pandamen的個人專頁

幾年前喺度食過係覺得掂！咁啱今日經過咁咪encore 食返同一樣嘢,心諗應該唔會相差太遠。豬扒包- - 搽喺包入面嘅牛油都未烘溶，塊豬扒唔知煎咗擺幾耐。焗豬扒飯- -焗得夠熱汁正常，個飯底似用蛋撈埋就算，完全唔覺有炒過！塊豬扒同個包一樣咬一啖就夾起擺開。呢餐剩係食汁撈飯同齋包自動走肉。咁嘅肉紋同霉到爆嘅質感，一大陣雪味真係完全食唔到！最正係員工收哂枱面其他嘢剩係留返碟豬扒喺度，留返供奉定展覽？好食嘅地方真係要短期內食到爛食到驚為止，如果唔係…..…查看更多

扎肉米紙卷—扎肉無味又紙咁薄！食落剩係得醃蘿蔔味。黑醋牛油蒜蓉雞翼—牛油同蒜蓉味係零，雞翼本身唔入味外皮剩係得陣醋味。越式蝦春卷—真係唔知越南春卷，賣相同味道原來同去飲茶時用隻杯裝住果種乜鬼沙律蝦卷春卷一樣㗎喎！越式生牛肉河—牛肉同河粉正常，但無配任何香葉同湯底淡而無味，果啖湯有一種合成feel。法國咖喱牛肋油香飯—就係見到個名法國咖喱咁有趣先叫嚟見識下。結果係幾塊肉加幾條無味牛筋淋咖喱汁上去（肯定唔係同咖喱一齊煮）已經笑左，除咗鹹味之外全無咖喱香，個所謂油香飯食唔出同白飯有乜分別。咁多人話「正宗」究竟係我味覺有問題…定未食過越南菜？除咗價錢平同份量大之外，食物味道同越南百分百無關！…查看更多

本來一心支持吓餐飲業搞果個United we dine活動。咁就揀一間未去過嘅試吓，見Ritz Carlton 102/F Lounge and Bar menu 都算OK，咪打電話訂咗星期日食Lunch囉！去到坐向窗位置，天氣差無景觀無得怨。但係呢個疫情之下見到張檯清潔程度真係一般！Brunch Menu同之前見覺得ok 而訂位個Menu完全唔同。舉手一問先後有三個人逐個埋嚟答,全部好似錄音機咁得一樣答案:嗰個menu係晚餐嘅，而家係做返 Brunch嗰個!服務弱雞：而家只要去到一間稍為注重衛生嘅餐廳，都會自動派個信封俾你入住個口罩比包濕紙巾未抹下手，呢度全部要開口問。冰凍麵包籃一個，Baguette韌到用力扯先撕得開粒牛油雪到硬過我條命！龍蝦湯好在夠熱味道算正常。主菜揀咗出事率接近零嘅煎豬肉腸！10分鐘內極速食完，留返甜品咖啡轉場先至食好過。…查看更多

一直好奇佢嘅賣點係厚豬扒，究竟好食到咩情度到可以開到咁多分店呢！每次想起去呢就多數撞正午市人山人海而放棄，終於今日下午茶時段我得閒想食時佢又有位。厚豬扒全日早餐火腿片、炒蛋、香草豬肉腸同茄汁豆正正常常。牛角包又凍又韌有老油條質感！沙律菜唔新鮮核核突突咁，豬扒確係厚身又大塊但梳打到毫無肉質纖維，食落仲有乸喉feel！連食咗一半都無就頂唔住放棄。預估計除咗譚仔阿姐獨有語言系統外，呢度好快都會有！落單時叫凍檸茶少甜同熱檸水，嚟到變成凍奶茶走甜同熱檸茶....問阿姐佢就比個黑人問號樣我！如果認為咁就係「好味」豬扒的話，為今日年輕人口味悲哀。…查看更多

