到此一遊的个人专页

男朋友撞正爸爸節生日, 為左唔想同太多人迫所以提前一日慶祝. 訂檯時要求近窗口位, 服務員對我要求都一一答應.十二時間始用餐, 去到先發覺酒店正門原來橫街, 大鄉里出城咁慢慢去到2樓, 已經有人開始用餐. 地方不大, 行左一個圈已經睇晒有咩食. 沙律有兩款dressing同配料任你撈. 其他冷盤好似火腿, 凍蝦等等都幾好食. 熱葷類真係好少, 數埋都唔夠十款. 但都係大路野好似時蔬, 咖哩雞, 三文魚頭, 炸雲吞, 日式pizza等等. 仲有老火湯同西湯飲, 不過西湯唔夠熱同真係好太濃太杰撻撻啦. 有個即煮粉麵檔, 都好多人幫襯喎, 不過都係留返個肚食其他野好過.好快我地就停晒手想開始食甜品. 旦糕呢part真係好令人失望. 唔係話唔好食, 但佢畀我既感覺係唔食都冇損失. 而其他人大讚既movenpick雪糕係唯一令我覺得呢個自助餐值得既一樣野. 當日有8款雪糕都畀我試暈晒. 當中最滿意既係swiss chocolate, 真係每一啖都有朱古力架. 其他好似焦糖, 士多啤利都好滑. 雪糕呢環真係水準之上. 不過唯一要彈係雪糕太受歡迎啦, 好多小朋友都搶住"筆"雪糕. 個個都你又搶佢又搶非常忘我果時,睇住佢地對住幾桶雪糕口水花四濺. 我....真係接受唔到囉. 總括黎講, 食物平平, 甜品(只限雪糕)令人滿意. 服務員快手快腳同好有禮貌, 主動提醒某幾張信用卡有折. 當然最後要多謝開飯張coupon啦 ! …查看更多

男朋友就黎生日, 好早已經plan定同佢一齊食自助餐慶祝.12點幾到達, 已經有3成人入左席. 未開始食前晌buffet檯前行左一個圈, 直覺款式都唔係太多. 冷盆方面: 最多人一窩鋒去搶長腳蟹, 凍蝦等, 幸好refill好快, 唔好令其他人冇得試. 凍蝦好新鮮, 但長腳蟹係異常地十分之咸!! 我食左一隻已經放棄. 眼見其他檯全部收碟都係一大碟既蟹殼, 佢地既嚐"咸"程度小妹實在佩服. 沙律方面: 可自己挑選自己喜愛既款式, 如果冇idea既可以叫chef 提供意見. 我就揀左紅椰菜,車厘茄同紅腰豆, 黑醋同olive oil 令沙律更鮮味. 前菜方面: 我留意到呢D係比較冇咁受歡迎, 因為個個都去食蛋腳嘛, 我只係試左少少, 有菠蘿沙律, 青木瓜沙律, 味道不過不失啦. 反而我好欣賞佢既芝士配餅乾, 雖然只係普通既克力架, 但食得出係岩岩開封而唔係放左好耐既. 仲有餐包, 有我最愛既提子餐包, 軟綿綿, 配上牛油有係yummy yummy. 刺身方面: chef 十分有禮, 唔錯. 我其實唔多食生野, 但一場黎到, 都試左吞拿魚八爪魚. 吞拿魚好新鮮但八爪魚就冇味. 可能我真係唔識欣賞啦.潮州打冷: 好大排檔feel, 我冇食呀, 但男友就話唔錯. 有豬紅呀, 墨魚呀紅腸等等. 最岩有碗粥一齊食啦. 熱盤方面: 款式好大路, 有豬排, 魚柳, 白汁千層麵, 薯角, 西蘭花, 你諗得出都會有, 其中一款咖哩雞好入味, 如果有埋白飯就更加好! 仲有即煮粉麵檔, 可以任選自己鍾意既材料, 有魚蛋, 貢丸, 牛丸, 仲有麵, 米粉, 河粉任揀. 但個人覺得食buffet食粉麵有點怪, 而且我都冇咁大個胃口啦.甜品啦: 反而呢part我有D失望, 第一款式已經唔係多, 但買相又唔係太討好. 印象中藍苺芝士餅係好一點之外, 其他例如bread pudding 就太淋, 鮮果撻冇味, 朱古力mousse太甜, 朱古力噴泉得個玩字, 其他...都冇乜印象啦. 另外即整pancake都OK, 材料任你配. 最多人都係用雲呢拿同朱古力做餡, 味道唔錯. 雪糕方面, 大家都知道係用"哈境大師" , 味道當然有保證啦, 但最奇怪我之前行一圈睇有乜好食時(當時大約係12點3到), 發覺每桶雪糕都己經冇左一半! 唔通食客一入黎就食雪糕唔食其他? 定係連早餐buffet都提供雪糕? 小妹真係孤陋寡聞啦. 我試左芒果雪芭同朱古力, 個雪芭真係似食梗真芒果咁, 朱古力就好滑. 仲有其他幾款, 不過我真係夠晒皮啦. 最後附上餐茶一杯, 整個用餐都晌好滿足. 幸好安排坐晌近窗口位置, 今日正係酷熱天氣警告中, 場內中間位置會太陽由天窗射入黎, 相信呢個位置會比較熱. 多謝開飯啦既贈卷, 埋單2位都唔過$200. 晌呢個地點, 服務, 我會畀85分. 自助餐真係一次半次好啦, 一來食得太多身體唔健康, 二來我發覺小妹既胃口真係比其他人細. 眼見其他人食完一碟又可再追加另一碟. 自問我真係冇咁既本事啦. 到第三碟已經開始投降啦. 如果要我畀更多既價錢食自助餐, 對我黎講都不大化算呢! …查看更多

