Marvin L的個人專頁

Pheromone 嘅難訂位程度..   其實真係無需要再講,     真係只可以話係「可遇不可求」,  好彩 friend子訂到位,  一於一齊去食好西~  今次就揀左個貴啲嘅 set , 多啲肉亦都多啲小食,  仲可以BYOW,   三五知己把酒吹水慢慢食其實係幾舒服嘅~ 喺開飯之前,  老闆娘會細心解釋今餐我地主食嘅肉會包括啲咩,  係嚟自咩產地, 咩部位,  同食落去口感同味道, 畀大家有個心理準備. 先嚟冷盤蝦~   類似好似 cocktail shrimp 咁, 但係個醬就無咁茄,  都係醒胃嘅前菜啲野啦~ 跟住落嚟就係牛舌,  好入味,  好腍,  送酒真係一流~ 和牛可樂餅,  香料味好似勁左啲,  令到牛味有少少失色唔係講笑,  佢個蒜蓉包真係世一 無得輸,  係秒殺無難度. 雜菇,   亦都係意料之內呢一個價位嘅餐廳嘅水準啦. 佢嘅薯條,  係任食嘅,  亦都做得好好, 外脆內鬆軟,   但係為左唔好塞爆自己,  唯有忍口無狂食.  主角一號~  羊里脊(Picanha),  有驚喜,   正常出面西餐食羊 唔多會食呢個位,  呢個部位肥係會偏多,  佢個 finish 做得好好,  食落去肥瘦嘅部份配合得好好,  唔會有覺得「好肥」嘅感覺.  主角二號, 三款牛,  包括有小牛,   牛柳心 以及 和牛里脊 (左至右),   三個都係事前處理功夫較多嘅部位,  其中小牛最驚喜,  食落係真係有種好嫰滑嘅感覺,  有少少好似食緊名古屋生雞肉嘅 feel. 其實仲有湯, 沙津同甜品~     真真正正係食飽飲醉嘅一餐晚飯~ 有幸去過 Pheromone 不只一次,   今次係暫時最好嘅,   其實喺主食質素上,   每次去都真係有啲分別嘅, 相信最大嘅原因係要睇佢地當日有咩貨,   明白佢地嘅理念係希望大家可以試到啲未試過,  或者相對地少見啲嘅部位,   例如我今次就食到小牛, 或者羊里脊 等等.    但係可以對於對「扒房」牛扒有固有前設嘅食客,   冀望同現實就可能會有啲距離.     如果你係想食熟成bone-in ribeye 的話,   或者真係唔應該嚟呢度食,   但如果係想試下一啲相對地小眾嘅肉類,  可以試下   Pheromone, 但係同樣地,  當日有嘅肉 係唔可以100%保証會係你杯茶,   同埋大大大 前題係, 首先要訂到枱.  …查看更多

一年四季都好鍾意打邊爐,   大熱天打麻辣邊爐直頭係爽呀~!!!     以前食麻辣火鍋都鍾意北上,  味道就係有啲唔一樣,   聽講呢間 成都老碼頭火鍋 有啲料到,  一於去試試佢~ 早去到唔洗等,  入到去地方好大,  枱好大,  啲位好闊,   如果二人同行 對住坐,  就好似有啲啲遠,      叫左鴛鴦鍋,  一邊係藥膳可以淥下菜飲啖湯果啲,  另一邊就梗係叫招牌嘅「老碼頭全紅無渣紅油麻辣鍋」啦,  第一次食唔夠膽去咁盡,  叫住中辣先~        最後結論係:  下次食大辣!!另外值得一提,  係喺混醬區係有「乾碟」呢種其他邊爐比較少見嘅野,  唔係乾嘅碟,  而係一種用幾種乾嘅蘸料撈埋一齊嘅調味,  通常有辣椒粉, 花椒粉, 芝麻,  花生粉 等等,  用嚟點炸嘅小食或者淥完嘅肉或者鴨血等等 係可以將個味道同辣度再提升,  有興趣記得試下~! 先出場嘅係「極品鵝腸」,  上枱果下真心笑左,   可愛到呢~  牛方面就揀左北上邊爐必食嘅黃牛牛頸脊,  份量比想像中細,  以佢呢個價嚟講, 都算貴,  靚仔嘅,  但係味道就有啲失望. 另外想提下就係雞子~!!!    大粒到有啲誇, 淥完都無乜點縮水,  如果鍾意食嘅朋友真係要試下.  其實仲叫左好多野食,   不過因為去到先知原來早埋單 食物可以有68折,  所以就無再影相係咁食,   下次就可以預啱時間去68折慢慢嘆.  覺得呢間其實比起比佢更貴嘅重慶火鍋更有北上嘅風味,  係會再戰嘅,  唯一係牛就真係失望左啲.  …查看更多

