 賣相有別一般o既椒鹽鮮魷, 一舊舊好似縮水麥樂雞o甘. 你又唔好睇佢樣衰衰o甘, 查實都幾好味! 魷魚新鮮, 出面層粉一d都唔厚仲幾脆口! 好食!!! :)豉椒炒聖子, 聖子新鮮但偏咸, ok啦.豉油皇中蝦. 原本餐牌係虎蝦, 但亞哥仔話今日得中蝦無虎蝦, o甘咪要中蝦囉, 當然價錢會平返少少啦. 賣相都唔錯, 蝦亦唔細隻, 但我同老婆一人食o左一隻就無食喇, 因為d蝦唔係好新鮮, 梅梅地. :( 好在同老闆反映之後佢都肯退, 叫我地叫過第二樣O野食.之後我地叫o左個例湯, 係粉葛豬骨湯. 足料無味精. 但唔知係咪之前食個聖子咸, 所以覺得個湯有d淡.je je唐生菜正常, ok 好味.整體黎講我覺得算ok, 起碼有問題o既送佢都肯收返. 但老婆話海鮮唔得係死罪, 唔會再幫櫬喎. …查看更多

上星期六父親節前夕, 落住大雨但又唔想叫外賣, 於是乎同老婆兩個人近近地去幫襯呢間Corner 90. 其實之前已經幫襯過7-8次, 每次都係食晚飯. 多數係兩個人, 亦試過一班人. 感覺係ok啦, 食物中規中矩價錢唔算貴. 即係百零二百蚊個set由頭食到落尾, 又餐酒又甜品又餐茶, 仲想點.但今次(唔知關唔關父親節事)打開menu, 見平時食開d set 要成 $250, 仲要無餐酒!!! 見貴o甘多就無叫set. 分別叫o左個黃咖哩雞, 另跟燒餅兩份, 一客鐵板燒倉魚, 同埋一杯啤酒.咖哩雞同燒餅都好食:), 但個燒倉魚就認真麻麻. 乾憎憎汁都無滴, 再加埋d味道古怪o既香料一齊燒. 可能係印度特色啦, 但我唔識欣賞, 況且仲要成一百四十幾蚊.整體黎講都勉強合格(主要係因為奉旨唔使等位), 但compare with 之前就絕對失望. …查看更多

一路都有聽人講話藍地果間Lam Tei Grill 有幾好食幾出色, 始終都無dick起心肝去試一試. 最近又聽人講話元朗開o左分店, 相對夠近便, 立即約d friend去試試!位置o向安良里雖然唔係大街大巷, 但呢類西餐廳仔就係要o向呢d地方至夠mood. 大馬路行入黎唔使10分鐘, 門口對出又有表位, 都幾方便.門面裝修唔錯, 簡簡單單睇落幾舒服. 我地一行6人訂o左7點. 可能因為星期五, 餐廳都幾full, 好在有訂位! :)入面格局都係以簡單舒服為主, 即係果d無乜特別裝修, 牆上掛d抽象畫, d燈暗暗地同埋播晒英文舊哥果隻.我無揀食物, d friend點o左prime rib, 德國咸豬手, 羊架, 豬肋骨同埋意大利雲吞. 所有main course都可以加$35轉餐, 有沙律餐湯連餐飲. 好似好抵咁所以我地全部轉晒.最先上就梗係沙律同餐湯啦. 沙律係Caeser Salad, ok啦. 湯我揀o左周打蜆湯, 味道唔錯但略嫌太厚身, 飲完有d飽! 餐包記得趁熱食, 超正!!!跟住d main course陸陸續續上. 先試我至愛o既牛! 炭燒果然係唔同d!!! 要5成孰夠晒juicy! 最緊要係夠肉味!! 廢話少講, 我地即時encore一客!!! 豬手亦值得推介!! 份量夠, 火候又剛剛好, 即係皮脆肉嫩果隻. 絕對唔會比出面d德國餐廳遜色. 羊就相對失色, 唔係話唔好食但只係普通. 唔知係咪因為我地order 7成, 熟過頭呢 !!?? 下次有機會要試試生少少.豬肋骨又係大件夾抵食. 味道有少少酸酸甜甜都唔錯.意大利雲吞就睇落細碟少少, 每人大約分到兩舊. 但原來好濃味好creamy, 所以不宜食太多, 唔係會好溜. 兩件just make!飲埋餐茶埋單位位唔使$300. 咁o既環境食物質素同service埋單都唔使3舊水一位, 今時今日o黎講都算係超值!! 值得再幫襯!!…查看更多

