大食熊仔餅的个人专页

提早食早秋節飯，今年試下食韓國嘢，見樂富開咗間韓國餐廳一段時間未幫襯過，就趁呢個機會一家大細去試啦！今次4大一小，食物甜品連飲品總共12樣嘢，連埋加一埋單$1159分別叫咗脆米豬手沙律/芝士海鮮菜餅/蜂蜜提子脆米炸雞 （半份）/滋味炸雞（半份）/蟹膏海鮮炒年糕/ 冰果魷魚鬚水冷麵/牛肉石鍋飯/炸紫菜捲（粉絲卷）飲品：凍朱古力咖啡/紫薯沙冰甜品：松露曲奇脆脆3.6牛乳雪花冰/爐板燒布朗尼首先我覺得豬手沙律味道一般，豬手都算淋，但冇乜特別，下次可以試其他嘅沙律；芝士海鮮菜餅唔知係咪因為我遲咗食所以覺得唔脆，味道還可以，下次會再叫試下趁熱食先；炸雞方面，佢嘅皮同平時食既有啲唔同，個皮有啲似k字頭唔辣炸雞嗰隻皮，但脆口好多，上枱時新鮮熱辣，雞肉都keep到嫩滑，唔錯，滋味脆雞嘅芝士醬比較單一，似係坊間可以自己買到嘅芝士醬，味道可以接受，但唔算特別，反而係佢嘅炸雞係冇雙拼咁叫，所以我只可以每個味道叫半份，但原來半分雞只有四件，比我想像中少咗一兩件，但每雞size似乎都唔細件；炒年糕個味其實幾好，屬於偏甜少少，蟹膏又好似唔係好覺，不過就見到有蟹子，分量唔算太多，但我就略嫌個年糕淋得滯，如果火侯掌握得好啲應該會仲正，個汁我攞咗去撈飯，唔錯；炸紫菜捲正常發揮冇特別；牛肉石鍋飯，係我每次去食韓國嘢都會叫，牛肉質素唔差，分量一般，飯都叫幾足料，可以選擇叫佢幫你撈或者自己撈；水冷麵個湯都幾清甜，面量都唔少，而且面個口感都幾好，唔會話好淋，個湯結果我哋都飲曬；飲品方面紫薯沙冰一上台大家都話一聲，真心幾大杯，48蚊黎講性價比幾高，望到都幾開心；甜品方面，松露朱古力雪花冰唔會太甜，甜味主要嚟自cream同埋雪糕，配襯咗幾塊oreo曲奇，佢個松露味都幾重，味道幾得意，小朋友好欣賞，至於另外嗰個鐵板brownie，我反而有驚喜，鐵板上嘅甜品，鐵板下面仲有火㷫住，brownie墊底，上面放咗雪糕同cream，brownie四圍放滿咗一啲脆脆，熱辣辣嘅brownie配埋凍冰冰嘅雪糕，感覺非常唔錯，下次再去呢間餐廳食一定會留肚encore呢個甜品!…查看更多

