littlefd的个人专页

熊大兔兔最近經常品嚐美食，不過要數印象難忘，就一定唔少得The Big Bite的Honey Garlic Buffalo Wings喇！小店坐位不多，但裝修予人輕鬆的西洋風，大大的紅磚牆和黑板好搶鏡，場內仲坐滿happy hour的人~The Big Bite 主打Burger, 份量的確好大，可以大大啖咁食！Signature Big Bite Burger的牛肉烤得好香，蔬菜亦非常爽口！超多醬的Slurpy Jane就仲大件，雞扒配芝士好好味！麵包仲有濃濃的香草味呀~Burger係好味，但太大件比較難keep溫暖，相比起來，新鮮出爐的Honey Garlic Buffalo Wings真係無得彈！雞翼炸得酥脆不油膩，入口更是超juicy! Honey Garlic sauce 很夠甜，根本不用點旁邊的sour cream~ 食完雞翼，食埋條西芹就清曬熱氣的感覺！雞翼另外仲有多款口味，有辣有唔辣，下次一定再試！買Burger另外可以加薯條同汽水餐，有不同醬汁可選，tates n cream都唔錯！下次想試cheese~ 汽水可以免費添飲，唔怕食到口乾~…查看更多

熊大曾經在鰂魚涌返工，今次就帶左兔兔去呢間隱藏於工廈的西餐廳。夜晚走入工廈都幾可怕，不過去到餐廳發現氣氛都唔錯，而且都有幾檯客人，生意唔錯喎！唯一不足係張檯較矮，食野時要捧住個碟先得~因為之後趕住去睇戲，所以只係點左一人一個main course~ (每款約$100)兔兔的香煎三文魚蕃茄意粉造型吸引，三文魚煎得皮脆肉嫩，醬汁夠味但略為稀身，最好係意粉煮得剛剛好，正！熊大選的牛肝菌香蒜意大利飯，一上枱就已經香噴噴，上面有清新的豆苗，蒜味突出，入口相當creamy,飯粒亦有咬口。是次小試兩道菜均有水準，值得下次再來細意品嚐。值得留意午市雖然便宜一半，但水準並不能與晚市相題並討呀！…查看更多

自從日式食店愈開愈多，近年仲引入不少過江龍，迴轉壽司已經無以前咁吸引...難得當晚去到太古，依然見唔少人在元氣升級版的千兩壽司店排隊，熊大兔兔都決定一試，點知差不多等左成個鐘呀！千兩定價差不多貴元氣一倍，不過餐廳走江戶風情，格局又的確係高級左~熊大兔兔坐左迴轉枱，可以一邊拎野食，一路欣賞師傅煎甜蛋~很快就發現迴轉碟的顏色和價錢好像沒有指引，對於慳家的熊大兔兔來說，難以預算價錢會有點擔心吃太貴了。最後大部份也是落單叫~首先來個江戶風拼盤，可以試多d款嘛~大約百多元有八至九件左右。其中吞拿魚特別好食，三文魚籽也不錯。甜蛋夠平，但略為老左少少。軟殻蟹手卷的蟹腳好脆好味，紫菜亦新鮮爽脆，雖然份量不多，但食到最底仲有料，算是高質素的手卷~卷物要了個鰻魚牛油果卷，呢兩種材料好夾，好難會唔好食。外層的芝麻更加添了口感同香味。熊大兔兔每次食壽司都鐘意叫燒魚之類的熟食，今次見最平呢個三文魚鮫都要六十元，本身都打算放棄了，但最後都叫左！點知上菜有驚喜，因為好大碟、好香呀！有兩大舊魚鮫，汁煮又比燒的更juicy, 醬汁甜甜地，同肥美香滑的魚肉好襯, 好彩有叫呢道菜，為整個晚餐加分不少呢。最後兩人共吃了三百多元，比平日去其他壽司店貴了一百元左右，但計算環境、服務、味道等，呢間升呢版都算值得一試啦。…查看更多

