可可樂樂的个人专页

平時多數去同層另一間茶樓飲茶，最近覺得越來越差，所以今次選擇去這間試試。曾在開飯網買它的火鍋套餐，2個女仔的話加多個丸或餃子，菜，都差不多夠。而且打咭好靚。但掃興的是這裡的人對員工態度好差，在場中當著客人面大聲喝罵員工，放工後離開緊張的辦公室，只想有個地方讓我輕鬆自在的食餐飯，真的不想聽你為了彰顯自己職位的嘈鬧聲今次同朋友再次來到這，不過就是早上飲茶，估唔到價錢竟然不貴，食物出色，我哋叫左好多點心，樣樣都好味，而且無論蒸點心，還是煎炸的，全部都是即整的，正。最後，我真的想講，因為方便來過幾次，但每次真心覺得你哋對員工的態度好差，請盡量減少你們的呼喝聲，請給多點尊重！…查看更多

之前一直好鍾意沙嗲王, 鍾意沙嗲檬粉, 鍾意豬扒, 鍾意呢度價錢不貴, 可以試多幾樣.所以今天男友費事我纏住煩, 雖然不太願意但還是陪我來了沙嗲王食我一直嚷住話好想食的沙嗲檬粉.今天好難得來到不用等位就可以直接入座, 記得以前經常見到門口排住一大堆人的.一坐低我就巳經即刻叫我最想食的沙嗲豬扒金邊粉(成日將金邊粉和檬粉撈亂), 其實我鍾意的是檬粉....:(男友左挑右選下叫了最穩陣的白咖喱豬扒飯 (又是豬扒...), 我另外要了個奶油津白, 男友的豬扒飯轉了餐, 有龍虾湯, 餐飲我叫了青檸梳打.豬扒還是那麼香口好味, 但沙嗲湯底卻不是印象中的味道....淡了好多, 沒有了那令我一飲再飲的衝動, 總覺得缺少了什麼?心中不由來有一種失落的感覺, 為什麼美好的東西永遠那麼難捉緊?男友的白咖喱飯我都忘了叫他好唔好味, 而後來的加了腊腸的奶油津白好咸, 而且真的好油好在有杯青檸梳打俾我沖淡下口中的又咸又漏的感覺.可能是因為物價高脹, 餐牌上的食物全部巳升幅不小, 加上沒有了令我念念不忘的味道, 相信巳找不到令我再踏足的理由.....…查看更多

難得一個星期日十點巳起身, 突然想起好耐無同Honey 一齊食早餐久違的一個兩人世界早餐, 我選了肯德基, 因為我們兩個都沒試過呢間的早餐, 佢一早巳搵好位等我大駕光臨.趕在十點四十分落早餐Order, 我要了10號餐, 有件新出的醬燒雞塊, 炒蛋及鬆餅, 男朋友要了1號餐, 是雞扒飽.落完Order即時有兩杯熱飲, 但其它食物就要等, 枱面有塊大大的等餐牌樹係度, 男友的雞扒飽一陣巳有服務員送上枱, 我等了又等,男友的包食完了, 眼見店員將早餐的廣告牌收起換上中午餐牌, 但我的食物卻還不見踪影, 再等了一陣, 男友終於起身詢問職員10號餐還沒來, 有職員即時入廚房跟進, 再等了一陣, 職員送上一個雞扒飽, 我們再向職員重申一次, 未來的是10號餐, 但該名職員入廚房一陣又出來回覆: 剛剛不是送上了個包嗎? 男友耐心的解釋10號餐不是包, 讓職員再入內交涉一輪才出來叫我們再等, 過了一陣, 有職員遞上我的食物, 但卻變了全部用外賣袋袋住, 我們唯有拆開外賣袋, 點知一打開, 男友又發現問題, 拿住份早餐走去問職員, 我要的是醬燒雞塊, 不是炸雞, 該職員才又恍然大悟, 即時入廚房再做, 我坐係度望住呢一切, 心中不禁好大疑問, 呢班職員點會幾多號餐是什麼食物都沒弄清楚 ? 因為其中交涉是幾個職員, 但卻個個都沒意識到10號早餐是什麼. 祇不過一份早餐, 可以錯漏百出, 我坐到11點半才有早餐食.本來應該是兩口子好溫馨的享受一個久違的早餐, 但被呢一切破壞晒.:(…查看更多