今日有得早放工，咁啱上網見到人介紹吉列牛，就心癢癢想去試，所以就同朋友去咗位於佐敦嘅“秘”，就算糧尾都唔理啦！六點左右就去到餐廳，我諗由於時間尚早，唔使排隊可以直入，入到餐廳一陣燒肉的香味就撲埋黎，即刻feel到好肚餓。坐低睇一睇menu，發現食物種類選擇不多，有兩款吉列牛，兩款燒肉，一款鰻魚飯，一款吉列豬，仲有少量的小食，我同朋友二人很有目標地柯打咗兩款吉列牛，分別係原味吉列牛同埋黑松露吉列牛，加一碟兩隻嘅炸軟殼蟹，一支薑啤....餐牌上的煮食都可以加錢變成餐，晚餐只可以加38蚊或者48蚊，跟餐有味素飯一碗，糖心蛋一隻開邊同一碗櫻花昆布湯。兩個價錢的分別在於湯，但事前上網已有網友話佢個湯真係好清，不飲也罷，所以我同朋友加38蚊就算啦。兩個餐上咗嚟之後，發現每塊鐵板上面都會有一小舊牛脂肪用嚟開鉄板，啲牛望落去油脂非常豐富呀，就咁望都覺得幾吸引！黑松露吉列牛外層包裹著應該是勞了黑松露醬的麵包糠，所以看起來是黑色的，我首先把原味和黑松露的吉列牛分別放了一塊在鐵板上試燒，由於切得不算太厚，所以我每邊燒了15到20秒左右便試食，我整塊放入口，牛脂嘅香味喺口入面散發開來，而且亦都食到吉列的脆口，特別是黑松露吉列牛，黑松露的味道比我想像中的香濃，黑松露愛好者必點。跟餐會有一碟燒肉醬汁，但由於牛本身的味道已經非常香，為了食到牛肉的原味，我沒有點到買碟燒肉醬，就算只食牛肉味道都已經很足夠。跟餐的白飯上面灑有味素，味道一般啦，但我略嫌飯就唔夠軟熟煙韌，呢個可以改善一下，溫泉蛋味道唔錯，夠晒糖心，都可以讚一讚。至於個湯呢......的確如網友所講嘅一樣....真係好清淡，不提也罷。最後都講一講軟殼蟹，一碟有兩隻炸軟殼蟹，上面鋪滿咗炸蒜（啲炸蒜蓉嚟撈飯都幾好食）,軟殼蟹都,唔算細隻,但炸得真係唔夠脆口，感覺爭啲，但78蚊黎講又唔算太貴既！順帶一提佢嗰個澳洲薑啤，飲落比較甜，有薑味嘅，但似薑味汽水多過似薑啤，我唔飲酒嘅人都覺得幾好飲，唔知咁係好定唔好呢？🤣🤣餐廳整體食物質素確實唔錯，特別係吉列牛不負所望，為咗啲牛我一定會再encore！但食燒牛肉都確實幾大油煙，放枱面嘅兩杯水都有一層油響面頭，搞到我都唔想飲！！…查看更多

今日lunch食南記，一於試下“新嘢” - 麻辣擔擔面.....見到個名咁勁，唔係唔試下呀？呢個新口味湯底响上環店只供應春卷菜肉餃呢個組合 （我見網站咁寫），雖然我唔好佢既菜肉餃，但見有春卷，照殺啦！呢個新口味湯底硬性規定要跟餐, 個餐跟一杯飲品，係芒果冷泡鐵觀音 （送咗俾同事飲，話唔錯，唔會太甜），盛惠53蚊。春卷唔使介紹啦，話晒係南記名物，大家都食唔少，水準keep到；至於菜肉餃呢，一碗有4粒，我個人真係覺得麻麻哋嘞，皮厚肉少，下次可以唔叫就唔叫啦！黎到重點，佢個 “麻辣擔擔面湯”，個湯有啲窄菜，肉醬，麻辣味唔多覺，只係有些少辣味，我加咗包南記辣醬都無乜料到，有啲失望，但慶幸個湯都仲有陣淡淡既花生味，令我有番啲安慰。今次米線我略嫌唔夠軟滑，扣咗少少分！…查看更多