好耐無嚟,  再加上之前 晚市無啖好食,   早排見到佢夜晚開返已經好想食,   終於有機會了~ 坐好左師兄問飲唔飲例湯,   話係冬瓜湯,   都好吖~   不過上枱嘅應該係節瓜嚟  ,  但唔緊要,  入面仲有豬腩肉, 鳳爪等等,   足料好味嘅~! 兩個人雖然食唔到幾多野, 但係嚟牛記先嚟梗係叫蟶子先喇~   老闆娘推介我地試下 薑蔥炒 ,   果然無介紹錯喎~ 明顯無豉椒炒咁濃味同咁咸,      薑蔥炒鮮甜好多,  試過下次都應該會叫返 薑蔥炒 喇. 再嚟,   炒左個菜,  叫左西蘭花炒田雞,   都好食,  色香味有齊,  有鑊氣,  田雞又唔會太熟, 送酒的確係好~ 極~ 最後, 見到隔離枱食, 忍唔住叫埋個鹵水拼盤 ,  餐牌度又搵唔到,   呢類傳統小菜就係有呢度好,  叫,  就有喇~ 有驚喜嘅係,  佢真係「拼」下,  好多唔同款嘅野食,  豬, 大腸, 豬耳, 鵝腸, 魷魚, 腎, 乜都有啲,  勁開心先..     唯獨是,  無雞蛋囉!!!!  飲埋大啤,  完滿結束,  一定會再嚟嘅~  …查看更多

聯和墟係好多野食，但係走中高路線嘅唔多，如果想食靚西餐、坐得舒服、飲下酒、睇下波，或者慶祝生日紀念日等等，呢間新開嘅 Good Times 應該啱你喇～佢地係喺原本聯和墟舊街市，新起好嘅樓盤嘅向住墟果邊嘅地鋪，鋪面都好大，但係入面枱同枱唔會太貼近，坐得幾舒服嘅係 講返野食，介紹三個畀大家：1. 漢堡 夠晒大份，有樣野出色嘅係佢用左松露牛油，咬嘅時候好香呀！2. 炸魚薯條 佢唔係一般香港食到，炸到乾多面脆嘅 炸魚薯條，係似真係喺英國食果啲，外面比較軟身果一種，佢仲加左黑椒喺個漿度，鍾唔鍾意呢個就見仁見智喇，我自己就一般 3. 卡邦尼意粉 做得好好嘅卡邦尼，夠厚夠乾身，亦好夠味，呢樣野成日話易話易但係好多地方都做得唔好食，呢個係會想返下次再去食嘅 4 少爺啤酒少爺啤 鉖於都殺到入嚟粉嶺喇，呢個 香港手工啤 一哥近年無孔不入，不試過手工啤嘅朋友可以試下，佢呢隻 Classic 襯西餐確係好～ 極～ 無可否認，價位嚟講以喺聯和墟食飯嚟講算係唔平，但係我肯定我會再嚟試埋佢其他野食嘅！…查看更多

