gingerbaby25的个人专页

人在觀塘，忽然間想食魚生海鮮丼，醒起一田超市入面哩間嘢，就試一試佢。我今次點咗大卜口、中卜口、海膽、赤蝦、三文魚、帶子、立魚、什錦海鮮漬、厚切三文魚腩..... 個飯係醋飯，加咗海苔絲、芝麻同蔥。姐姐擺盤攞得唔錯，未食睇到都開胃啲。第一啖先試個醋飯，好味喎。佢個飯醋味唔會好搶、微微食到有酸味，軟硬度適中。大卜口咁啱我果舊就有筋嘅，但都尚算肥美。其他刺身正常嘅，係三文魚切得薄咗少少。蝦頭有啲變黑咗感覺唔係幾好，但食落無問題嘅，因為你唔會連蝦頭食嘛。至於個海膽呢，哩個價錢我收貨嘅，但佢一定唔係好靚嘅貨嚟啦。要讚一讚幾樣嘢，厚切三文魚腩真係好肥美，有魚油香；個什錦海鮮漬都漬得好味，唔會死咸，咸香又少少甜，真心好食。叫咗咁多嘢都係$200唔使，性價比係高嘅。唔好抱住食日本菜嘅心態，當自己食緊車仔麵就得喇。哩度勝在有set好咗嘅丼，亦可以俾你自己揀刺身，食多食少任你話事。超市咁嘅價錢，但佢個質素係遠勝嘅，所以一定會再嚟呀....…查看更多

唔試唔知咁好食！趁住天氣未係太熱，就趕快嚟池畔餐廳食咗先，因怕太熱坐室外會熱到食唔到。但其實餐廳環境原來好舒服喎，頭頂有把大吊扇吹住，天氣再熱少少都應該無問題嘅。麵包係新鮮睇住佢出爐再上枱，好食到不得了，我哋忍唔住加多咗一條包呀！青口好大隻，嫩口唔會老，用白酒忌廉煮，無得輸。八爪魚腳出奇地軟身，刀一切就入，絕對唔會𡁻香口膠咁；加埋佢炭燒燒到外脆肉軟，每一啖响口裡面爆發炭燒、海水、八爪魚鮮味.... 加埋個軟綿嘅口感，哩個真係必試呀！龍蝦蟹肉餅都好出色！佢全塊實的的都係肉嚟，唔係撈pat白汁响入面hea你嘅。肉一絲絲分明，唔會水冷冷。再薄薄加層麵包康去炸，炸出嚟外皮薄薄酥脆，內裡真才實料，堅係正！龍蝦意粉都唔錯，龍蝦唔老，意粉個汁勁濃龍蝦味；意粉彈牙唔糊口，唔錯唔錯。甜品朱古力mousse都出色，三層唔同濃度朱古力分別都好味，又唔會死甜。朋友生日仲可以預先要求佢幫我寫埋happy birthday.... 總括而言全餐食咗約$1700係唔算平嘅，但酒店餐廳，有環境有服務有食物質素，個人覺得係抵俾嘅。間唔中想食餐好嘅哩間餐廳係唔錯嘅選擇。…查看更多

Sabatini係一間唔會令人失望嘅餐廳。因疫情關係，brunch雖然好多嘢都無限添加，但就唔再係自助餐咁自己去拎。侍應會由頭盤開始每樣食物俾啲你試，試啱可以叫佢再上。麵包係自家製嘅必定好食嘅，但就要小心唔好食太多，否則食唔到之後嘅嘢喇；仲有，枱面放咗陳醋同olive oil，想搽牛油可以問侍應攞。頭盤有蟹腳、龍蝦、火腿加蜜瓜，同埋有啲其他青椒藜麥沙律咁上下嘅嘢。龍蝦好一般，蟹腳唔會死咸，鮮甜有海水味，肉都多，所以要添食啦。仲有個火腿都係另一個精選嚟，咸香配上極甜蜜瓜，人間美食.... 頭盤可以無限添加嘅。跟住侍應會上一人一罐魚子醬，可以配麵包籃入面嘅多士食，咸香好好味.....餐廳中間有廚師即場整食物，可以出去點餐，煮好侍應會送過去你枱度俾你。有湯、牛他他（必食）、黑松露炒蛋（必試）同其他燒物..... 唔怕食生牛肉嘅就必食牛他他，牛味濃而且加埋啲調味勁好食；要供生食嘅牛一定係靚牛肉先可以咁樣上，所以必定係食到好嘢。黑松露炒蛋炒得嫩滑，而且蛋香同黑松露不嬲都係好夾嘅，鍾意黑松露就一定要試吓。Pasta ok，好味嘅但比起其他嘢就無咁吸引，要留肚就唔好添食喇。主菜無得無限添嘅，有羊、牛（要加錢）同魚揀。極力推食medium嘅羊，因為真係做得十分出色。羊肉好嫩好嫩好嫩.... 有羊味.... 加錢叫嘅牛扒，廚師上菜時會拎3舊黑松露响你面前即場刨，好慷慨俾好多黑松露你，直頭係全塊牛扒俾佢遮晒.... 試過牛同羊之後，我都係覺得唔使加錢嘅羊好食啲.....甜品有4款，4款都好味。餐包每人一杯果汁同餐飲，酒店啲咖啡都好好飲。食完飯仲可以落佢餅店買全宇宙最好食嘅蝴蝶酥.... 咁成餐飯就完滿喇.....…查看更多

