or#di66801849的个人专页

睇到介紹，意粉咖啡都好似唔錯就試試佢。咖啡係正常味，環境正常。然後意粉，難食。意粉叫左卡邦尼扁意粉 & 手打牛肉漢堡扒蒜蓉意粉配黑松露蘑菇汁。卡邦尼扁意粉默默地放左上枱，然後staff就走左，初頭以為係上錯，睇落聞落都唔似卡邦尼，就問一問確認一下係咩嚟，會唔會係上錯，佢反左下白眼，發出左一下幾重嘅呼吸聲，然後就返左去counter。見佢好似嬲嬲地，我仲以為係真係上錯所以要去問責，有少少緊張會發生咩事。原來佢係去睇一睇張單就返嚟，答我係卡邦尼扁意粉。心諗，你望住碟野都唔知係咩嚟，要睇下張單先知，咁我點會知係咩嚟😂然後食食下就醒起，我見過依款卡邦尼意粉，係同叮叮意粉一樣，但係叮叮好食啲，起碼叮叮都會用煙肉而唔係火腿。牛肉漢堡扒蒜蓉意粉配黑松露蘑菇汁一上嚟，依個睇得出係咩嚟，因為有塊漢堡扒，上面有pat黑松露。但淨係睇個意粉，同上面嘅卡邦尼不能夠話十分相似，只可以話係一模一樣。不過撈返黑松露係當然會唔同，就係卡邦尼加黑松露味。漢堡扒正常，但格格不入，唔明點解會咁設計。然後係無影相嘅，唔會想影啲求其整嘅嘢。店員態度就理所當然地差，唔知大家係唔係有咩心事唔開心，或者可能返工就會心情唔好。收左加一服務費，但唔知有咩服務。總括而言就係索然無味，餐飲無味，人情無味。完全體驗到間野係是但求其，除左喺宣傳方面十分之落力，睇唔到仲有啲咩位間野係有心做。…查看更多