晌淘大附近住左2年, 平價同高檔既餐廳都試得七七八八. 講真我呢個無飯家庭日日出街食真係食到有d悶.有日放工又再經過方媽既檔位, 咁岩最口淡淡, 就去方媽度買碗酸辣湯麵返屋企做晚餐. 雖然有一段時間冇幫襯方媽, 但去到佢都仲記得我呢個"舊客仔". 唔知係咪因為我係第一批晌方媽岩岩開業時就幫襯既人呢? 例牌叫左一個酸辣湯麵扲走. 期間望一望牆上既價錢牌, 只係事隔2個月, 一碗湯麵已經由來$15加到處$17! 無計啦, 而家乜都加價, 好似唔加就係有問題咁. 返到屋企即刻開餐啦, 一打開...咦? 碗湯冇煙出既? 食一啖, 面色一變, 成碗野只係暖, 最後要我自己開爐整返熱佢. 而個麵底明顯係少左好多, 以前食到大半都已經好飽, 如今食晒成碗都唔夠. 到底係我大食左丫?定係佢地偷工減料? 我有同自己講話係我生大食積, 但望住碗湯就好明顯係料少左好多. 以前有木耳, 豆腐呢d材料, 而家只係得幾條木耳, 三小片豆腐咁就出貨畀客人. 將貨就價呢種精神已經不可避免...到底係邊個既錯呢? 要晌九龍灣/牛頭角搵一餐平過$15既晚餐, 怕且除左晌明星海鮮酒家既$14外賣飯盒外,都冇其他選擇.…查看更多

一早同老細過中環見客, 點知又畀個客放左飛機.11點半要等到2點幾見下一個客, 肚又餓, 點算好呢?靈機一動, 就諗到不如去勝香園啦, 反正未到食lunch時間應該唔會好多人. 沿住鴨巴甸街行上去, 全只係得返一個位!!即刻坐底諗住叫野食, 當等完其他人落order我就請阿姐幫我落. 點知果位上左年紀既阿姐突然好大聲話, "等其他人落完先得唔得!" 我已經等晒其他人落我先出聲架啦, 其他人仲好猶豫不決咁諗緊食乜好, 咁我落左order先有乜唔岩? 就算係我打左人尖可以唔對我客氣一點? 算啦, 最後我都叫左茄牛通同混醬多. 等左一陣個通粉先上. 今次幫我扲餐黎既阿姐又好好人喎. 唔理咁多, 即刻食啦, 真係好蕃茄味, 但係罐頭蕃茄唔係新鮮果種味道. 廿二蚊晌中環黎講都算抵食. 食到一半, 混醬再上, 呢樣真係好味呀, 今次仲有橙味果占!! 食完都飽晒, 12點正, 當對面九記仲未開門時呢度已經要排隊!!小插曲: 當我用餐途中, 隔離坐左3位衣著光鮮既人兄人姐, 應該係第一次黎. 當中有位人兄不停話環境唔得,又話好熱點點...名過於實. 佢估勝香園係5star食府咩?! 我見佢隔離位女同事好似好無奈咁, 係咪黎錯地方呢?其實勝香園大部份人既服務都好好架, 我見有位戴眼鏡既姐姐好好人, 對人客有問必答, 要加分!! 而我...可能唔好彩卦!後話: 食飽飽又未夠鐘做乜好? 介紹各位由德輔道中向西行, 行到東邊行再向上行, 去高街去參觀高街鬼屋!再沿東邊街落返山, 大家就知道平時由鴨巴甸街去勝香園係幾咁easy job啦!…查看更多