生日食咩好? 有諗過食日式放題, 有諗過食意大利菜, 最後佢提議食我提過幾次的芝士龍蝦伊麵. 我想起呢間食過幾次而覺得味道及價錢都唔錯的酒家.兩個人來到酒樓, 人客不多, 所以亦不覺吵嚷, 兩個人坐左張四人圓枱, 很鬆動舒服, 坐下巳見到餐牌上有個芝士龍蝦伊麵配梅菜扣肉亦不過二百幾元, 再要一個晚市特價菜式----蒸魚, 男友本來還要繼續點, 但我怕到時眼闊口窄, 始終芝士伊麵都幾飽肚, 所以制止左佢.點左菜不久個梅菜扣肉就上枱了, 上菜速度驚人, 可能呢d菜式一早巳弄好吧, 我夾左小小梅菜試味, 梅菜小小甜, 難得是食落口無沙, 整道菜味道唔錯, 肥豬肉位得好淋, 但廋肉位就差少少, 再淋少少就更正. 再來的蒸魚細細條, 始終是套餐, 當然不能要求太高, 但條魚就過左少少火位, d魚肉有d嚡, 因為男友唔食魚, 所以我自己一個人ko左.噔~噔~噔~ 主角永遠都係最後出場, 等了又等, 芝士龍蝦伊麵隆重登場啦~~ 侍應姐姐果然無講大話, 真係有一隻龍蝦, 蝦肉爽口, 芝士味不太濃, 不過伊麵淋左少少, 我食左二碗, 其它都交給男友去完成. 但佢將龍蝦肉差唔多全部塞入我碗中, 當然又免不了一輪爭奪戰, 人地係爭食, 我們就剛好相反, 兩個都推俾對方, 但我要重新申明, 佢所謂的公平一d都唔公平, 我三舊全部都係啖啖龍蝦肉, 但佢碗中的三舊卻全是殼.食完飯當然唔少得食埋碗糖水---紅綠豆沙, 我兩碗都試過, 全部都煲到起沙, 而且味道都好好, 同出面糖水舖買的一模一樣, 並沒有因為是免費的而水汪汪. 最後我祝自己生日快樂, 永遠健康開心! 當然亦希望身邊人都開心快樂! 老土些都要講句: 希望世界和平!…查看更多

雖然渡過左咁多個聖誕節, 但卻沒有去食過聖誕大餐, 嗯...可能覺得為左呢日去食個比平日多出一倍或者二三倍價錢的所謂聖誕大餐不值得.今天就是聖誕節, 但我們兩個到左食飯時間都不肚餓, 而且我們根本無諗住要同人去逼食聖誕大餐, 但夜晚十一點幾時, 肚餓於是出去搵野食, 經過我們呢排食過幾次的呢間餐廳, 見到門口好大個海報寫住:聖誕大餐, 我停下腳步, 見到價錢不太貴, 但又怕巳咁夜餐廳巳收, 此時, 身邊的他巳推開門問是否還做生意, 近門口的一個睇似老細的伯伯即時招呼我們入內.今日的聖誕大餐有: 頭盤:美國煙火雞伴挪威煙三文魚鮮果沙律, 酥皮焗邁亞美海鮮忌廉湯跟蒜茸包, 主菜是北海道鴛鴦帆立貝伴萊斯卡肉眼牛扒, 我們要求牛扒轉豬扒都無問題, 另外甜品有彩虹新地, 另有一杯紅酒及餐飲.當時餐廳祇剩下一枱客, 等左一陣就有新鮮焗好的酥皮湯, 酥皮好鬆化好香, 我鍾意按落去浸一浸湯飲, 呢個湯入面好足料, 一d都無欺塲, 而且味道幾好, 蒜茸包亦是新鮮整好, 食落口脆卜卜, 而且好香蒜茸味.飲完個湯巳有少少飽, 但見到一大碟新鮮生果所做的沙律, 我又怎受得住誘惑? 兩大片煙三文魚令我胃口大開, 我欣賞佢的火雞肉切得好簿, 而且味道整得唔錯, 因為我印象中火雞肉又嚡又無味, 但今日令我打破呢個觀念. 碟邊圍住一堆切成片的新鮮生果, 我一片片的食落去, 奇異果, 火龍果跟住到橙.最後熱辣辣上枱的豬扒有兩大塊, 份量十足, 而且不是太硬, 味道亦整得好好味. 一啖紅酒一啖豬扒, 感覺真係好嘆. 中途我見陸續有侍應夠鐘收工, 還驚阻住佢地收工, 但見後來還有客人陸續入黎, 而且頭先個伯伯叫我地唔駛急, 慢慢食. 令我倍感窩心及體貼.本來根本無諗過食聖誕大餐, 估唔到竟然食得到, 到後來才由佢口中得知, 原來佢放工回家前巳來呢間餐廳睇過, 一早諗住今晚帶我來呢度食, 真係好開心.多謝你! 又帶給我一個開心的第一次~…查看更多

