暗黑廚神的个人专页

星期日同朋友喺Mega Box shopping 完已經差不多8點半，大家又攰又餓，見到十勝豚肉無人等位加上我同友人都未試過呢間餐廳就決定試一試啦。剛好有張卡位枱，座位都幾舒適，環境乾淨企理。未試過嘅餐廳我都習慣會睇睇食評再落order，嘩… 負評都唔少，所以只叫一個主食 share ，再加份沙律、小食。芝麻醬露筍沙律，賣相靚味道好，主角露筍幼嫩、沙律菜新鮮再配上芝麻醬，整體都唔錯，唯美中不足是份量太少。炒野菜抵食，只需$18，份量又唔會太少喎～ 味道都唔錯。十勝烤豬肩脥色香味俱全，味道相當唔錯，肉質鮮嫩唔鞋，醬汁又香濃！十勝烤薄豬扒飯，由於我同朋友share，所以叫了Jumbo Set ，碗飯真係好大碗麵豉湯、中華沙律都正常，烤薄豬扒較為遜色... 肉質非常鞋口，好似湯渣瘦肉 總括來說食物都唔錯，服務質素都幾好，起碼侍應們都識自動自覺幫客人加水。整體感覺都唔係負評講得咁差，可能我哋當晚好彩啩…查看更多

由於近年較少去又一城行街，聽朋友講才知道有一間西餐廳叫Ciao Chow，是全港唯一一家獲得正宗拿坡里薄餅協會AVPN（Associazione Verace Pizza Napoletana）認證的意式薄餅店。 咁厲害！當然要約埋朋友去試一試啦~餐廳是開放式設計，光猛簡約，餐廳外望入去感覺良好。可惜我倆被安排坐單邊位置，狹窄又不舒適 入座後有一本附上好多食物相片嘅Menu同落單紙，客人需自行落單，由於食物種類不是太多，自行落單都簡易快捷。前菜、沙律、意粉、意式薄餅、甜品及飲品都一應俱全，而意粉及意式薄餅都可以自選配料，客人可以根據自己喜好製作獨特口味嘅意粉或pizza。我哋大胃王上身~ 兩個人竟然叫了前菜、沙律、意粉及意式薄餅各一款。本想再叫埋cream brûlée，但最後真的太飽，甜品都吃不下了。羽衣甘藍、松子仁、麵包粒，配上香蒜蜜糖汁及芝士碎，味道同賣相都不錯。新鮮蕃茄醬不會太酸，十分開胃，可惜肉丸嘅肉質較淋身，雖有鮮肉味，但口感一般。露筍火腿招牌忌廉寬條麵，露筍爽口幼嫩，忌廉汁又夠 creamy，整體都唔錯，略嫌味道偏咸。Due Salami 顧名思義呢款pizza有兩款莎樂美腸～ pizza 個個都係即製，新鮮出爐一上枱已經好香，賣相唔錯又熱辣辣。餅底屬於薄身還有陣陣炭香味，莎樂美腸加上芝士、蕃茄醬確實絕配，非常惹味可口 …查看更多

夜晚同朋友心血來潮去深水埗搵食，本想去食車仔麵，但路經見到劉森記，同行友人又話此麵店頗有名氣，所以即時轉陣去試下蝦子撈麵傳統麵店，舖頭細細但勝在乾淨企理，坐得舒服。醃蘿蔔有驚喜！每枱都有一大瓶給客人免費任意添食～ 醃蘿蔔爽口，酸酸甜甜令人好開胃，簡直食到停不了口食緊醃蘿蔔之際，主角蝦子撈麵好快就出場。老闆一啲都唔吝嗇，好多蝦子呀～ 麵條煙韌彈牙又不會太難咬鵝腸爽口加埋薑蔥同辣椒豉油，超正！略嫌黑柏葉較硬較難咬。接著雲吞炸醬撈麵都上枱，雖然炸醬賣相一般，但好好味！最最最出色係碗雲吞湯底夠味配上韭黃，超香～ 雲吞足料，每粒都有兩三隻蝦要再去encore …查看更多

因工作關係嚟到大圍，見到呢間粉麵店就入去食個快飯啦，點知中哂伏牛什河正常，牛肚好味又夠淋，但個人覺得湯底略咸。炸醬麵就麻麻地炸醬唔好味，啲麵好似未煮熟咁，成條橡筋一樣。奶茶、鴛鴦都只係一般... 又苦又澀...嘩... 最伏嘅主角出場... 碗淨食豬油渣上枱時都感覺ok架...豬油渣食落口就知出事喇超級難食！又唔香又唔脆！我完全唔知自己食緊咩成碗豬油渣浸了5分鐘後，直情係恐怖！啲肥油、肥膏浮哂面，見到都無哂胃口…查看更多

好友飯聚總有說不完嘅話題，明明已經食飽飽晚餐，但總會再去搵甜品店，食住甜品、糖水繼續源源不絕嘅話題同朋友都係第一次嚟到大角咀麥太甜品，雖然舖頭小小，只有4至5張枱，全店大約坐到十幾人，但甜品款式有很多選擇有傳統中式糖水、豆腐花、涼粉、西米露、芝士蛋糕、以至果汁、花果茶等等，應有盡有天氣凍嘅關係，大家都選擇了熱辣辣嘅中式糖水分別為：花生湯圓拼芝麻湯圓(左上) / 自家製即磨腰果露(右上) / 南北杏木瓜燉雪耳(下方)湯圓可以雙拼，讚！我哋可以試哂兩款口味。我個人較喜歡芝麻湯圓，若然薑湯再辣一點味道會更好。木瓜燉雪耳味道唔錯，重點是不會太甜，清清地又夠滋潤！最好味係腰果露，腰果味濃郁，口感又夠細滑，既不會太杰又不會太甜平凡又簡單嘅小店都有出色嘅甜品！唔錯唔錯…查看更多

