Sweety1201的個人專頁

今晚，第一次幫襯呢間酒樓，兩個人叫了孖寶，有蒸沙巴龍躉魚同半隻燒雞，價錢$208，質素中規中矩。差不多食完，見隔離3人枱有糖水，問侍應係咪有糖水送，佢話依家冇糖水送，諗住佢做細未必話到事，於是再試吓問吓高級啲著西裝嘅男經理，佢答依家改咗冇糖水送，但我聽到另一邊隔離有位太太同佢朋友講呢度有紅豆沙送，叫朋友食埋先走，過了一陣，有位女經理捧住5碗紅豆沙送去俾果兩位太太，我就問呢位女經理係咪有糖水送，佢疾咗一下，話係人哋order, 我再問頭先話有糖水送嘅太太係咪叫嘅，佢當下答係呀，到女經理捧住餘下三碗糖水送去另一張枱時，太太同我講唔想令經理難做所以答係，佢都好認同佢哋做法太唔公平，我同佢做得咁小家，一碗紅豆沙值幾多錢，淨係送俾熟客，生客就冇得送，冇生客何來會有熟客，既然食得咁唔愉快，亦都唔會有下一次，依家市道咁差，有邊間餐廳食店唔想留住客人，但呢間酒樓連碗糖水都要選擇性咁送出去，絕對唔會再去。…查看更多

好耐以前都食過上海婆婆嘅其他分店，見商場新開了就試試。每枱都有一個熱水壺，裝住有茶色嘅水，無錯，呢壺可說是水，完全沒有茶味，睇了餐牌，發覺涼菜類價格都幾高，所以唔打算叫，最後叫了生煎包、嫩雞煨麵同農家小炒肉。嫩雞煨麵先到，啲麵有少部分仲痴埋一舊舊，明顯廚房煮嘅時候沒有極鬆，麵亦不是煨麵般嘅質地，湯味淡。農家小炒肉，賣相同味道都極似回鍋肉，只是少了回鍋肉嘅配料-竹筍，味道濃偏咸，但碟頭細，以價錢來講屬於貴。最後嘅生煎包，一見到賣相就知係先蒸熟再煎，完全不是生煎，一夾起個底是軟軟的，即是話根本沒有煎脆，底部只係微微金黃色，都不要期望有肉汁，三個包當中，其中一個仲要有骨嘅😒此店嘅水準同上一手尋魚記一樣，不知道是否只轉了店名，但肯定唔會再嚟食，果杯淡如水嘅茶都仲要收茶錢，真的不了。…查看更多

偶然經過呢間酒樓，見環境裝修都不錯，於是就試吓，被安排廚房門口位，其實當時成間酒樓只有兩枱客，我問有否其他位置，侍應話其他有客訂了，心諗咁多人訂位唔通好好食🤔 叫了茶 - 瑰荔堂煌，即玫瑰荔枝茶，比較少有，聞係幾香嘅，飲落不及聞嘅香，不過還可以。太極蝦餃 （3/5） 蝦幾爽，不過冇筍，調味稍稍咸咗啲啲，黑白皮味道上冇分別。燒賣皇 （4/5） 燒賣幾好食，多蝦、豬肉少量，勝在蝦爽脆。懷舊蟹肉灌湯餃 （3/5）整體味道較淡，都真係有蟹肉但唔多，感覺一般。甜梅菜叉燒腸粉 （1/5）腸粉皮夠薄，但梅菜唔香，叉燒偶然有一兩舊有豬肉腥味😖蘿蔔絲脆脆卷 （1/5）呢個點心係第一碟上枱，未食已經聞到油膉味，而且望上去偏油，廚房油炸功夫差，食落更是成日油同油膉味😖之前提到座位正正係廚房出入口，而左轉行經兩張枱就係廁所方向，果度附近一大陣嗅味，總括嚟講，我就唔會再去幫襯，以呢個價錢還有好多更好選擇。…查看更多

早餐時段見門外不算多人排隊，加上入得都算幾快，只排了大約10分鐘，排隊期間見隔住玻璃有位女士食剩好多，成碟通粉好似未食過咁，都諗係咪唔好食呢🤔 叫了一份沙爹牛肉麵跟炒蛋丹麥酥、凍檸茶少甜少冰。首先嚟到係凍檸茶，明明叫了少甜少冰，但冰一啲都唔少，於是叫職員俾隻杯我裝冰，隔咗冰之後杯檸檬茶只淨返半杯，檸檬茶茶味淡，而且係勁甜，只係一杯沒有茶味嘅檸檬糖水，即時同職員反映，不過職員係聽完就走左，一句都冇回應過，至於食物，炒蛋一般，滑嘅但蛋味唔濃，丹麥酥牛油足，沙爹牛肉麵嘅沙爹味唔濃，屬普通茶記水準，梳打粉太多令到牛肉肉質過鬆，而且冇牛肉味，食過就明白剛才位女士為何食剩咁多。最後提醒各位，呢間餐廳只收現金。餐廳嘅職員比一般餐廳多，服務速度好快，但禮貌不足。…查看更多