廣東人好重視做冬, 連好多公司都特別放早俾員工早少少回家同屋企人食飯做冬, 但我們俩小口因為返工關係要到夜晚十點半才放工, 同佢一齊既所有節日我都希望可以一齊慶祝, 做冬呢個大日子我更加不想省略, 本來還諗住咁夜還有邊間食肆可以, 八點幾時, 佢打來叫我上網查荃灣呢間霸王山莊晚上幾點打烊, 估唔到佢都諗過一齊做冬慶祝, 聽完個電話心裡甜絲絲的, 當然立即行動, 當知道呢度收一點時, 開心到即刻將呢個好消息話佢知.放工後, 我們即時坐MTR返荃灣, 原來呢個時候巳經係宵夜價錢, 比平時抵食好多. 佢叫左我最愛的生煎包, 我當然亦不會忘記佢的至愛-小籠包, 我知佢又為左陪我一齊食飯一路無食野, 所以我特登叫左個炒飯, 另外叫多兩個小菜.呢個時候餐應內不是太多人, 兩個人坐張四人枱, 好舒服好寬敞, 而整間餐廳望落好光亮好乾淨, 一諗起我們一齊做節, 我就由心度笑左出來, 可能宵夜時分, 所以d食物好快上枱, 小籠包熱辣辣冒住煙的, 佢夾左一支俾我並吩咐我小心燙, 小心的咬開簿簿的皮, 入面熱烫的肉汁流入口中, 再一口吞埋成個包, 中間的肉團好少渣, 水準都唔錯, 而生煎包亦煎得底小小脆, 包面有少少芝麻, 不知是肚餓還是心情好, 總覺得今天的食物持別好味~ 跟住來的一碟炒飯, 賣相唔錯, 炒得粒粒分明, 中間有我最愛的南瓜碎粒, 中和肉的油膩感, 好快兩個人又上演經常發生的情況--就是兩個人都怕對方食唔飽, 跟住你往我碗中添, 我又爭住往你碗中加, 我總覺得自己食少d唔緊要, 最緊要佢食得飽食得開心, 所以佢每次推番俾我都令我好勞氣.而另外兩個菜中規中矩, 沒有什麼特別.兩個人平靜的渡過了呢個節日, , 雖然平淡但好溫馨, 希望往後的每一年我們都還有呢個興致慶祝每一個節日. 留低一個個美好的回憶.…查看更多

