蜜桃小丸子的个人专页

今日lunch叫咗個最人氣嘅四寶撈粗，差到我要專登寫篇食評講個事實比大家知。正如圖片所見，所謂嘅切腩係瘦肉咁，完全唔知個腩位係邊，仲要個厚度係仲薄過幼過我隻手指，令人超級失望！！同佢張相係唔一樣，違反哂商品說明條例！！其他材料只係正常發揮，個麵唔加湯係好咸，根本就咁係食唔到。大家仲要有心理準備隨時比人叫你搬位坐呢度、坐個度，幫舖頭砌好枱嘅人數賺到盡，但服務員嘅態度係唔憂做，差！總括而言，唔會再食！😡😡😡😡…查看更多

辛苦做咗成個禮拜嘢，星期五一定要食餐好嚟慰勞自己！今日蜜桃小丸子嚟到炮台山覓食，最鍾意食泰菜嘅我記得呢度有橙象，忍唔住又走咗入去食。好鍾意舖頭好大好闊落，仲要有啲草草係度點綴，好似去咗森林咁好舒服放鬆。佢仲有啲圓形卡位，一睇就知好好坐，最岩同一班朋友嚟談天說地！餐牌有各式各樣嘅菜色比你揀，最特別係有好多芒果為主題嘅飲品同甜品，睇見都開心🤩原個菠蘿海鮮焗飯：超正！十分足料，有魷魚、蝦、青口、魚塊不特止，仲有臘腸、腰果、肉鬆、菠蘿粒等配菜，口感豐富之餘，仲食到甜酸咸鮮嘅味道，令人眼前一亮🤩泰式拼盤：所有食物都係熱辣辣架！蝦餅超級彈牙，啖啖肉好好味；魚餅都係熱辣辣，食落有陣陣嘅香料味；春卷包咗粉絲蘿蔔絲等，仲滲咗啲咖啡入去，外脆內軟好正；香葉包雞嘅雞用咗香茅嚟醃，唔會太濃調味剛剛好，出面脆脆地一啖咬落去入面好嫩，好味😋😋😋炭燒牛肋骨：唔使BBQ都食到陣陣炭香味，配埋特製醬汁好惹味！最貼心係佢會有啲酸蘿蔔青瓜配菜，開胃之餘又感覺無咁熱氣。我地叫咗兩杯嘢飲，一個係mango mania，飲落似芒果沙冰，芒果味勁濃，仲有芒果粒，堅係真材實料，夏天飲超爽！另一杯係Mango treasure，入面有芒果布甸係底，上面仲要有芒果雪糕，完全可以當甜品嚟食，飲落去令人幸福感滿滿🥰多謝橙象令到我開開心心食餐飽，食物好味果然可以療癒人呀！有機會會再嚟食😁😁😁…查看更多

今日蜜桃小丸子去咗九龍城食下午茶，見到有間街坊小店，就入去試下。餐廳唔算多人，有卡位，都算坐得舒服。餐牌都幾多選擇，正常價錢，有啲特別嘅菜式，總有一款岩心水。瑞士汁雞髀拼西多：西多新鮮整出嚟熱辣辣，牛油係面即刻浴化，超正！好耐無食過雞髀，瑞士汁份量剛剛好，唔會太甜，雞髀都幾多肉，唔係hea你個隻，好味！熱檸水嘅檸檬係女新鮮架，唔會飲到好苦澀，幾好😋😋偶然簡單一個下午茶，都幾抵食，叉返足電繼續努力！…查看更多

今日嚟到九龍灣食早餐，經過見到早餐set好似幾平幾抵食，就入去試下。因為舖頭本身係食越南嘢，所以菜式都係有越南風味，選擇唔算多，但價錢都幾實惠。我叫咗個香茅豬扒米粉，跟餐牛角包有牛油香味，都幾鬆化；炒蛋做得幾好，加咗啲香葉入去一齊炒幾特別，都炒得幾滑；豬扒就普普通通，幾多骨，米粉係清湯底，基本上無乜味。咖啡就正正常常唔難飲。總括嚟講，想平平地食餐飽又唔算難食嘅早餐，呢間係唔錯嘅選擇，但要追求味道嘅話，可能就要諗過。…查看更多

