水上飄的个人专页

通常一講豬潤麵，都會諗起深水埗維X，自己亦食開呢間。但最近睇 YouTube 有人介紹漢發，由於一直都未試過，咁就去試下啦。首先格局，一定係漢發勝。整潔光鮮。服務，漢發勝。一坐底就即送上一杯熱水，提點小心熱。主角出場，豬潤麵。首先飲啖湯，淡淡酒香，味道恰當。豬潤出場，第一啖咬落去，嘩一聲，好脆嫩，不禁再來一啖，係我鍾意的爽脆口感。牛肉淋滑，牛味不算濃。脆嫩豬潤併淋滑牛肉，簡直係口感的雙重享受。價錢方便，雖然比維X貴，但個人覺得係值得的，因漢發的分量好多，一個女性食完已經好飽。試完漢發後，愛上了。食完我返唔到轉頭了，值得推介一試。…查看更多

第一次光顧，興朋友叫咗二人餐，有齊沙律或餐湯，前菜，2個主菜，飲品及甜品，平均$230一個人，正常價格。食物味道正常發揮。印象最深刻，係員工們笑面迎人的熱情招待，主動的為你換碟，添水。問洗手間位置，基本上口述正常人都會明點行，但侍應姐姐卻會同你一齊行出門口，再清楚指示方向。洗手間出入口位置都好窄，清潔姨姨又會溫馨提示要小心。結論係一個充滿有愛的小店。有心試的朋友記得訂位，因為係好多客，8：30仍然有人等入座…查看更多

甩單情況嚴重，出單慢，基本上食2個鐘，最少9個字是等食物，每次落單起碼等15分鐘先有食物到，重要追單先有。人手極少，成日都搵唔到人加湯或追單，唯一讚的是員工的態度是好的。食物普通無特別，所謂甜品就只是有冰粉及啫喱，連最cheap的雪糕杯都無。試一次怕怕，基本上係食清個煲入面的剩餘食物飽了，因其他邊爐食物等極都未到，就唯有食個煲入面的剩餘物資，到有食物到時就已經食飽咗，等得太耐都冇癮再食。真係唔會有下次。…查看更多

趕車食個快早，唔想食老麥，就腳就行入八番屋。完全無期望，諗住拿拿臨快快趣填飽肚就算，重影乜鬼相呀，所以叫個最平$35的擔擔肉撈麵餐就算。先嚟咖啡，正正常常，但都好過老麥淡如水的Latte 。嗰撈麵嚟到，半隻糖心蛋，有少少肉鬆，少少蔥，幾條荀，3隻辣椒。唔理啦，趕時間，撈起就食啦。一啖放入口，超出預期，微辣，麵質非常Q彈有咬口，係我最鍾意的口感，味道唔差，即刻望住碗麵心心眼老公叫雞扒炒蛋多士餐。雞扒分量一定大過大家樂，味道OK,都嫩滑的，稍為凍咗少少。多士脆口微暖，唔錯，蛋我無試，但個樣一定滑過老麥。整體ok總結，坐得舒舒服服，早晨正常價，無加一，侍應服務態度非好，環境衛生，絕對值得推介。…查看更多

想在中環搵間唔太貴但坐得舒適的餐廳。在openrice㩒下㩒下見到又一。看看餐牌，價錢合理，大致食評都幾好，咁就即管試一試。大約7點到達餐廳，嚇了一跳，說好的夜繽紛呢，星期五全餐廳只有自己一枱，個心沈一沈，死啦，會唔會坐咗直升機 ～～～ 伏伏伏伏伏㗎 。。。。仍然都在openrice 訂咗枱，咁就好好醜醜食一餐啦。行到入餐廳，𠵱，唔係喎，感覺幾舒服喎，少少雅致。坐低睇餐牌，唔係呢，中環區，價錢真係唔貴呀，openrice訂座重有85折添。食物到了，點了咖哩吉列豬扒蛋包飯，蟹肉意大利飯，牛油果大啡菇漢堡，重有一啲串燒 ：雞皮，雞軟骨，雞亦。首先咖哩，可辣可唔辣，我揀咗辣。吉列豬唔算好出色，正常嘢，但蛋好滑，咖哩係真係有啲辣嘅感覺的日式咖哩，味道甜中帶有辛辣，好醒胃，鍾意食咖哩的不防一試。意大利飯口感都算正宗，味道有淡淡的磨菇味，唔會搶咗蟹肉的鮮味。而漢堡因是全素，大致上味道唔會有突破性的期望。但可以一提的是牛油果，蕃茄片，大啡菇等原材料，全部都好新鮮。反而要讚伴碟的炸薯條，薯條大小不一，應該是手切薯條，熱辣辣好好食。主菜以外亦叫咗串燒，串燒由十幾至卅十幾蚊不等。我覺得燒雞皮同燒雞軟骨都好好食，因已燒走多餘的油份，只剩下香脆的雞皮及軟骨，真係食唔停口。而雞亦就稍為乾了一點。而最後亦都要讚讚服務員，殷勤有禮，會耐心落單，遇有疑問亦耐心講解。總括而言，又一絕對值得一試。…查看更多