好似沒同你食過扒房, 你雖然話無所謂, 但我卻一直記在心頭, 因為成日經過呢間餐廳而沒有入去食過, 所以, 今日我決定用加左人工呢個藉口請你來呢間餐廳鋸扒.入到去, 樓上樓下二層, 樓梯上企左幾個人係度排隧等位, 一向唔鍾意等位的我今日乖乖的排在人龍後, 好快巳安排左一張卡位枱俾我地, 我叫左個什扒餐, 將牛扒轉左火腿, 佢叫左個當日特選晚餐, 當知道有牛柳時佢想取消, 因為佢應承過我同我一齊唔會食牛, 不過我聽人話如果唔食牛不如唔好食扒餐, 所以我同佢講今日例外, 再三要求佢唔好因為我而錯過美食, 經過一輪爭論, 佢最後終於妥協, 不過再三強調祇此一次.我地兩個都要左忌廉湯, 湯及包都熱辣辣, 不過不失, 佢個餐有個細細個焗魚柳飯, 因為佢成日叫我食多d魚同菜, 咁的魚柳就梗係入左本小姐個肚內啦, 剩番的飯理所當然推番俾佢, 一心等我自己的雜扒餐 等左一陣兩個鐵板扒"吱吱吱"陸續上枱啦, 黑椒汁一淋落去即時四圍彈, 我個什扒餐好大份, 豬扒同豬扒都大大件, 全部都好入味, 唔錯唔錯:) 而男友一路食一路讚佢個牛柳好正, 話好耐無食過咁正既牛扒, 我聽左好開心, 見佢食得開心我就最滿足最開心, 佢幾時先明白, 佢的開心對我黎講多麼重要, 見到佢笑見到佢滿足我就更加滿足.多謝你, 莎樂美~ …查看更多

好耐無寫食評啦, 唔駛男友詐型, 我自己都知, 呢排實在發生太多事, 令我沒有心情寫, 因為我希望呢度記低既都係我同你既開心回憶.你今日突然間話去葵芳食晚飯, 我以為係果間我地提過幾次既小廚, 所以一路都無問你, 點知去到先知你一早巳做好功課. 除左鼎泰豐後, 呢間好似係你主動提出的第二間, 我幾鍾意呢種做你既小女人心情. 門面似一般的打冷店舖, 但佢入面就好似一般酒樓, 祇不過間局一睇就覺得自己坐係上海菜館中, 因為以酒樓形式來講, 呢間店都幾細間. 我地七點左右去到, 祇有二三枱客, 但入面的伙計卻好好态度, 令人覺得比上酒樓舒服好多. 因為佢地好親切, 唔似酒樓例行公事般的笑容.男友話突然間想飲豬肺湯, 所以帶我來呢度食. 一如以往由我負責點餸, 我點了個魚香茄子, 翠玉瓜雲耳炒蝦鬆, 諗住二個人二個餸一窩湯巳足夠, 點知男友趁我去洗手間期間點了個七味蝦.本來男友還驚豬肺湯要等好耐, 但伙計話我地知, 湯一早巳煲好, 有客要時才熱好上枱. 所以好快就有湯飲.好大窩湯上枱, 我見到就直覺兩人沒可能飲得晒, 伙計幫我們各一碗後再細心地將湯渣撈起放入一個盤中. 我唔食豬肺, 所以男友唯有自己慢慢食. 因為個湯名是杏汁川貝白果豬肺湯. 所以湯是奶白色的, 但杏仁味不是太濃烈, 相信唔鍾意杏仁味的都可以入口, 而且睇到佢將白果巳整碎, 所以成煲湯好濃味, 我同男友都好鍾意飲, 飲完一碗又一碗. 當我們飲緊湯時, 魚香茄子煲"z~z~z"的冒住煙上枱了, 睇個樣幾對辦, 而且味道都不錯, 唯一缺點係少了咸魚香, 如果唔係就perfect啦, 但都因為呢個煲我們叫左兩個飯. 再來的七味蝦, 一碟都有好多隻, 其實食到最後我都唔肯定是否連蝦殼一齊炸, 因為炸得好香脆, 可以成隻蝦放落口就咁咬, 食落又唔似外面咬到的蝦殼唔夠脆的要吐出來, 如果話無蝦殼又無理由食到脆脆地既口感, 對我黎講都係一個謎. 我諗下次去食我一定要問問侍應叔叔. 反而個翠玉瓜雲耳炒蝦鬆唔知係咪漏左單, 要催左兩次先黎, 好大碟好夠鑊氣. 但相對前兩碟就顯得有些少失色.整體來講, 呢餐我好滿意, 味道好, 服務好, 一定會再來的!收到沒呀? 親親男友, 下次你又想飲豬肺湯時, 記得再來呢度丫~~~…查看更多

