ernester的个人专页

喺附近大型連鎖式酒樓食到一肚氣，決定轉場去糖兄弟食返個甜品順返條氣，老闆態度親切，冇催我落單，仲好有耐性講解甜品嘅比例同口感💛。榴槤小丸子⭐️⭐️⭐️⭐️⭐️榴槤肉+榴槤雪糕+小丸子+榴槤沙冰底，各有不同嘅層次口感，榴槤肉甘甜濃郁，榴槤雪糕甜得嚟仲有淡淡嘅榴槤香味，微暖嘅小丸子配沙冰口感煙靭，又唔會死硬，每一啖都係榴槤味，啱晒榴槤控又鍾意杰撻撻口感嘅我❤️榴槤忘返⭐️⭐️⭐️⭐️榴槤肉+芒果肉+西米+涼粉（仙草），隱藏嘅椰奶底好香，老闆一啲都唔孤寒，榴槤肉比芒果肉多，榴槤配合椰奶好夾，食完喉嚨好舒服😌…查看更多

平日晚上6點正入座，當然全場只有幾枱客，冇人等位，坐低唔夠兩分鐘，兩個樓面行咗埋嚟四次催我哋落單，我哋連張單張都未睇完，同佢講等多一陣，佢唔係嚟介紹有咩好食，只係黑面、反白眼咁企喺我哋張枱等。由於食咗下午茶，又早食晚飯，我哋求其叫咗兩個餸先，費事俾人監視。$1蚊雞唔算細隻，但超級鹹，連骨都好鹹，好「鞋」好乾。$98燒汁蜜桃脆香骨，有8支，皮包骨，骨多肉極少。食到尾聲，見樓面向鄰枱食客上糖水，客人馬上給利是，應該係熟客仔，我就問樓面呢度有冇糖水甜品，個樓面亞姐第一時間態度囂張咁話「$16.8喎」，連咩糖水都冇講，就調頭走，我係嚟消費食飯，但樓面當食客係乞衣？連一碗糖水都食唔起咩？！呢啲服務態度，難怪香港人要北上消費。…查看更多

初初開業時幫襯過，當時份量都正常嘅，見好耐冇幫襯，即使平日放lunch時段超多人排隊，諗都冇諗就幫襯下佢，點知出咗名，質素就差咗好多👎🏻。職員喺門口已問定要咩餸，我點嘅京都豬扒和肉餅都放在收銀機附近，相隔長長嘅走廊，我當時冇為意職員夾咗幾多入盒，從收銀接過個飯盒時都覺得輕飄飄，返到office打開個盒，竟然返半盒餸，白飯就正常偏多，白飯仲涉入餸底，墊高僅餘3小片嘅一口京都豬扒，其中1件應該以粒嚟形容，早知我睇下上一個食評先決定再幫襯😔份量少都算，京都豬扒好大陣漂白水加膠手套嘅味，連酸酸甜甜嘅汁都藍蓋唔過果陣膠味，🤮即刻嘔返晒出嚟。好彩嘅係肉餅尚算正常，係有碎骨咁囉，其實肉餅都好難唔好食🤷🏻‍♀️…查看更多

因為近公司，差不多日日都會落嚟買燒味返公司餸飯，而且老闆和老闆娘好好人，睇啱邊件任你揀，就算中午繁忙時間都會同客人吹下水，夠貼地又有人情味。但自從轉手俾咗個中年師奶經營，食物質素已大不如前，仲加咗價，滷水雞($12/隻)髀越賣越細隻，唔上色、仲一陣雪藏味，連滷水都蓋唔過雪味，乾爭爭，拎返公司只係一兩分鐘，已經黐住張燒臘白雞紙👎🏻滷蛋($10/4隻)只有一隻係完整嘅，其他裂或崩，應該係唔正確剝殼所致🥺雖然裂咗，但並無增加入味。😞燒肉($35/條)味道ok，不過皮唔脆，中午時段買嘅，照道理應該新鮮，可能鬆針唔夠。還有，新老細脾氣唔細，唔俾揀，佢喺堆雞髀中揀咗隻甩皮瘀黑嘅，我唔想要，佢話依家冇得揀，然後發脾氣將雞髀掉落旁邊桶滷水汁，搞到我件衫都彈咗幾滴汁😡其實行過少少，同一條街都有好幾檔燒味檔，無謂消費都要受佢氣，決定唔會再幫襯。…查看更多