一直以嚟台灣薄餅水準都比香港高！自己又好鬼鐘意食呢味嘢。AlleyCat’s、Antico Forno出品平、靚、正，爐燒風味十足。蘇豪區的口味正宗又如何？好多人都唔願專登上去為咗食件薄餅，地點方便真係好重要。銅鑼灣的Mother of Pizza有力一戰！皇阿媽沙律—沙律菜新鮮爽脆調味夠，收貨有凸。肉丸肉醬意粉—肉丸有彈性唔死實，最怕姨媽傢俬賣果隻質感。肉醬味道略淡，意粉做到al dente效果。Pizza 可以揀13’’或18 ’’兩隻size.山洞人啖啖肉/我的柏爾瑪—配料份量十足！餅底夠乾身夠薄有麵粉香，食落脆口無硬到似餅乾feel ！三個人食埋其他嘢的話叫個細嘅雙拼就OK.六點幾嚟到已差不多九成客滿！走果陣未到八點都仲有等位人龍。雖然地方都唔算細，但不設訂位！想食就要耐心排隊等吓位。…查看更多

近期大坑非常火熱的食店之中Envy穩佔一席位！四人來到每人一Set Dinner,另外加一隻想試很久的班蘭葉鹽焗雞。炸雅枝竹片配乳酪-頗特別的吃法，屬於一食停唔到手/口果隻！Envy Garden-清新野菜沙律。Octopus Carpaccio-薄切八爪魚鬚配微酸醬汁啱晒做開胃菜。炸茄子配上大閘蟹粉及三文魚子-蟹粉的鮮及脆口的三文魚子，配上炸過的茄子但完全沒有油膩感，效果是意想不到的討好！Bone Mallows-特別之處不是慣常的配法包，而是配上幾口有昆布調味的日本米飯同吃。油脂加上飯香極度邪惡但食落去又有昇仙feel！Fish of the day-今天的是馬頭魚。連魚鱗用滾油滾熟至可以連骨食，魚味濃肉滑溜。Soup of the day-沒加忌廉只用蝦穀及其他海鮮淆成的極濃海鮮湯！Dry age 30 day porterhouses from Spain-向來對西班牙牛扒好感度一般，印象是肉質纖維粗糙！但這次吃到的是肥瘦適中，肉質嫩滑不膩。班蘭鹽焗雞-向來歡班蘭葉的香氣！但多數用來製作甜點，最鐘意取汁加蛋漿用法包切件蘸來燒烤時烤至脆身加點砂糖來吃。鹹食算是第一次，焗出來的外㝅顔色吸引有淡淡的香氣。雞的外皮意想不到的乾身及脆！雞肉嫩滑濕潤，墊底的雞油香飯.....個個嗌飽但又唔停口食到清碟。食埋自家製Sorbets 呢餐真係完満結束！今晚的餐牌是度身訂造，主要是想盡量多試主理人的招牌出品。欣賞Sandy 及Matt 對出品的執著及用心去配襯組合不同地方的食材！…查看更多

N年前去北海道有路過帶広市，當時除名字外並無留下印象。星期日睇完戲散場行過，見唔駛點等位就迷吓迷吓咁坐低咗！望完簡陋餐牌真係無乜想食㨂得落手....求其手指指篤咗個沙律同個鍋物就算，食完好似無食！唔岔氣上網睇吓其他人有乜捱介，結果瀨到足。蕃茄沙律$69—一個蕃茄可以切到咁多片，薄到食唔到蕃茄味、好刀功！極上海鮮膽漁師鍋$560—無味有腥氣鍋底加雜菇雜菜同豆腐，另外一碟普通料刺身（三文魚、鯛、油甘同一蟹腳各2件及一督腥味海膽）質量比平民居食屋更低。十勝豚丼$145–網上有人話好得必食喎！豚肉柴皮又有渣，仲要加幾粒急凍青豆！一碗兩個人分都食剩一半。如此名物不敢恭維！已經多年無喺香港食鰻魚同海膽。估唔到咁都又要瀨一次！食物唔掂連侍應都可以唔掂成咁。開口埋口我哋呢間嘢專賣炸嘢同打邊爐..........瀨嘢指數🍌🍌🍌🍌🍌…查看更多

