zaku的个人专页

大角咀區競爭激烈已經唔係新聞，好多新鋪落場無耐都係失敗收場，特別係大全街呢個鋪位，兩年內轉左四手。咪話唔得人驚。不過有時都無法怪人，食嘅嘢，好直覺嘅。得就得，唔得就再勤力都係唔得。至於呢間係區內主打食羊嘅鋪頭，我都幾肯定，唔係好耐，應該都係收檔。其實香港開專食羊嘅鋪頭已經好冒險，做得最掂個間係觀塘某店以雲南風味清湯羊打響名堂，都幾乎未有其他人望其頂背。而大角咀呢間新開嘅店，見佢都係清湯羊煮法，有齊羊肉羊腩羊雜及羊肉撈麵，影相望落唔錯，就俾次機會佢啦，點知...餐飯係夜晚，諗住叫羊肉湯飯同羊肉餃麵，結果店員話：「兩樣都無...」當堂打左個突，已經只係做午晚食你同我講無主打嘅食物？你預材料份量都有夠失敗喎。咁係咪乜羊都無？還好有羊腩湯飯同羊雜湯粉，有得試就試左先啦。終於試到味，之不過...啲調味，又係到喉唔到肺，同期望差距未免有點太大。仲諗住學似觀塘個間店咁嘅風味，結果只能話差天共地。正所謂無比較無傷害，但有朱玉在前無可避免，問題係佢差到連比較嘅資格都無。先講碗羊腩湯飯，未放入口還好，紅棗杞子羊肉湯，感覺都算認真，但啖湯入口，好普通，唔惹味。通常羊肉湯會有啲藥膳風味，好似北茋當歸之類嘅係入面，點知出奇清啖，原來經棗杞子係裝飾，羊肉鮮味唔突出，但羊腩嘅羶味就有係度嘞。都算，但唔知點解，羊腩似係用汁炆而唔係清湯煮，其實佢想點處理呢喂？啲羊腩亦切得偏細，丁方一寸都唔夠，無皮，唔難食已經算好彩。之後，上埋羊雜湯麵。無埋杞子紅棗嘅湯底，仲清淡過譚仔。至於羊雜係做得好乾淨，但切得有啲濕碎，叫係羊肚、羊腸、羊肺、羊肝都有一小撮咁，但太過細碎，入口無必質感可言，好似食緊牛柏葉絲咁，味道口感均無驚喜，只能話唔難食，但唔會有任何回頭意欲。最後埋單走人，睇下隔離枱食乜，原來都有人叫羊腩飯，但係炆羊腩，無湯。咁呢下我明白咩回事，根本羊腩湯飯，係炆羊腩放落湯道一齊上，邊有人會咁整喀？係就清湯，係就炆，炆左放入清湯，兩種風味互相破壞，佢真係唔識煮個喎。成餐飯兩個人食，一碗湯飯一碗湯粉連油菜，$113 埋單。我諗緊，將貨就價，我明。但做好啲賣貴啲，有人回頭唔怕人爭喎。呢餐食啲嘢要乜無乜，煮又煮到唔湯唔水嘅經營手法，死硬。改自己叫名羊天下，志大材疏左啲喎。…查看更多