餐廳自從今年一月收爐後，我不時經過都會入內詢問訂座，店員話因爲舖面裝修，暫停堂食，等左半年佢終於恢復堂食，無左羊腩煲，唯有試下雞煲。根據宣傳單張，每位$28任食60分鐘雞煲，訂枱後，店員突然反口話要$48位😡要4位以上才有每位$28的優惠😡我望晒成個post都冇呢個條款，理論一番後，店員又改口說可以享用優惠價，但沒有宣傳單張上的鮑魚，反正我之前試過果粒「疑似鮑魚」，細如茶匙，口感味道一般，有少少似麵粉，不吃也罷。入到餐廳，舖面裝修完全冇改動過，當晚十分冷清，客人唔多，只坐左約十個客。停業後食物品質大不如前，以前的賣點係雞煲上到枱先計時，依家入座已計時，等左10分鐘先有得食，頭一輪的數量比追加多少少，配料有蘿蔔、豆卜，我一家三口每人分到四件，每次加雞又要等10分鐘，有次仲漏單，勁多雞頸、雞腳、雞翼尖，有d更肥到食唔落🤢，每人每次只有兩件雞食得，仲要超咸，飲左兩罐汽水都仲好口渴🤢，離坐前15分鐘，在無通知的情況下已被last order，都唔知食左d咩，以後都唔會再幫襯😡我寧願比多少少去隔離區，已可以食到有質素的任飲任食放題。…查看更多

民豐係好有歷史的老舖，沒有冷氣，門口有即煎檔口仔，成間舖都有陣陣熱風吹出黎，每次嗱嗱聲比完錢都會快快脆行返出去。我雖然唔係住喺荃灣，但每次經過果附近，都必定買返十隻八隻糯米糍返屋企同家人分享，可惜民豐的質素已經大不如前，我老公仲食到肚痾🤢。琴晚上小巴返屋企前買了花生味及芝麻味糯米糍，以往民豐的糯米糍鬆軟香滑，好似捉住隻兔仔咁，大力少少都會將d餡料唧左出黎，搞到成身都係，所以我例必返屋企前買，再拎返屋企食。短短唔駛半小時的車程，一返屋企就即刻食，一拎起粒芝麻味已覺得怪怪，唔似以往鬆軟手感，好似雪左隔夜咁死死實實👎🏻食落鞋口👎🏻，我再拎粒花生味試，糯米糍有些細孔滲出啡色的水🤢，發出似爛香蕉嘅怪味👎🏻，我老公唔為意，食左成粒，痾左成晚，呢個變壞程度，唔似係短短的車程造成，而且全程仲係有冷氣的，至少涼過間舖，應該係賣果刻已有問題。怕街坊食左會肚痛，我出於好心打返比民豐叫佢唔好賣果批糯米糍出街，店主喺電話度叫個師傅黎，鬧佢下次唔好再搓定d糯米，賣晒先再搓，相信呢個就係唔再鬆軟同變壞的原因🤢。…查看更多

