qqyanyan的个人专页

之前貪近貪平，係深水埗間上海餐廳食小籠包，但係食物資素下降，小籠包d 肉好梅。旺角好多人食個間小籠包又係差左，又貴份量又小。所以好想搵間好食又正宗嘅上海餐館。第一次食好德來，我老公話依間開左好耐，老字號，近來搬左入商場。餐廳唔大，6點幾黎已經冇乜位淨，有d仲訂左檯。我地係經QR code 落單，見到餐牌食品價錢都唔平，蟹粉小籠包2粒要$70。都要叫返普通個d先。招牌小籠包6粒$78，分左2籠，每籠3粒。夾起唔會穿，皮薄豬肉新鮮，好好食。酸辣雲吞湯(有4粒雲吞)$75，酸辣湯唔係出面個d重豆瓣醬味，又唔會好浠似水。料好足，飲完唔口乾，雲吞d肉又係好新鮮。雪菜肉絲炒年糕$108，正正常常嘅一道菜，冇乜挑剔嘅。炸排骨$50，真心好食，成吋厚，唔嚡唔乾炸完仲好juicy，個炸皮唔會同舊肉分開，冇加鬆肉粉有五香粉味。如果想飲茶，就$8位菜茶錢。叫水就應該唔駛錢。總共食左360連加一，感覺d食品新鮮有保證，一分錢一分貨，貴得黎係好味唔係俾行貨你。…查看更多

結婚週年紀念日關係，又要湊仔放學，所以選擇左去食午市嘅燒肉放題，餐牌上有3款午市放題選擇，一個係「宮崎A5桜花牛極上燒肉放題」$998；一款係「宮崎A5桜花嚴選放題」$898；最後一款係「九州A5和牛特上燒肉放題」$698。我揀左$698個餐(未計加一)。店員安排我地嘅位置係面對維園嘅座位。一入座就有6款靚嘅和牛燒，但只有五花腩同外後腿肉先可以任食。不得不說，冇得任食個4款真係入口即溶呀，真係冇牙都咬到。而可以任食嘅五花腩算係好有油脂感；外後腿肉就比較重肉味，唔鐘意食太油膩嘅可以揀依款encore。和牛只需配少少岩鹽或芥末食就可以。雖然九州和牛只有2款任食，不過其他熟食同燒物都唔失色，有比較少係放題見嘅甲羅燒，好驚喜係甲羅燒有配埋鵪鶉蛋同米通，所以燒起上黎好好食。平時我好少燒雞類，估唔到雞係好有日本燒鳥嘅風味，唔腥仲好好味。燒魚又係估唔到唔嚡又juicy。燒魷魚唔係乾爭爭，入口有少少辣不過真心好香口。豬就比較失色少少。牛內臟有牛肝同牛沙瓜(第四個胃)，試左牛沙瓜好爽口。叫左牛乳和牛烏冬，細細碗，麵質係稻庭烏冬口感，因為冷氣太大，越食越凍，所以食下d暖野都係唔錯嘅選擇。飲品嘅烏龍茶係日本入口嘅一枝枝俾我地嘅，另叫一杯荔枝乳酪梳打都唔太甜，岩我d唔係螞蟻嘅人飲。最後甜品係自家制嘅牛乳布甸同柚子雪糕。總體我對依間嘅食物質素同上菜速度都好滿意，係有時漏左1、2款，不過再order都會黎返。服務態度ok啦，講野快左少少，有時會幫下手燒(不過我覺得收最貴價錢先會幫多d手，不過唔緊要，我依d社恐唔幫手燒都冇問題)。最後太凍了，食到2點半未夠就走人，連加一依餐係食左$1,536，2人。…查看更多

我之前係油麻地食金銘粉麵，依家係深水埗開左又近自己，咁就要試下啦。見門外個餐牌價錢比出面貴少少，基本沙牛麵連熱飲就$30，但額外要方包同蛋/腸個d都要加$10，咁過得黎咪試下啦。叫左2餸粉麵餐(揀左墨魚丸同魚片頭) + 熱檸茶，一共$38。熱檸菜正常，墨魚丸平平無奇，魚片頭出奇地好味，食落有魚味同食得出係手打，唔係出面係急凍貨。最正嘅檯面有潮州冬菜任「筆」，加左粉麵到真係正好多。雖然價錢貴少少，不過都會有下次。…查看更多

