Angela C.的个人专页

喺偏僻嘅商場中偶然發現呢間小店。人流唔算多，有唔洗排隊嘅cafe實在難得😀睇得出呢間店好有心，除咗有寄賣本地農產品，更融合呢啲農產品製作Gelato： 好似「本地有機芫茜牛奶」、「紅菜頭冧酒提子」、「火龍果檸檬」呢啲創意組合咁。Gelato嘅收費平均$58 一球，唔算平，但新鮮自家製嚟講誠意滿滿，加上店舖幾重視環保，唔用即棄餐具，所以都甘心支持。講吓Gelato嘅味道：1） 本地有機芫茜牛奶🌿 有鮮芫茜味，食到少少渣嗰種真材實料，但整體其實牛奶味比較重。對芫茜黨友嚟講覺得茜味可以再濃啲。2）馬達加斯加🇲🇬黑朱古力🍫呢隻朱古力有陣天然嘅莓香果味，偏酸同苦，比起芫茜味冇咁甜，對於唔想試新嘢嘅人嚟講係穩陣嘅選擇。飲品：咖啡同茶飲價錢意外地幾親民，$40甚至$30 樓下嘅選擇都唔少，屬於良心價錢。3）Flat White $384）高山玫瑰配焙茶 $32份量同味道屬中規中矩 ，咖啡有拉花！ 侍應喺拎過嚟餐檯時仲有耐心解釋飲法，好有禮貌。對比喺中西環區嘅同類型Cafe，呢間嘅質素同性價比高，仲係Pet friendly，整體嘅體驗都好好👍🏻 …查看更多

早有聽聞讀HKU嘅同學仔都識Hemma呢間shop話係全香港最好食嘅cheesecake，所以期望過高啦。以下總結咗失望嘅地方：❇️欠管理12:30 walkin 咁排隊，Hemma門口貼住幾隻大字「籌已派完」，但見出面人龍大概7-8位客人仲排緊隊，過程中大家都好confused應唔應該排落去，但都冇職員出嚟了解吓。有部分客人等得太耐想買外賣，重複問完又問，最後先知係冇take away服務。建議店員貼張signage俾人知安排，可以減少好多誤會。❇️食物及飲品嘅質素以呢個價錢嚟睇，我寄予厚望，但結果只係中規中矩.....流心效果係正嘅，但都淡而無味，算好食，但不至於要排隊食。❇️漏單入座有時限，但係咁漏單，叫三樣嘢，其中一樣係臨走10分鐘先送到，嗰樣係「四季春」茶...... ❇️環境嘈吵呢間Cafe前身係Good Good Groceries，都係一間IGable但唔太好食嘅Cafe (原諒我直話直說）但至少Good Good係營造到清靜之美，而Hemma播嘅音樂加埋嘈雜嘅人聲，令人有置身花園街嘅感覺.....hand drip咖啡&四季春茶都係好普通，性價比唔算高。…查看更多

想同朋友搵個地方坐低傾偈、飲杯嘢，見到寶湖花園呢個舊商場竟然有間環境咁舒服嘅Cafe，就決定揀呢間～由於呢間係Vegan Cafe，見到佢用Oatmilk 燕麥奶沖咖啡，本身期望好低，覺得唔會好飲得去邊（對不起各位純素友！） 但估唔到都幾易入口，比較淡口味，但都覺得算唔錯。 無平時全脂牛奶咁香濃，但勝在飲完唔會肚痛（乳糖不耐）店員拎過嚟嘅時候好有禮貌，又整得幾靚，雖然覺得佢配嗰枝小匙羹唔算好實用，但擺盆係好賞心悅目。最主要係享受個環境，可以好好咁傾偈。欣賞Cafe內有漂書架、舊報紙展示大埔歷史、同埋一個「技能交換」嘅水松木板，等客人悶悶地時可以睇吓，同身邊人又可以多啲話題可以傾。呢度係無洗手間嘅，最近要落樓下街市嘅公廁，好彩都好乾淨嘅。…查看更多