嚟過兩次，第一次嚟試了雲吞麵同水餃麵，雲吞同水餃屬高質，幼麵冇梘水味👍🏻 酸蘿蔔味道佳，但成餐飯嘅敗筆係店員用抹枱布抹完枱之後，枱上遺留下嘅臭味，嚴重影響用餐體驗，唯有快快食完走人。隔咗一個月再次幫襯，因上次聽到隔離枱食客盛讚豬潤好食，於是叫了豬潤麵，一坐低又係聞到抹布留下嘅臭味，亦見店員每次都用同樣兩條抹布抹店內嘅枱而每次抹完都冇見到有清洗，只見兩條抹布放埋一堆，今次再食酸蘿蔔，覺得味道差了，蘿蔔有苦味，咁啱見到店員為每張枱添加蘿蔔，職員係戴住手套用手隔住樽口倒去部分樽內嘅醋，再加添蘿蔔，但佢事前係戴住手套去落單、抹枱、送餐，而並沒有洗手再去接觸蘿蔔樽，OMG, 見到之後即刻唔敢再食，另外豬潤多筋，並唔係我杯茶，如果下次再食都只會叫外賣，因為佢啲枱布臭味令人作嘔🤮…查看更多

近排買外賣嘅機會越來越多， 燒味亦係加餸嘅好拍擋，經開大圍，以前有朋友介紹過《阿爺燒鵝餐室》啲燒鵝唔錯，幾好食，咁就要試吓！當你經過舖頭，就可以見到整整齊齊嘅燒鵝排晒係度，燒鵝外皮色澤光亮，見到就自然好想食，今日一於去番屋企加餸啦！ 燒鵝係招牌菜，梗係要叫啦， 我鍾情下莊，就係貪佢夠肥，食落肉質肥美，味道唔錯， 有濃郁嘅燒鵝味道，值得一提係燒鵝帶有煙燻嘅香味，真係又juicy又好食！現在凡買滿$100 ，就可以加$18換購「少爺雞」半隻， 咁抵，一定加啦！ 黃油雞煮成的， 不但有香濃嘅雞味，而且皮下脂肪少，肉質特別嫩滑 ，抵食之作！餐牌如下👇👇👇👇…查看更多

今日去咗大埔嘅《溏串小町》食dinner ! 餐廳位於大埔翠和里5號麗和閣地下D1號舖。餐廳環境不錯，仲有客人影相留念添， 好溫馨呀！ 免費餐前小食！ 這份《日式鰻魚飯》，我相當滿意， 因為份量足， 有大大條嘅鰻魚，鰻魚真係好厚肉， 口感十足， 配上燒汁嘅鰻魚， 好惹味， 好好食！ 嚟到梗係叫番個《串燒拼盤》， 食物包括有菠蘿，冬菇、翠玉瓜、雞翼同豬肉串，食物相當豐富！ 我最鍾意食《菠蘿》同《雞翼》！ 串燒菠蘿超好食，新鮮菠香甜多汁， 真係一試難忘！ 串燒雞翼， 肥瘦適中， 外皮燒得香脆， 肉質香滑， 味道不錯。下次可以試吓壽司同刺身， 因為價錢都算大眾化！ …查看更多

從朋友得知Pizza Hut出咗新野， 名叫《現製手藝薄餅》。 今日約了好友一齊去試吓先！ 今日， 我哋叫咗個2 人套餐 $293 ， 包括有現製手藝薄餅、小食、 葡汁雞焗意粉、 餐湯& 餐飲。 我選了一個 《三文魚誘惑》， 味道非常惹味， pizza 外脆內軟， 非常鬆脆， 仲有煙煙韌嘅口感， 皆因經過人手搓壓，而麵糰亦經過長時間低溫環境發酵，所以焗出超好味嘅Pizza ， 真係好好食！ 小食有腸仔同雞翼， 雞翼好食， 有雞味， 雞肉嫰滑，yummy ! …查看更多

今日又特然想起《生炸無敵大雞髀太陽蛋飯》， 住係元朗嘅朋友一定知道我講邊間餐廳啦！ 無錯！ 就是萬芳冰室， 佢隻炸雞髀好有名， 雞髀又肥又厚肉， 醃得好入味， 當然係即叫即炸啦！ 因為隻雞髀是生炸的， 所以要等15至20 分鐘， 但我覺得值得嘅。 雞髀炸到脆卜卜， 外脆內嫩，仲好juicy 𠻹！ 值得一提就係隻大陽蛋， 充滿蛋香， 配上白飯一起食， 真係Perfect ! 一啖雞髀加一啖蛋飯， 太滿足。 好耐無食過紅豆冰， 叫番抔先！紅豆大大粒， 仲要煲到起沙， 甜度適中， 好正！ …查看更多