今日星期六, 好慘呀!!因為要返工, 男友今日休息在家, 知道嘴叼的我公司附近的快餐店無一間啱食, 所以佢放假的日子都盡量抽時間買我鍾意既野食送來公司俾我, 有個咁體貼既男朋友, 真係好開心好幸福! 多謝你!傻汪汪~今日佢打來問我想食咩, 突然間諗起好耐無食既沙嗲王, 突然間好想食佢既金邊粉, 於是向男友Order了沙嗲豬扒金邊粉.好野, 一路等的果種期待令我興奮, 一來可以見到成日未見的他, 又來有我最想食既野, 男友風塵僕僕的將熱辣辣的金邊粉送到我手上, 見到佢因為趕路而行到成身濕晒, 果種感動相信我呢一世都會記得~一打開碗粉, 熱氣同香味迎面僕來, 同記憶中的香味一樣, 胃口即時提升, 急不及待夾一注金邊粉放入口, 好熱~~都怪自己太猴急, 燙傷了嘴嘴~好濃香的沙嗲汁, 呢種香味好多食店都做唔到, 難得呢度味道一路都保持水準, 而豬扒分開袋住, 炸得鬆軟又好入味, 成個粉都好好味, 我真係成碗麵成個清晒, 還要飲左好多湯~ 食完真係好滿足~希望沙嗲店可以一路keep住呢個水準, 等我想食時隨時食到:)…查看更多

昨晚同男友係九龍城附近拍拖, 所以一早諗定左晚飯食泰國菜, 祇是選邊間而巳.而一向選擇餐廳及菜式都係我呢個女朋友既責任, 所以當晚我地係九龍城街頭一路行一路選餐廳, 出名少少既門口都排左一堆人, 而見到呢間隆姐門口人少少, 而印象中好似OR有唔少人講過呢間都唔錯.我地拿左籌無耐就巳有位, 呢d餐廳仔唔好寄望坐得好舒服, 我地就要同其它二人共用一張四人枱, 唔知既還以為我地係一齊, 因為唔想食太飽而食唔到甜品, 所以我選左個細既冬蔭公湯, 一碟炒金邊粉, 一個炒通菜, 半打串燒雞, 點知男友見到隔離枱碟炒蜆好大隻即刻追加一碟碟炒通菜最快上枱, 同我之前食的泰國餐廳食既唔同, 呢間的似港式多d, 最奇怪入面有麵鼓?跟住到的冬蔭公湯味道唔錯, 相信落左唔少泰式香料入去煮, 但d蝦就淋左少少,如果個湯再辣少少就正:)炒金邊粉相信炒呢碟粉難度唔高, 但好明顯唔夠鑊氣, 味道一般, 無驚喜.再來的串燒亦沒有即燒出來的香味, 而且都幾乾.失望!男友追加的泰式炒蜆更加唔掂, 我都話佢啦, 唔係大隻就正, 呢碟蜆就係因為太大隻而好難噬, 而且又係無鑊氣. 男友都話呢間野麻麻地, 收到!! 下次出街食飯前都係認真做多d功課先得~容咩易被人話我辦事不力炒我魷既.…查看更多