鍾意食濃味嘢嘅人應該會好鍾意蘇媽哩間馬拉茶餐廳。食物質素好平均，試過嘅菜全就部都無令我失望。第一次嚟等咗成個鐘先有得食，但食完真心覺得係抵排嘅...... 第二次就晨早未夠11:30就到門口排隊，一開門就有得食唔使等。據觀察，周末想唔使排就有得食，12:00前一定要到，越晏就越要等，大家自己睇路啦～～必試肉骨茶三層肉、仁當牛咖哩麵、辣死你媽、蝦麵......要讚一讚姐姐嘅服務質素，姐姐好親切有禮；就算超爆超多人，姐姐都保持有禮，好有耐性咁招待客人，好抵讚呀～～ 用餐經驗滿意，好快又會再去食過......…查看更多

原本book咗嚟Grand Hyatt Staycation慶祝生日，包早餐及晚餐 Tiffin 嘅自助餐；但由於疫情關係，6:00後禁咗堂食，酒店只好將晚餐buffet轉做lunch buffet（但價錢一樣）。由於有食開Tiffin嘅dinner buffet，好清楚午餐比晚餐少咗鵝肝、羊架、豆腐花；凍海鮮啲蟹腳唔係一大盤放出嚟，只係插幾支出嚟，好快就俾人攞晒了。今次午餐都會包每位一隻龍蝦，可以揀凍食、香草牛油燒或芝士焗；欣賞佢貼心地將個箝拆晒肉，塞埋落隻龍蝦個身度，食得好方便。龍蝦唔老，肉質爽嫩彈牙，無令人失望。其他食物質責都保持到嘅，最開心係食唔同口味嘅雪榚。…查看更多

哩間泰國菜，每隔一排就會有心癮，想去食佢嘅豬手同船麵。見近排天氣涼咗，又係去食返碗熱粉麵暖胃嘅時間。今次叫咗鳳爪湯金邊粉、咖哩雞金邊粉、豬手、椰汁冰。鳳爪質素一時時嘅，我試過佢太好生意，未煮夠身就要賣，咁個鳳爪就會偏爽啦。今次哩碗係啱啱好，滷水好入味，皮軟而未至於融掉，入口一啜啲肉連皮就即刻離晒骨。超好味。咖哩雞個汁好濃好夠味，辣辣地好暖身。原本每次嚟都會叫豬手粉或豬手飯嘅，但今次覺得叫碟爭豬手可能會抵啲；的確無決定錯。豬手好大碟好抵食呢。豬皮好多膠質，好軟好入味，就算皮內嘅瘦肉都唔會硬.... 結果兩個人，一人一碗粉，再加成碟豬手，食晒..... 哩度粉麵嘅份量我覺得都唔算細，隔離枱一個大男人食一碗湯粉唔加其他嘢都夠。4-50蚊一碗咁有質素嘅泰粉超級抵食。佢仲有好多其他菜式㗎，小食小炒全部都好得，不過近排唔知係咪疫情關係，無開爐無小炒食，如果唔係必叫馬拉戔炒芥蘭。…查看更多

間唔中就會想食吓邪惡嘅炸雞，癮起時就必定係食李家，因為好味又抵食。蜜糖蒜蓉炸雞係我嘅致愛，雞本身醃時已有少少辣，加埋蒜香同蜜糖甜，真係超好味。佢個脆漿做得好好，唔會太厚，沾咗蜜糖都唔會軟咗，讚。炸魷魚鬚又係另一必食之選，由於脆漿實在大出色，香口鬆脆，送酒一流。新菜式辣雞腳當然要試啦....... 辣得嚟唔會係死辣，佢個辣味好豐富好精彩。雖然無韓國當地食嘅咁辣，但哩個都絕不嘢小，食到飆晒眼水，但真係好addictive，食到嗌晒救命但都係要不停食..... 食得辣嘅話哩個雞腳都係必食。…查看更多