回到沒有dry /wet aged ,和牛澳洲和牛或韓牛。普通人家想鋸扒會去邊？美而廉、皇上皇、第尾定花園？小時候屋企甚少出街食飯，如果出去食又點會唔去酒樓而去餐廳吖。有收入後自己會去飛鷹。貪佢餐包夠大、以前跟飯仲唔駛加錢！餐包—拳頭咁大個是標記，翻熱已覺得好好食，仲要搽埋屋企人粒牛油先安樂！羅宋湯—鐘意佢足料同落咗麵撈，飲落去杰杰地果種感覺。鐵板牛柳餐黑椒汁—有段時間怕油煙食親都叫碟上，而家人老咗又回歸鐡板。蒜蓉汁黑椒汁免費，洋蔥汁加$3。8安士以上牛柳肉質有化學處理過但比金鳳輕手，要拗五成定七成無乜意義，只知夠熱唔韌加埋索晒汁嘅粗薯條已收貨。埋單一百有找又満足到心理生理需要，今時今日仲想點？…查看更多

喺某飲食谷內見好多人去試過話唔錯！過咗一排行過就去試吓。滑嘟嘟-牛柳加炒蛋蕃茄湯底烏冬—蕃茄湯底味道偏鹹，唔明有人點解可以食到加湯？如果以呢個連渣形成出現就叫濃湯的話，我寧願返去勝香園。炒蛋就正常炒蛋，牛柳碎到五毫子咁嘅size，可以食得出咩呢？烏冬有人覺得咁叫咽靱有咬口，我會叫呢種做未煮熟。你估而家食意粉Al Dente 呀？慢煮雞翼—慢到從來無出現過。凍檸檬雪梨露—賣晒喎！無論廚房同樓面都嚴重欠缺人手！下午兩點入座，等咗十分鐘執檯落單，落完單又等多廿分鐘.....樓面行過嚟唔好意思你頭先叫咗乜嘢？眼見遲過我坐低嘅都食緊。到全場得返五個客，等多十分鐘走埋嚟講雞翼又賣晒要等。好老實你碗嘢幾好食都無用，更何況只係咁嘅貨仔。吹到點用心做又如何？…查看更多

開頭行過一望個招牌Logo，仲以為Doppio Zero開咗分店！仲話揾日要試吓。撞正呢日入場睇戲前仲大把時間，Yeah~~瀨Lailai瀨瀨！店舗座位非常擠迫，行出行入要搬開圍欄先行到。乳酪Smoothie—係都要你揀兩種味溝埋已經有趣，唔知大家對Smoothie理解係乜？我認知係冰沙！但呢杯嘢質感完全係淡味又稀嘅奶昔，仲要唔多凍先神奇。墨西哥辣椒蜜餞雞翼—面層外皮腍嘅，中間實嘅！仲要唔係辣係鹹L到要飲水溂口，五隻食剩三隻。烤肉狂熱Pizza—餅邊係硬晤係脆！餅身濕到軟晒攞唔起，食落仲要係韌先抵死。餡料辣肉腸、火腿.....我去BBQ唔會燒呢D嘢囉！什麼沖繩肉醬幼扭繩意粉—原來沖繩肉醬係乾身無汁，係一堆又乾又嚡羶味極重肉碎！意粉除咗無味之外食感係正常嘅。單就埋咗但食完好似無食咁，我係嚟食飯唔係嚟Hea,限時個半鐘交檯係合理嘅。但檯細無位擺上菜又一次過咁滯！要客人捧住碟意粉係咩玩法？…查看更多

旺角火車站新世紀廣場以前有間叫Apple Green，抵食夾大件記得都好旺場吓。搬走之後商場翻新執位有幾多人會記得已經改名叫MOKO Mall？新加入唔同種類食肆，午飯多咗好多選擇。平日中午時間嚟到約有八成客人，仲可以揀靠窗位置坐。頭盤自助形式另配唔同價錢主菜，由最平$98三文冶或漢堡包到$328的牛扒都有，誇張地真係有N咁多款選擇！自助頭盤有好多新鮮沙律菜，估唔到連羽衣甘藍都有！最正仲有燒菠蘿，有湯及冷盤肉類外仲有兩款不停Refill唔同口味嘅炸薯條！出去走一轉胃口細D的話都可以收工。主菜揀咗Southern Risotto貪佢有辣味,見到個份量都呆一呆！兩個人食都夠，𥚃面主要有肉腸及雞肉，調味係ok嘅！明白好多人食唔慣正宗意大利飯果種生生地米囗感，一般食店寧願煮到佢淋晒為止好過比客詐形！唯有當台式燉飯咁食。加埋杯餐飲真係飽到叫救命！呢間Brooklyn原來就係Apple Green嘅新品牌！價錢合理食物出品有咁上下水準，係一間做得唔錯嘅進化版。…查看更多