大埔超級城其實分咗ABCDE Zone，而呢間Cafe正正位於人流相對其他Zone較疏落，比較隱蔽少少嘅Zone A! 印象中佢係疫情最嚴重嘅時候開業，所以過去一直未有機會試。捱到一年真係唔容易，我諗當中會有佢嘅吸引力🧲今日係我第一次幫襯（唔係鱔稿，真心因為佢好好先決定寫）舖頭好細，只設有6個座位。有舒服嘅bar枱位同以木箱搭建嘅位。環境非常舒適，係日系簡單裝修，無多餘同華而不實嘅裝飾（有啲Cafe吓吓都倒吊啲乾花、尤加利葉同擺打字機😂.......）叫咗一個Set ：🍰+🍵 = $65Cafe嚟講呢個價錢算幾抵，要知道市區出面叫杯啡都over $50，再加cake夾埋冇$90 都走唔甩！味道好有驚喜： 利申我係一個低糖主義者，攝取過量嘅糖除咗令健康做成負擔，皮膚都會變差。呢度嘅Cake睇返出面Poster先知係標榜「少甜」，原來真係冇呃人，食落比較淡口味。我諗平時飲開全糖半糖珍珠奶茶嘅人，試呢度嘅Cake同飲品可能會唔慣；但由於我慣咗少甜，如果要形容呢度嘅蛋糕同Latte，我會覺得佢係介乎3分甜嘅甜度，所以食得好安心 我好欣賞佢個 Earl Grey Roll Cake雖然唔甜，但擺盤都落咗心思— 用糖霜撒喺碟，唔夠甜可以用蛋糕沾多啲，又賞心悅目！食食吓，老闆同老闆娘問我：「你飽未呀？」本身我都話飽，但老闆手上拎住件Scone話係研發中嘅新品，打算中秋節推出....話免費請我食，睇吓覺得好唔好味。 厚面皮地要咗，成件事真係好窩心呀～可見得呢間小店好以人為本，一定會繼續幫襯…查看更多

第一次幫襯係新蒲崗首店，人地門面企理，員工態度又殷勤。今次呢間鰂魚涌店真係有待改善。差#1: 🤧 勁難開嘅玻璃趟門幫襯過都會明我講咩，度門其實好明顯日久失修，遲早有安全問題。另外，員工嘅私人物品周圍擺，貨又亂擺。差#2: 🤧 人手問題入到去，3點幾，得我一個客，舖頭有三位年輕員工，全部都冇戴口罩........冇人招呼，或者問我要啲咩。 其中兩個掛住食米線、傾偈； 收銀掛住睇外賣啲單。我已經講咗想要order乜嘢，但佢地零反應——— 我再講多次，收銀終於應我：「好，等陣。」之後收銀再同食緊米線嘅員工講：「有人網上落單。一陣要送20杯外賣！」講完照樣大家若無其事。我體諒佢多單，等啦⋯⋯⋯企咗差唔多近10分鐘，佢地咩都冇做，茶都冇整過一杯，佢先再問：「你要飲啲咩？」 真係曬晒人啲時間。好彩最後其中一位員工以5分鐘都冇嘅神速整咗飲品俾我。差#3 飲品好稀因為唔係第一次飲，之前喺新蒲崗店都飲過一模一樣嘅menu，但呢間分店沖嘅方式可能唔同，好似飲緊冰水咁，火龍果成份極少，好多碎冰。個啲nut cream比例同飲品差好遠，有圖有真相⋯味道真係好一般。…查看更多

同男朋友一人叫一碗冷刀削麵（$68可自選一樣餸） 揀咗招牌手撕雞，本身可能有好大期望，見佢電視上面播緊「香港開電視」嘅訪問介紹，睇到師傅好用心準備食物....好吸引結果食落發覺太有落差，有啲失望。雖然份量真係好多，但有啲over多，啲麵好難消化、口感硬，所以食得會唔太舒服，個胃頂住頂住。啲雞非常乾，入口有雪味，唔推薦。反而見幾多人叫湯麵，我諗湯麵會比較好，麵會易咬易吞啲，同冇咁重口味（啲擔擔醬同麻辣麵有啲重手，食到底好口渴！！！）小食嘅木耳落糖重手。服務幾好 唔算難食但都應該冇下次了。…查看更多

