4樣餸逐樣講地獄七重天花枝辣嘅頭盤，薄切花枝片配好多種唔同嘅辣香料，原本以為會好辣，食落又唔覺，反而感覺到一種清新，落單時服務員強調加左墨西哥辣椒，話好珍貴，總共七種唔同辣香料，雖然我唔識咩係墨西哥辣椒，但確實係辣中帶香，亦會啖啖都食到相似但不相同嘅辣味，而且花枝片亦高質兼彈牙，very good。水煮海班球烏冬第一眼望落去嘅感覺就係嘩駛唔駛咁多舊魚，份量真係好足，估唔到會多成咁。而一般水煮魚要好食其實都要預先煎一煎，即係傳說中嘅水煮油封，所以會比起清蒸更惹味，咁呢碟水煮魚嘅魚肉都仍然幾結實，有味得來亦有口感，亦冇遮到魚嘅鮮味，非常唔錯，而且用嘅烏冬底都幾彈牙，成碟都好有水準。香茅脆皮炸子雞講賣相，絕對一流！至於味道其實都幾有新鮮感，但以我對香茅冇特別好感來講，OK好味，不過最想知係佢點樣整到D香茅入到雞入面，真係唔知佢點醃得咁入味，講返隻雞，煮功到家，外脆內嫩，好過普通酒樓何止兩級，配香茅絕對係一個好嘅嘗試，至少熱愛香茅嘅朋友唔需要再不停食香茅豬扒！香菌海蝦墨魚麵超正嘅墨魚麵！一般食墨魚麵都預左好咸，但呢個唔同，有墨汁香，咸淡適中，好彈牙！近一年內食過嘅墨魚麵之中呢個最高質，反而牛肝菌汁變左配角，汁好濃、好重味、但唔算杰，都幾易撈埋D麵條一齊食，其實己經十分惹味，但D墨魚麵無論味道抑或口感都實在太正！做唔到主角！中環來講算抵食，高質係重點，創意同特別都要加分，有機會係會再去。…查看更多
