Selina S N Lo's Profile

去 SOGO shopping完，天氣熱辣辣，亞仔居然話想食火鍋，咁就滿足下佢，去咗銅鑼灣L Square嘅火鍋本色。我哋一行六人，坐張大枱，二話不說，就叫個六人餐先啦。哇，個餐嘅食物種類真係多不勝數，幾乎一般嘅火鍋材料都包含了，而且仲有兩樽竹蔗水或酸梅湯添。食物種類實在繁多，一般嘅水餃雲吞，肉丸蔬菜盤，不在話下，真係要提一提佢哋海鮮拼盤，同埋手打牛肉。  海鮮拼盤一上枱嘅時候，我眼睛就俾佢吸引住，D蝦腳正在不斷嘅擺動，鮑魚也在抖動，見到食物咁新鮮，真係想立即將佢哋K.O.。另外，聖子也很彈牙，蜆大隻，蟹又有大肥膏。食火鍋，食牛肉就例牌㗎啦，佢嘅手切牛肉好講究，特別新鮮，有牛味，淥到啱啱熟，入口就溶化。高質素嘅牛肉，貴啲都值得。除咗呢兩份主角，其他嘅蔬菜拼盤新鮮，肉丸超級彈牙，響鈴脆卜卜，以每人平均三、四百蚊黎講，最後配上雪糕糯米糍，好滿足超值的一晚。…Read More

星期日朝頭早，唔想同人去酒樓迫，就走咗去牛頭角國際貿易中心呢一間 Lagom Kaffe，嘆番個brunch.  呢間 Kaffe面積好大，兩邊都有開陽大玻璃，所以特別光猛闊大，好舒服溫暖嘅感覺。我哋兩個人去食 brunch ，覺得總要叫返個All Day Breakfast 先似樣，再加上一個巴馬火腿奶油牛肝菌意粉，叫番杯燕麥奶latte同凍檸茶。All Day Breskfast 一上枱，好豐富好精美，好有心思。除咗大條芝士腸仔外，還有兩隻煎蛋、蘑菇，冬菇、沙律菜，薯餅和兩件多士仔。 見到兩隻煎蛋就開心，係我鍾意嘅脆邊，冬菇蘑菇炒得好香，值得推介！巴馬火腿奶油牛肝菌意粉，呢個意粉好特別，喺出邊啲餐廳好少食到，而且加上啲巴馬火腿，吊起個味道，配上啲creamy 嘅汁，真係一流，而且份量啱啱好，唔會太多!食到呢度已經好飽了，再飲埋杯咖啡，真係一個好豐富嘅brunch，下次要再嚟過!…Read More

朋友仔都知道我除咗對食物質素有要求外，餐廳嘅環境我都好重視下，咁今日喺旺角放咗工，就帶我去到Bellevue Bar and Grill.  一上到去，我就被餐廳嘅擺設、環境、和格調吸引了，由於佢位於大廈嘅頂層，整個旺角嘅美景盡入眼簾。我同朋友仔一人叫咗個套餐，首先上場嘅係比較有特色嘅黑水橄欖麵包和粟米味餐包，呢兩個都唔係一般喺街食到嘅麵包，可以見到大廚嘅心思，上枱熱辣辣配上牛油溶化，好好味。跟住今晚嘅餐湯係大蒜薯仔湯，好creamy  ，分量剛剛好，跟住就上埋開胃嘅沙律，為主菜作好準備。主菜方面，我哋分別點左一個法式海皇鍋和肉眼扒，牛扒我要叫七成熟，係傳統嘅燒烤紋上碟，肉質嫩滑，口感豐富，配上芥辣，剛剛好。海皇鍋包括有大蝦、香煎魚、青口和帶子粒，醬汁有濃濃嘅蝦味，配上海鮮清新，中和得你啱啱好。食咗咁豐富嘅食物，之後當然仲要食返份甜品啦，套餐包括了一件自家製白桃乳酪慕絲蛋糕，食到咁飽，最後再叫番杯熱檸茶消化下，今晚真係大滿足了。…Read More