其實好耐之前巳有同事向我推介呢間刀削麵, 但一直都無機會去試試, 今日出去拍拖睇戲, 食飯呢個咁重要既工作(男友話)我梗係要做番d功課, 一於就決定睇下呢間刀削麵是否合格!如果無記錯好似曾試過刀削麵, 但我記憶中既刀削麵好似食一團粉, 唔好食!! 所以相信呢個應該都係我一直無試呢間店舖既原因, 但今日終於鼓起勇氣同男友一齊踏入呢間店來會會出名既刀削麵.一坐低, 我就點了碗麻辣手撕雞撈刀削麵, 一個麻辣肚絲湯刀削麵, 一客小寵包(呢個不能少, 男友至愛), 一客秘製勳魚, 一個宮廷餃子, 點完餐男友問我是否有信心食得晒, 我才發覺點得開心過頭原來叫左咁多樣野食秘製勳魚首先出場, 男友因為唔食魚, 所以坐係對面睇住我食, 呢碟魚我就唔識欣賞, 因為好多魚骨, 我好小心食都幾次差d哽到:(而且好咸, 好努力食左兩舊都係擺去一旁.跟住到的麻辣手撕雞撈刀削麵睇個樣都好多雞絲, 一於亂撈一通, 撈勻即時食一啖, 有驚喜!!味道麻中有辣(雖然唔係好麻辣), 但都幾香, 最令我驚喜的是刀削麵簿得來好有咬口, 好好味!而小寵包趁我不為意時悄悄的上了枱, 雖然無食開的那間好味, 但一間小店舖黎講巳很不錯, 咁既價錢我接受, 唔知男友又覺得如何?跟住到的麻辣肚絲湯刀削麵餸同麵分開上, 麻辣肚絲沒有想像中麻辣, 而且的肚絲如果再淋少少會更正, 但原來主角係碗毫不起眼的刀削麵, 刀削麵浸左一陣咬落都彈牙有咬口.最令我失望的反而係宮廷餃子, 睇個樣好似幾靚, 但原來虛有其表, 鐵皮底本應令到餃子皮脆, 但唔知點解一d都不脆之餘反而好硬, 餃子皮又厚, 而且周圍既蛋祇可作裝飾, 食落無蛋味而且又係唔知點咁, 唉, 失敗!!!又俾男友多一個藉口話我信人地講咩食咩~~鳴鳴~慘!…查看更多

我一向鍾意食小食, 正餐反而麻麻地.有時夜晚男友問我食咩, 如果唔肚餓, 我第一時間諗到來大家姐難得男友肯就我, 俾我話晒事.兩人來到第一時間會叫碟腸粉加燒賣, 呢兩樣係我至愛. 其實我諗我最鍾意食的醬卦. 另外一人叫一碗車字麵, 估唔到呢間既車仔麵水準唔錯喎, 最鍾意個湯底清清地又夠味, 一路食一路笑住讚, 還有, 呢度既串燒又係唔錯, 我估我最欣賞既或者又係佢既醬卦男友鍾意見到我開心笑住食既樣, 我鍾意男友陪我試勻各式美食, 開心配搭---絕配!我預左俾佢見到笑我既~~哈哈~…查看更多

男友話想行下廟街, 所以今日去左佐敦附近行街, 咁晚餐地點梗係鎖定佐敦油麻地一帶啦~唉, 我又要上網搵定餐廳先得(其實佢對食無咩要求, 講到底都係我呢個公主要求多多而巳)見到呢間有小籠包各式野食, 啱晒我呢個多心樣樣都想試少少既人啦~一於等我今晚來會一會你啦~我點左生煎包, 小籠包, 担担麵, 醉雞. 男友跟住叫了酸辣湯, 紅油抄手, 雞絲粉皮. 後來又追加了一個糖醋魚柳, 一個咸肉豆腐湯.好似叫左好多野食, 其實呢度全部都係細細碟, 生煎包及小籠包都係二只一份, 首先講小籠包, 真如其它食家所講皮好簿, 咬開好多湯汁, 但今次我叫左川味, 係有少少辣味, 但我唔鍾意, 還是傳統味既小籠包啱我多d, 生煎包沒有煎到餅底脆脆, 祇是一般而巳. 醉雞夠酒味, 但入口苦苦地, 相信同的酒有關, 而且的雞沒有味道, 麻麻地. 酸辣湯相信落了太多生粉, 好糊而且的料都不是太多, 不夠酸亦不夠辣, 唔收貨. 紅油抄手的餡入面有西芹, 所以我食左一粒其餘全部男友包尾, 但佢既醬汁沒有我期待應有既味道. 雞絲粉皮最離譜, 真係好細碟, 粉皮卷埋左一齊, 好厚而且一d都唔滑, 而且醬汁中食到類似味精既東西.:( 反而糖醋魚柳係我全晚最欣賞既一樣餸, 魚肉好滑而且無咩炸粉, 我好鍾意, 成碟清晒 (在此要多謝男友特別為我而點呢樣餸, 因佢自己唔食魚), 咸肉豆腐湯亦都祇是一般.担担麵亦沒有驚喜, 而且的湯味道怪怪地, 埋單二百三十幾元, 但男友話好似無食咩落肚:( 其實又唔可以話唔好食, 但全部野食都祇是做到一半出來.…查看更多