上回提到於黃珍珍訂枱時的不愉快經歷，在Openrice訂了枱，致電餐廳確認時卻告之滿座，怕白行一趟、十五十六唔知去唔去食之際，負責人當晚晚市後親自打畀我，同我確認有位，真心畀佢哋誠意打動。餐廳做緊問卷調查優惠至7/6，只要用餐後回答有關食物的問卷就可以用優惠價$38享用半自助午餐，包一款主菜，小食、飲品及甜品任食，用餐時間12:00-14:00，時限尚算輕鬆。全場只坐滿一半枱，好多吉枱，用問卷優惠的人唔多，名額只有大約9個人，聽店員講6月份的問券優惠已被訂滿，7/6後會全面回復正常午餐，現場都有唔少人以正價$89惠顧半自助午餐。我哋揀左紅咖哩海鮮飯同海南雞飯，紅咖哩唔辣但勁咸🤢海鮮有青口、蝦、魚各兩小件加上新鮮菠蘿，分量少(圖片的鑊仔好似成人手掌心咁大)，如果無自助吧的小食，一般OL都唔係好夠飽。海南雞飯味道一般，黃飯撈得唔均勻，中間仲有白飯😓，雞唔算滑，但勝在無骨。自助吧的小食唔錯，有燒雞扒、燒豬頸肉、炸蝦餅、青木瓜絲沙律、泰式鳳爪、蝦片、法包、灼菜、涼瓜湯。除左雞扒太硬太乾👎🏻，咬到牙肉都痛😖，其他食物都幾好，尤其是炸蝦餅同豬頸肉，夠juice夠嫩👍🏻！美中不足的就是醬汁太浠，好似水一樣，辣的唔夠辣，酸甜醬冇乜味。甜品有芋頭西米露、雞蛋大菜糕，有濃濃的椰香，正👍🏻飲品有3款，熱龍眼水、泰式奶茶、青檸水，淨飲偏甜，但配合辣的食物，奶茶好解辣👍🏻，青檸水解渴👍🏻值得一讚，餐廳侍應見我抱住個女攞嘢飲，光速跑過來幫忙👍🏻相信只係個別負責訂座的知客或收銀的問題。…查看更多

話說琴晚喺佐敦某4星酒店餐廳享用左令我畢身難忘的自助餐，食唔飽之餘，仲谷住度氣，今朝起身馬上訂自家燒吧，補返數！(如果冇被河蟹，有興趣可以睇返我之前的食評💁🏻)名乎其實的自家燒吧！呢度啲爐自動識轉，唔駛擔心忙住食嘢、唔記得反就燒燶晒啲嘢食，唔好以為燒串燒一定好花時間，其實燒8-12分鐘已食得，等候期間取熱盤、前菜、沙律、甜品、雪糕食住先，仲可以order熟食，蒜燒生蠔、炸雞翼、芝士黑松露炸薯條、炸餃子，無限任食，不過要等大約15分鐘即製，我自問唔算大食，所以揀任食1小時，剛剛好😋入座時，侍應細心講解有咩食，用咩火力燒烤最好，食物避免放邊邊會出白煙等等，如果唔識用個爐，可隨時叫佢，抵讚👍🏻前菜嘅白雲凰爪、中華沙律都唔錯，但八爪魚、螺肉黐左太多凝固左嘅醬，有點喊😣生蠔黐殻的👍🏻，唔似年宵嘅小食檔，重用蠔殼，可以”安心”食用，雖然細粒，但蠔汁飽滿👍🏻Order嘅炸雞翼夠熱夠脆，而出面自取的燒雞翼通常都係凍嘅，但較薄漿粉，冇咁滯，我鐘意攞返黎燒熱佢食😋兩款都多汁嫩滑，味道唔錯👍🏻芝士黑松露炸薯條麻麻地👎🏻雖然夠熱，但好硬好厚皮，黑松露芝士”粉”一舊舊，似翻炸😔飲品除左盒裝維他，一般汽水都齊全，仲可以order水吧，檸茶、蜜桃茶、柚子蜜，款式多👍🏻唯一美中不足係唔可以揀少冰少甜🤔串燒除左d基本嘢，豬牛羊雞丸冬菇粟米，呢度仲有綿花糖、午餐肉呢d冷門嘢👍🏻可惜冇魚類供應👎🏻午市任食1小時，連加一都只係$8x，CP值超高！抵食！…查看更多