前排想食港港式扒餐，於是走去試飛鷹餐廳啦，叫咗一份牛柳7成碟上，一份肉眼鐵板上。首先黎個湯同餐包，個餐包好鬼大個，碗紅湯都唔少嘢，大碗又夠熱，味道都幾好，飲完湯同食埋餐包都包咗一半🤣🤣到塊扒出場啦.....我嗰份牛柳係碟上走汁，7成，一上枱，我就發覺塊扒唔似係煎，似係炸....無錯，係炸扒！怕肥諗住走汁碟上，點知都係逃不過命運......味道方面呢，塊扒腌咗，無汁都唔會怕啖味，肉味就唔濃架啦，不過勝在夠晒淋，無牙力都食得，份量都ok, 幾大塊，食完好鬼飽！我杯餐飲加錢轉咗雪糕紅豆冰 （又話減肥？）我就覺得一般嘞，啲紅豆唔夠淋，好有咬口，下次唔會嘥錢叫！朋友嗰份係肉眼扒蒜蓉汁，鐵板夠熱既，淋汁上去 （炸炸）聲，同樣地份量夠大，男人都夠飽，塊扒望落都似係炸，食落都係腌過，無乜肉味咁啦！朋友杯餐飲轉咗做黑牛，但無晒朱古力味雪糕😣唯有雲呢拿味頂下檔先啦！整體食落會抵食過太子既金翠，但如果唔係炸扒，係煎既，感覺始終好啲，至少無咁油膩先吖！…查看更多

有朋友想試呢間既飯團，知我上環返工，托我幫佢買幾個，咁啱見到拌飯特價25蚊，梗係順便買黎試下啦，飯團未食，所以俾唔到食評，可以講下個拌飯, 味道真心唔錯，啲飯煙煙韌韌，唔會太冧，好食 （本身唔係特別鍾意食飯），拌飯有兩種口味，一款係吞拿魚，一款係明太子，我就揀咗明太子。 餸同飯係分開放，食時再撈埋一齊，配料有菜甫，青瓜，蕃茄仔，椰菜，雞胸肉絲等，另配有明太子沙律醬，撈勻晒食個味道幾好，好fresh,雖然有沙律醬，但食落唔會有罪惡感，啱晒keep fit人士食。但份量比較細，女士食都係7-8成左右飽，男士就可能唔夠食啦！…查看更多

臨時book都有枱，幾好玩，寫下食評先：今日聖誕節，要280位再加一，埋單317大洋，唔平，但由佢啦，咁遲book,又想試下，照食啦（上網見KOL介紹）由book枱到現場，都覺得職員好nice, 望落啲人都女仔young,全部無譚仔口音😅食物方面唔算好多選擇，食物係以自取為主，食過既有豬：义燒，腩肉；牛：牛肋肉，牛肉粒，牛舌；雞：單骨雞翼，雞肉，菜：粟米，翠肉瓜，菇s; 其他： 多春魚，丸，腸等。另外都有冷盤，包括有沙律菜，牛奶布甸，煙三文魚撻，帶子撻等小食可以自取，佢仲有啲小食可以落柯打叫，免費既，有黑松露薯條，炸餃子等....枱面上除咗有主角-串燒爐之外，仲有三隻味既孜然粉，有辣味，花生味同原味，另外有三隻醬for燒緊時查，包括茄汁（好奇怪，淨係用過黎點時薯條），义燒醬同泰式醬汁佢啲冷盤小食唔錯，我食咗兩個三文魚撻，佢係用麥芽餅乾做底，有蕃茄，青瓜，雞蛋，好食。串燒方面，佢個牛肋肉同豬腩係讚既，個豬腩我食咗幾串，雖然肥，但燒完勁脆，咬落有豬油渣既感覺，忍唔到口一食再食，牛肋肉好冧，但有食到少少筋位，但整體ok, 佢呢個爐燒多春雨ok喎，唔會燒爛，可以原條上，佢另外個墨魚丸都幾好，但食過一轉之後就唔見refill lu.....佢整體食物質素幾好，我地兩個人坐4人枱，好闊落，職員態度好，會留意你啲食物熟未，知道我地食得辣，有仲攞咗隻麻辣粉俾我地食，好nice但唔好既係由於食物係自取，如果人多時，攞食物既位置會比較迫，而且佢提供既茄汁真係有啲奇怪，如果佢有提供沙爹醬，蜜糖可能會好啲…查看更多

