可可米搭搭的个人专页

首先，book咗餐廳之後，因為同朋友慶生，已經提早兩天要求餐廳幫忙喺甜品碟邊寫字，因為想驚喜，再三叫佢remark主動喺我哋叫甜品後直接喺甜品碟邊寫字。當晚去到我再次WhatsApp提示佢哋，佢亦有覆我話已經remark了。最後我哋叫甜品時，個甜品等咗好耐，我以為佢幫我處理好，點知催佢之後佢竟然直接上甜品忘記咗幫我碟邊寫字⋯！最後竟然要我喺朋友面前再提佢，驚喜冇晒，非常非常非常失望⋯！😡至於對呢餐飯嘅感覺⋯首先，個環境係ok的。門旁有個大鋼琴好靚。至於食物方面⋯法國生蠔 $68/隻失望，生蠔有怪味，雖然新鮮，但真係唔太好食，好彩只係叫咗4隻⋯兩杯cocktails：LM Snow Ball $138/杯LM Salty Caramel $138/杯以極少嘅份量黎講絕對唔平。但⋯Snow Ball似藥水味，難飲⋯同以前飲開嘅蛋酒差好遠😖Salty Caramel原來只係普通baileys，加左舊cream同少少焦糖醬，完全冇特別，勁失望😩海膽刺身多士 $188海膽味道一般。魚子醬味道有啲搶。鵝肝多士配焦糖蘋果 $198呢個鵝肝幾好食，但有少少筋。多士脆口，焦糖蘋果唔錯。慢煮西班牙黑毛豬鞍配焦糖蘋果 $338完全唔係慢煮嘅感覺，豬鞍唔夠嫩，好韌，味道仲衰過食茶餐廳嘅豬扒⋯烤龍蝦海鮮薏米飯 $418龍蝦汁幾好，但薏米飯有啲漏。龍蝦肉唔多，講唔上好食，但又唔算差。時令甜品：Basque Cheese Cake $88唔記得客人要求寫生日字已經扣晒分⋯Cheese cake等咗超耐，催左一次都仲等咗好耐先黎。味道極之平凡，Basque烤得唔夠香，亦唔大件，以呢個價錢，我會選擇出去食其他甜品店嘅軟心Basque好過⋯最後飲咗杯白酒，B&G Curvee Speciale Bla $98正常味道⋯但唔知點解一杯普通嘅白酒都係等咗好耐，仲要催佢再等咗一陣先黎⋯埋單時冇任何投訴下俾咗85折，折後$17xx。以呢個價錢，我可以有更多好選擇。對呢間法國餐廳極之失望。咁多好評何來？🫠真心唔會再黎⋯…查看更多

一直都有買呢間，次次都有新鮮嘢。唔係漏單、漏嘢食、漏醬料，就係遲遲唔出餐，又或者你嘅嘢食已經放咗喺度但一直都話俾你聽未有。攤到凍晒。問親職員個餐有未都唔睬你、又或者當聽唔到、又或者敷衍你話未有叫你等，但實際係已經放咗喺櫃枱旁邊冇人理⋯你見過有好多人係咁催單，有啲人仲已經俾人偷走埋啲餐⋯竟然咁都可以做到落去⋯真係無語。發郵件去麥當勞投訴就一直都冇改善，人手又不足，店員又冇禮貌，又唔睬人。奉勸大家如果繁忙時間叫餐，如等半個鐘至九個字。…查看更多

平時好少寫負評，估唔到今次就要破例。等左半粒鐘唔緊要，冇諗過會差到咁😡籠仔蒜蓉蝦飯啲蝦黑到唔想食，啲肉係霉嘅⋯飯好硬⋯仲有粒唔知咩硬物，一咬即時痛一痛，牙肉即時流血⋯鳳爪排骨飯鳳爪排骨衰過食唐記包點n倍。鵪鶉蛋燒賣有少少腥味，啲肉都唔熟。臘味蘿蔔糕唔好食。可以煎到苦苦地⋯唯一可以接受係個所謂燉湯，唉。。。食左百六蚊，都唔知食咗啲乜，難食到乜都食唔落，牙肉仲流緊血，仲痛緊，好彩唔係叫左好多。冇下次⋯…查看更多

開張大約幾個月，見食評讚，所以黎試食。果然好好味！之前喺澳門食過卜卜蜆，諗住香港未必有得食，點知呢度有！叫左卜卜蜆鍋，勁正！啲蜆清甜冇沙！之後再落湯打邊爐，啲材料都好新鮮好靚，肥牛、豚肉都好好味，呢度有芝士獅子狗，超好味！仲有紫菜響鈴，特別之餘又好味！佐酒小食一樣美味！服務態度亦好好，坐得又舒服，又唔會趕你走，又多鍋選擇，真係一個理想嘅打邊爐之地！帶過好多朋友黎，個個都讚不絕口。我而家經常都黎幫襯。…查看更多