係新填地街依個位置開，平時夜晚都比較少人經過，都預左係做街坊生意多，所以經過見到價錢都好合理。今日幫襯，雖然唔多選擇，但係present都幾好，唔似茶記咁。我揀左吉列豬扒溫泉蛋烏冬（$50-->轉烏冬另加$10，所以係$60）包一罐飲品加$10烏冬係日本製讚岐烏冬，入口都煙韌彈牙嘅，唔係噹噹個Ｄ。不過湯底冇乜味，加左好多七味粉都改變唔到佢嘅啖味。吉列豬扒就咁睇好似份量多，但炸得太乾啦，食到個上顎有d痛。加上塊豬扒拍得太薄，所以肉其實好少。溫泉蛋係唯一可以讚嘅～先生叫嘅照燒雞扒烏冬（$50-->轉烏冬另加$10，所以係$60）佢都話燒雞扒好乾，所以佢最後都食淨左。欣賞佢環境算乾淨，夠光猛同價錢合理，但係如果食品質素提高返少少會更好。…查看更多

今日係中秋正日，但係公司放４點，為左令自己開心d同有節日氣氛，所以搵左我先生過黎陪我食中秋午餐～新開張冇幾耐，所有野都乾淨同光猛，因為中秋正日嘅關係，我叫先生早少少去拎位，因為之後黎就冇位啦。我地叫左特上刺身拼盤同特上壽司拼盤，有蒸蛋同味噌湯作前菜。好驚喜蒸蛋有銀杏。叫左特上刺身拼盤$338左上：大吞拿魚腩　左下：金目鯛中上：牡丹蝦　中下：深海池魚　右上：海膽　右下：螺片（本身係赤貝，但來貨不足所以要轉）依個餐係所有午餐中最貴，所以師傅都切得比壽司厚身。我先生話佢食個舊大吞拿魚腩有少少筋，我食反而冇，入口即融，好肥美。海膽：份量比我想像中多，唔苦螺片：有點失望冇赤貝，不過螺片本身都好爽口。其餘都好高質素。特上壽司拼盤$268左上：深海池魚、魴鮄、大吞拿魚腩、鯖魚、銀雪魚右下：赤貝、帆立貝、牡丹蝦、三文魚籽、海膽因為多數係先生食，所以冇評價，但就咁睇魚生比上面刺身薄Ｄ，不過都好味嘅～依個中秋午餐連加一食左6百幾蚊，係幾貴，不過都值得，因為食材都幾新鮮，希望改善下如果師傅或服務員可以簡單介紹下個特上刺身拼盤係咩魚生就好，唔駛我估估下。…查看更多

食了飽飽的晚餐，又係好想食芋圓，咁岩係深水埗食飯，就同老公講不如行遠少少去康瑞甜品食個芋圓糖水啦。７點幾黎到都開始坐滿一大半人，雖然選擇一眼望晒，不過我都係會食返依度嘅招牌－凍特色仙草百配$26凍特色仙草百配$26份量好多呀，我最鐘意唔係芋圓，係其他配料，即係西米，薏米，小丸子之類，相反芋圓較失色，食落粉左Ｄ，不過價錢咁平，冇投訴啦～我老公揀左貴妃楊枝甘露，$30黎講已經好合理，出面閒閒地$40以上。價錢合理而且味道唔錯，再夜d就開始多人等位。…查看更多

上海街618號係重建大樓，外表依然保留傳統古色味道，但入面已經好有年代感，依個落差吸引左好多年輕人入黎打卡同相眾食飯。本身諗住應該唔會好多人鐘意舊式文化，估唔到我去到餐廳（已經係8點）都好多人等位，幸好友人一早預了檯，所以就可以直入坐卡位了。餐牌上有好多選擇，而且價錢都好合理，所以同友人商量後揀了二人晚市套餐。頭盆有特色四式多士由上至下分別係水牛芝士巴馬火腿、蟹肉牛油果、蝦球蕃茄沙沙、磯煮鮑魚沙律２選１炸雞粒蜜糖南瓜合桃沙律或煎封吞拿魚蜜柑沙律我揀左炸雞粒蜜糖南瓜合桃沙律，份量好多，南瓜有點硬同大粒（我鐘意食林身同細粒，好似先襯配沙律）湯２揀１周打蜆肉忌廉湯或意大利雜菜湯 (+$15酥皮)我地揀左周打蜆肉忌廉湯加酥皮，依家好多地方都冇得加酥皮，所以見依度有得加錢要酥皮，就立即拍版～其實係想食個回憶～主菜Part A - 自家制廣島蠔慕絲雜菌意大利飯、墨魚汁海鮮扁意粉、軟殼蟹蟹膏忌廉意大利粉軟殼蟹蟹膏忌廉意大利粉，軟殼蟹好大隻，份量好多，有蟹膏撈晒d 意大利粉~主菜Part B  - 原隻芝士波士頓龍蝦配香草牛油薯茸、慢煮西班牙黑毛豬肋骨配秘製BBQ醬汁、炭燒美國安格斯西冷扒10安士 ∙ 燒汁炭燒美國安格斯西冷扒10安士 ∙ 燒汁 - 點了5成熟，其實想3成熟，但友人怕太生，結果係medium well了。不過好彩係佢醬汁很好，同扒夠厚，而且有配薯格，所以都係唔錯嘅。包飲品2杯，加錢+$30飲mocktail包甜品焦糖燉蛋，為依餐作完美句號～如果揀Part A + Part A就 $388；Part A + Part B就 $418；Part B + Part B就 $468因此我地係Part A + Part B，另加$15酥皮同$30飲mocktail，所以依餐約$550，食品質素唔錯，份量夠多，因為book左位坐卡位所以唔駛咁迫坐，環境都很好。…查看更多