有日去深藍區土瓜灣工作，要搵間黃店食早餐其實都幾辛苦，好在都有兩間，於事揀左其中一間去試。其實茶記食早餐來來去去幾道板斧，一定有沙嗲牛面多士煎腸旦之類，要比較一係比價錢一係比調味。去到上址，老例沙嗲牛面($35)，但跟餐嘅多士旦熱奶茶 就有少少唔對路，餐牌上係多士煎旦，再睇真啲側邊有個選項：炒旦加 $4......呢個選項，唔知點解感覺寧捨篤眼篤鼻，食過唔少茶記，光榮又好、大渣哥又好、牧牛又好，炒旦係煎旦嘅另一種選項，唔使加錢，佢居然要加4蚊？最好笑係，佢有個常餐選項，就係跟炒旦 $39，真係有少少俾佢吹脹。我知好野可以吊高來賣，但大家都係旦只係處理手法唔同，要加收真係第一次見。認真講，而家全香港餐記，早餐食旦跟麵個碟嘅選項離唔開多士拼煎/炒旦再加香腸/火腿/餐肉嘅組合，而一冰廳就跟多士加一隻煎旦咁大把，比起其他茶記，真係唔夠大方囉。人地光榮一個早餐 $33 一樣設定，多士拼餐腸腿加煎/炒旦咁計，唔要餐腸腿就做夠雙旦嘅份量，好均真。飲品冷熱同價，預設係真丁面，改辛辣面唔使加錢，怪唔得全世界人都咁 Buy 佢。一冰廳講到自己個炒旦咁勁，都唔使用加錢來顯得自己咁矜貴，干脆就出個餐 $39 煎炒雙旦同價，仲無咁難睇啦下化。我預左俾人話係方丈喀喇，咁茲尾嘅野都同佢計較。但唔好意思，就係怕貨比貨，人地做到佢做唔到，無計囉。至於成個餐嘅體驗，真心嘅，沙嗲牛面個沙嗲比起食勻咁多間來講，係最好味個間。但炒旦就無緣喇，個4蚊唔係咁賺喀，聰明少少得唔得。何況而家全部茶記炒旦個風格幾乎一樣，除非係標榜美國珍寶旦或者日本旦都仲可以抬下自己身價啫，再唔係當自己係澳牛咁扮，睇你又夠唔夠膽挑戰佢地吖。我唔會話佢差，但我只會話係OK囉。…查看更多

本來，呢間店係可以俾一個好評嘅，但做人要公道，各位有機會幫襯時要小心呢間店啲做野手法，免得最後掃興。話說當晚五個人食飯，叫左六款菜，包括麻辣雞煲(全隻)、炸全豬手、椒鹽魷魚、古法老豉油叉燒 + 龍蝦伊麵、炒四季干煸豆。總體味道其實唔錯，但其中個雞煲就好古惑。本身可以選點全隻 $188 或半隻 $108，叫人多就叫全隻。點知一上到枱...所謂全隻雞，係放係一個15cm 嘅鐵沙煲上，即係平時叫小菜一人餐個種尺寸。放上枱個刻其實已經問：呢度全隻？個侍應話：係呀！裝滿還裝滿，但係好明顯，大家各自食左三至四件，根本砌唔番一隻雞出來，半隻都差啲唔夠。裝得滿只因為仲有好多洋葱菜料墊底。最搞笑係，佢有賣炸子雞，亦都有全隻，有相為證。惟獨個煲係無大細參考圖片，死無對證，變左疑點歸於被告，只能斷估佢落錯單。例牌會點啤酒汽水，通常二會一次叫晒，唔夠再添，因為咁先至夠凍。叫左四支個時，睇下張單，做乜個手寫係「正 一」，即係六枝。可樂要一罐，但寫左「丅」，當兩罐。即刻捉住侍應，問做乜寫多左？夾好照要無問題，不過我地就hold住張單，免得佢又寫多野。埋單當然睇清睇楚啦，已經無爆佢個雞煲昆人，如果無留意佢地寫多兩支酒同罐汽水，真係俾佢昆左差不多幾舊半水去。本來好地地可以賺個好評，老實啲咪好，而家去唔去下次都諗過。我當佢忙中有錯都算，請多個人落場做野得唔得？星期五晚嚟喀，根本唔夠人。…查看更多

小弟看到該店以龍躉湯飯為招徠，感覺價錢也可接受，就進門一試，點了泡椒酸菜龍躉魚片湯飯再加一杯熱奶茶($56)。先嚐一口湯，只嚐到辣及一點兒酸味，湯的鮮甜味呢？完全欠奉。然後再數數有多少龍躉魚片，只得四片，當中有一片過熟(很有趣，全部一起煮會過熟，是翻煮嗎？)，另外兩片是腩邊，幾乎只有脂肪，只得一片是原整有肉。整頓飯感覺是捱著吃，因為湯半咸不啖，還要加鹽，魚片份量不足鮮味也很一般，為免浪費，勉勉強強的盡量吃完。我一度懷疑是否只是自己味覺遲鈍吃不到咸味，直到鄰桌有人問店員有沒有鹽，終於肯定不是自己的問題。我不曉得是否自己太不幸遇上這種經驗，還是廚部沒有個像樣的QC。如果有自信可以用「第一」做招牌，請老闆自己先吃過再說。…查看更多