喺ELEMENTS行行吓，去到戲院附近，見到有一間越南餐廳，見好耐冇食撈檬，都想入去試吓。一入到去，已經覺得好光猛開楊，陽光通過透明嘅大窗，落在餐廳，溫柔溫暖嘅感覺，大玻璃仲可以眺望開揚大遠景。睇吓餐牌，即刻叫咗碗，我思念左好耐嘅美國生牛肉湯河，香茅牛肉撈檬，燒豬頸肉，同兩杯鮮青檸羅勒薄荷梳打。生牛肉湯河，一上碟已經見到伴碟嘅洋蔥澆了一個又一個嘅圈，上面插進薄荷葉，即刻feel 到餐廳嘅心思，湯粉湯底濃郁，牛肉份量都幾多，而且嫩滑有肉香，下次一定要再試；香茅牛肉撈檬，牛肉味非常濃郁，好多肉汁，夾埋檬粉啱啱好；燒豬頸肉上碟嘅時候熱辣辣嘅，香肉味濃郁又爽脆，一啖食落去好滿足，加埋好特別酸酸甜甜嘅醬汁，好開胃。青檸羅勒薄荷葉梳打， 青檸份量好多，非常清新，食飽飽飲佢，唔會太滯太甜，令人有舒適嘅感覺。埋單幾百蚊，呢間餐廳喺Elements，有啲超值嘅感覺！…Read More

今日同同事去食晏，見喺ELEMENTS溜冰場，上面有間餐廳，Cafe Deco Pizzeria，顧名思義主打食Pizza，咁就入去試吓囉！一坐低就點嘢食先，頭盤揀咗個香脆魷魚，Pizza就要咗黑松露火腿薄餅，再加個醬燒美國豬肋骨同兩杯 mocktail. 食嘢之前，餐廳好窩心咁先送上兩碗忌廉南瓜湯，湯味濃郁細滑，令人開胃。 跟住送上惹味香脆魷魚，上碟時還熱騰騰的，外面包着脆醬，點埋個醬汁，香脆鬆化，又不太油膩。黑松露火腿薄餅，薄餅好大份，脆卜卜熱辣辣，黑松露薄餅唔係咁容易食到，配上薄火腿，香味中和得來好香滑，同脆皮嘅薄餅相得益彰。跟住係醬燒美國豬肋骨，炸到脆香嘅薯條伴碟，好入味，配上濃濃嘅醬汁，同烤西瓜粒伴碟，食完肉再咬一下西瓜，又變得清新了！最後，飲埋杯菓汁，甜甜荔枝香味，澆在口中，大滿足了！…Read More

趁而家疫情放寬，可以同朋友聚下，就諗到去屯門三聖邨食海鮮，眾裏尋他，我哋就選擇了泰海鮮試一試。我們一行四人，點左海鮮湯、油鹽水貴妃蚌、泰式香茅瀨尿蝦、辣酒煮花螺、油鹽焗奄仔蟹、酥炸生蠔同白酒忌廉煮花甲烏冬底。首先上場的是海鮮湯，因為配料充足材料新鮮，所以湯味濃郁、鮮甜無比。跟住嘅貴妃蚌，亦都因為食材新鮮，不用加什麼調味料，用油鹽水勺，已經好鮮甜了，保留住蚌嘅鮮味。我嘅至愛賴尿蝦，唔用傳統嘅椒鹽，改用泰式香茅，特別惹味，配料嘅腰果也不錯呢。奄仔蟹，充滿黃黃嘅肥膏，鍾意食膏蟹嘅朋友，係唔錯嘅選擇。酥炸生蠔，外脆內滑，上碟時熱騰騰的，小心盪手。辣酒煮花螺，螺肉爽有咬口，唔太辣。最後，大大隻嘅花甲，用忌廉汁撈上烏冬，真係食到捧住個肚了！…Read More

同閏密喺SOGO shopping完，有D餓，想食個晏先，行行吓就去咗，銅鑼灣謝斐道Tower 535 地庫嘅京都勝牛。我哋分別叫咗兩個套餐，第一是霙花翼板牛排套餐，配芒果奇異果味有汽特飲；我就點了一個香脆炸里脊豬排套餐，配白桃蒟蒻冰茶。每個套餐都包括了味噌湯，椰菜沙律和麥飯，要提一提，沙律、湯和麥飯，還可以無限追加呢，保證食得飽！先講講份霙花翼板牛排套餐，原來「霙」係解作雪花，牛扒上還很有心思地鋪了一層白蘿蔔蓉，比喻作雪花，其實真正嘅雪花，係喺牛肉入面嘅脂肪均勻地遍佈在牛扒上，就好像雪花一樣；此外牛排還配上牛排汁、山椒鹽和鰹魚昆布汁，就是配料方面也花了不少心思呀！至於份香脆炸里脊豬排套，豬排一上枱時是熱騰騰的，還冒着煙啦，食嘅時候小心盪口啊，豬排鬆化加上脆脆嘅外皮，一落咬口卜卜聲；此時再將椰菜絲配上沙律醬，跟豬排一起放進口，椰菜絲中和左豬扒嘅熱氣，配搭相當好！食得炸物咁上下，有啲口乾，再飲番啖佢哋嘅特飲，食完整個餐，都已經飽飽了，邊個唔夠嘅仲可以追加麥飯、湯和沙律，下次真係要再嚟過！…Read More