6點幾過到黎，唔駛等位即入座。叫左2人餐($238)是日餐湯蕃茄湯，冇得揀得依款主菜揀一款有黑松露燒春雞、釀焗地中海鵝肝鴨胸、加拿大豬鞍配蜜糖芥末子汁、嘉璐連州燒美國豬背骨、馬沙拉美國肉眼（+$50）我地就揀左馬沙拉美國肉眼（+$50），但塊牛扒薄左少少，諗住加錢會質素好D，其實都係一般。意粉或意大利飯揀一款有軟殼蟹雜菌忌廉意大利飯、炸蝦南瓜忌廉意大利飯、意大利煙肉卡邦尼扁意粉、炸軟殼蟹忌廉意粉我地揀軟殼蟹忌廉意粉，軟殼蟹都幾大隻，但意粉較為乾身。飲品要加錢($35) 先有所以每人各加了$35不過相對飲品係高質嘅。雖然個餐$238，但加埋加埋都差不多4百，性價比唔算高，食過一次就算。…查看更多

週末去旺角區食飯，真係要一早去食，否則真係有排等。所以我地6點15分左右就排隊等依間一直等到15分析就可以入座。佢同牛大人一樣，都係scan QR code點野食，我地叫左個士林放題餐，鴛鴦鍋。一上檯就主動黎左美國牛頸脊，睇個樣都好似唔差。之後又自動黎左六小碟拼盤，有滷大腸、滷牛肚、滷豆腐、麻辣雞翼尖、麻辣川耳、麻辣鴨血。當我老公食麻辣鴨血嘅時候，見到有隻小強（鴨血旁），真係乜胃口都冇。同侍應講，佢地都係同我地講聲抱歉，仲話拎過碟新嘅六小碟，我地話唔駛了。之後唔敢再食熟鴨血，只order生鴨血再去個鍋度浸熟佢。之後叫下打邊爐料同熟食啦，依個係鹽水雞，但味道好怪，雞肉好嚡，唔好食。鐵蛋算正常（好明顯係出面買包裝個Ｄ）我覺得全部最好食係王子麵黑糖芋圓，難食到一啖就放棄。真係冇乜心機影下Ｄ打邊爐料，所以淨係scan cap左有Ｄ咩食，總括黎講，野食種類少過牛大人，又唔好食，靚個Ｄ又要加錢食。為左記得自己下次唔好中伏都係紀錄一下。真金白銀俾錢，食到小強都冇向佢地Ｒ著數嫁。（眼淚在心里淌）出面自助種類都比較少選擇，同埋檯同檯之間都幾迫。出面拎野食左一忽，右一忽，唔集中，所以唔推薦。…查看更多

我每次黎都係叫外賣，拎到返屋企都15分鐘左右，雪多一陣食仲好食添。今次同朋友係出面食晚餐，見係太子而且仲有時間，就去芋圓圓度試下食堂食。估唔到平時唔駛點排，可能咁岩當日係星期五，happy Friday，所以好多人排，不過排左15分鐘左右就可以入座，入座前都提醒因為繁忙時間所以食用時間為30分鐘，咁我都覺得合理嘅。我叫返平時食開嘅仙草芋圓$35，我食過好多間芋圓，我覺得依間暫時係我覺得最好味嘅芋圓。芋圓煙煙韌韌咁，唔會太多粉團，而且仙草整得好滑，唔苦，配合埋其他配料，例如紅豆，薏米等都出色。我依家都儘量戒食甜野，但芋圓圓嘅仙草真係令我抵擋唔住。…查看更多