食左個炸雞烏冬定食($55)，包一碗湯烏冬，內含獅子狗魚蛋兩片斜切，炸雞另上，附兩件蟹子手卷及海苔一小碟，唔包飲品 (要另加$8)。味道如何，我唔直接答你，我用例子來答你：759 阿信屋烏冬 $25 (平均 $5 一個)出前一丁豬骨濃湯 - 湯粉(半包) $4麥當勞板燒雞腿包餐轉粟米可樂走冰 $25食法：煮一個烏冬，加半包湯粉，開水直至無咸味為止，落一湯匙粟米，取出雞腿，另上。無蟹籽手卷，用面包代替。海苔用生菜代替。Total$29，小左兩片魚蛋，賺左杯可樂。或者最簡單咁講，買包豬骨濃湯丁面自煮加個板燒雞腿包餐好過啦。…查看更多

心想吃個酸辣米線醒胃，見就近即管一試。招牌食品是阿一豬扒酸辣米線，就跟推介點選了酸辣再拼雞中翼。結果，第一口是小辣不酸的咸水無味湯，要自行加醋，然後咬一口炸豬扒脆口欠奉都算了，薄得來還感覺到梳打粉的餘味，味道像燒烤包醃過度的豬扒。至於雞翼，大小可一啖全隻放進口，但干巴巴的沒甚麼肉連皮都炸開了，難吃。一時看漏眼，附近原來還有越南菜和潮州鵝肉麵。盡管價錢不算得貴，但破壞了一天的心情，不值得。本來店內還有燉湯一類供應的，但招牌菜也做得這般難吃，已經沒信心再冒險了。…查看更多

其實，看到價錢如果還期望這店能吃到像樣的烏冬，只能說是明知故犯。當人家基本一碗豬骨拉面要65元，到citysuper差不多要50元才能吃到一碗淨手打烏冬，44元一個辣汁雞扒撈烏冬連面豉湯套餐，又怎可能會有預計的效果。44元你可以到阿信屋買三包急凍貨，都比這家聲稱手打的好吃。這家烏冬令我想起大家食的手攪麵，只是麵條略闊。真正的手打烏冬，應該有筷子的粗幼才像樣。我只能說，調味合格，烏冬欺場。其實自稱手打麵可能還過得去，但彈性和煙靭度都欠奉，實在不能借此欺世盜名。這種檔次，只能做學生餐的級數，有心吃烏冬，大可迴避。…查看更多

(11 月 28 日初試)不是紅磡人，純粹工作後半夜路過，走近門前，見有一位銀髮男子在路邊炒黑芝麻，加上玻璃上的媒體報導及客人不少，也就即管一試。打開餐牌，心裏只簡單想到糊類甜品。眼見黑芝麻是自炒再磨，心想也許不錯，不過仍有點遲疑，因為炒出來的是一種半「火羅」的味道，算不上香。再看看餐牌，有杏仁糊供應，不如貪心一點來個黑白配。可惜，杏仁糊沽清，只有芝麻糊又覺得太單調，最後叫了芝麻合桃糊。來到面前，用匙一滔，流質覺得頗為綿滑，嚐一口，不對勁，再嚐一口，心裏面在想，芝麻味和合桃味去了哪裏？為了搞清楚兩種糊的味道，於事我將未搞混的糊盡量單獨再試，試合桃，是有合桃的，但不算濃。至於芝麻糊，恕我直言，由第一刻開始離鼻一呎都都沒有甚麼香味聞得到，再放進口裏終於感覺到芝麻味，這個還是見人家在門外自炒自製的芝麻糊？還是合桃和芝麻糊混不得？我真的有點後悔為何不先叫單味，現在真的叫人難以評價。說實在，芝麻糊這個基本功在香港也不是每一間都做得像樣，但做得像樣的要找也實在不難，大良八記、廟街源記、北角翠園、旺角浩記，隨便也找得到像樣的芝麻糊，至少不是溝粉的化水貨色。有時人算不如天算，怎麼來到這個真的自家炒自家磨的味道會令人失望？我只能說，這家芝麻糊的少甜及滑溜程度其實是很討好的，但就是不夠芝麻味。點心不濟落味精，芝麻糊不濟可以落甚麼？加多兩分心機吧。還是應該研究一下，炒芝麻出了問題，又或許是那些芝麻是次貨？(12 月 16 日第二試)再叫單味芝麻糊，有結論，真的是芝麻不行。雖然那天是 8 度嚴寒，但我絕無鼻寒及傷風感冒之類。那熱芝麻糊，我仍然要滔一匙到鼻邊才嗅到味道。入口之後，那芝麻糊味仍然是不甚了了。我只能說，這碗芝麻口感是不俗的，綿滑細緻，不化水，但就是欠缺關鍵的芝麻味，叫我如何讚得出口。也擺，給一個 OK，已是很盡的了。究竟問題出在哪裏？芝麻本身的質素不行？是炒的問題？磨的問題？還是根本就是芝麻不夠，只有店東才曉得。…查看更多

