AngelaChan1992的個人專頁

九月頭同屋企人去咗屯門工業區建榮大排檔都食小菜，呢間舖頭非常之接地氣，一入到去已經好多人喺度飲緊啤酒玩緊啤牌好熱鬧。嗌咗腐乳通菜，椒鹽豆腐同埋咕嚕肉呢三個非常之常見嘅小菜。咁啱腐乳通菜係當季蔬菜，所以食落去非常之有鑊氣同埋嫩口，椒鹽豆腐炸得非常之好，一啲都冇做到再配埋香口嘅椒鹽送飯一流，啤酒一流。佢金鑽菠蘿咕嚕肉真係冇得頂，菠蘿香甜再配埋外皮炸到香脆嘅豚肉配埋酸甜醬汁送飯好正。所以我同屋企人都搵到一個新嘅食飯聚集地。…查看更多

【肥雞打邊爐】Prime牛肩+海鮮任食！鍋霸吃到飽滾到忘形！今次肥雞唔食燒鵔，改攻火鍋界！衝咗入「鍋霸吃到飽」歎套餐第二級——Prime Grade牛肩肉+海鮮任食，仲有脆肉鯇、蝦、靚肥牛同任食魚，聽到個名已經覺得自己變身貴族雞（雖然身型似皇帝鵝）！一坐低個鍋底揀咗藥膳雙拼，湯底滾起嗰陣，香到肥雞個鼻差點跌落鍋！重點嚟啦：Prime牛肩肉雪花靚到似藝術品，淥5秒撈起，入口即化，牛油香衝上腦門，食到肥雞雙眼發光，狂encore十碟（對唔住，肥雞食力驚人！）！海鮮陣容更誇張——脆肉鯇片爽脆到「索索聲」，大蝦鮮甜到彈牙，連任食魚都係鱸魚片，冇骨嫩滑！肥牛仲要係靚貨，油脂分布平均，同個麻辣湯底夾到天衣無縫！配料區仲有自家製手打丸、蔬菜吧、罐裝飲品任拎，最癲係連芋頭雪糕都有！肥雞食到捧住個肚行唔直，差點要滾出門口！總結：$2xx一位（加一服務費），食到頂級牛+海鮮，性價比高到笑！鍋霸，你成功征服咗一隻雞嘅胃！（溫馨提示：請預留胃空間同穿彈性褲頭，否則會發生「肥雞爆鍋事件」！）📍鍋霸吃到飽地址：佐敦莊士敦廣場推薦：Prime牛肩、脆肉鯇、手打蝦滑#肥雞打邊爐 #鍋霸吃到飽 #Prime牛肩 #海鮮任食 #減肥永遠聽日先…查看更多

肥雞有晚同朋友響銅鑼灣，Fashion Walk揀咗一間西餐餐廳，見到佢個二人餐幾抵食，仲要紅白酒任飲，捉咗朋友入去試吓。本身個餐係包含四隻生蠔，但係因為咁啱嗰日大家個肚都唔舒服，所以商家好貼心咁樣轉左個沙律俾我哋。佢俾咗兩款沙律，第一款沙律就係無花果配嫩菠菜布里芝士，配埋酸甜嘅希臘乳酪沙律汁，口感即刻好fresh。而佢知道肥雞鍾意食mozzarella cheese,即刻整多個黑醋汁Mozzarella cheese with Tomato,酸甜酸甜配上芝士嘅奶香。佢嘅主菜有新奧爾良香辣牛油海鮮拼盤，入邊有香腸，大蝦鮑魚，魷魚等等海鮮配菜，熱辣辣送上枱真係好正再嚟多份特級西冷牛，嗌個五成熟，牛肉汁香濃又Juicy，配上煙靭嘅口感，棉滑嘅薯蓉，食到個肚真係飽到捧住走。再嚟多個開心果芭菲，開心果味幾濃郁，下面係餅底，食落去成個口腔都好fresh。…查看更多

肥雞今次同爸爸去咗位於旺角嘅鍋霸台式火鍋鍋，打邊爐最好就係任飲任食咩都有得揀，咁就揀咗椰子雞湯，嚟到侍應即刻叫我哋飲個湯底先，非常之濃郁，啲雞俾嘅份量唔係好多，所以可以留肚陣間任飲任食。仲有一啲熟食例如鹽酥雞同埋甘薯花枝丸，佢最正嘅係會送埋啲Shake粉有，三款味道俾你揀，紫菜香辣同埋芝士。真係好正。佢啲嘢食嚟得好快，海蝦蜆同埋魚頭超新鮮，爸爸非常之鍾意食海鮮，所以食到佢舔舔脷，其他基本嘅豬牛羊都好好味，嘢飲仲要任飲，食得非常之滿足。…查看更多