尖沙咀平日 lunch time 搵位煩，等位煩，厚福街 光榮冰室 屬於唔貴又坐得算ok 之選。四十幾連野飲 嘅正常餐廳 尖沙咀已經絕無僅有。佢有幾款快餐，十二點前食仲再平啲添，食左「三眼仔叉燒飯」，無乜投訴，就係一句：大件夾抵食！大大碟，多餸多飯熱嘅食到好飽，唔會好似有啲尖沙咀茶記上枱碟飯好似有人食過咁樣樣～ 我朋友食左「窩蛋牛肉飯」，亦係已經少有嘅「正宗」窩蛋牛飯，好多地方都無得食喇已經。總結：如果你都係尖沙咀打工仔女，係多左一個地方可以Keep住去嘅！…查看更多

大好日子，決定以日式晚餐慶祝一下，到＜開飯網＞看看最高人氣的尖沙咀日式食肆，找到這家伊呂波，本身亦很喜歡日式燒肉，於是不作他人選，訂位去也！＜伊呂波＞本身是日本一種古代的字母排列法，由於排列後可以形成有意思的句子，所以也是一首古詩，同時亦都有"最基本"的意思，名字跟餐廳的內部十分合襯．　餐廳位置並不難找，大堂電梯上一樓，看到一扇重重的簡單木門，正想伸手用力拉之時，原來是一扇自動門，設計頗有心思．　內部沒有多餘的裝潢，非常簡樸的日式設計給人一種很舒服的感覺．坐下來第一時間當然是看餐牌．　Sapporo生啤，有．　頭盤，有．　拼盤，有．　和牛，有．　開飯！　蚊香形電爐頭比起別的真的好得多，整個爐頭也有足夠熱力，好處其一是同時間燒很多材料也應付有餘，其二是燒熟後的食物亦不會有很多油留在表面．食物方面：燒牛筋很特別，整串放在爐面燒，弄得脆脆的．:)拼盤有齊三種牛肉，牛舌，雞肉，三文魚，魷魚以及蝦，足夠給二人享用．:)推介牛胸外膜和牛排肉，色香味俱全！和牛拼盤絕對是全晚高潮所在，入口即溶的感覺太棒了！　雖然價錢是比較貴一點，但難忘的日子當然要吃難忘的食物吧！　＜伊呂波＞絕對是令人回味的地方．…查看更多

星期六，本來想去inside out dinner，但係之前有friend 推介Shake'em Buns，於是決定去試下試， inside out 開平道對面馬路就係．店面算細，幾個卡位之外其他都係高枱，睇左餐牌之後就自己去收銀處落Order，叫左兩個包一個薯條兩支啤酒，我地好早六點幾已經去，但係都等左一陣先有野食，我諗如果Full House應該都有一排等．Hawaiian Surfer Girl佢地嘅包係巨型，大過我兩個拳頭加埋，呢個"囡囡"入面有蕃茄，菠蘿，芝士，當然唔少得新鮮煎漢堡扒大大塊，材料好鮮，包好軟，一啖咬落去好juicy，唔會有好似Triple O's 吃不消嘅感覺，讚！Gang Bang全場最貴嘅漢堡包($98)，雙層漢堡扒，芝士，煙肉同煎蛋．比Hawaiian Surfer Girl更巨大，一口咬唔晒，但係真係Juciy到不得了，煎蛋同漢堡都好夾，如果係太陽蛋就仲正！Poutine "A"New York Fries 嘅Poutine就食得多，Shake'em Buns版本分別在於佢加入左蒜蓉，好香，食落去增加左口感，讚！！地點都算就腳，下次去開銅鑼灣一定會再去…查看更多

星期六放工，一行三人去左沙田食lunch，本身諗住去和民，被"星馬風味"四字吸引，結果去左魚尾獅！叫左個二人餐+炸雞翼，開飯！馬來咖喱魚架唔知咩係魚架．　但係入面d魚肉幾滑，唔辣，但係其實成碟野係骨多過肉喇沙浸娃娃菜喇沙味同菜味係分開，一d都無浸嘅感覺咖喱串燒拼盤豬牛雞各二，無甚驚喜．馬來炸雞翼呢個簡直有d離譜，茶餐廳可以仲好食過佢．其實新城市嘅食肆數量都唔少，要立足除左要有一定特色，當然要有令人想"吃回頭草"衝動．　坡魚尾獅呢個名已將餐廳特點娓娓道來，但卻只帶星馬之名，而未有星馬之味．…查看更多