呢日蜜桃小丸子同細佬行開大角咀，見到原本係博文街嘅Orange Elephant 搬咗嚟利奧坊呢邊，咁耐無食決定試下新舖仲keep唔keep到水準！舖頭裝修好新淨光猛，淺木色的枱櫈令人感到很放鬆，加上周圍有啲草草做裝飾，有少少似置身係樹林入面一樣。餐牌有各式各樣的泰菜選擇，張張相都影得好靚好吸引，好想全部都試下。因為今日係星期一，可以用$1優惠價食到明爐烏頭魚，真心超抵！估唔到餐廳仲有呢個offer! 😍😍😍嚟到服務員會幫手點火，超足料，用咗好多蔥、冬菇、蘑菇、香茅等等嘅材料去煮，好似仲有椰菜添！條魚好滑好嫩，湯底酸酸地，好開胃，正！😋😋😋酸辣去骨鳳爪亦都好夠料，鳳爪又彈牙又爽脆，仲有好多新鮮洋蔥、紅蘿蔔同蔥等等嘅伴菜，食落去酸酸甜甜又辣辣地，夏天食超級開胃，望到已經流哂口水！🤤🤤🤤我地仲叫咗咖哩海鮮脆包盅，嚟到仲係熱辣辣出哂煙架！餐廳好慷慨係勁多咖哩汁，煮得好香濃，完全唔會太辣，連埋焗到脆口嘅包包一齊吃，令人有滿滿嘅幸福感，雖然唔可以去泰國，但都好似神遊咗去一樣😇😇😇飲品方面，我地揀咗椰汁珍多冰同鹹檸雪碧，甜度調教得相當好，唔會太甜，又有啲啫哩食下咁口感豐富；鹹檸雪碧鹹鹹甜甜咁，好得意又消暑！整體來說，新舖仲keep到橙象一路以來嘅高水準，完全無令人失望！想食泰國菜又想坐得舒舒服服嘅一定會再來👍🏻👍🏻👍🏻…查看更多

Happy Friday 嚟到又一城光臨鼎鼎大名嘅J.S. Foodie，因為時間算早，唔使點等已經有位，但眼見都有吉枱，又無人等，服務員都要我地兩個坐bar 枱，就有啲唔高興，同佢講女仔著裙唔太方便，先話比我地坐，但個位勁近風機，超級嘈，環境麻麻。食物選擇都幾多，主要有意粉、漢堡包、pancake。黑松露忌廉意粉：好好味😋首先好欣賞佢隻碟係熱嘅，拍得住西餐廳，有好多唔同種類嘅菇，忌廉汁好濃好香，啲意粉似係天使麵，好煙韌，份量都好足，一試難忘！日式咖哩雞飯：都好味，但就冇意粉咁驚喜，啲雞炸得香脆，咖哩汁甜甜地，但啲飯唔夠口感，如果再硬身啲會更理想。法式焦糖pancake：甜品無得輸！第一次食甜嘅pancake，而佢表面有啲焦糖所以係脆嘅，好得意，加埋啲水果一齊食，酸酸甜甜咁令人好幸福🥰總括而言，食物係好正，但環境同服務就麻麻，希望可以改善一下，唔好影響整個經驗。…查看更多

今日來到K11 Art Mall覓食，見到有間Ricky開嘅餐廳，價錢都算合理，所以就入去試下。餐牌基本上係茶餐廳嘅款式，但當然有名廚招牌，感覺用料同煮法應該會更勝一籌。魚柳Tea Set: 多士好味，牛油完全融入包中，唔會太乾口，食得出陣陣嘅牛油香。蛋炒得幾滑，加入咗粟米粒，令到口感更豐富。魚柳質素高，唔會一咬就散，肉質靚，炸得外脆內嫩。唯一敗筆係個羅宋湯通心粉，份量極少，唔夠蕃茄味唔夠酸，十分普通。沙爹豬Tea Set: 豬肉有筋，有啲難咬，但沙爹醬整得幾香，份量都令人滿意。整體嚟講食物質素還好，但要加一就唔抵，眼見全場得三個服務員，飲品勁遲嚟，咖啡唔好飲、檸蜜無甜味，舉咗好耐手都無人理你，性價比唔高。…查看更多