今日lunch約埋3個同事一齊去食米線. 本來食米線單拖去都ok, 但又想食佢個汽窩雞. 上次3個人去食有d勉強, 所以今次加強陣容.汽窩雞應該係招牌菜, 有普通($68)同田七($99). 本來想嗌田七, 但其中一人話大熱天時咁補驚頂唔順, 所以嗌o左個普通就算.汽窩雞d雞有雞味又唔會鞋, 窩內除o左雞, 仲有木耳, 絕佳o既配搭.米線我就次次都係食黃鱔加腩肉多蔥. 黃鱔唔係咁多地方有得食, 再加兩匙秘製辣椒油, 無得頂!!!4個人一窩雞一碟油菜再加人頭米線位位$45, 深水講算有d貴, 但就食得非常滿足!!:)…查看更多

尋晚踢完波, 一行3人去o左觀塘瑞和街街市樓上大排檔. 由於其中一個食過知訂, 預先打去留定有冷氣o既檯. 上到去環境一般, 咁街市係咁上下啦. 好在留o左冷氣位(即係有d 部份用透明膠膜圍封), 如果唔係呢d 天時坐外面d 無冷氣位都幾甘…..點菜方面交晒比隻識途老馬發辦. 由於我o地3個都鐘意食辣, 佢就嗌o左兩樣辣o既: 口水雞同痲辣牛尾煲. 另外嗌o左一個唔辣o既狗仔豬手. 當然唔少得大量啤酒啦 !!先o黎o既係口水雞. 食落無睇落咁辣, 味道唔錯但雞就唔算太滑, 整體o黎講都算ok好食. 第二味上o既係痲辣牛尾煲. 呢味就不得了囉!!! 痲辣係我o既至愛, 而佢亦煮得非常出色!!! 夠辣之餘又唔會蓋o左牛尾o既香味! 但最好食唔係d牛尾, 而係煲入面d 枝竹, 索晒d 辣汁, 超正!!!最後一味係狗仔豬手, 可選擇河粉或小唐菜餞底, 我o地揀o左小唐菜. 雖然呢個係唯一唔辣o既菜式, 但味道一d 都唔比前兩味遜色. 豬手好腍好入味, 成味菜o既精髓係個汁, 我唔識形容佢o既味道, 總之香味, 鹹味, 濃度都好出色, 亦同d 豬手好夾. 真係唔識講但really very good!!! 下次會試用河粉餞底.3人3味加10幾支大啤都係$410, 每人唔使$140, 抵到爛!…查看更多

上回講到晚飯幫櫬o左間食唔飽o既烏冬店, 食完老婆仲話要去拮魚蛋. 咁啱烏冬店對面就有檔小食. 舖面唔多搶眼, 差唔多都係全白色加不銹鋼o既裝修, 街頭小食o黎講相當反傳統.店名叫“食個味”, 幾特別. 似乎係想話比人知o野食味道唔錯, 又可以玩埋諧音, 幾有心思!!!:)Counter有塊大menu. o野食種類唔算多. 亞老細話遲d慢慢會加返多d品種.我問有咩好介紹, 佢就特別推介至尊魚蛋(即係比傳統魚蛋再大粒d o既魚蛋喎) , 腸粉, 同埋木耳(新o野喎!!!). 另外佢o既另一特色就係有5種漿汁任你自己揀, 有辣有唔辣. 呢樣我就最like!因為話晒都叫做啱啱食完飯, 試腸粉實在太誇, 所以我就揀o左傳統o既魚蛋配咖哩汁, 同埋木耳配痲辣汁. 老婆就要豬皮同蘿蔔, 因為唔食辣, 所以佢要傳統漿汁(叫做街頭爆香汁喎.).雖然唔係至尊魚蛋, 但我又唔覺好細粒. 老細好nice咁送o左粒至尊魚蛋比我試o下, 叫我比d意見. 細魚蛋較有咬口, 魚味亦較濃; 大魚蛋就勁彈牙!! 真係好難講邊隻好味d. 但我想推介o既係個咖哩汁, 非常香濃之餘又唔會好似一般o個d得d咖哩粉味. 對我o黎講有dd辣, 除非你完全唔食得辣, 唔係如果一定要試!!!木耳配痲辣汁又係一絕!! 本身我兩樣都好like. 雖然話個痲辣汁唔係勁辣, 但木耳容易入味, 加埋食真係天衣無縫!!!我都有試老婆d豬皮蘿蔔(佢太快食晒我趕唔切影相), 值得一提o既係個蘿蔔, 夠腍夠甜入晒味, 最重要係無渣無筋. 正!!!好想再試其他o野食同漿汁, 尤其有隻叫「臺式三椒汁」, 老細話真係用三種唔同o既椒, 新鮮打成. 咁有heart下次一定要試!!魚蛋豬皮蘿蔔木耳total $21價錢合理. 老細話遲d會搞promotion 買一送一. 二話不說我即刻留低電話比佢叫佢到時call我!我見好少人會對街頭小食有咁長篇comment. 但家陣搞小食搞得咁有heart, 食物水準又高, 地方又乾淨企理o既真係買少見少. 絕對值得推介!!!…查看更多