任食大閘蟹就唔好預佢會好大隻啦，而且佢係乸同公都有無得揀件性別嘅。但，那又如何？大閘蟹最緊要係膏多，就算俾夠7-8両一隻嘅你，但無膏嘅話一樣係把鬼。所以任食大閘蟹嘅重點唔係佢幾大隻，而係佢多唔多膏、上菜速度快唔快同會唔會漏單。另外，由於齋食蟹未必夠飽肚，所以餐廳除咗蟹之外，其他食物嘅質素都好重要。利寶閣性價比高係抵食嘅。佢個片皮鴨好好食，蟹多膏，糯米飯都得。我去當日唔係好多人所以排片皮鴨都快嘅，蟹未上時可以食住片皮鴨先慢慢等..... 蔥油焗大閘蟹好特別，同清蒸分別好大，蔥油香不但唔會搶咗大閘蟹嘅甜味，反而仲將佢個鮮味帶到另一層次，個人好鍾意。限時兩個鐘所以係生死時速咁同大閘蟹搏鬥，唔建議同朋友去吹水食飯，因為兩個鐘係唔會有太多時間傾到偈，大家會好靜好專心咁拆蟹食。全餐都無漏過單，上蟹速度快，但你要自己預吓時間提早啲加單，因蒸蟹需時。甜品有豆腐花同雪榚，但太飽同大趕所以無食到。…查看更多

餐廳的晚餐令我一試難忘，得知佢仲有午市點心提供，當然要再試埋佢啦。一上第一個小梨子咸水角簡直係驚艷呀。造型得意，最驚喜嘅係佢個皮撈得好好呀...... 講真咸水角個精髓我個人覺得絕對係個皮。皮要唔油，脆而軟糯，味要咸中帶甜同甘香..... 哩個真係不得了，凍咗都仲係咁酥、唔油同好味。潮州粉粿係有啲失望嘅，一般啦唔係唔好色，但對比起個咸水角就有點失色。今次嚟專程要會一會佢個灌湯餃嘅，都無令人失望，有原粒乾瑤柱好足料，湯底個金華火腿味好出。蝦餃皮薄同有好多蝦，啲蝦好彈牙。古法馬拉榚我覺得有好少好少白糖榚果種酸味，可能用同一方法、麵種發酵所以味道有啲似。甜品係腰果合桃露同綠豆清心丸，腰果合桃露味道好濃好好味，啲果仁應該先烘到好香然後先再煮嘅，質地好濃稠，要試哩個甜品記得要留肚。清心丸應該改良咗唔係用彭沙撈嘅，雖然無咗果種彈牙感，但彭沙始終係化學嘢食咗對身體無益，改咗都係好事嚟。清心丸質感有啲糯米feel，軟軟彈彈咁，都ok嘅，不過我就鍾意個腰果合桃露多啲。餐廳服務質素維持到嘅，員工都好好態度，好勤快。…查看更多

雖然係哩間餐廳嘅常客，但每次嚟都剩係掛住食無影相，所以無寫過關於佢嘅食評。餐廳食物質素同服務水平都維持到，所以要寫返一次贊吓佢還佢一個公度......任食火鍋嚟講，101嘅食物質素係超乎預奇地好。沙嗲湯底好濃，一上枱就有沙嗲香撲鼻而來。牛頸脊夠牛味又tender，碌到啱啱熟仲pink pink地係最好食嘅。其他火鍋料質素都好好，性價比超高。最抵係佢任飲係連埋酒嘅。今次試咗佢個黑梅可樂沙冰，好味好夾，唔古怪嘅，推介俾唔知揀咩飲嘅朋友。好抵贊佢唔似一般任食火鍋咁有限時，約朋友食飯加唱水一流，唔會傾傾吓夠鐘俾人趕。餐廳仲有個露台，可以出去吹風睇夜景。冷氣都好夠涼，唔會食到出晒汗......…查看更多