間舖見就見得多，但一次都無食過。去到深水埗好多嘢都試過，唯獨呢間未試，咁有食下啦。入到店內見菜式不多，主推狗仔粉同魚肉翅。入得嚟都要試下嘅。但極之失望。碗魚肉翅差不多40蚊，杰到不得了，又冇味。狗仔粉都係，湯係杰的，粉就煲得好淋，完全無咬口，食粒油渣就成口油。辣魚蛋得個辣字，亦唔夠彈牙。只有燒賣叫正常。。係正常咋，唔講得上好食。如果個米芝蓮係好耐之前攞落，希望佢唔好再話自己係米芝蓮。希望老板可以多點巡視業務，試試係未邊度出咗問題啦。…查看更多

上星期剛在京都食完栗子紗織呢個甜品，後來先知原來深水埗都有，即管去試下。原來十常八九由2位年青人打理，小店環境舒適，走日系文青路線。初頭亦不抱任何期望，但食後估唔到同京都的比較，都唔係差好遠，有點喜出望外。十常八九的和栗蒙布朗外貌同京都的非常似，同樣都係蛋白餅做餅底，口感鬆脆，只係分量無京都的咁厚。另外十常吐司亦值得推介，口感特別。總括十常八九值得一試，價錢亦合理。溫馨提示 ：盡可能在1：30前到達，可以唔使等咁耐位，今天只係等10分鐘就已經有位。…查看更多

價錢其實唔貴，所以無要求，正正常常。但服務真係有好大好大的進步空間。之前都睇到有關服務的問題，親身試過後，感覺真係有好多空間可以改善。希望店舖重視留言，對生意應該有幫助。…查看更多

平日的早上出開尖沙咀，呢間餐廳一定會係首選。因為真這是最好的時間。餐廳開8點，但呢段時間真係好少人嚟，感覺就係包起餐廳，靜靜的享受咖啡及音樂。雞扒萍果沙律 ～ 雞扒都好大件，煎得金黃焦香，今天食的一次，稍為咸了少少，好在有沙律中和返。咸蛋黃薯蓉桂花pancake ~ 被個名吸引，樣樣味都想試下，所以叫。勁大份，有人share會好啲。有甜有咸，配搭創新。本來兩個餐都跟餐飲，但放棄咗一杯，另外加一杯香蕉咖啡，純為個人喜愛。…查看更多

約咗朋友早餐，又唔想飲茶，見到啡奴原來平日咁早就開，咁就去試下啦。由於是平日的早上，客量不多，所以可以同朋友舒舒服服的慢慢嘆，盡情傾。啡奴早餐係唔包飲品的，但加唔同價錢就可以選想要的飲品。就我自己一份為例，我點咗咸pancake, 即有pancake, 蛋，煙肉同沙律菜，加咗杯紅豆咖啡，都只係需要$85，以在cafe用呢個價錢，並不算貴。而朋友叫的all day breakfast, 以及吞拿魚牛角包賣相亦相當精美。個人覺得啡奴環境唔錯，員工有禮，食物亦好，值得一試。…查看更多