上星期三晚同老婆＆個friend去厚福街一帶搵野食. 記得之前有friend講過H8地下有間烏冬專門店, 凍手打烏冬都係廾零蚊碗, 一行三人決定去試下.因為已經成9點, 去到唔使等位, 但亦唔算太少人. 始終係新開張, 裝修算唔錯, 夠光猛. 坐位唔算寬闊但可接受.打開menu都幾錯愕, 總共得10款8款烏冬, 選擇相當少. 我揀凍牛肉烏冬($55), friend揀肉醬湯烏冬($45). 但我老婆就非常惆悵, 因為佢一唔食牛肉, 二唔食唔熟透o既蛋, 而呢度大多數款式都會懶係加隻溫泉蛋上去. 所以總括o黎講, 佢只有兩款選擇: 海鮮or吉列豬扒, 兩款都同樣盛惠八十大元. 結果佢揀o左海鮮烏冬.先講我個牛肉凍烏冬. 賣相ok但略嫌細碗. 烏冬食落幾煙圻, 凍食口感幾好, 但牛肉唔出色, 心諗下次會食$25碗o既淨凍烏冬. 叫個friend comment o下佢個肉醬湯烏冬, 佢凈係講o左句: 都話去排隊食拉麵啦!到最昂貴o既海鮮烏冬出場喇! 味道如何呢?? Sorry, no comment, 因為佢無放過落口. 一眾海鮮包括: 帶子一隻 (size OK, 但係霉過梅菜!); 蝦一隻 (無誇張, 大過蝦米少少, 但應該唔係蝦米o黎o既!) 魷魚鬚兩條, 熟o既三文魚一塊 (呢兩樣睇落正常o既.).$80一碗咁o既o野當然唔肯過佢啦! 唔知係咪因為我地要求換o既吉列豬扒烏冬都係$80, 所以佢地都好順攤話可以換, 但係就等成3、4個字, 原因係因為吉列豬扒係即炸所以要咁耐. 呢個解釋都可以接受. 最後我老婆話個吉列豬扒烏冬都算ok 好食, 而我亦望見d 豬扒都幾新鮮, 但咁的色賣$80有點那個.食完o野有飲品送, 並唔係因為我投訴完先有, 我見每檯都有(唔會每檯都有投訴ha!). 但只限咖啡奶茶、檸茶檸水.Overall如果唔計個海鮮烏冬, 食物都算pass, 但埋單三個人成兩舊幾真係有d貴. Recommend食齊凍烏冬.後記: 老婆未出門口就話要再食d野, 以防夜晚要起身煮宵夜. 頭先食o野o個陣見就烏冬店對面有檔小食叫“食個味”, 個名幾特別, 睇落應該新開o既 (因為門面非常乾淨), 唔似一般辣辣撻撻d檔口. 反正呢餐又真係唔算飽, 咪又去試o下囉 …… 試成點留待下回分解.…查看更多