上星期帶老公去旺角某丼屋食海膽，但可惜餐廳未備好貨，食唔成，所以今個星期四出搜尋海膽丼，終於搵到人氣爆燈的爆丼丼，補償返老公四重爆丼，海膽佔了半個飯面，部分火炙後的海膽，半溶狀態易送飯，配上魚子、兩片帆立貝、吞拿魚蓉，整體算新鮮，但份量偏少，size是細丼。築地價錢，香港質素(當然不及築地的新鮮)，如果唔夠時間飛一轉東京，喺香港當頂下癮的，都係唔錯嘅選擇👍🏻。安格斯牛肉鵝肝丼，兩片煎鵝肝配汁煮安格斯牛肉，鵝肝外層的粉漿有點厚，油脂口感偏低，可能低溫煎得太耐，鵝肝應有的油份流失了👎🏻。安格斯牛肉，醬汁偏甜，好似食緊韓式煮牛肉，牛同飯的比例大約1:2，牛肉唔算多，但飯量好夠飽，比海膽丼多。點餐時已叫侍應不要椰菜底(大肚婆唔食得，老公又唔鐘意食椰菜)，侍應話午餐先有椰菜，晚餐冇椰菜，點知個丼黎到，椰菜同牛肉的份量一樣😓。餐牌上的丼飯都送味噌湯，或可加$5轉汽水，味噌湯終於有日式味道，足料👍🏻，仲有兩片油揚同大量海帶，不過可能時間的關係，海帶未煮開，仲好硬😅。老公話個海膽丼太細，唔夠飽，本來想叫汁燒牛舌同唐揚炸雞，但賣晒，其實當時未夠8點😓，侍應提議我哋食鹽燒牛舌，但見隔離枱食剩晒，伏味濃，所以最後冇點，老公最後返屋企食杯麵。小店座位較迫，服務非常一般👎🏻，我大肚唔飲得有咖啡因的茶，所以特別問侍應攞杯熱水，但係佢竟然俾錯左我兩次😡，害我緊守左8個月，係咁嘅情況下破戒飲左兩啖(😭對唔住呀BB)。…查看更多

芝士紅燒牛肉麵，湯底較清、偏甜，帶少許紅油，牛肉有點似清湯牛腩，拉麵彈牙，麵的份量唔算細，不過芝士流左少少，純粹綽頭，放湯後冇乜味，算不上紅燒的味道，當佢係fusion菜都ok嘅，不過不失啦。吊龍扒配黑椒汁，塊肉非常薄，而且好細塊，同餐牌相差太遠😡👎🏻，個人覺得應該叫”吊龍肉飯”，不能叫做”扒”，睇對筷子夾起塊肉的厚度就知啦，薄到不足5mm，只係比打邊爐的肥牛厚少少，正正因為薄，即係快熟，所以overcooked，好鞋好靭👎🏻，其實肉質本身唔錯，有正常牛味、牛脂味，可惜煮得差、太老，浪費左片牛👎🏻。個白飯太濕，一pat pat，配上少少黑椒汁，好似食緊隔夜冷飯，超難食🤢。加$9可配唐生菜，反而個白灼菜唔錯，因為菜嫩，輕輕點甜豉油已好好食。餐飲點左烏梅汁同菊花桂圓茶，好好彩，我哋雖然係第一枱客人，但亦都係最後一支烏梅汁，足料夠味，又唔太甜。菊花冰係限量供應的，環顧四周，除左我哋兩個，就只有之後兩枱有，只有12份，送完即止，菊花水味道好重，配上大菜糕，清一清囗入面的牛味，但味道偏甜。午市套餐第二份半價，埋單一舊水都唔駛，好平，但呢個食物同服務質素，不會有下次😡。…查看更多

經openrice訂左星期六的中午12點，準時去到大勝丼門口，餐廳內外仍然烏燈黑火，又焗又熱，廚房仲忙緊準備食材，好似未開始營業咁，我哋唯有開手機照明，過左幾分鐘，刺身師傅終於發現我哋啦，話侍應未返，叫我哋是但搵個位坐。本來點左帆立貝海膽丼同燒肉元氣爆丼，過左一陣隱約聽到...刺身師傅：海膽未送黎喎。侍應反問：琴晚唔係仲有兩板咩？刺身師傅：最後兩份琴晚賣左啦... 北海道海膽就仲剩兩板。點解餐廳唔好好點算食材數量，及時補貨，或者明知送貨時間唔穩定，預留最低存貨量呢😓，老公係為左食海膽而黎，唯有轉食北海道魚生爆丼，但海膽比例就少好多😭。北海道魚生爆丼，可以試晒多款魚生，尤其是海膽、甘蝦、三文魚腩、魚子都好新鮮👍🏻，但帆立貝味道怪怪地，吞拿魚好多筋👎🏻。燒肉元氣爆丼，果然冇令人失望，牛肉同飯的比例大約係2:1，肉塔成坐山咁高，飯索晒牛肉汁同燒汁，好好味👍🏻😋，飯的份量比魚生飯少，所以添左碗飯。可能廚房未準備好，食到一半，味噌湯先黎，有肉碎、洋蔥，但味道偏淡，而甜品就係提子味䈮蒻，一般嘢所以冇影低。…查看更多