熊大同兔兔放工會經過北角，有時口痕會買下小食~呢度雖然叫三寶皇，但實情煎釀三寶($6有4件, $10有8件)味道普普通通，如果晚上七點前來到就比較多款又夠熱，但好多時太夜收工來到就得返幾款凍凍地的。真正令熊大兔兔回味的係咖哩魚蛋，$6一串有5粒，而且每粒都算大，以現在的物價來說比其他小食店都算平~魚蛋彈牙有鮮味，雖然唔係話入味到內裡都變黃色，但就保留到個口感而不會太淋~咖哩汁好香，少辣帶甜，食完之後仍有辣味留在口中，往往叫人有種唔夠喉的感覺，所以熊大兔兔經常都去翻食，推介！…查看更多

在數碼港工作的熊大兔兔，平日通常帶飯，難得有同事係數碼港艾美酒店會員，可以半價食到酒店級日菜，熊大兔兔當然把握機會跟埋去~入到餐廳，樓底有三四層樓高，而且裝修富時尚感，比市面的和風食店新潮喎！打開餐牌，一人午市套餐定價二百多至四百不等，果然價錢都好酒店級，好彩有半價咋~款式方面都算ok, 魚生飯、燒物、烏冬、天婦蘿等等共有十幾款。熊大叫左個雜錦魚生飯(原價$240)，而兔兔就食同事推介的銀鱈魚西京燒定食(原價$250)~雜錦魚生飯，好・豐・富・呀！多款新鮮刺身，每款兩件~素聞比數碼港另一間質素唔錯的日式餐廳奧壽司仲鮮味，一試之下，又真喎！三文魚分別唔大，而吞拿魚就做到入口即溶喇~估唔到的係甜蛋同蟹棒超水準，蛋又嫩又有口感，唔會煎到老或者一層層散開，蟹棒鮮味無窮！另外配有海蜇前菜，沙律，麵鼓湯同三色水果，當然樣樣都好味高質素（菠蘿超甜）。兔兔的銀鱈魚餐，有兩塊，雖然唔算太大塊，但成個餐份量就好夠喇！銀鱈魚有燒過的香味，但係一d都唔乾，滑不溜口，配埋個香甜的蛋黃醬，真係好好味~配菜方面海哲變左三塊刺身~值得一提係珍珠米白飯免費添食，加多幾碗都仲得，絶對唔會貴夾唔飽！半價食就更加抵喇（加一以原價計），下次都要跟同事再來~…查看更多

下午茶時段來到厚福街，少不免吃個甜品。本想食返心頭好甜蜜蜜，點知路上看到另一間裝修精緻的甜品工房，而且食客不少，機乎滿座，所以決定入來一試。打開Menu,甜品款式不少，新派的刨冰芭菲，傳統的糖水，日式的綠茶紅豆，西式的窩夫都應有盡有，而且圖文並茂，令人食慾大增！兔兔好快揀左款新地，而熊大就想食椰子綿綿冰...誰知間野可以話係百無..新地芭菲都無曬，綿綿冰又得返三隻味。即刻有d失望！最後叫左芒果綿綿冰$42和朱古力雪糕窩夫$48~等左十分鐘左右終於有得食綿綿冰！賣相不錯的~份量亦都幾足。配料有小丸子，芒果肉及椰果絲。味道方面甜度適中，芒果肉亦新鮮夠甜，不過整體不算驚喜。兩人慢慢食完個綿綿冰，仲等多左十幾分鐘，個窩夫先姍姍來遲出現。如果一班人食，上菜時間咁樣真係唔得掂。窩夫賣相都好吸引呀！點知一食落口..個窩夫竟然係室溫架..以為佢搞咁耐係為左烘熱個窩夫，可惜同我幾日前超級市場即買即食的味道同熱度都一樣，用半個鐘只係為左擺得靚靚？唔熱的窩夫好似無左靈魂咁...個雪糕球呢，朱古力味夠香濃，但係雪凍到有冰粒，影響到雪糕的質感。令人失望呀！呢個價錢，尖沙咀有不少更好的甜品選擇。…查看更多