公道講，杯啡係幾好飲嘅，但做得生意對客人態度唔好，會影響人回頭再幫襯。深水埗太多咖啡店，行咗一圈決定揀呢間，欣賞佢夠樸實，專心做啡。入到舖頭嘅時候咁啱另外一位客人準備走，可能冇閂實門（我地都無留意佢閂成點）我向店員講：「唔該⋯⋯想要兩杯Iced Latte少冰吖。」店員冇eye contact，零回應（100尺空間內，得我講嘢）咁我估佢忙緊，等佢忙完再重覆一次，店員突然間皺曬眉，語氣好差咁話：「閂返好道門啦！」我同朋友都好錯愕，感受到店員將anger發洩我地身上面。 硬食咗佢呢句，都費事解釋唔係我地問題，只係想買杯啡姐。重覆咗第二次想飲咩，店員再次唔俾回應。 到我預備俾錢示意我想買嘢嘅時候，店員態度唔好地反問：「要咩㗎？」 整體會覺得佢對客人幾無禮貌&唔attentive....（心不在焉？）都幾委屈無啦啦被咁樣對待。可能佢喺我地進店前遇過好多麻煩客人先咁grumpy，又或者本身性格係咁？睇到openrice前幾篇有人都提到態度問題，先放心咗，唔洗take it personal....…查看更多

琴晚男朋友帶我到此餐廳慶祝生日。因為之前網上面Book唔到位，7:00 walk in ，被告知要等45 分鐘，都接受到。論食物：唔好意思⋯⋯真係唔講得上好食，份量少，普遍過鹹、辣同重口味。性價比好低。Vegetable Kothu 係一堆濕炒嘅粉，入面加咗啲好似大陸名物「螺螄粉」酸豆角咁嘅嘢，勁鹹同酸同臭，我地都食唔到，要吐返出嚟Potato chili fries 嚟嘅時候呆咗，得個sauce bowl大小嘅碗嚟serve，入面係啲切到好細嘅薯仔cubes，非常鹹，但本身隻味係似熱浪薯片。 Hopper with Egg 呢個我可以形容佢做一陣風，食完好空虛，塊薄餅非常薄，沾椰奶醬同一啲新鮮辣醬食，已經係最唔重口味同較好食嘅一款。無甜品食，有啲失望。 論服務： 可能因為星期五Happy Friday嘅關係，個場好full，大家都忙到不可開交～Front desk係一位講英文嘅白人姐姐，態度好好，仲主動話俾水我地。用餐時其他服務員都好關顧我地需要，仲有耐心解釋menu。論環境：坦白講坐得唔算舒服，環境比較擠迫，晚市嘅室內燈光昏暗，難以睇到食物嘅顏色，影相都唔係好靚。所以都冇咩點影相。…查看更多

呢間cafe，俾我印象四個字「虛有其表」。無誠意、員工態度欠佳，對人流控制又冷處理。 好聲好氣問佢拎餐具、仲要等幾耐先可以到（坐咗半個鐘未有嘢）面口語氣都極差。奉勸想帶女神嚟tea吓嘅人，都係搵過第二間把啦，呢間嘢只會令你失望，仲浪費成個鐘時間等有檯。食物hea到一個點，擺堆火箭菜同幾塊ham都好意思收人$108講整Sourdough 好食，不如食中環嗰間（大家可自行openrice）人地會以新鮮煮嘅肉做主菜，自己煮醬汁做調味，唔係呢間Lucy咁馬虎。…查看更多

首先網上啲相同真實嘅舖頭係有落差舖頭好細，加上疫情要限聚，入面坐到8個人左右⋯ 每位客人用餐限時75分鐘， 出而排隊排到傻都未到你。而職員都未有盡責check吓出面人流，態度亦愛理不理。然後有最低消費每人$80但食物嘅質素又未到有誠意值個價錢中環蘇豪區嘅消費都有啲比較豐富嘅食材配搭呢度嘅食物較單調、份量少相對係 overpriced instagram上睇落係有溫度嘅小店現實嘅落差好大反而去大埔、西貢一啲同類cafe人家真的是有禮貌又有心整食物向客人宣傳食物嘅概念等所以 真係只此一次算啦…查看更多