喺旺角搵食實在太多選擇了，唔想盲舂舂周圍迫，所以上openrice搵訂枱優惠，呢間街坊cafe有咁多好評，主餐牌仲有5折優惠，唔係唔試呀?!牆上壁畫好有香港地的特色，營造到好街坊，仲播住本地廣東歌，有一種休閒舒服的cafe感覺，隔離左右都係廣東話，差點忘記自己身處旺角。一坐低，侍應有禮貌地介紹白色主餐牌(散叫)有5折優惠，副餐牌上的午市套餐同二人餐就無優惠。選擇十分多，有fusion的蝦子麵同河粉，好有特色，樣樣都好想試，最後我哋叫左午市套餐的鵝肝雞肉意大利飯同澳洲西冷，因為主餐牌係無嘅。澳洲西冷厚身，分量多，好冧，鐵板上岩晒我哋，因為我大肚要食全熟嘅，老公就鍾意生d，所以一上菜就切定部分邊邊的肉，再喺鐵板上煎一煎👍🏻。配菜有茄子、蕃茄仔、豆角、炸薯條，好好味，茄子扒完坑紋再焗，蕃茄仔同豆角分別用香草同蒜茸煮，唔係白灼，食得出用心煮，無揸流攤👍🏻。鵝肝雞肉意大利飯，老公話係堅·鵝肝，煎得岩岩好，粉不太厚，間中淺嚐無咁邪惡，配意大利飯，除左雞肉，仲有蟹籽、紅椒、黃椒、菇片同翠玉瓜，清清地中和鵝肝的罪惡感😋。什菌湯好足料，每啖都充滿菌粒，似食緊什菌蓉多過似飲湯😅，不過味道唔錯。雖然食完兩個午市套餐已飽飽了，但好想試下呢度的香港地道特色甜品～雞蛋仔，平時食雞蛋仔都係單獨乾啃，所以我哋點左Tiramisu雞蛋仔配雪糕，以預熱的砂窩上，綿花糖外皮焦焦地，入面溶化，好似BBQ👍🏻熱辣辣的雞蛋仔配凍冰冰的雪糕，口感好好，又唔太甜👍🏻。特飲「是我的錯」係蘋果+菠蘿，「當我想起你」就係柑桔+藍柑，果味偏淡。埋單時侍應還好細心地掃openrice的優惠QR code，甜品有折。餐廳好有那些年親切的感覺，一定會再來，下次要試埋蝦子麵同河粉🙋🏻。…查看更多

印象中佐敦分店無論咩時段，門口永遠坐滿等位的客人，侍應的態度麻麻，唔憂做咁，有次冇book枱，提早5點半去到，被接待職員屈1.5小時交枱，食唔足2小時，但都要比足正價。今次我特別提早訂枱，試下旺角分店，食早場，由5點開始食到7點，仲有$20優惠。有10款免費湯底選擇，如鴛鴦鍋就加$48，我哋揀左好評如潮嘅椰子滑雞湯底，的確冇令人失望，椰子清香但唔會蓋過海鮮、蝦滑同墨魚滑的味道👍🏻。鵝腸係肥腸👍🏻，平時坊間大多數都係冇肥膏的冷藏鵝腸。海蝦新鮮👍🏻，隻隻都彈牙離殻。但每次送黎的數量都唔同，由5隻變4隻，4隻變3隻，越叫越少。手切肥牛，肥膏均勻👍🏻，好食過日式連鎖牛肉火鍋店。邪惡的鵪鶉蛋🤤，本身已經熟的，第一round蠢左，我連殼落，搞到好多碎殼溶落個湯度，第二round剝左殼先放入煲，好味👍🏻。牛筋腩同花膠由一開始已經放落去煲，但點煲都唔冧，煲到原本柱候醬的味都冇埋，似湯渣👎🏻，似乎未ready比人打邊爐食。飲品竟然有白色罐裝的「減脂」可樂，仲有C+、烏龍茶、鍚蘭檸檬、蘆薈汁同忌廉溝鮮奶，好多選擇👍🏻。出街食嘢，除左食物質素，服務態度都好重要，而呢度嘅侍應就保持一貫的水準～有性格，雖然唔係對我惡，大部分侍應見係大肚婆更加會避開🤷🏻‍♀️，但見有一兩個侍應同新入座的客人為左揀坐邊張枱的問題而嘈交，侍應更加叫個客人走、唔好食🤦🏻‍♀️，嚇到我個心都離一離。…查看更多