星期六又同老媽子去新漢記，可能lunch晏食又食得太飽（沙田魚尾獅），晚餐兩味餸兩個人食，都覺得啱啱好．咸豬骨芥菜食過好幾次，真係好正，芥菜爽，豬骨有肉唔肥又唔硬，d湯入味，係今次好似咸左少少．　下次再去都依然會再食咸豬骨芥菜，超讚！叫埋蠔餅，白飯．　埋單一百廿幾．…查看更多

朋友介紹，再加上OpenRice各好友大讚，於是放工去試下呢個咁出名嘅時新漢堡！天橋下的老鋪，簡簡單單．　坐低左就去叫野食，叫左兩個漢堡加薯條汽水．兩層芝士蛋漢堡咖哩汁如果你話味道，其實麻麻，但係以"快餐店15蚊漢堡"黎講就真係絕對抵食，size夠大，肉夠厚（雖然完全可以話無肉味），蛋夠份量，口感其實真係唔錯，咖哩汁漢堡個感覺都幾特別．　芝士蛋漢堡茄汁個情況其實都係差唔多．薯條認真麻麻，炸到乾晒．　無味道可言．唯一真係抵讚嘅，真係抵食！　兩個人$50蚊食左一餐，今時今日，去邊度搵？…查看更多

十二月十二日 (星期五)大伙去燒野食，因為大部份都係北區人， 諗都唔諗就梗係去大尾篤．　先行部隊由粉嶺直接坐的士去，一人廿五蚊，OK啦都算．第一次去呢個燒烤王，環境唔算好好，但可以接受啦:)，我地最後一行九人坐低左，四圍好多一大班學生哥，隔離係一個不停食煙不停飲酒老師帶住一班十四五歲學生囉 =_="星期五有任食時段58一位，但考慮到唔係人人咩都食，又想試下其他野，於是叫左一個五人餐（跟埋五罐汽水，叉，紙碟，蜜糖，面包，紙巾），再加羊，鱔同火雞腎，加埋比起九位任食貴左廿蚊，正！羊羊係賣飛佛，點可以唔食！　燒起好香，燒燒下麥師傅仲親自黎教我地叉同幫我地燒左一舊，麥師傅教落：1.　大舊肉果邊要向出面，條骨指住自己2.　燒果陣要貼火燒，最大火果度燒有少少焦就最正好好味，肉又夠厚又半肥瘦，讚呀！鱔第一次BBQ食鱔，唯一係唔係好sure佢幾時熟，我女友就覺得9成熟好食d，我就覺得well done爽d，蒜香燒鱔，讚！五人餐仲有豬牛羊雞腸丸翼，全部都有水準，加上唔會雪到"實的的"，但最後呢個餐都只係食左九成，所以我會推介唔一定要叫任食，試下其他野食啦！再加埋飲左差唔多廿枝大藍妹，圓滿結束！…查看更多

早已聽過NYF 嘅大名，可惜每年去美國都只會去L.A.，放工見到海港城開左，一於去試下！Regular Combo我好鍾意食薯條，其一係因為可以話係人都識整，但係要整得好係一種好強大嘅誠意．先試下咩都無加料嘅regular... 當一食落去feel到佢係薯仔，已經感動到爆，再加上佢唔算粗切，但係都可以炸到個心好薯，讚！"The Works" Combo再試咩都有嘅The Works，ｄ醬溝埋好正！　好多料！等一下等D薯條索d醬最正，唔停得口．　唯獨係我唔太好䓤，仲要係１００％生䓤，但係唔理得咁多，讚！其實以佢地呢個price point，以薯條掛帥，響香港呢個地方能否生存真係見人見智，見到兩位老外響度有心有力指揮，員工亦熱誠有禮，抵讚. 同埋真係唔可以睇小呢個"小吃"，　食完兩個COMBO，我同女友都已經７分飽！另一醒目位，就係佢整左個門口直出海港城望海位，以前果個位無咩人坐，最多係得ｄ自由行響度影下相，禽日去到，全部變晒NYF食客！過兩日再去試埋the heart of NYC: HOTDOG!!…查看更多