太和嗰邊肥雞好少去，今次肥雞同媽咪去咗呢一間位於太和嘅咖啡館，入到去啲客人都唔少，趁住有陽光喺窗邊曬吓太陽。嗌咗杯凍嘅Cappuccino同埋桂花latte杯桂花latte係超級無敵宇宙好飲,柔和嘅咖啡豆配上香甜嘅桂花蜜糖，飲落去喉嚨真係無比嘅舒服。肥雞大推。據聞佢嘅burger係好食，肥雞嗌咗和牛漢堡burger同埋炸魚柳burger，新鮮嘅沙律菜配埋黑醋汁，熱辣辣嘅炸魚柳同埋入口爆汁嘅和牛漢堡，佢啲burger真係有返咁上下水準。…查看更多

住港島嘅肥雞，得閒都鍾意喺港島區搵吓啲小店探索一下香港嘅美食。今次肥雞揀咗位於北角嘅一間串燒店，雖然店舖面積唔大，但係入邊都坐爆咗人。識串燒蔬菜嚟講肥雞最鍾意就係食烤土豆片同埋秋葵，次次返深圳都要食，今次就試吓呢一間嘅水準，土豆烤出出嚟又淋又多汁，撒上香香嘅孜然，微微嘅辣粉，加上啲秋葵敲到連啲汁都爆曬出嚟，真係好食過水煮。肉類方面，肥雞嗌咗雞翼，羊肉牛肉粒五花肉等等唔同種類嘅肉，都係講嗰句，串燒嚟講羊肉係世一。羊肉一啲都唔腥，牛肉粒非常之多汁水，五花肉肥瘦適中，飲埋罐加多寶成餐真係好Perfect。…查看更多

位於天后嘅味滿，喺晚餐時候真係好多人，肥雞次次經過都想試吓，今次就試吓我哋廣東明菜粥粉麵飯。佢嘅南乳炸雞翼，隔籬枱聞到好香，肥雞即刻點一份。即叫即炸，肉汁Juicy超正，佢嘅蝦子撈麵非常之出名，配埋用大地魚淆嘅湯，每一啖麵都沾滿咗蝦子，食落口嗰種鹹香味真係非常之出色。再試多個韭黃大蝦腸粉，佢啲蝦隻隻好大隻隻，韭黃配埋嫩滑嘅腸粉，配埋我哋傳統嘅甜豉油，滑捋捋。再整多個淨雲吞，入面嘅蝦同埋鮮肉都非常之大份，我哋廣東雲吞係比一般雲吞大隻好多，性價比極高。…查看更多

位於太古城嘅Black bear,肥雞夜晚同朋友睇完戲之後去試吓食，一入到去佢嘅裝修風好木係feel，完全有少少無印良品嘅感覺。肥雞揀咗佢嘅日式鰻魚定食同埋黑松露醬芝士薯條佢嘅鰻魚係非常之厚身啖啖肉，再配埋佢甜嘅燒汁，水準非常之出色，佢嘅小菜係蜜糖核桃加小魚干，真係比較少見，肥雞食得好開心。佢嘅黑松露醬芝士薯條，醬汁比得非常之多，每條薯條都鋪滿咗黑松露同埋芝士，非常之適合熱愛呢兩種食物嘅人。飲品方面，肥雞就嗌咗斑斕拿鐵 ，呢杯飲品喺香港咖啡店都比較少見，佢嘅斑斕味好重，配埋熱熱嘅奶，飲落去個口非常之舒服。甜品肥雞嗌咗佢嘅黑熊新地，其實係咖啡味嘅雪糕配黑糖啫喱，熱愛咖啡嘅人可以試吓呢杯新地，香甜嘅雪糕配上微苦嘅咖啡，另一個甜品就嗌咗士多啤梨牛角窩夫，熱辣辣即叫即整嘅窩夫充滿牛油嘅香味再配埋甜甜嘅士多啤梨醬，佢嘅甜品做得非常之出色。…查看更多

肥雞終於試到呢間位於海港城嘅泰式餐廳，佢嘅姊妹Nara係米芝蓮三星嘅泰國菜，肥雞去當地嗰陣時都有試過一直對佢嘅美食都念念不忘。肥雞今次終於嗌咗一直好想試嘅火山排骨，一上到嚟個份量肥雞嚇到呆咗，起碼有10條嘅豬肋骨 ，再配埋香辣酸甜嘅湯汁，濃濃嘅香茅味檸檬草同埋一啲泰國嘅調味料，味道非常之道地。豬肉熟晒佢啲醬汁，每一口都充滿咗香辣同埋肉質嘅鮮甜。肥雞叫嘅泰式蝦餅，佢嘅蝦膠非常之彈牙，配埋酸甜醬，又係必食之選。…查看更多