N年前去過增輝後已經好耐無喺深水埗區食晚飯小菜。近期最旺場原來係呢間！樓上樓下兩層環境算乾淨企理，餐牌上有不少特式小菜。菜乾豬肺湯—近年飲到的多數是杏汁，甚少飲到這款最舊式的。飲落肉同菜味道比例平衡有老火湯感覺不過呢款同要預訂。胡椒蝦—胡椒味聞就頗濃，食就不太入味！乾隆生菜包—食味係ok,但再切細碎D口感會好得多。蜜汁鱔球-完全同時食嘅唔同，鱔肉本身唔彈唔脆！口感全靠外層炸漿。調味偏甜到似食緊西多士咁！燒鵝-一般般。窩貼小棠菜-超厚一層彈牙蝦膠。火餡蟶子-大大隻有筷子咁長都算肥大肉厚，鐵板上淋酒點火。僅僅熟有少少酒香味，正！唔怪得七點鐘已嗌咪沽清！呢間店樓上樓下都好旺場！仲見到有張坐十八個人大檯，平時想開飯訂定位留定想食嘅餸穩陣。…查看更多

旺角真係乜嘢奇店都有，呢個位對上一間係流到爆嘅越南餐廳。估唔到摺埋左之後變咗呢間都幾離地嘅餃腩店！賣嘅係清湯腩呢樣野我係向來麻麻，見到價錢都呆一呆！細剩腩$149大嘅$199，粉麵平均$50。唔想食腩諗住都仲有餃子吖點知得兩款咁大把！本來打算起身走.....點知又見到有呢個話要等十分鐘即煮番茄湯底自選配料麵餐。牛筋加芫茜馬蹄餃米粉—落單後三分鐘即到，又話要等嘅？真係接受唔到蕃茄湯加粗幼蛋麵....所以先㨂米粉。一見到碗嘢個賣相都真係幾核吓！湯底蕃茄味淡到似有還無，好迷離。足足落咗三湯匙辣椒油先叫有D味，牛筋正正常常有少少黑椒味，同埋隻餃其實OK嘅。清湯腩無興趣，$320隻醉雞又覺得貴。無乜機會再翻啅除非鬼揞眼！…查看更多

而家有得食台灣牛肉麵地方，分分鐘已經多過日本拉麵！成舊水一碗又有五六十一碗又有，路線有分高低，呢間係走街坊路缐嘅。 冬瓜茶—唔知係咪店家就返香港人口味？比台灣飲到嘅淡咗幾倍。 台式滷味腸旺—完全係果隻醬油味！滷水味道唔明顯而大腸係台灣興果隻靱但未至於咬唔開嘅質感。 招牌豐盛牛肉麵—即係台灣叫嘅綜合啦！蘿蔔貢丸墨丸各一，牛筋腩加條菜。牛肉=牛腩,與平時食到嘅係牛𦟌唔同肉質偏瘦好在無渣。牛筋就真係非常好食！入味有彈性唔黏口。湯頭肉骨餚的味道略淡反而有陣陣蘿蔔味，深色係醬油作怪。麵條硬身唔多索湯！再嚟會係為咗牛筋同其他感覺真係幾台嘅各款小食。…查看更多

話說某次得龍飯局，席上有一對中年男女喺食名物金錢雞時，將成件冰肉夾開放埋一邊話接受唔到成塊肥豬肉擺入口囉！咁每人接受程度唔同OK吖。到大良野雞卷時有就大大啖成件啪入口.....原來唔知野雞卷係成舊油就無事。🤷🏻‍♂️嚟呢度目的係六十年代懷舊撈麵。其實即係豬油撈麵！$29賣相簡簡單單上面撒滿韮黃，麵條全無鹼水味彈性十足每一條都均勻沾上豬油特香味。最厲害係食完碟底唔會有一層油!唔係度度有得食，如果見到有又真係食得過嘅麻煩通知聲！食過一次...真係會對普通撈麵無感，返唔到轉頭！…查看更多