真係好難食！喺紅磡住咁耐，冇咩邊間車仔麵好食，呢間一開我就黎幫襯，開頭食都覺得唔錯，以為終於有間好食又坐得舒服嘅車仔麵喺紅磡，之後不時都會黎幫襯，食食下開始質素下滑，不過見某啲野食還ok，點知越黎越差，隔左一段時間冇再黎食。今次再黎幫襯，叫左口水雞，啲雞可以完全冇味！有幾多調味料淋喺面都冇用！車仔麵啲餸完全唔掂，樣樣都好似放左好耐咁！冇味之餘有啲仲有啲變變地⋯後悔再黎食，唔怪得已經冇乜人幫襯，拍晒烏蠅啦！以後都唔會幫襯！…查看更多

之前幫襯開旺角店，自從開左太子分店之後，又轉戰太子店試下，真係不得了！超好味！款式多選擇之外，食物質素仲好好，服務態度超讚！仲有啤酒、紅酒、日本清酒等可以飲，一大班朋友聚會晚飯傾偈把酒談歡最適合不過！掛住食，有啲忘記了影相一定會再來幫襯…查看更多

剛行完朗豪坊，一路向油麻地方向行，睇下有咩好食，誤打誤撞去左呢度食串燒，當然啦，入得黎就預左唔睇價錢食。呢度食物選擇唔算多，但有自己想食嘅貴價食物，價錢亦合理，就一口氣叫左一堆野食。 串燒其實好簡單，用料唔需要太講究，只要調味粉夠，烤嘅時間教得好，其實已經唔難食。點知。。。出乎意料之外，佢地嘅食材係好大件同用料都好靚！ 一啲都唔會嗇吝！太幸福了！ 當然呢晚食左好豐富而且好舒服同美味嘅一頓晚餐啦～介紹下我地食既野先～～～鵝肝：非常大件，煎得好香，軟韌度拿捏得非常好，而且仲係用靚鵝肝！勁美味！虎皮椒：夠辣，味道剛好！鱔：我冇食，朋友話好味！雞肉＆雞軟骨：好味！牛舌：我冇食，朋友話好嫩，正！雞皮：餐牌冇的，問佢就有得食，呢個好正！必食！！粟米：好香好肥！乳鴿：唔錯！朱古力香蕉：甜甜地，唔苦～蒜蓉包：好香，仲有原粒蒜頭食，so good！雞翼：醃得好好味！好香口！仲翻叮左一次！雞肉腸：唔錯～可惜唔係廚師牌，有點失望。芝士丸＆蟹子丸：唔錯～原隻茄子：非常香！又好味！超讚！燒羊架：都好味，唔係太膻，連我都接受到。牛油焗大蝦：嘩！呢個好正！勁香蝦膏味，而且好大隻！超好味！蟶子王：不得了！！！ 好大隻！！！超級正！係店長推介架～～～！焗蠔：又係好味之作！～～～法國生蠔：餐牌冇的，店主突然推介，就叫黎試下。好正！！！好新鮮，入口甘甘甜甜，好好味。最後因意猶未盡，決定再叫個貴價野：芝士燒龍蝦：超好味！芝士味道非常好，龍蝦亦係用靚野，好大隻，絕對唔係波士頓龍蝦！一黎到，香噴噴，啖啖肉，連隔離枱都忍唔住望住我地個龍蝦，又裝下我地張單幾錢今日呢隻龍蝦$220，但真係好大隻，又好味，絕對超值嘅！最後想講，呢度嘅侍應非常禮貌，唔似紅磡美X佳咁差！而且地方闊落，坐得舒服，貴一點又何妨？…查看更多

預早訂左12位, 當晚8:00PM去到, 冇乜人, 我地一行12人入去, 佢offer一張長枱俾我地. 坐得都ok舒服. 呢度係限食2個鐘(可能我地多人, 電話訂座時佢同我講限食係2.5小時, 俾多左半小時我地). 每位係$128(另加一服務費), +$10有飲品任飲, 有多款汽水, 同埋大罐裝青島, 絕冇吝嗇.至於食物, 先黎個雞煲, 因為雞煲係任食, 再order左一大堆串燒, 寫幾多黎幾多, 冇漏單.首先講串燒, 種類唔多, 但以咁既價錢, 質素算係唔錯, 我一人都食左5隻雞翼~~至於雞煲, 隻雞新鮮度麻麻, 但個汁就唔錯, 都幾入味, good~!!食完雞煲, 加水打邊爐, 火鍋食品種類都唔少, 都係一d大路食品. 以呢個價錢去, 就唔會要求太高啦~~! 不過食完串燒同雞煲, 已飽左大半. 其他火鍋食品都食唔落.話食兩個半小時, 但因切蛋糕搞到過晒鐘都冇趕你走, 值得一讚!…查看更多