位於屯門海濱花園嘅Fantasy coffee，肥雞真係第一次去，佢係沿着海旁嘅一間Cafe店，夜晚啲海風吹埋嚟其實幾好feel。肥雞試咗佢嘅大蝦牛油果蟹肉沙律，真係超超超正，佢嘅大蝦比得一啲都唔吝嗇，配埋香甜嘅牛油果同埋蟹肉嘅鮮味，仲有卜卜脆嘅蟹籽，真係超正。嗌咗佢嘅火箭菜Parma Ham Pizza ，呢個Pizza係簡直深得肥雞心，鹹香嘅火腿配埋薄薄嘅批底，食落一啲都唔飽肚，麵粉嘅香味再加埋新鮮嘅火箭菜，真係一啲都唔輸蝕Pizza Hut。再嗌多個香口炸雞軟骨，配啤酒一流。…查看更多

位於柴灣嘅薯仔屋電影餐廳，肥雞好少過去嗰邊，但係見到門口有好多雀仔籠同埋入邊都有好多好得意嘅擺設，所以就入去睇吓，發覺佢啲食品價錢唔貴，而且睇落去都OK就是一試啦。肥雞嗌咗個安格斯牛扒五成熟，佢嘅牛扒真係幾好，啖啖肉得來佢一啲都唔柴，肉汁非常之Juicy，配埋香脆嘅薯條同埋清爽嘅沙律菜，以一間西餐廳嚟講都幾高水準。再嗌多個豬肋骨，佢嘅醬汁BBQ醬，份量都幾多，啲肉係烤到脫晒骨，一食就甩，配埋煙熏味十足嘅BBQ醬，真係幾好味。…查看更多

荃灣不嬲都係美食天堂就全部人都知啦，位於呢一個三陂坊附近嘅醉潮館，就係一個晚晚都人頭洶湧嘅地方。肥雞今次試咗佢嘅卜卜蜆煲，佢嘅卜卜蜆非常之鮮甜，每一口都熟晒濃濃嘅胡椒味湯汁，肥美嘅蜆肉，海水味十足。再嗌多個黑椒鐵板炒魷魚，佢嘅黑椒汁非常之惹味，彈牙爽口嘅魷魚配埋香甜嘅青椒紅椒同埋洋蔥，攞嚟送飯就一流，再試埋佢嘅乳鴿，佢嘅乳鴿係用一個鳥籠裝住，創意感十足。乳鴿炸得非常之香脆，皮脆肉嫩，好食嘅乳鴿，有陣時仲好味過炸雞。…查看更多

響尖沙咀行到攰攰地，肥雞就揀咗一間叫江記燒味飯，午市時間入邊都幾多人，應該都幾好味。肥雞見佢嘅招牌係食乳豬。，就嗌咗個乳豬雙拼，拼咗個白切雞。講吓佢個乳豬先，外皮燒到卜卜脆，豬仔亦都唔係好肥，唔會淡淡油，皮薄香脆配埋鹹香嘅肉，佢嘅乳豬真係掂。而佢嘅白切雞都俾咗嫩滑嘅部份俾我，雞有雞味，真係好正。而朋友就嗌咗個五寶飯，又係有乳豬叉燒腩肉鹹蛋，呢個性價比真係超高，咩都試暈晒，而且價錢又唔貴，肥雞大力推薦。…查看更多

諗唔到食咩嘅話，韓國菜不嬲都係肥雞其中一個選擇，今次肥雞就去咗位於將軍澳新都城嘅韓閣，佢嘅食物呢出咗名係又平又正，咁肥雞，今次就嗌咗個芝士部隊鍋，一邊有除咗肥雞最鍾意食嘅方便麵之外，仲有腸仔白菜，午餐肉等等常見嘅配料，用嚟填飽個肚係一流，配埋佢嘅香濃芝士湯汁，真係好食過有幾自己煮。再捱多個芝士蒜香雞翼，佢嘅雞翼炸得非常之香脆，啖啖肉肉汁非常之Juice。再嗌多個年糕拼香腸串，年糕煙煙韌韌，配埋炸過嘅香腸，又係香口嘢。…查看更多

呢排天氣開始熱返，肥雞就挑戰吓日頭去位於屯門大欖燒烤戶外燒嘢食，佢嘅地點係比較入少少，但係都唔難搵嘅。好在佢係有瓦遮頭，而且附近仲有啲有武器嘅風扇可以幫場地降溫，最值得一讚嘅係佢呢度除咗燒嘢食之外，仲有得打埋邊爐，比顧客多一個選擇。仲有佢嘅飲品係自助飲品，燒嘢食最怕就係飲品要收費，呢一點做得唔錯。佢嘅肉類葉都幾好味肥雞最鍾意食嘅就係土匪雞翼同埋咖喱魷魚，佢嘅爐上邊有個燒烤網俾你，所以啲食物唔係咁容易燒得燶，而且仲有嗰啲蒜蓉牛油麵包選擇，打邊爐方便都仲有一般嘅菜同埋肉類 ，最正係有好多方便麵，俾肥雞好多選擇。…查看更多