成個星期無食過飯落肚, 今日想食番d飯, 正在愁今晚去邊度開飯之際, 諗起呢間咖喱大皇.決定左餐廳, 即刻同男友向目的地出發, 七點幾既星期日, 店內祇有幾枱客, 兩個人靠邊坐了張二人枱, 但張枱真係好細, 祇可擺到兩碟野. 點了朋友曾向我推介的巴基斯坦咖喱雞跟簿餅(因朋友知道我嗜辣), 一個辣星洲炒飯, 男友接住點了蝦冬蔭公湯, 半打串燒(豬及雞), 一碟咸魚茸炒通菜.蝦冬蔭公湯最先到, 未飲巳聞到好濃既香味, 飲得出落左好多香料, 呢度的偏酸, 但幾好飲, 我同男友各飲了兩大碗, 跟住到的通菜好夠镬氣, 估唔到又幾好味喎, 不過咸左少少. 反而我一心期待的巴基斯坦咖喱雞卻令我失望, 好明顯雞完全唔入味, 而且的咖喱亦不辣:( 跟餐的簿餅熱辣辣好味, 但好細塊, 唔夠喉囉:(串燒雞好過豬, 但都係無串燒應有的香味. 失望. 最後到的辣星洲炒飯一d都唔辣, 因為係用豆瓣醬炒的:( 唉, 滿心期待的一個飯我食左兩口巳完全唔想再食. 點了杯青檸薏米水, 我估唔到係咁求其囉, 幾塊青檸同一匙煮熟既薏米加d糖水, 見到杯咁既野, 我0晒嘴, 無野好講.睇食評有唔少人讚, 咁是退步了嗎? 還是我唔識欣賞?…查看更多

傻汪知道餵食猫咪鍾意食辣, 所以平日都幾留意所有關於辣既野食, 呢間小店幾次經過佢都提我搵機會陪我來試試.今日傻汪放工巳八點半, 呢個鐘數巳過我食晚飯時間, 所以大家決定搵的小食食下, 佢突然間諗起呢間店, 橫掂我哋一直想試, 一於今日試下先.入到去間店真係好細, 擺得幾張枱, 而且都幾密, 好彩果陣九點幾無咩人, 我地坐低見到有套餐, 於是叫左個口水雞套餐, 有一碟口水雞及一碗招牌酸辣粉, 一碟油菜, 我地有個共通點就係要試就試多幾樣, 於是叫左二串串燒, 一碟滷水豆腐, 一條鯖魚(傻汪成日都想我食多些菜及魚, 但佢自己唔食魚的).碟口水雞最先到, 應該係一隻雞脾位, 都有五六舊, 唔好睇賣相好似好辣咁, 其實酸味重d, 如果我食覺得辣味可重些, 而且無咩麻香, 但都夠味.酸辣粉幾多份量, 好彩叫左一碗者, 又係不夠辣(無諗到加枱上提供的麻辣粉), 但味道唔錯, 而且的粉都幾彈牙.滷水豆腐好入味, 但我覺得略咸左少少. 串燒不過不失, 叫左串豬肉一串雞肉, 豬肉太亁, 相對雞肉好味好多.碟菜無咩特別, 所以都無影到相.反而男友特登幫我叫的鯖魚令我太失望, 因為平日係日式餐廳叫過幾次鯖魚我都好滿意,所以男友見到呢到有鯖魚即刻叫左條俾我食, 但呢條鯖魚可能太細條, 所以無油份, 成條魚好乾, 男友見到我食到皱晒眉. …查看更多