休閒的星期天，熊大去探兔兔，經過APM仲為兔兔帶來左幸福的驚喜！就係APM新開的Paul Lafayet甜品喇！兔兔之前只係食過尖咀店的焦糖燉蛋，無試過其他西餅架~唔知味道如何呢？打開盒仔，有兩件造型精緻的cake, 一問之下，原來每件要索價$40...綠茶果件仲好細...兔兔心甜得黎都有d肉痛呀！因為係熊大買的，唔知兩件餅的原名~首先試試綠茶蛋糕，造型有層次，仲送左件迷你macaron喎！綠茶cream好幼滑，茶味同奶味比例相若，清新剛好中和了甜味，讚！下層有薄薄蛋糕，餅底係脆脆的hazelnut chocolate，搶去綠茶不少風頭哦~附送的macaron味道不算突出，可能因為熊大兔兔一向對macaron不太著迷吧~之後再試朱古力慕絲，呢款可以話係驚為天人呀！好好味~立即成為熊大兔兔的心頭好！外層的黑古力非常香濃，入口係流質的，真難相信它能這樣包住入面的慕絲！慕絲亦分兩層，外面是牛奶朱古力味，滑得像雪糕，內裡則是藍莓味，酸酸的，剛好緩和了朱古力的甜，不然這款就太漏了~當中還有上下兩層海綿蛋糕和藍莓果肉，為幼滑的慕絲注入了不同的口感，檔次的確有別一般的西餅，令人相當回味呀！食完如此高水準的甜品，兔兔甜在心頭，幸福感可說是久久不散，愛・就是這樣甜❤…查看更多

去完港運城food court晚餐，覺得唔夠滿足，所以熊大兔兔決定去附近的利強記買多底雞蛋仔食。不愧係雞蛋仔熱店，晚市都要排四五位先有得食！望住店員即叫即整，蛋漿一落烘夾就反轉，做到雞蛋仔半粒脆半粒軟，所以入口就外脆內軟喇！北角總店的雞蛋仔仲特別有蛋香，脆的程度仲好似食緊蛋卷咁~雖然通脹左要$15一底，不過呢種港式小食真係令人好滿足！…查看更多

熊大兔兔最鐘意抵食夾大件的食物，今次去北角權記食晚餐，亦係貪佢平靚正。$13一碗雲吞麵，連快餐店都做唔到咁平呀！兔兔叫的單拼雲吞麵，有三大粒雲吞，而且每粒都有兩三隻蝦加豬肉，真係好足料！另外麵質都算彈牙，湯底唔算太鹼水，這個價錢夠晒抗通脹啦！熊大叫雙拼牛丸雲吞麵$18 ，加多五蚊多樣餸，但係雲吞反而得兩粒！牛丸亦普普通通，似乎單拼抵d~菜有幾款可以揀，$6一碗都好平，我地叫的腐乳通菜都幾新鮮~另外支裝汽水都係$6一支，望住懷舊的汽水樽食雲吞麵，特別有回憶感！值得一提係麵檔算乾淨企理又唔迫，晚市不用等位，服務勤快，兩人食飽飽唔洗$50，仲可以去邊搵？…查看更多

難得lunch前到灣仔開會，會後兔兔就拉住熊大去食呢間出名pizza!原本見到咁多人，熊大都唔係好想入去，但見到open rice竟然一個喊面都無，又咁岩有二人位，所以都決定入去試試~門口一個個24＂大的pizza真係相當吸引！食肉獸熊大好快就揀左件god father $40.一塊真係好大，我覺得近乎有全個pizza hut普通批咁大呀！熊大話比佢在美國食的更大塊呢！想用手拿著吃都唔得，要用刀叉先可以喇。教父有意式肉腸、辣肉腸丶火腿同洋蔥，可以話係啖啖肉呀！批底無港式pizza咁厚，但又唔似意式pizza咁薄脆，介乎兩者之間啦~但食完一件真是超飽肚呀！至於兔兔認為難得來到，梗係要試左招牌貨先啦！比起教父，呢塊招牌薄餅$45仲多左mushrooms and olives! 一睇都知豐富呀！兩塊pizza都好好味，當中洋蔥絲的甜味令人覺得好清新！唯一的不足可以話係唔夠多蕃茄醬，吃著批底批邊就比較淡味喇。另外無得平平地加野飲就有d失望，我地最後去左旁邊的come buy買台式飲品。中午時候實在太旺了，雖然有位坐，但係無人執檯，又有人企在附近等位，最後只能匆匆吃完就走，無得細意品嘗了。…查看更多