其實好耐之前食過一次，即疫情前，覺得都算OK，但未之於想成日黎食。後來疫情後就多左黎幫襯，品質好似有改善左，而且多左好多人添呀（不過個場都唔係大），所以如果週末冇訂檯的話，就比較難食到。我知道週末就一定多人所以一早6點就黎睇下有冇位，侍應話淨得Bar檯available，咁冇所謂啦，照食可也。幸運地，侍應後來通知有張2人檯可以安排我地坐，所以就可以轉（我地唔係西客，冇要求轉嫁，冇俾面色嫁，好似侍應話個訂檯客比較晏先黎到）。我地叫左2人餐刺身盤有生蠔4隻；紅蝦2隻2樣都好新鮮，特別係紅蝦，估唔到同牡丹蝦有得揮，2隻真係唔多夠喉。頭盤：揀左鵝肝多士及脆青瓜沙律其實鵝肝都算大塊，出面個d分量仲少，配埋好清新嘅沙律可減去油膩。餐湯：有2個揀，一個蕃茄湯，一個係圖中嘅黑松露蘑菇湯。係真係有細細粒嘅蘑菇粒，唔似罐頭個Ｄ咁稀，濃濃地唔錯～手造意粉或意大利飯－燒雙海蝦野菌忌廉汁闊條麵海蝦比較脢左d，但闊條麵就好好食，每條都掛到汁，d汁又好濃郁，果然佢地手工麵好出色。主菜：碳燒美國黑安格斯西冷牛扒配黑松露燒汁 (Medium)今次有點overcook左，似7成熟 ，所以有點嚡。不過我欣賞佢嘅黑松露燒汁，唔會太搶牛扒嘅碳燒味，又唔似黑椒汁咁辣咁霸道，燒汁里有少少黑松露味，所以其實好夾。而且個配菜都好出色，鐘意個燒薯仔同沙律，真係去左不少油膩感。飲品：我就冇另外加錢飲野，淨係叩左杯凍檸茶，都好大杯，其實上次試過乳酪飲品都幾好飲。加埋一就$440左右，其實我食左幾次嫁啦，連埋網上外賣平台都幫襯過一次，多數外賣我覺得唔好食，不過依間嘅外送都好出色，送到上黎都仲熱辣辣，不過我下次都係儘量堂食。依間就黎變左我同我老公飯堂了，但越來越多人幫襯，可能遲下都未必食到。…查看更多

平時早餐叫1仔外賣都會叫牛肋條烏冬個餐，另配香腸+太陽蛋(走包)，飲凍檸茶(+$3)，總$41依個係舊嘅早餐menu~今日如期又咁樣叫啦，落order時話牛肋條烏冬個餐，另配香腸+太陽蛋(走包)，飲凍檸茶，一陣過黎拎。行到去10分鐘左右，一如以往已經準備左係檯面，我見收據同我order嘅一樣，但當我睇個價錢時，心諗$52咁貴嘅，我個份應該未出到黎，所以我就去左收銀度俾錢先。收銀確認話$52，因為加左價，咁我硬食啦，鬼叫自己蠢咩，5月7號落order個時都未加價，估唔到10日後(5月17日)就加價，仲要加幅2~3成，佢個專頁又冇update喎。依個係新嘅早餐menu，仲要專頁都未公佈，硬食。牛肋條烏冬之前係$39，依家係$49 (加左$10)冇提供餐具，只得飲管同飲品匙。只係多左雜菜，其餘份量不變凍檸茶淨係叫走甜（但係冇啦啦走埋冰）我依Ｄ基層市民真係估唔到早餐可以加幅咁大，我人工今年仲要凍薪。我諗從今後我都要另覓早餐地方…查看更多