公司恩賜我一件好差事, 就係做跑腿下晝出左去旺角book酒店完事後都就黎放工, 就索性唔返去啦咁岩又有少少肚餓誤打誤撞下就走左入黎間舖點知原來最平既雲吞麵都要22蚊!!算啦, 都入左黎, 咪食囉等左5分鐘就一得食不過....真係好細豌我食左三啖就食晒碗麵問心果句, 佢d麵真係好彈牙, 冇鹼水味, 因為佢係標榜手打麵.唔係佢既錯, 只係我眼大睇過龍走左入去食...呢個食評...OK啦…查看更多

年廿九, 阿D話接我放工陪我去觀塘食飯. 食完間乜冇乜既譚仔米線後, 唔夠喉走去多多想買十字包飯屋企食. 去到多多, 十字包一早賣晒, 眼見有好多賀年食品. 一場黎到, 梗係點都要買返D野返去啦. 就叫左店務員要半磅曲奇餅啦. 點知果位店務員可磅磅下就話岩岩好一磅叫我要埋佢. 雖然佢呢種做生意既手法令我有點反感, 但年尾我都唔想同人家嘈...就算數啦.好好彩, 曲奇餅比我想像中好味好多, 特別係咖啡味令我一塊一塊咁停唔到口.終於一磅既曲奇畀我2日內消滅左!! 年年減肥年年肥, 都係疊埋心水過肥年啦, 哈哈! …查看更多

年初三晚, 天氣好凍, 但九龍灣地鐡站對出既天橋底有一大班人晌度掃街.而我都係其中之一. 街上林林種種既小食, 魚旦, 腸粉, 串燒, 臭豆腐, 崩大碗, 當然唔少得...雞旦仔同格仔餅. 個個都襯住新年最後一晚作最後衝刺, 往後既日子又要搬返去牛頭角下村度啦. 我同阿D食完燒賣同煎饜三寶後, 點都要買返D甜品返屋企啦. ORDER左一底雞旦仔同一底格仔餅.因為人多關係所以要等一陣. 兩件甜品盛惠24大洋. 哇, 即係每件貴2蚊?? 好, 就見新年流流就豪畀你. 返到屋企都等唔切即刻食啦, 我試左格仔餅先, 件餅又淋又乾, 打開一睇裡面既餡只係得好少...以前既多牛油, 多花生醬既格仔缾消失左, 好失望.再試雞旦仔, 太甜啦, 一來已經唔脆, 二來真個甜度同格仔餅相比好似格仔餅有落糖咁, 一路食一路...唉...可能所有食店都係人怕出名豬怕肥, 連走鬼檔都逃唔過同一命運.我最愛既格仔餅...永別了! …查看更多

公司黎緊一年會加人工, 呢個咁開心既時刻值得慶祝!又咁岩抽獎抽中免費戲飛, 一於就出去食啦~~其實旺角仲有其他選擇之地, 但偏偏黎呢度食既原因係因為我同阿D以前黎過呢間! 咪當緬懷過去就入去啦.由於去到時間尚早, 一入到就已經有位. 好快咁揀左餐單上既食物, 5分鐘後黎左餐湯同包. 餐湯淡如水, 任我加幾多PEPPER都係一樣. 餐包相比下好好多, 至少係軟熟. 20分鐘後, 主餐仲未黎到, 我倆以前人多上唔切;眼見隔離幾台遲我地落ORDER都陸續已經上菜, 有台仲食完埋單添! 知道情況不尋常, 即刻追問下原來漏左單!! 侍應話即刻去落, 好!, 就由得佢. 15分鐘後, 仲未見到主菜, 又去追問另一位侍應. 該位侍應我問完佢轉個頭又唔記得. 最後再追問一位主管, 佢又話"跟緊啦" 終於等了一個鐘, 我倆既牛排餐才出現.味道如何, 唔講啦, 反正都係一肚氣.環境如何, 咪又係一樣黑媽媽, 駁你有小強陪食飯都睇唔到嘛.…查看更多

當全公司個個都出晒去食午飯而我就選擇留晌公司既目的係上OR, 每日食飯時間一路上OR係一件樂事! 而我今日既午餐就係...合桃提子包. 每次經過呢間麵包舖都以會佢係果類好睇唔好食, 所以都好少會去買. 有次心血來潮入左去, 見到有個合桃提子包,個款幾平實就買左. 返左屋企試左呢個包, 自此就瘋狂愛上佢啦!一個中型size既包, 面頭鋪上好有份量既提子同合挑. 每一啖都食到合桃同提子, 岩晒我呢d咁貪心既人! 一啖都令我好滿足! 每一次都同自己講食半個好啦, 食一個實在太多啦, 但到最後都忍唔住鯨吞整個包! 又話減肥, 日日都係食食食....死心吧! …查看更多

