charmiannn999的个人专页

尋晚七點幾去買的 排隊排了十五分鐘左右啦 唔算太耐 老闆娘肥姐態度好親切 好細心 即叫即炸嘅炸蠔餅 香噴噴 脆卜卜 入面有埋蔥同胡椒粉 配埋泰式酸辣醬 非常美味 下次入元朗肯定會再去 …查看更多

尋晚黎買外賣 原先見到門口招牌啲燈壞左有啲唔想幫襯但係見到好多人黎買野食 幾乎係源源不絕嗰隻 於就試喇 試完之後決定以後想食菜飯都會黎哩度 同屋企人試左鮮炸蒜香雞扒菜飯 生煎鮮肉鍋貼 同鮮炸豬扒肉片飯 雞扒有好濃嘅蒜香味 肉質鮮嫩多汁 菜飯入面有大量嘅小棠菜 超好味 而豬扒口感都算外脆內軟 不過好薄 鍋貼大大隻 好足料不過唔係咁啱我口味 服務態度幾好舖頭入面幾位姨姨動作好快 而且好有禮貌 …查看更多

其實之前喺銅鑼灣翡翠明珠經過無數次 但因為燈光好暗冇想幫襯嘅欲望 點知最近搬去炮台山附近 裝修唔同左光D 所以今日就自己黎食lunch喇 點左廚師推介印尼常餐 有巴東燉牛腩 炸牛肉餅 半隻烚雞蛋 白飯同Gado gado🤗Gado gado其實即係印尼沙津 有菠菜 芽菜 薯仔片 青瓜片 紅蘿蔔同少量烚雞蛋 上面淋左沙嗲醬 味道香濃 撈飯好正 燉牛腩個醬都幾好食 牛腩肉質嫰滑 但係得兩件真係太少 炸牛肉餅只有一件 味道好濃但個人唔太鍾意 好彩得一件啫 因為我本身唔食辣野所以order嘅時候全部野都要求走辣 全部食哂 哩個餐$88包湯同埋餐茶 湯我揀左雞湯 入面嘅椰菜幾甜但個湯落左太多胡椒好辣 凍咖啡少冰口感好滑 好香奶味 不過另外點嘅嗰件班蘭榴蓮木薯糕甜中帶咸 食唔出有榴蓮味 服務態度幾唔錯 我埋完單之後見出面仲落緊雨而且環境唔錯所以就坐耐D 喺間餐廳慢慢嘆杯咖啡同用手機上網 坐坐吓嗰位微胖身材戴眼鏡嘅哥哥仔出去送外賣之前同我講話如果杯咖啡唔夠甜或者有咩其他需要可以隨時叫佢其他同事 所以整體黎講對哩間餐廳印象真係幾好 …查看更多