今日突然想食西餐，就去海港城嘅Dan Ryan開餐！服務員先送上麵包，暖烘烘的，最鍾意佢自家製嘅士多啤梨牛油，用嚟搽麵包甜甜地酸酸地幾好味。辣肉漢堡包，真係幾辣，但好似無乜肉味咁，勝在大大份，一定夠飽。海鮮意大利飯，係熱辣辣整出嚟嘅，海鮮嘅份量都足夠，但啲飯索唔夠汁，口感差少少。甜品係朱古力brownie配雪糕，係好甜，但係今餐最好味嘅食物。叫咗杯士多啤梨沙冰，但真係好酸，味道唔夠天然，不過夏天飲就好涼快。食物質素麻麻，但服務員有禮貌，性價比唔算高，可來可不來。…查看更多

好耐無食過拉麵喇！呢日蜜桃小丸子心血來潮嚟到海港城食一幻，唔係繁忙時間嚟，唔使點等就有位。不過本身係坐bar枱，但之後附近有好坐啲嘅卡位，服務員姐姐都好好人咁幫我地調過去，抵讚！叫咗個招牌拉麵，熱辣辣即叫即製，一飲啖湯就知到不得了！蝦味又香又濃又鮮，配埋幼麵、香蔥、脆粒食，每一條索哂汁嘅拉麵都令你忍唔住食完一啖又一啖，口感豐富又惹味。叉燒肥瘦適中，識食嘅都知有啲肥肉係香好多，同埋麵湯一齊食幸福感非常！雖然已經好耐無食，但高水準仍能維持，值得一讚👏🏻👏🏻…查看更多

今日蜜桃小丸子嚟到新蒲崗嘅Mikiki，見佢有間西班牙餐廳好似幾吸引，就試下。原來佢同隔離嘅德國餐廳係互通，所以無論你去邊一間餐廳，都點到另一間嘅食物。我地叫咗個香腸拼盤，啲腸老實講無咩特別，份量唔大份，配菜蘿蔔絲超級酸，幾乎入唔到口咁濟，無乜驚喜。芝士焗麵包，基本上就係有啲薯條係底，上面有啲麵包粒，再舖埋芝士一齊焗，係熱辣辣嘅，但又係無乜特別，入到口但你又唔覺好好味。總括而言，食物價錢偏貴，但唔係正宗嘅西班牙或者德國菜，仲要都坐得幾迫下，又嘈，唔會再來了。…查看更多

尋日晚餐突然好想食韓式便當，經過九龍城見到居然有一間好似家庭式嘅外賣店，幾新淨，便行入去睇下有冇正嘢。舖頭主力賣韓國菜，炸雞、炒粉絲、紫菜飯卷都有，價錢中上。密桃小丸子叫咗個牛肉便當，啲配菜估唔到都幾豐富喎，有好多芽菜！我覺得合唔合格就要睇下啲Kimchi醃得好唔好味，呢一間都尚好，唔會太辣，但我覺得可以酸多少少就perfect 喇！最特別佢有啲腐皮，甜甜地少少辣，幾好味，仲要有鵪鶉蛋，細細粒食落去咸咸甜甜咁幾得意。啲牛肉同椰菜一齊炒，上面仲有塊小小嘅蛋餅，所有嘢嘅調味都恰到好處，唔會太甜太辣，最緊要係熱辣辣即叫即整，好味。中間嘅酸瓜我覺得係醃得最好，食到停唔到口😋😋😋整體來說，$83一個便當係有啲貴，但佢嘅配菜好多，份量都幾夠，味道唔錯，所以我諗之後如果突然想食都會再買！…查看更多

近期愛上了飲咖啡嘅蜜桃小丸子，周圍搵靚靚咖啡店，今日就嚟到九龍城，意外地發現了一間令人喜出望外嘅店舖！Lazy Creatures 係一間寵物友善嘅咖啡店，係宋皇臺地鐵站一出唔使行好遠已經去到。門口有唔少可愛汪汪，食客都有傾有講，明顯係嚟過唔少次。叫咗杯Americano，估唔到居然跟埋消化餅，甜甜地配埋咖啡，一甜一苦襯到絕！咖啡嘅濃度剛剛好，好易入口。All-day-breakfast無得輸，所有嘢都係即叫即整，啲蛋仲熱辣辣出緊煙架！沙律菜好新鮮爽脆，芝士釀蘑菇多汁香嫩、yoghurt配埋麥片口感豐富，好好味😋雞肉批好可愛，真係有隻小雞係酥皮上，都係岩岩焗出嚟嘅，食落去唔會太漏，味道還好。總括而言，假日嚟chill食個早餐歎杯咖啡，十分寫意，希望有機會試埋午餐！…查看更多