中午時段晌中環搵地方食午餐係一件苦差. 又要平又要快更加難上加難. 如果唔介意大熱天時30幾度去食粥, 呢度係唔錯既選擇. 呢度既白粥係比其他粥品更出色, 記得落些少鹽巴會令碗粥更出味.其實我好鍾意佢地既蘿蔔糕, 無任何特別既配料, 但蘿蔔份量足夠已經係一大賣點. 其他例如油條同牛利酥, 最好係朝早食會食到新鮮炸起既. 環境方面真係不敢恭維, 我有次數到一檯可以有數十隻蒼蠅飛黎飛去你都咪話唔驚. …查看更多

今年書展真係好多人, 撞正週末去直情係自討苦吃. 星期六放左工, 先去到灣仔醫肚, 之後再戰書展. 听聞再興係燒腊舖中既火車頭, 當然要去試下.由於唔係平日既食飯時間, 出面都唔係太多人, 但舖內就人頭湧湧. 我同男友等左5分鐘就可以入去. 環境係十分之迫, 根本唔會坐得舒服. 我叫左一個瘦叉飯而男友就要一碟燒鴨飯. 由於我冇講明係要碗定碟,佢\地就黎左一碟畀我. 試問我一個女仔又點會得一碟飯? 我同佢地講我要一碗,但佢地話一碟都係多一蚊, 但事實係我真係食唔晒咁多嘛! 最後我都堅持要一碗, 但佢\地既態度令我大打折扣...事實佢地既瘦叉飯係唔錯, 唔會好似食柴皮咁. 而桌上有一枝汁任你加, 雖然味道偏淡都起碼唔駛乾啃白飯. 男友既燒鴨我只係試過一細啖,味道冇乜特別驚喜. 忽忽忙忙咁食完碗飯就向會展出發. 可能我抱住太高期望去食, 加上佢地既態度我卻步. 下次食叉燒都係去返由細食到大既金菱燒腊. 佢地d金錢肉真係人間極品! …查看更多

由方媽出山果時我已經開始幫襯. 每次行過搭巴士都見到方媽晌度落手落腳去搓麵粉同包餃子. 呢度既價錢都算係幾平, 10蚊4隻餃子, 5蚊一個蔥油餅. 餃子係正宗既北方餃子, 皮很厚身但煎得很香口, 蔥油餅就不過不失但有時就落太多油. 但我唔推荐粢飯, 佢\只係用普通白飯而唔係糯米, 每次食都好乾身而飯粒就跌晒出黎, 極為狼狽. 酸熱辣湯就好足料, 10蚊一豌好抵飲. 如果各位經過可以試下, 但唔值得專程黎幫襯.p.s :牛頭角下村面臨拆卸，　唔知方媽何去何從?…查看更多

而家呢個哥哥已經係第二代長門人啦, 不過有時都會見到位伯怕擺檔. 呢位伯伯好好人架, 有次我同男友一齊買一底夾餅, 但我一個人又食唔晒咁多, 果位伯伯好好人話切開一半畀我地喎. 雞蛋仔好老實唔係我杯茶, 我最鍾倩都係食夾餅. 多奶,多醬多沙糖, 熱辣辣, 一口咬落去最好既味道都溶晌口中真係好鬼正, 肥就係肥架啦, 不過最唔健康既野永遠都係最好味,係咪?…查看更多

擒日晌中環做完野打算行去銅鑼灣做gym. 行行下行到一間不大起眼, 附近都係重建中既唐樓.初頭都唔為意, 見到門口有忌廉筒喎, 就知道呢間一定係快樂餅店. 入到去,有好多出爐麵包, 咁岩有少少肚餓, 就晌咁多麵包中要左個最簡單既- 菠蘿包. 呢個包比坊間既size細少少,盛惠2蚊, 摸上手, 暖暖地, 咬落去一種好微妙既感覺. 好似係細果時同媽咪出街, 行過麵包店買包畀我食...味道...包質好軟熟, 麵粉冇臭粉味, 甜甜地, 加上兒時既回憶, 幸福同快樂既感覺湧上心頭. 2蚊, 換來兒時既回憶, 千金難買此時既快樂. …查看更多

冬天天氣凍, 想食d熱食. 但一般飯盒最平都要廿元起. 我呢d窮等人家如要外出工作邊會食得起? 權記真係令我晌冬天給我一點兒溫暖.10蚊一碗, 雙拼15蚊. 雲吞4粒, 每粒都有蝦, 唔知佢地點樣回本? 人龍不絕, 但因地方淺窄, 食客都很自覺唔會坐得耐. 5蚊一碟菜, 仲可以要求菜湯,令食完粉麵都可以飲啖湯. 服務一般, 阿姐有問必答. …查看更多