平時好少去九龍灣行街街，機緣巧合之下嚟到 E-Max ，當然要搵下有咩好食先見到有間759車仔麵，之前都未試過就一於試下啦。早餐時段就未有車仔麵供應，要下次晏啲嚟先試到車仔麵。咁早餐有咩食呢，有豉油王炒麵、腸粉、糯米雞、雙拼三文治、西式扒餐、雙拼麵餐。雙拼麵餐可以選擇出前一丁，重點係唔使加錢，當然不能錯過啦早餐 ($28) 午餐肉拼炸雞中翼出前一丁 & 熱奶茶茶夠香濃P.S. 759會員仲享有95折優惠！而家仲有廿幾蚊早餐，無論環境及食物質素都唔錯，真係超抵…查看更多

星期日行街行到攰攰地，好想搵個地方坐下休息下，最好就係去食個下午茶經過 Tom 中西泰料理，我就被個餐廳名吸引咗，又中又西又泰，睇睇餐牌後發現其實係一間茶餐廳。都好啦，餐廳乾淨、裝修又新，又有我至愛嘅菠蘿油 & 熱奶茶，我就充滿期望咁入去食嘢。餐廳都幾大間，好多座位，下午茶時段都差不多爆滿。服務都唔錯，侍應落單快，上菜都好快。落單後，熱奶茶好快就送到，茶香奶滑，不錯不錯！菠蘿油貌相好差 個包扁哂，而個皮又爛又碎... 一啖咬落去，心情一沉，個菠蘿包係凍 凍菠蘿包配軟牛油，難食！呢個$28 嘅下午茶餐真令我好失望…查看更多

放工後再上瑜珈，落堂後又凍又餓，同朋友經過D2 Place 見到 The Salted Pig 環境唔錯喎，就決定入去食少少嘢啦，始終運動完應該忍忍口樣樣都想食但又怕運動後喪食變增肥，結果只好放棄好吸引嘅招牌德國咸豬手，選擇了小食拼盤 & 芝士通心粉小食拼盤有6款食物，款款都幾好味，當中最特別係炸豬皮，超級脆口，佐酒一流👍🏼芝士控嘅我見到芝士通心粉已經心心眼，竟然食哂先發現忘記了影相通心粉芝士味濃濃～ 又夠彈牙～ 超讚！如果份量可以增加就更好總括而言，環境舒適，食物唔錯，下次要相約好友們 happy hour 飲返杯…查看更多

星期六的下午路經土瓜灣道時突然傳來一陣雞蛋仔香味，就見到一條小小嘅人龍，當然要去八卦一下啦 原來有一間新開嘅629雞蛋仔，除了原味之外，還有不少特色味道！作為芝士控，我必然選擇芝士蛋蛋～芝士味香濃，份份新鮮即製加埋吹風機所以雞蛋仔又熱又脆，真係食到停唔到口！一試難忘如果多幾個朋友同行就必定試多兩款口味&格仔餅…查看更多

星期五嘅中午既趕時間又肚餓，我就決定食一個quick lunch，發現荷里活商業中心地下開了間 Toast Box，見無人等位就即刻叫餐啦。叻沙賣相吸引，令我食指大動，差點連食物相都忘記了影低。第一時間飲啖湯先... 湯底唔夠香濃又唔辣... 失望 😔 但最敗筆係 Laksa 個麵底 - 米線又軟身又碎，口感其差😖 若然米線換成油麵的話，成碗 Laksa 可以加分，不至於唔合格...Toast Box嘅熱奶茶係加煉奶，所以比較甜，我叫少甜，甜度剛剛好，不過我始終較喜歡茶餐廳嘅絲襪奶茶。PS. 喺旺角中午時份都無人等位嘅餐廳通常係會中伏😅…查看更多

因工作關係要到機場走一趟，見時間尚早決定食返個早餐先😊 喺 Terminal 2行咗個圈，餐廳食肆都有唔少可以選擇，仲有一個food court添。最終我被阿鴻小吃所吸引，因為阿鴻小吃曾獲得米芝蓮殊榮，一試無妨！早餐有中式有西式，任君選擇我自小就對銀針粉情有獨鍾，難得見到阿鴻有銀針粉我又怎能錯過呢～香菇肉鬆銀針粉可以配蘿蔔糕或者炒麵～ 其實炒麵都好吸引，但只有我一個人嘅力量真係食唔哂呀，所以揀咗蘿蔔糕～銀針粉嘅湯底用鵝肉熬成，味道香濃惹味，銀針粉彈牙再配上冬菇、蝦米、冬菜、豬肉碎，更添層次，yummy😋 蘿蔔糕都好有水準，煎得香脆之餘，啖啖都食到蘿蔔及粒粒臘肉👍🏼總括而言，早餐$39配埋飲品，抵食美味！…查看更多

嚟到鍋貼大王，招牌鍋貼、無糖豆漿當然係必食之選！招牌鍋貼雖然皮比較厚身，但勝在煎得夠香脆，豬肉餡又鮮味又多肉汁，配埋豆瓣醬更加美味～鮮豆漿有熱有凍，今日選擇了無糖熱豆漿，無糖更顯豆味香濃～雲吞水餃都好大隻，每碗麵都有5隻，最重要每碗都只係$25 咋！蠔油生菜，份量略少，但生菜新鮮翠綠惠顧麵或飯，加$7有豆漿1杯，或者加$13有豆漿1杯及鍋貼2隻，非常抵食👍🏼 總括而言，平民小吃抵食美味，值得一試！！…查看更多