熊大兔兔之前已經去過鰂魚涌的burger mix了，這一直是熊大的心水burger店，這次來到北角海運城food court吃晚餐，熊大也二話不說就挑選了burger mix的檔口。雖然這店標榜的是和牛安格斯漢堡，不過今次熊大就選了關西風燒雞漢堡套餐 $39。雖然價錢略貴於M記的套餐，不過包的size大得多，而且仲係配薯角同凍奶茶，所以價錢都ok啦~看上去也相當豐富哦。味道方面，雞堡中有生菜和蕃茄，雞扒又嫰滑又多汁，直情食到d燒雞汁滴出來，好juicy呀！不過咁多汁令到麵包淋左少少~薯角普普通通，算幾脆但唔夠熱。凍奶茶沒想到是台式奶茶這種，唔洗叫少甜都唔會過甜，奶味亦好夠，好過之前在鰂魚涌叫罐裝餐飲！在food court坐亦都舒適過鰂魚涌的專門店呢~見到旁邊有人叫左burger mix的日式飯同沙冰，覺得好奇怪，唔通依家的burger店都一定要出飯餐先可以做晚市生意？其實食burger都唔錯丫？…查看更多

放工後來到北角附近，想平平地吃餐晚飯，便來到港運城的food court. 這個food court約有8個檔口，其中包括KFC同大快活，所以想吃特別點的話，選擇就不算太多了。抵讚的是坐位數量足夠，晚巿亦不用等位，而且坐位都很舒適乾淨。兔兔很快就選定了味佳居的檔口，因為價錢相宜，而且檔口的食物模型滿吸引。一碗粉麵加飲品三十幾蚊，算是比其他越南餐廳便宜了十元八塊的。兔兔叫了個香茅豬扒湯檬加可樂。食物等了幾分鐘就拿到了，可惜賣相教人失望，豬扒細塊得被生菜蓋著，差點就看不到。配菜也就只有基本的洋蔥和蔥花，當然也是沒有驚喜的。味道方面就不過不失，熊大還說豬扒有點酸味...不過兔兔認為，以這個價錢來說，就不能要求太多了。不知其他檔口可會有更好的選擇呢？…查看更多

早幾日才試了東海堂最新的cake little系列蛋糕，估不到淘大分店更進一步，推出多款消暑特飲，而且價錢比加價後的happy lemon好像更便宜，在炎熱的天氣下挺吸引人一試。熊大叫了一個十勝紅豆抺茶，標價$18，特價$15。抹茶顏色很對版，不像某些台式飲品般很假又或者水汪汪，底部的紅豆亦很大粒。喝下去甜度很適中，抹茶味尚算香濃，冰塊亦不會過多，紅豆香甜好味。東海堂近日的新形象和新搞作都非常切合市場，而且質素不俗，令人期待它作出更多新嘗試。…查看更多

