or#Tm65175762的个人专页

經過見到餐牌幾吸引，就叫咗三色芋圓豆腐花，見到網上食評都唔錯，所以本來都滿心期待，但係一嚟到見到個賣相，先發現圖片只供參考。首先，原來個兜唔係圖片嗰個透明膠杯，而係啡色外賣紙兜，至於入面嘅嘢，就係所有嘢倒埋一齊，好似幅圖咁。另外，攞埋嚟先發現原來碗嘢係熱的，雖然天氣凍，但係食落都係怪怪的。食落發覺原來黃糖水得面頭咁多，食到底已經覺得好淡。芋圓其實唔錯，不過救不了大局。好彩三十幾蚊都唔算貴，不過後悔浪費了quota 😩…查看更多

之前經過已經想試佢嘅沙律，本身想搵位同朋友堂食，但係我喺左邊門口入，見唔到右邊門口條隊。喺我想入去睇吓有冇位時就被職員喝住，問我做乜嘢，叫我出返出去等。咁搞到我即刻唔想堂食，但又懶得搵第二度，結果就買咗外賣400 grams沙律，盛惠$90。我點食咗cous cous, beetroot, garden salad, quinoa四款。其實味道唔差，不過外賣$90真係性價比低，食完又唔係好飽肚。如果$30一盒我都唔預有咩服務，但佢收得呢個價錢，可能至少唔使喝人？先祝佢好生意啦，但我就冇下次了。…查看更多

同朋友喺西環搵食，我係食素嘅，所以見佢貼出嚟話有素餃就決定入去。我講完要食素餃，職員就話得豬骨湯底。我問有冇其他，佢話俾滾水我。結果朋友照食，都係叫素餃麵。係好味嘅，不過素食配素湯會好啲。…查看更多

之前經過見到已經想試，今日終於去咗食。呢間小店得四張椅子，張枱都唔係好大，但店長係台灣男人，好好禮貌好好人 👍🏻由於餐牌唔多嘢食，試咗滷肉飯同起司蛋餅，再叫咗冬瓜紅茶嚟飲，加埋都只係$63。滷肉飯啲肉汁夠多，啱晒唔喜歡食白飯嘅我。起司蛋餅啲芝士流出嚟，同樣好啱我呢個芝士控。至於冬瓜紅茶就好清新，適逢今日天氣咁熱，非常啱飲。整體嚟講樣樣嘢都好味，店主亦好有心，可惜位置問題，唔係咁易見到，所以由落單到食完都冇第二個客 🥲。如果喺附近住或者返工，平時諗唔到食乜，呢度絕對係好選擇，就算買外賣都ok。不過始終枱櫈少，同朋友飯聚當然唔啱啦。…查看更多

之前聽人介紹，終於約埋幾個朋友去試二世祖。叫咗好多人介紹的蜜糖芥末雞翼、明太子意粉、豬肋骨嚟食。雞翼第一啖已經覺得個味好好，仲要放咗一陣都仲脆脆哋！明太子意粉個汁略嫌有啲太稠，不過味道唔錯。豬肋骨就又juicy，又大份（可以切到八條）😋。不得不推介的係青蘋果沙冰，味道清新又有真青蘋果肉，又大杯又解渴。唯一唔好嘅係一夠鐘，佢哋就算冇客都會趕你走。我哋細食又食得慢，成枱三碟嘢都仲有嘢未食完，但侍應已經兩度過嚟催我哋埋單還枱（當時大半間店都係吉枱，我諗佢哋想早啲收舖）。雖然餐廳位置吊腳，但食物絕對值得一試。不過如果三五知己想坐低慢慢傾，佢就未必啱你了。…查看更多

同朋友慶祝生日，去到研究咗一陣，覺得個semi-buffet唔太吸到，反而單點好似選擇較多，所以冇試到buffet。叫咗個海膽意粉同牛扒，仲有seafood platter。海膽意粉係見到openrice有人推介，果然冇令人失望。牛扒就只係叫咗件細的share，但其實都大份夠食。海鮮盤放到同食放題差唔多，一大個兜同雪咁上，印象中同餐牌張相唔同，但唔影響味道，都算好食。成晚食物係好的，連任refill的包都好食，但間餐廳坐得太滿，啲侍應太忙，唔得閒理啲客。最失望係叫咗蛋糕，但佢哋唔肯寫人名，話因為廚師好忙喎。喜歡食意大利餐的話，呢間都係好選擇，不過要專注食物，唔好因為見佢靚同貴就對服務有期望。…查看更多