用鳥籠serve嘅下午茶，仲要每兩位有一份Darphin護膚品送，性價比超高。下午茶精髓除咗咖啡/茶之外，個人覺得個scone都好重要。原本對哩間餐廳嘅食物質素無咩期待嘅，因為佢唔算出名；老實講係覺得有得食有得拎好抵，所以抱住一試無防嘅心態嚟幫襯嘅。點知，一試佢個scone好有驚喜喎。其實scone唔係咩特別嘢，但可能就係普通嘢先最考廚房嘅功力啦。哩度個scone好味嘅，夠牛油香，唔油而且外脆内鬆化；個jam同clotted cream都好味，配埋食好完滿。其他咸甜點都好味。原本諗住哩個價錢仲有嘢送應該唔好抱太大期望同咁高要求，但試過之後覺得佢交足貨，性價比高。就算唔再做聯營優惠，都會再嚟呀。個咖啡都好飲，真係一個不錯嘅下午茶選擇。…查看更多

疫情關係，餐廳提早開11:00，食11:00嘅2:00 last order，3:00前要離開。由於晚上6:00後禁堂食，餐廳唯有做兩轉生意。原本無限時變到有限時，但其實時間好充足，都唔會趕嘅。麵包自制嘅，每款都好好食。意大利菜湯雜菜味濃，伴麵包一流。餐廳會先上一盤前菜/海鮮拼盤，內有哈蜜瓜加火腿，咸香火腿加哈蜜瓜嘅甜簡直係絕配。蟹腳偏咸、龍蝦仲老過本人，所以就算可以無限添食，我都無再encore喇。即制/燒烤食物要自己出去點嘅，佢個他他牛就必食啦；個松露蛋多士都好味，蛋滑，加埋淡淡松露味又係好夾嘅。主菜個羊超級好味，肉嫩多汁，好pink唔會老.... 推..... 個三文魚就正常.....到上甜品時其實都已經飽到上心口，甜品中tiramisu 最好味，其他都正常，無失望。以食物質素及服務計，性價比都高嘅，想食餐好嘅不妨一試。…查看更多

12月食大閘蟹已是尾水，基本上都唔期望會有爆膏嘅蟹喇，叫做盡最後努力食埋今年最後一次，跟住就疊埋心水等出年先再有得食了。一開始食頭兩隻係好失望，蟹可能唔太新鮮就死就死，食落無蟹味兼且仲水水地（蟹一死肉就會化水跟住發臭），諗住食多兩隻就收手。點知第三隻開始個質素又响返度喎，有膏、甘香肥美。所以食蟹有時都好睇彩數，就算同一批蟹，每一隻嘅個別質素都可以唔同。好彩之後食嘅全部都正常，終於發揮後勁食咗好多。今餐全部係蟹公。油鹽焗嘅好好味，但始終油咗啲唔可以食太多。值得一讚套餐包嘅其他嘢食都好味，壽包好大個建議要share食，奶豬皮脆肉嫩，抵讚。…查看更多

算高質嘅日本菜餐廳。壽司飯嘅調味唔錯，而且刺身溫度調較得好好，唔會仲係好凍咁就serve俾你，啱嘅溫度配埋好味嘅飯，成件事可以話係相得益彰。唯一覺得有啲唔方便嘅係，佢有一本餐牌，然後再有一張點菜紙落單嘅。餐牌有相睇有寫價錢，點菜紙就無圖無價錢。結果係你唔可以只睇點菜紙就點菜，因為唔知價錢（除非你食飯唔使睇價錢啦）；最後要點菜嘅話你要先睇餐牌，揀啱然後再响張點菜紙度摷返個菜名出嚟落單，都幾唔方便。餐廳位於哩個地段仲要係日本菜，你都估到佢唔會太平；但佢嘅食物質素係好嘅，都值嘅。想揀間餐廳食餐好嘅時候，佢都不失為一個好選擇。…查看更多

三希樓除咗川菜同火鍋做得出色外，佢個點心都做得好好，今次介紹吓佢個午市飲茶。無諗過川菜餐廳可以整到咁好味嘅叉燒，好彩嘅話有機會食到一件分開三粒，有晒肥、膏同瘦肉嘅叉燒。無咁好彩嘅都唔會失望嘅，因為佢全碟無論肥定瘦，都好好味。肉質軟但仲有咬口，唔會係軟晒豪無質感可言，或死硬果種。佢燒得好好味，豬肉甜香多汁味濃。牛肉腸同鮑汁雞腳都好好味。作為常客呢，有好多今次無叫嘅菜/點心/飲品都好推介嘅，例如黃金南瓜、滷水豬大腸、麻辣滷味拼盤、洛神花茶；如果夠人多呢，一定要叫佢個原桶桂花糖豆腐花，超滑而且豆味好濃好香㗎。但由於原桶上，起碼4個人先食得晒。…查看更多