今日去咗沙田行街， 見有少少肚餓， 就在商場食個午餐先！ 我去咗 Mimila食lunch，因為不用等位， 食完 Lunch 再Shopping。唔該一碗《馬來辣蝦白毛豬肉湯麵》， 材料非常豐富， 有蝦、白毛豬肉、芽菜同貢菜。我最喜歡就是馬來辣蝦湯底， 有濃郁嘅鮮蝦味，好食！ 原來白毛豬真係味道特別鮮甜，可惜得幾片啦！ 今日我叫咗個「摻摻」麵，它是由兩種唔同嘅麵煮成的一碗麵。這碗麵混合油麵同米粉， 所以有兩種口感， 粗身嘅油麵加上幼身嘅米粉，食落幾特別。 油麵富有彈性， 少少煙韌彈牙，掛上湯汁， 當然非常惹味啦！ 近排成日下雨， 叫番杯薏米水去吓濕先， 甜度適中， 好飲！ …查看更多

以前來過 「New York Cafe」食晚餐，見到有午市套餐非常抵食， 所以今日一於試吓! 一個午餐由$54 蚊起， 包餐湯、主菜同餐飮， 真係好抵！ 餐湯係粟米忌廉湯，粟米打成蓉， 味道清甜， 再加入忌廉， 非常香滑。 我叫咗烤雞肉意粉，意粉煮得煙靭有囗感， 雞肉嫩滑，外皮有少少香脆，味道當然好好！ 值得一提就係個凍MOCHA， 做得好出色，有一層好厚嘅cream， 真係又香又滑， 帶有香濃嘅朱古力味， 好飲！我十分支持街坊食店，價錢親民， 真材實料， 係元朗人氣餐廳！ …查看更多

聽說這間日本店質素好，今次有機會嚟試一試，午市選擇都很多，有點選擇困難症嘅我，最後叫了個三色魚生丼定食，定食包括了前菜、湯、沙律、蒸蛋、甜品，好豐富。三色魚生有三文魚籽、帶子、海膽同吞拿魚腩蓉，其實我對三文魚籽有點抗拒，皆因以往食過帶有腥味，但呢度嘅三文魚籽完全一丁點腥味都冇，反而有鮮甜味，令我改觀了帶子大大隻，又厚肉又新鮮另外我最愛吃嘅海膽，好好...好好味可惜份量只有兩隻，太少了到吞拿魚腩蓉，食得出係新鮮貨，整體嚟講，成碗丼飯都係上佳之作，用料新鮮這餐廳用料新鮮，午市價錢實惠，絕對值得再三來幫襯…查看更多

靠得住都真係靠得住，除咗粥粉麵，仲有小菜㗎，晚市門外多數都會出現一條人龍，但好彩每次都不用等好耐。一坐低，待應就會遞上一壺蘋果茶，好喜歡呢個茶好香好清，試過去吉之島搵過，只能搵到同牌子，但就是搵唔到呢款蘋果味，所以有時嚟呢度食都有點是為咗飲蘋果茶先講蒜茸開邊蒸蝦，蝦上面放滿蒜茸，底下鋪了粉絲，粉絲吸盡蒜茸同蝦嘅味道，簡直係成碟餸嘅精華所在，粉絲就成了這道餸嘅主角了另一叫了砂鍋雲吞雞，先講個湯底，用了金華火腿、豬骨、雞去煮，味道好濃，亦有火腿嘅咸香味，雲吞內蝦同豬肉比例剛好，蝦又爽口，至於雞肉好軟熟好嫩滑，可惜只得1/4隻，略嫌少一點，如果有半隻就好喇…查看更多

呢間小店無論什麼時候都人頭湧湧，門外總是被一大堆人圍住，有的等位，有的等外賣，雖然要等但都是值得等的。這店款式唔多，分煎餃同湯餃，可選6隻或8隻，亦可加上海麵或米線，今次叫了木耳椰菜豬肉餃拼冬菇木耳雞肉餃，每粒餃子都係大大隻同漲卜卜的，好足料，木耳椰菜餃有椰菜嘅清甜味，而冬菇雞肉餃都有冬菇嘅香味，兩款都有木耳絲，所以食落脆口，口感豐富，加上無味精魚湯，有少少膠質，非常清甜，食完餃子必定要飲晒整碗湯，真是大滿足。…查看更多