0383T的个人专页

今晚去咗燒肉谷食Lv3澳洲和牛海鮮放題，真係好高質！和牛質素真係無得彈，擺盤本身就好靚，d肉都雪花分佈均勻，一放落爐即刻聽到「滋滋滋」聲，油脂爆開超香！薄切一口咬落去即熔，肥瘦比例完美，完全唔會膩。牛舌厚切有咬口，烤到表面微脆內裡仲juicy，搭啲檸檬汁爽到喊！海鮮方面居然有鰻魚！新鮮肥美，烤到外皮微焦，肉質軟滑甜甜地！除左牛仲有羊架、豚肉等等超多選擇，全部都新鮮又大塊。配菜有好多款，薯仔沙律幾正。甜品區最誇張，馬卡龍、芝士蛋糕、啫喱、窩夫、棉花糖、雪糕任食，真係燒肉+甜品控天堂！CP值超高，連飲品都可以無限攞。環境乾淨舒適，服務員態度好好，見碟空即刻收走唔會阻到我地！就算有fd唔食牛都完全冇問題，海鮮同其他野食全部都超高質好滿足！…查看更多

麻薯芋泥肉鬆豬排係我最中意，外皮炸得脆身，豬扒厚肉汁都鎖到住，入面有軟糯麻薯同香芋泥，再加啲肉鬆提味，甜鹹啱啱好，一啖幾過癮，食完唔會太杰太油。墨魚滑玉米燒分量十足，墨魚滑彈牙有墨魚味，炸得外脆內軟，掃咗層蛋黃醬同芝士粉，微辣帶香，幾開胃。牛肉麵湯底偏濃，香料味夠而不搶，牛肉燜得軟入，麵夠煙韌有口感，冬日食一碗暖笠笠，幾舒服。呢間餐廳啲嘢創意多又好食，唔會太甜太鹹，啱晒香港人口味，價錢都OK，之後想再試其他。…查看更多

元朗QUE午市套餐試咗一款火炙壽司盛，包七款唔同火炙壽司加兩件卷，仲有碗野菜湯烏冬。整體賣相幾靚，壽司份量都夠。帆立貝同三文魚炙得啱啱好，表面微焦，油香夠但唔會太過；赤蝦鮮甜，左口魚裙邊油脂多，入口幾順滑，係幾款入面最突出。穴子汁下得幾重味，甜鹹OK；紋甲魷魚彈牙，火力控制唔錯。太卷就中規中矩，蟹籽牛油果幾夾。最意想不到係嗰碗野菜湯烏冬，湯底清鮮又有菜味，烏冬彈口，飲落暖胃，冬天食好舒服。呢個套餐食完飽足感夠又好食，下次會再試其他set。…查看更多

最近先知牛氣開到去馬鞍山，即刻搵機會黎食。超中意佢地隻吉祥物好得意w新店有好多隻用黎裝飾。湯底揀左牛肉清湯，唔會太鹹太膩。叫左佢地既Lv5和牛set，超多款野食可以揀。和牛餐都會贈送一個圍爐，上面有唔同牛既部位同海鮮，超吸引。d和牛超靚入口即溶。出面自助吧都好多選擇，配料同熟食都好多款可以揀，菜全部都好新鮮。飲品都好多種類可以好好解膩。食完仲可以甜品收尾，除左蛋糕仔仲有雪糕可以自助加。店員態度好有耐性，肉切得好靚又補充得快，座位舒適又唔逼。…查看更多