九龍城主要有三間飲茶小店，是日蜜桃小丸子嚟到最近新開嘅一間，因為唔係午飯時間，一嚟到就有位。舖頭新裝修但枱面偏細，兩人枱真係肥少少都坐唔落，嗌咗五個點心基本上張枱係完全放唔到，仲要啲呀姐係你隔離行嚟行去好近好近，除非你係坐梳化位，如果唔係真係唔會可以安安落落歎個茶。講返啲點心先，佢就話係即叫即整，但個焗菠蘿包一嚟我就好懷疑係放左幾耐，因為唔熱囉！都唔係第一日食焗菠蘿包，但佢完全冇個種岩岩焗出嚟好鬆脆嘅感覺。唯一好嘅係佢個餡唔係流心，一咬落去成pat嘢流出嚟個隻，但當然有人係鍾意個種多啲啦，唔會太甜，但都冇驚喜。招牌蝦餃細細隻，正正常常，但係九龍城食過更大更新鮮的，所以又係覺得冇咩特別。鮮竹卷一咬落去係腐皮多過餡，真係不予置評。鴨腳扎就係鴨腳扎，冇異味，唔會太咸，但除此以外就冇咩抵讚了。最好味嘅係呢個腸粉入面包咗春卷，口感較豐富，個腸粉都叫薄皮，啲餡都係新鮮同脆嘅，成個九龍城得呢間有得食，但其他點心就真係普通，價錢亦比其餘兩間貴，性價比唔算高，試過就算了。…查看更多

最近口淡淡唔知食乜好，從來都冇食過一風堂，今日lunch周圍都排哂隊見佢入得算快，就嚟試試。主要嚟講佢有三款拉麵，因應配料唔同而有唔同價錢，我就叫咗個赤丸齊料嘅$85，另外加$28有個小豬肉丼飯同汽水，因為蜜桃小丸子係大食怪怕唔飽🤭嗌咗冇幾耐就嚟到，熱辣辣好正，湯底夠濃喎，啲麵我揀咗較硬所以好有質感唔錯，隻蛋咬落去都做到流心，其他配料都好正常，燒叉燒好香，係薄薄地，原本冇乜期望，但食落有驚喜。至於個丼飯，都冇hea你，豬肉都幾多，啲飯係珍珠米，撈咗燒汁，所以都好味呀。整體而言比我想像中好，會再嚟食！…查看更多

老闆請食飯，嚟到金鐘嘅dim sum library食晏，睇佢門口細細，原來入面都幾大，枱同枱之間好有空間，坐得好舒服。我地食咗好多招牌點心，啲點心比起平時食嘅有特色，材料好新鮮，當然價錢都好可觀，但間唔中食下係滿足嘅。黑椒牛肉蘿蔔酥：夠酥脆，有好香嘅黑椒味海膽春卷：海膽份量唔錯，無苦味蟹肉包：食落好似菜肉包，但係啲餡係新鮮嘅黑松露蝦餃：好香嘅黑松露味，啲蝦都爽脆芥末和牛：食落唔似和牛，少少韌，但個汁有芥末味幾得意米紙卷：啲菜好新鮮好脆，好味鵝肝溏心蛋：鵝肝係煎得外脆內軟，但隻蛋做唔到溏心嘅效果，同埋冇乜味，要另外落鹽北海島帶子：啲粉絲應該係用紅菜頭汁整，但冇乜味芒果卷：酸酸甜甜，溫度適中，夏天食好開胃總括嚟講，點心優勝，其他炒嘢唔係特別出色，個茶都普普通通，好似唔同茶都一樣味咁，下次嚟專食點心就可。同埋佢好似唔太夠人serve，但係有禮貌嘅。…查看更多