熊大兔兔約好去淘大影藝睇戲，買完飛就在附近覓食等入場。早上十一點半人流未算很多，即使戲院旁的開飯熱店都仍是空空的，不用等位就可內進。第一次來到覺得裝修還不錯的，一入門口的位置有一排bar枱，店員則招呼我們坐sofa位。打開餐牌，吉列炸物挺多元化，雞、豬、蝦都有，而且還有滑蛋、和風汁及咖哩汁的配搭，最重要是價錢親切！飯和炸物的size分成梅竹松三種，亦即是小中大的份量，切合不同人士需要，非常貼心又環保。飲品方面加$6就有，兔兔選了較特別的巨峰提子乳酸，店員很快就送上。賣相不甚討好的紫色飲品，一喝下去就發現中伏了！！完全是粉紅色藥水的味道:( 以後還是不要貪新鮮叫特別飲品了！熊大兔兔亦叫了一碗大的雜菜豚肉湯兩份分。幸好這湯對味多了，用料豐富，有紅蘿蔔、白蘿蔔、洋蔥和豚肉片，很香很好喝。飯方面，兔免叫了滑蛋吉列蝦飯$45，四條大蝦很足料呢！之前在丼丼屋的價錢更貴卻只有兩條哦~ 吉列蝦炸得很脆口，而且蝦肉也挺鮮味，有海鮮的咸香。白飯是珍珠米，雖然只是梅size已經有吉野家特盛咁大碗！滑蛋份量略少，洋蔥亦有點太生，可惜今天咖哩暫停供應，否則應該比滑蛋更下飯的。熊大的和風汁吉列雞扒飯，$39已有120g的份量，另加了$9大飯，好大碗呀！雞扒比炸蝦更勝一籌，不但外脆內嫰，脆皮亦沒有皮肉分離的情况，拍得住其他索價貴幾倍的吉列專門店呢！和風汁酸酸甜甜很開胃，而且飯中亦有汁，不會吃掉面層就變得很乾。菜絲夠爽口，但份量很少。桌上亦有豬扒汁及芝麻醬任用，味道不錯。雖然沒其他貴價專門店有得玩生磨芝麻，但勝在方便又實惠。平日吃得下三碗飯的熊大最後亦沒法完成那個加大飯，實在是眼闊肚窄，建議大家不是超大食就不用加飯了，可能單點多個炸物更好。（聽說是飯價減$20）最後吃飽飽埋單只要$125，還送多兩張$8現金券，抵呀！總的來說是性價比很高的吉列店！…查看更多

熊大的爸爸一向茹素，今日約好了兩家人來到南蓮園池食素菜午餐~ 熊大兔兔已經第三次來了，除了因為素菜好味，亦因為南蓮園池既近地鐵站，風景又靚，可以說是城市綠洲！不過熊大兔兔失策在沒有book位，令到幾位長老由12:30等到1:15先有得入座，好彩公園夠靚可以周圍行下影相！大家記得book位喇~無啦啦整張風景相？非也，因為龍門樓就隱藏在瀑布之後，在香港應該沒有其他餐廳如此有詩意了。老人家一定喜歡呀！龍門樓設最低消費，午餐每位最少$95，小菜每款$75-$90左右，基本上亦不難達標。這個五福拼盤是我們每次必點前菜，貪其選擇夠多，當中又以柚子粉皮及菌類最美味。拼盤分為大中小三款，我們六人叫了中款（$145）~點心一般$28/3件，我們叫了篜素菜包及蘿蔔酥角~菜包軟熟，內涵豐富，不錯哦！這道菠蘿咕嚕麥纖是這次的驚喜之作，酸酸甜甜的醬汁很開胃，麥纖外形沒有刻意扮作咕嚕肉，入口卻有外脆內煙un的口感，沒有想過素菜亦有這種咬口呢！菠蘿亦非罐頭貨式，夠新鮮，必試推介！雜菜白菌豆腐煲，蔬菜排得整整齊齊，賣相精緻。當中的薄豆腐非常嫰滑，配上各樣蔬菜及菇類，感覺健康又豐富！這個素菜版的肉絲炒麵亦有多種蔬菜及麥纖，麵底亦有點脆，挺香口的，而且份量不少呢！飯粒分明的炒飯，配上松子口感不錯，不過吃到最後兔兔真是很飽...已經吃不出什麼味來..上一次來龍門樓應該是一年前了，今次再來亦保持水準，沒有失望，生意似乎更勝從前呢！雖然龍門樓只賣素菜，但美食美景亦令人感覺滿足。吃飽後再在公園欣賞各種植物，在鬧市中仍予人一種遠離煩囂之感。…查看更多