男人的浪漫唔一定係豆腐火腩飯，去「滾」就係我老公的浪漫首選，唔好誤會，係講緊打邊爐啫😅。老公生日梗係食佢最鍾意的海鮮粥底火鍋啦。上一次黎食已是個零月前，個餐有少少唔同左，除左冇左加錢轉任食，海鮮主食的款式都少左，沒有桶蠔，改上黃金蜆，海沙白也沒有了，要另外order。值得一讚個聖子皇，真係超大隻👍🏻，龍蝦鮑魚都好鮮甜👍🏻。叫左個三文魚刺身做餐前小食，雖然唔係叫三文魚腩，但都相當肥美，餐牌上寫明足1磅，只有8片，應該唔夠秤，但只係$68，算抵食丫～飲品方面，雖然保持任飲，但款式少了很多，所有罐裝飲品，如汽水、烏龍茶都沒有了，只有豆漿及竹蔗馬蹄水，我大肚唔敢飲竹蔗馬蹄水，老公話味道好淡，好似冰水👎🏻，豆漿還可以，唔太甜啦。頂級肥牛本來係喜點同大煲皇的招牌配料，可惜今次令人有點失望，沒有牛味，而且雪味重👎🏻，美國肥牛比頂級肥牛仲好味。火鍋配料增加至8款，我哋叫左手切肥牛、日本黑豚肉、滑牛、滑雞、即炸響鈴、雲吞、自家製墨魚丸、魚皮。睇前人的食評，話份量少左，我見今餐同個半月前的份量相約，並没有減少，雲吞、墨魚丸、響鈴等，每人都有兩粒，份量夠的。最後食左兩碗粥已太飽了，唔想嘥左個粥底，還打包左碗返屋企。…查看更多

一心唸住食少少熟壽司同嘆返件芝士蛋糕，由於用餐時間有限制，只有30分鐘，所以一入座已𥄫實輸送帶上有冇芝士蛋糕，望左10分鐘都唔見，就同侍應order，等左10分鐘仲未上芝士蛋糕，所以追單，侍應話師傅整緊，我唯有再耐心等待下😔，等到離座時間已到，侍應想趕我走嘅時候，佢先醒起仲欠我一件蛋糕未上，前後我追左4次單，足足等左半個鐘，都未見件蛋糕😡，如果冇貨或整唔切，大不了我咪食其他嘢囉，但問親都話整緊...黎緊...等等...等多陣...😡😡之後竟然俾我發現輸送帶上層，有件芝士蛋糕放左喺廣告牌上面，可惜當我發現嘅時候件蛋糕已離開左我嘅範圍，隔離左右又坐滿人，我即刻想找侍應幫忙啦，遠遠企喺廚房送餐窗口嘅師傅，伸個頭出黎大聲叫我呢個大肚婆起身追住條輸送帶攞蛋糕，請問呢d係咩服務態度😡😡😡(留意返丫，呢間餐廳係有收服務費㗎，況且都唔應該叫個客追住條輸送帶囉，呢d係食物，唔係骨頭呀，當客人係🐶咩！)坐我旁邊的哥哥仔都睇唔過眼，見我等左咁耐，出手跨過4條輸送帶到對面幫我攞。…查看更多