今次係我join左openrice咁耐以黎第一次寫食評. 典解會有呢個衝動呢? 係因為四出尋食既我終於搵到一間又好味, 又抵食, 又衞生, 又真材實料, 服務又周到既食店喇~!!!講返我既經歷先~~! 原本我係想去食嘉太賀, 但係去到之後朋友話覺得貴, 又麻麻地好食, 所以決定轉架步, 跟住我地就喺呢兩條街度周圍睇下有乜野啱食又唔貴, 沿途經過好多間食店都好似好貴咁, 結果行到尾尾就見到呢間潮人車仔麵, 店舖細細地, 但感覺都OK舒服, 價錢又唔貴, 之後就俾果度既熱情老闆釣左我地入去喇~! 以為簡簡單單既車仔麵, 但睇下個餐牌, 原來又唔係一間普通既車仔麵喎! 佢有個招牌菜冬陰公海南雞麵, 最愛食辣既我又點會放過??? 但係果一刻我又想食車仔麵, 又想試冬陰公, 唔知揀邊樣, 煩惱之下, 老闆娘就同我講可以幫我將車仔麵轉冬陰公湯底! 嘩! 我即時開心到爆! 於是我就叫左鹵水雞翼+腸仔+蘿蔔+紅腸+油麵+冬陰公湯底(中辣), 朋友就叫左個三餸公仔麵 (唔記得係乜野餸).等食期間, 望下d裝修, 真係好young呀! 以豬仔圖案為題材, 放晒喺幅牆度, 好cute! d筷子好特別, 開頭以為有三隻色, 細看之下原來係有六隻色(有深紫色/淺紫色/深綠色/淺綠色/深藍色/淺藍色), 好潮呀~! d枱同櫈襯得好靚好sharp, 感覺好乾淨好舒服!開動喇~!!! 我個冬陰公車仔麵賣相好靚! 忍唔住就影低左, 一食, 超正囉!!!! 原來冬陰公湯配油麵係咁正! 簡直好似食緊韓國酸辣麵咁! d餸俾得好足, 材料食得出好新鮮, 至於味道, 冇得頂! 完全係正宗冬陰公湯! 真係好正~! 如果好食得辣, 可以試大辣, 我本身都食得少許辣, 所以覺得中辣岩岩好~! 至於朋友果個, 佢一邊食一邊話好好味喎! 雖然只係一個普通公仔麵, 但佢真係整得好講究, 主要係因為d材料同湯底, 食得出係用料十足果種. 老闆介紹我地試下佢地新出既特飲菠蘿XX冰(唔記得係乜野冰), 我地就叫左兩杯, 好好味! 唔會太甜, 仲食到個底有菠蘿肉! 大滿足~~! 後來見到餐牌有個炸燒賣, 就叫左個黎試, 嘩~! 真係好好味! 炸左出黎外皮脆卜卜, 裡面好香好彈牙! 好正呀~~!! 食到咁上下, 見到廚房炒緊d好香既野, 一問之下, 原來係飛天通菜! 竟然喺車仔麵檔有飛天通菜!!! 好特別! 老闆娘問我地要唔要一碟, 可惜我地已經好飽, 怕叫左食唔晒, 所以冇要到, 不過老闆娘好好人, 竟然叫廚房炒左少少俾我地試食, 唔收錢的!!!! 一試, 真係好正! 夠辣!!! 好啱我胃口~! 唔食得辣既朋友如果去食可以叫佢減辣~! 之後我地問老闆娘點解d野食整得咁好味, 原來做廚房果個以前係做泰國餐廳既大廚, 而家都係呢間潮人既半個老闆, 所以每樣食材同味道都好講究. 老闆娘仲問我地d野食味道ok唔ok, 有冇野要改善, 我同朋友都覺得好好食, 冇野要改善, 唯一一個要改善既地方, 就係間舖要擴充!!! 因為真係幾多客人, 我地七點幾去到都坐到滿咁濟, 再夜d黎食可能要排隊喇!!! 可以既話, 最好開多幾間分店, 放一間喺我屋企樓下就perfect啦~~!最後我仲叫左個海南雞打包返去俾屋企人食, 佢地食完話好好味, 仲問我喺邊間海南雞店買添呀~~!整體黎講, 真係食得好開心, 老闆同老闆娘都好親切好好人, d野食又好食又抵食, 簡直係滿分呀~~~!!…查看更多