話說尋日見到有報紙介紹呢間餐廳既無骨海南雞飯，講到好唔錯咁，於是就上網search下啦…見到有得網上預訂自取，仲有九折，心諗好好喎，唔使驚人多買唔到（因啱啱見報，應該會人山人海），所以今朝10點幾就訂咗3個雞飯，一個咖哩牛飯，揀12點45分至1點鐘自取（一心諗住仲有得訂即係有貨啦）!點知原來只係我一廂情願，有order no., 準時到間鋪頭，條龍勁長，之後職員話就算網上訂咗都要同walk in 既一齊排隊，本來無問題，重點係原來訂咗既係唔代表會有貨囉，咁訂黎做乜?有人個網上預訂號碼後過我既無貨囉…，我好彩，排咗一輪，都仲買到，但咖哩就賣晒，要轉埋做雞飯!而網上預訂自取既九折都有!返到公司開飯啦…分別有一盒雞，一碗飯，小半碗湯，另附有薑蓉，辣椒醬同醬油，先講盒雞，賣相幾靚，食落都叫幾滑口，但，似白切雞多過海南雞; 飯呢…啲飯望落有啲啡色碎碎地既嘢响上面，應該唔似白飯咁簡單，但食無乜香味喎，偏向似白飯多啲，影相時我加咗醬油同自備既辣椒! 附設既薑蓉味道都唔夠香; 至於個湯呢，每碗湯入面有一夠蘿蔔，但成個湯呢，見到有啲啲雞油浮响面，但飲落，都係無味，似滾水湯咁款。總括而言，我個人認為呢個海南雞飯最大優點係無骨，唔鞋口，價錢唔算貴，但無海南雞嗰陣味，湯又無味，同區其他餐廳會好食好多（雖然貴啲），而且個預訂系統又好似多餘咁，增加混亂，要檢討下。所以我未必會特登去再幫襯!…查看更多

前幾日見雜誌介紹, 咁啱响公司附近, 所以就決定同同事一齊試下啦, 上星期五12點幾叫外賣時, 己經無晒慢煮义燒, 但都決定試下佢普通义燒. 佢既普通义燒都幾好食, 味道同坊間既差唔多, 肉質都幾嫩, 但同事就話佢嗰盒有啲瘦. 燒腩仔皮依然脆, 肉質都嫩, 我會推介, 貴妃雞我覺得一般, 同事話佢既豉油雞無咩味喎, 唔推介.再講講今日個飯啦~今日同事們為求試到傳聞中慢煮七小時既义燒, 11點就落定ORDER, 一點送到, 終於落單成功. 先講下個飯盒, 係用紙盒, 外觀似沙律盒, 設計都幾trendy, 同事們都鍾意呢個設計, 感覺好企理乾淨.開頭睇到其它食評既相, 到見到飯盒時, 都怕份量會細, 男同事會唔夠食, 但當打開後, 佢燒味既份量同飯都唔算少, 男同事們食完無投訴唔夠食. 今次我叫左慢煮义燒燒腩仔拼醬皇鴨(燒鴨). 燒腩仔KEEP到水準, 衣然係推介, 燒鴨有啲肥, 但味道都好食, 肉質嫩, 唔會乾, 個人覺得好食過貴妃雞. 登登登….去到主角慢煮义燒啦……佢既味道其實同普通既义燒一樣, 但係肉質的確係比較鬆化, 就算無咩肥肉, 但都唔會乾, 以中環區一個三拼燒味飯, 仲要有得拼燒腩仔, 只賣五十蚊, 絕對係可以encore, 就算無慢煮义燒, 佢既普通义燒都OK, 我覺得佢既味道絕對好過中環間老字號龍X囉…..跟飯盒既就仲有义燒汁, 如有貴妃雞就跟埋薑蓉, 都係用獨立膠盒仔裝住, 好企理, 佢個义燒汁比較淡身,稀啲, 唔同一般燒味店咁濃味, 咁杰, 但同黎撈飯己好足夠, 感覺上健康啲, 味道都好食. …查看更多