又到左我的好友生日了，平時係一班姊妹們食飯，但疫情下又要分檯坐，所以好耐都冇一大班人出去食飯了。今次就出去公司附近間嘉里酒店入面，好出名食Dry-Aged Steak嘅賀一賀佢～一早已經係Openrice 留左檯，而且remark係生日飯。當日有電話打黎confirm booking。入面個環境好靚，安排我地坐玻璃窗位，影相可以影埋個海，非常岩打卡呀～Lunch有個Menu，有Casual Set ($240) 同 Business Set ($350). 黎到當然要試下依度最出名嘅Dry-Aged steak，所以叫左2個Business Set，一個係Sirloin同Ribeye  Business Set包括: Sweet Pumpkin Soup; Seasonal Salad; House dry-aged Sirloin steak (180g) or use dry-aged Ribeye steak (180g); Sorbet; Today's Dessert. 就咁睇已經好多野食，性價比高～有2個餐包Sweet Pumpkin Soup果然係好sweet多過咸，有少少唔慣飲甜湯，不過d甜味係好natural，唔係個d片糖黃糖，係來身南瓜本身，所以都好飲嘅。 Seasonal Salad沙律好fresh，有水果又有新鮮菜類，清下腸胃一流。我揀嘅House dry-aged Sirloin steak (180g) - Medium估唔到真係超好味，果然係dry-aged專家，好食過我之前個間Mortions呀。我揀嘅Sirloin 唔多脂肪，有肉味，配埋3款提供嘅海鹽海，岩鹽同紫菜鹽真係一絕。其他醬汁例如黑椒汁同芥末醬都非常夾。雖然2塊細細塊，不過份量岩晒我地d 女仕，因為太好食仲有d 唔夠喉添。原來都包埋drink嫁，我order左Iced CappuccinoSorbet &Today's DessertSorbet 係新鮮芒果味(唔係藥水味)，Today's Dessert係焦糖燉蛋。左上係我杯iced Cappuccino。因為之前係openrice remark左係生日飯，所以係友人嘅dessert度有Happy Birthday字（但我好蠢應該remark度mention埋友人個英文名，或者如果餐廳打電話黎confirm時可以提一提我就好啦~）依家lunch有85折，所以order  2  set business set 就Total $665。服務我地嘅Restaurant Manager非常醒目，見到我地食完就自動收野同放下個dish，又主動幫我地影相，所以依餐我地食得好滿意，個環境同食物質素又一流，真係食個premium lunch嘅好選擇。…查看更多

平時好鐘意去同一條街隔2個舖位個間食辣野，但係今次因為太多人要等位，而且佢安排我地個位又唔滿意，所以就轉去依間。幾滿意依隻分隔檯位置都幾合理，唔似隔離個間貼得好近，近到聽到隔離個檯講乜。而且就係有埋茶提供但唔駛俾茶錢咁正。花椒桂花魚 ($288)真係太多花椒了，有排揀走D花椒呀，下次都係叫返水煮系列比較好。魚身都滑嘅，桂花有半條左右，里面有薯仔整嘅薯片(好味~)，少量薯粉同大量芽菜。辣子田雞 $128依度炸得比較乾身，不過就好重嘅孜然粉，所以好香口，會食唔停口。唔駛加一同茶錢，比隔離個間坐得舒服d，價錢都差不多，下次都會揀返依間。…查看更多

友人補祝我嘅生日飯，相約左依間，原來大家都係第一次食。不過位置就唔近MTR，好彩等巴士途中俾我地發現有架小巴可以直到，唔駛怕站站停有排先到。Menu上有Dinner Set，雖然包soup, Appetizers, Main course 同Dessert，但係款式唔太吸引，所以我地決定單叫。Oyster $198 (Half dozen)真係要讚下依個生蠔，隻隻鮮甜唔腥，有蠔味，飲埋d蠔水仲正。有3個醬汁俾我地點~Lobster Bisque龍蝦湯$68湯里有幾粒龍蝦，好香濃French Edible Crab Risotto 法國麵包蟹燴意大利飯$248我當初以為係成隻麵包蟹蓋俾埋 （畢竟麵包蟹最好食係個蟹蓋），點知見到都諗住中伏。不過食落係好好食嫁，個三角型以為普通餅乾，點知係好濃嘅芝士脆餅，忍唔住食晒成塊。意大利飯有好重嘅蟹creamy，食落又唔會太漏，雖然冇蟹蓋但都有蟹腳，我好滿意依個飯。Roasted Spanish Suckling Pig 傳統西班牙烤乳豬 $298睇相以為份量好少，點知食落其實好夠。烤乳豬個皮唔似我地廣東咁脆卜卜，係有點韌嘅，不過係正常。乳豬 里面Ｄ肉唔嚡，都算幾滑，配埋西式醬汁更惹味。依個叫Girl's Generation $68我一心以為杯野會好all pink，點知個杯咁攪鬼，真係好過癮。最後order 個Chocolate Molten Cake with Vanilla Cream 朱古力心太軟配雲呢拿雪糕  $68可能友人order時話生日隻，所以特別寫左個生日朱古力俾我，謝謝友人～ 雖則地點有點唔方便而且價格上偏貴，但係食物質素係唔錯的，而且星期五晚市差不多全滿，所以我諗應該係質素好吸引好多人黎食～…查看更多