28th Nov, 2008得返12.5度，凍到變左咁 －－＞第一時間梗係諗起去邊爐，於是睇下OpenRice有咩好野，女友想食豬骨煲，咁就去食豬骨煲囉！　天氣凍係唔同ｄ，我地七點未夠去到已經好多人，不過小弟的確有食神眷顧，又係咁啱有一張二人枱，讚呀！二話不說就叫左個"招牌豬骨煲"，跟住諗住寫野食啦，點解張點菜紙無價錢嘅？！？！　　原來ｄ價錢寫晒響牆上面！　"交功課"之後好快已經到，再加上個爐"火力"驚人（電爐黎架其實），好快就有得食，讚呀！招牌豬骨煲夠料但唔係太多，夠味！魚片頭出奇地好食，放落去一陣，索左ｄ湯咸味，好彈牙，正！羊肉羊係賣飛佛，必食！　唔算好蘇，同埋因為個爐真係好猛，基本上兩拖已經搞掂，又係正！魚鮫味道同出面食開有ｄ唔同，無咁咸，多ｄ肉味，成個鮫鬆身好多，索埋ｄ湯又係讚到不能！手切牛兩個人食，叫個中碼啱啱好，如果講味道其實係中級，但係又係果句，個爐好猛！　肉又夠薄，拖兩野加生蒜就放入口，正！坑腩店員教落："一到要即放晒落去，最尾先食就差唔多喇！"，果然無老點！仲有腸仔，菜等等，食到飽飽:)…查看更多

本身對食生蠔呢樣野興趣都不大，同埋有幾次食蠔"賴野"收場，又疴又嘔，有一日女友話想突然話想食蠔，本身都唔贊成(講真，真係一聽到就驚），但係大人落order，小人唯有照做啦．　上網搵左幾間，問朋友又問左幾間，最後決定試下Oyster Station!早一日打去訂枱，本身都話九點先有，話當日覆， 最後等到當日五點幾都無覆:(　唯有自己打去問，confrim左枱店員問我洗唔洗留野食，基於我未去過都唔sure佢有咩食嘅關係，咪話唔洗囉．　轉頭佢打黎話可以改七點，仲好！去到發現間野其實好細間，坐低左店員俾左湯同前菜我地食，湯好香，真係好香．　青瓜蘿蔔西芹都好食．　之後叫左個生蠔拼盤，海膽刺生，牡丹蝦，原來海膽刺生要預留先有，無得食！:(刺身加上四款蠔各二，上網已經睇過Oyster Station師父對開蠔好有要求，反而最欣賞係店員對菜色十分熟悉，亦好好態度好好語氣講解各種蠔分別，應該食邊款先，亦已經順時針放好推食次序，再推介埋白酒，絕對可信，俾人一種好放心唔洗煩嘅感覺，非常之diner-friendly． 食完一轉，再食埋好鮮嘅蝦刺身．　決定轉戰第二回合，店員推介向再濃味挑戰，再食多三款，飲埋入面ｄ海水，正呀！已經諗住十二月再去多次．…查看更多

見到佢大大個字話食和牛，跟住睇Hong Kong Walker 又見到介紹，於是就去試下．叫左個沙爹湯底，餸料選擇無咩等別，都係ｄ大路野，個湯煲極都好似好稀，完全無味，滾到爆放ｄ野落去，煮熟左都係一ｄ味都無，好似搵白滾水打邊爐咁．佢果ｄ和牛味道一ｄ都唔似和牛，反而手切仲好食ｄ．我諗我都會去試多次佢個冬陰功湯底，先決定係咪以後都唔去！　邊爐market咁激烈，尖咀市中心開仲要咁環境，可能去新星９點後任食仲正，起碼ｄ湯有味，酒水又任飲先啦．…查看更多