又到食午餐的時候，同事們話不如去返上次，性價比極高的太郎居酒屋，日式的午餐，百多元消費，係我哋午餐常去嘅地方。我本人呢，就比較鍾意熱食，所以通常我都係揀佢嘅壽喜燒定食，同我個人一樣烚吓烚吓咁。一如過往，鍋中有四片牛肉、蔬菜、豆腐、烏絲和冬菇等等，配上一碗白飯。牛肉數量剛剛好，蔬菜淋甜，豆腐入味，芋絲和冬菇中和番肉類嘅油滯，忍唔住連湯都飲埋。就如一般的日式定食，配上沙律前菜、蒸蛋和味增湯，最後包一杯飲品，作為一個白領的日常午餐，性價比高，已經很滿足了。…Read More

今日同囡囡去ELEMENTS玩完溜冰，好肚餓話要食pizza，咁啱喺溜冰場抬頭一望，就見到有間Cafe Deco Pizzeria，立馬出動。一坐低，要個頭盤先，意式牛油果蟹肉及煙三文魚多士。份量唔係好多，每款一件，好creamy，面層鋪了滿滿的芝士，加上沙律汁好開胃，為後面豐富嘅美食開路。跟住，當然就要叫我哋嘅主食pizza，囡囡喜歡牛肉，我喜歡大蝦，咁就一於叫返過M6和牛拼虎蝦pizza。Pizza一上碟，熱辣辣香噴噴，要小心盪口，餅底外脆內軟，分量很大。上面鋪了滿滿的牛肉，分佈均勻，再配上大量芝士，一咬落去，脆卜卜熱辣辣配上濃濃嘅M6和牛味，已經是人間美食，仲要加上爽脆可口彈牙的虎蝦，令到層次更加分明。以這個價錢，就食到一個咁豐富嘅Pizza，真係要大力推薦！主菜方面，我們再點了一個紅酒會豬膝，這份量特別大，絕不斯場，用紅酒慢煮，所以肉質特別嫩滑，還配上南瓜蓉、果乾和青豆，特別用心。最後，飲品方面，我和囡囡分別叫了Lychee Punch 同 Conte，夏日消暑特飲。我哋兩母女，最後都要捧腹滿足地離開！大滿足啊！…Read More

中午出街食飯，見到有間新開嘅Homeland，感覺好年青，忍唔住走入去試吓先。兩個人分別叫了兩個午餐，主菜一個是香烤西班牙乳豬配果洒燒汁，另一個即是煙肉蛋安格斯牛堡，因為為食，再加多個小食香草牛油蒜香焗田螺。午餐首先端上一個田園沙律，蔬菜新鮮配上黑醋汁，相當醒胃。田螺剛剛由焗爐送出，熱辣辣香噴噴，小心薯蓉盪咀呀，田螺新鮮軟淋，一口咬落去剛剛好。乳豬上碟，皮脆肉欶，配上新鮮熱炸的薯條！  安格斯牛堡，牛肉剛剛熟，配上豐富配料洋蔥、芝士、煙肉蛋和太陽蛋，咬落去層次非常豐富，肉質四溢，令人大滿足。再配上冰凍檸檬茶，這個午餐很豐盛呀。…Read More

今日喺銅鑼灣放工好肚餓，想舒服咁食個西餐，就諗起喺銅鑼灣二期嘅Mini Friday。浦坐下，便立即叫了佢馳名的火焰脆燒德國鹹豬手、水牛城雞翼、藜麥華都夫沙律，再加兩杯檸檬茶。呢個火焰豬手，真係要試一試，首先佢原隻豬手上枱，侍應會好貼心地，比時間你慢慢影相，然後慢慢淋上美酒，再係你面前點火，可以看得見，豬皮被燒得脆脆的，喺餐廳入面，真係有聲有色有香氣；之後，侍應會成隻豬手拎走，幫你逐件逐件慢慢切下，作為客人，我們只需要負責影靚相，和享受美食。藜麥華都夫沙律，西芹俾我意外驚喜，本來對於西芹一般的我，覺得它又香又脆, 為沙律增添一點清泉。總括來說，在銅鑼灣以幾百蚊一個西式晚餐來說，算超值了。…Read More