同男朋友經常幫襯意蠔屋嘅晚市，最吸引之處係買滿$50 就送一客小食，份量好多。沙律唔係普通hea爆雜菜加啲醋嘅⋯而係Romaine 羅馬生菜🥬加煎煙肉粒、蟹籽同蒜蓉包粒等即叫即整嘅新鮮沙律！ 個湯係南瓜忌廉湯👍🏻 食到啖啖南瓜蓉意粉中最推薦蟹肉蒜片天使麵，勁香，啲蟹肉又多，價錢又唔貴⋯ 兩個人食$95埋到單認真係區內比較好食又唔貴嘅選擇，超推薦小資一族同慳錢嘅情人們食吓平價西餐嘅選擇，高質過好多Cafe！…查看更多

喺附近做gym、無意中見到呢間餃子店，啲餃子款式比普遍餃子店要多⋯⋯ 試咗唔係成日有嘅西洋菜餃同埋洋蔥牛肉餃，前者好清香，皮薄餡靚；後者有啲似食緊X野家牛肉飯個重有豐富肉汁嘅味道，好食！推薦大家一定要加佢地自家秘製嘅麻辣菜葡蒲一齊食！身上唔夠現金，好彩佢地有得用其他付款方式俾錢⋯⋯因爲舖頭唔算大，位置比較「隔涉」，人流都唔多，坐得都好舒服。性價比係唔錯，會再幫襯。我發現全港最好味嘅餃子店都集中喺九龍區！…查看更多

星期日，到到都迫滿人，想搵個人少少嘅地方，靜靜地坐得舒服⋯⋯呢度係不二之選！ 小店位置唔多，少於十張檯。homestyle裝潢，服務態度都好似屋企人咁，爽朗而友善。 唔想飲咖啡嘅人、推介你地飲茶～ 主要係佢夠大壺，得你慢慢斟，唔似出面連鎖店得一個杯同茶包咁hea。玫瑰花茶嘅味道幾清新，不過唔鍾意甜嘅人記住同佢地講走甜。下午茶有set，有甜品、亦有鹹點如烘三文治🥪款款價錢實惠。PS: 店主係五月天fans！ 會睇到好多相同埋CD、海報，五迷不要錯過，同佢傾兩句～…查看更多

琴晚同朋友喺尖沙咀一帶覓食慶祝生日，然後好隨心咁幫襯Goolo，俾佢嘅裝修吸引咗，好復古又得意。叫咗好多嘢食😂： 虎咬膳良豬（素肉）+ 虎咬原隻軟殼蟹啤酒炸豬肉丸5粒咕嚕拼盤（$98）有12件炸豬條，裡面包括 1）梅頭肉 2）豬腩肉 3）豬爽肉 & 4）神秘嘅每期限定豬 各4件。 同埋跟餐加$5 焦糖雞蛋布丁🍮嘢飲就分別叫咗 有氣嘅夏枯草同洛神花茶。整體食物都好好食，特別係個素包（睇吓啲相就知） 炸得好靚，咬落去外脆內軟又juicy，飽足感滿分，好味過前排素食界好hit嘅「未來堡」！ 店員好nice，會向我地推介食物，完全無hea答，多謝佢推薦嘅醬汁，流沙蛋黃醬同咕嚕汁都好食，牛油果醬就混合咗cream cheese同香草，如果唔鍾意parsley嘅朋友應該唔好嗌。…查看更多

想食得清淡啲，叫咗素腸粉（$18）。本來係特別期望，因為素俾人感覺無肉同較單調，點知係有驚喜⋯因爲佢好colorful！紫色嘅紫椰菜、綠色嘅芹菜、橙色嘅紅蘿蔔、啡色嘅冬菇，夾埋烘咗嘅芝麻，齋睇賣相已令人食指大動。 另外仲叫咗好特別嘅紫米砵仔糕，紫米味道香濃，口感好彈牙，好厚實～ 幾好食！重點係老闆娘，即使一腳踢仍然保持親切態度對人，唔似出面食肆只得短促交流淡如水嘅對答。 睇報導話佢單親媽媽獨力開店，我好欣賞，7:00 開門，啲材料你地可以幻想要幾早去預備⋯⋯⋯⋯ 仲要湊仔陪溫書，可以瞓到幾多呢？我好佩服呢位女性！…查看更多