同朋友慶祝生日，揀咗 Miss Lee。搵資料時，最初被吸引的，是它的裝修，因好雅緻。之後再睇餐牌，有 Chef's Signature Menu, 幾好喎，可以一次過試好多唔同的菜式。所以決定訂位。餐廳外觀已好吸引，入內後真的覺得唔錯，有空間感，燈光柔和。感覺舒適。那天叫了2份餐，所有菜式都好有水準，名乎其實的好睇又好食。除咗裝修好，食物好，服務都非常好。每上一道菜，侍應都會同你簡單講解菜式的材料。而另一樣好貼心的安排，由於我叫的Menu 只有一種甜品，冇其他選擇，反而第二個 Menu 有我想試的陳皮燉蛋，所以便打算額外叫一個試下。點知小姐主動話不如問下廚房可否轉換，咁我哋就唔使叫，結果可以轉，我就可以試齊兩種甜品。食素嚟講呢個價錢真係咁平，但值得試，因真係幾好食，每道菜用心製作，物有所值的。…查看更多

一星期內兩次去喵一下。可想而知有幾鍾意。第一次朋友帶去，一踏入店內，嘩～～好靚呀，環境好舒服，有好多綠色植物，裝修及擺設好明顯係店主悉心設計。今次專程帶家人去，試多幾款食物。愛上喵一下的原因好多。。。。環境舒服，食物好，價錢合理，無加一，老板好好人，會同客人傾計，員工勤快，可帶寵物，重有最重要一點，任坐唔限時。你話，點會唔鍾意喵一下呢！提提各位，最緊要訂位，好會有一張好靚嘅貓咪postcard送返比你。…查看更多

呢間已想試好耐，今日終於有機會去試了。首先論環境，真係應該好多人接受唔到。今日天空尚算涼，幸好的我無出過汗。但見到檔口的格局，心裡沈一沈，咁出名，係未可以執返好少少😧由落單到米線到，要成20分鐘，趕時間真係要諗諗。最攪笑杯咖啡，原來係用咖啡粉開的。冒名而來的黃酒雞米線出場，飲咗啖湯，無錯係好濃酒味，但老實，湯底唔好味，好勉強的食咗半碗，真係頂唔到，放棄了。臨走時高處見到米奇啲friend ，重要好大隻。嘥quota 的一餐😑…查看更多

今晚想搵間靜靜地餐廳，一家人食餐飯。早前有朋友介紹呢間，今日終於有機會試。放工時間後，工廠區的食市都會比較靜，呢間亦不例外。今晚叫咗兩個意粉，兩個牛扒，及一客芝士薯條小食。兩個湯好味，白湯菇味濃，紅湯料多湯亦酸味適中，湯的水準喜出望外。兩個意粉做得不錯，條條掛汁，味道亦佳。而扒就一般，略嫌鬆肉粉味濃了點。兩件小小的一口蛋糕朱古力味重，都唔差。 總括而言。意粉水準比較好，一個餐有湯，包，主菜，甜品，茶，只需百幾蚊，又坐得舒服，無時限任坐，而職員的態度又非常有禮，晚市嚟講真係唔錯的地方。…查看更多

今日同朋友食明輝，午餐雖然有好正的牛腩飯，但想試下其他，所以叫咗咕嚕肉。真係唔講得笑，50蚊個餐但卻無hea你，碟咕嚕肉上枱是熱辣辣，嗰嚿肉的外層重係脆的，酸甜適中好送飯。另外叫咗碗淨墨丸同朋友分享。一碗有6粒，重有幾條菜。咬一口，不得了，除咗十分彈牙外，重會食到有粒粒墨魚肉，真係好食到停唔到口！！墨丸屬極強烈推介，入明輝必食項目之一。雖然已好飽，但我真係一個太為食的人，重有好多嘢想食。所以暫臨走時，叫多三個午餐，留返做晚餐。分別係encore 的牛腩飯, 泰式無骨豬手飯，同海南雞飯。牛腩上次寫咗，唔使再多講，依然咁好味。豬手飯軟滑無骨啖啖肉，重附送半隻蛋同幾片鹵水豆腐，一啲都唔馬虎。雖然係茶記，但明輝的海南雞並不比泰國餐廳差，好嫩滑。另外值得一提係香茅油飯，話就話油飯，佢但卻做到一啲都唔油，重有好香的香料味，好好食。明輝，已成為我嘅飯堂。…查看更多