喺灣仔行街行到攰，想搵間舒服嘅餐廳坐低，好好地食個飯，便想到去灣仔大王東街的一間泰國菜館，新泰東南亞餐廳。我哋兩個人，坐低便急不及待點了，我去泰國餐館必吃的泰式明爐烏頭、無骨鳳爪沙律、馬拉盞通菜，及一個冬陰功湯，再加上兩杯冰凍龍眼冰。無骨鳳爪沙律先上，鳳爪爽脆，個汁酸酸甜甜甜甜的，特別開胃，冬陰功湯酸酸辣辣，可以揀大碗或細碗，我哋兩個人，要咗一碗細嘅試吓，果然開胃。明爐烏頭上碟熱辣辣，下面一個火爐燒着燒着，熱騰騰的，等了幾分鐘，終於可以食粒，魚肉鮮滑剛剛熟，配上泰式靚湯，味道啱啱好！馬拉盞通菜，不在話下，傳統美味泰國馬拉盞，冇得輸！最後，加埋兩杯冰涼的龍眼冰，好滿足的一餐啊！…Read More

同朋友喺美麗華廣場行完街，係時候要搵食了，係咪男仔食嘢都鍾意大大份啖啖肉，二話不說就話想跑去食burger。咁喺商場2樓嘅Burgeroom，就最適合不過了，因為呢度啲burger出名大大份，今次真係見識了。朋友一心想嚟食burger，佢仲要係超級芝士迷，諗都唔諗就即刻叫咗一個特量芝士牛肉漢堡；而我就選擇左一個比較特別的軟殼蟹漢堡，再加上兩人共享一個黑松露芝士薯條，各自再點了一杯菠蘿冰冰及荔枝冰冰。等咗一陣，食物上枱就即刻為我們帶來驚喜了，漢堡包中夾了厚厚的牛肉，肉汁滿瀉，香濃牛肉味，連漢堡包皮也是被烤得脆脆的，再夾上蕃茄芝士配料，一口咬下去，真係冇得輸！再嚟就係我所揀嘅軟殼蟹漢堡，咁Burger一上枱，我即刻忍不住笑，就好似成隻蟹夾在漢堡包裏，外表炸得脆脆的，咬落去有肉汁不會太乾，喜歡香脆嘅朋友，值得一試！就連黑松露薯條也是熱騰騰，脆脆的上碟，食嘅時候還小心燙手燙口，再加上拉絲的芝士，對於我這個芝士迷來說，實在大滿足了！埋單300多元，一間位於尖沙咀嘅餐廳，咁豐富咁有份量嘅burger，值回票價了！…Read More

平日好少去新蒲崗，碰巧今日去Mikiki逛商場，在疫情期間，想搵間乾乾淨淨、舒舒服服嘅餐廳食一個午餐，途經見到商場樓下, 有一間西班牙餐廳，風格雅調，就心思思想去試一下！裝廳原來設有室外及室內雅座，室外嘅風格，就好似係歐洲享用午餐，配合暖暖嘅陽光，但怕曬驚出雀斑嘅我，當然就要搵餐廳入邊嘅雅座了😜餐廳設有set lunch，但見Menu有signature推介，特色烤乳豬，心想西班牙最馳名的就是烤乳豬了，點可以唔試一下呢，即刻點了一個，再加上一個burger，再點過凍飲。先來過烤乳豬，熱辣辣，正是皮脆肉嫩，而且皮下脂肪比例恰到好處，脆卜卜嘅乳豬皮，下面配上嫩嫩滑滑嘅肉質，呢個就係考功夫之處，係必食推介！跟住就上漢堡啦，呢個喺迷你漢堡配黑松露醬，食落好有肉汁，慢慢感覺出黑松露嘅配味，再加上薯條，飽飽了！好滿足的一個午餐！…Read More

這幾天，疫情在香港島爆發，想找過比較安全的地方吃過午餐，便選擇了到油麻地的廚十三老壇酸菜魚。餐廳內全是開陽的景觀，令人可以在一個光光猛猛、舒舒服服、整整潔潔的地方，好好的享用一顿午餐。我們一行四人，各人先點了一人份量的酸菜魚，午餐分有小辣、中辣和大辣。除此以外，我們還點了很多的涼食，其中主要的有手撕雞、麻辣豬耳、青瓜、黑木耳，油菜、泡椒鳳爪、香酥雞翼和酥炸豬扒等等。其中我覺得最有趣的便是上上籤，其實它是串好了的串物，包括有椰菜花、鵪鶉蛋、青瓜、藕片等等，我和朋友們，便輪流抽起簽來選食物，一邊吃一邊玩，蠻有趣的。最後，還吃了甜品紅糖冰粉和炸米餅，為這次的午餐，畫上一個完美的句號。…Read More