中午食晏試招牌菜，要左碗燒厚豬扒飯套餐。自稱豬扒專家，但出到來塊豬扒只係一般大，厚度係正常唔係厚 (目測 10 -12 mm)，比大埔街市炸豬扒還不如 (已經唔計脆漿)。唔夠肥干身無汁，一味飯多，多到男仔都食唔晒，遇著女士一定浪費半碗。比對面街食烏冬個間o既專門店差足一皮。講真，成個 set 連湯及一個可有可無的沙律夠膽收人 51 元，都算係有夠膽粗粗。或者我應該叫三十元以下 o既餐減低自己o既期望。我俾 OK，主要係侍應態度唔錯，留番幾分薄面。咁o既質素，怪唔得對面 12:00 可以人滿，呢間要 1:00 至滿啦。…查看更多

好吃的店，特色是：老闆同你唔客氣老闆唔得閒招呼你仲要好大陣味這不是讚美，也不是批評，只是你要有心理準備。以前吃過大理涼粉，也是同一類東西，今回經蔡生一講，跟風都去試。因為無位坐，人太多，局叫外賣。口水雞涼粉，盛惠$28。返到屋企品嚐，發現個份量不能與大陸同日而語，怕左少左一半。好在味道係真o既，食完萬蟻挑唇，當然少不了那種不吃比吃更麻的吊詭感覺。雞的調味中規中矩，白切雞不老不嫩，不過份肥腥，已是合格。會否再來？還可以啦，試多幾味先，尤其小吃。但真係辛苦左少少，成班朋友，得我一個食到，真係有排試。隔離唔掂咩真係？我試過，好唔掂。咪當有辣椒就係四川先得o架。…查看更多

只食夾餅，無食雞蛋仔。夾餅味道，餅底一般，唔夠脆身。醬料，有點輕手，花生醬唔太香，落左沙糖都唔係太甜，走糖的話......唔知點形容。做得起，睇怕都係因為成區得佢呢檔。誇張到排隊派籌，但認真講句，如果係都要排，我排北角個間。所以，主角只獲一個 OK的評分，因為無對手，所以勝之不武。當日個場面，仍然教我印象深刻，一對夫婦做餅同雞蛋仔，另有一小女孩在幫忙，只十來歲。我不敢妄下判斷這個孩子和他們是甚麼關係，但如果他們是一家人，應該明白這時候的孩子是讀書溫習，或者做自己的興趣事，何況已是晚上十時許！讓孩子做點工作，體驗生活，也許不太差。不過，如果到今時今日的社會還要看到這種景像，我應該對同情他們，還是應該責備呢？這塊餅吃起來也真的不是味兒。…查看更多

格仔餅：食過兩次，餅底幾好，軟硬適中，醬料就唔算太突出。如果去到個區諗唔到食乜，見唔多人排隊就可以試下。雞蛋仔：外脆，合格，但內軟...軟到有點濕...個漿我諗太多水喎。唔係點會收唔到水？講真，雞蛋仔再好，格仔餅再好，都係靠蛋靠面漿同醬料食糊。雞蛋仔非我所好，係要比較，北角個間似乎仍然係叻少少。格仔餅，唉，食左咁耐，係咪香港人怕"sip" 牙隙，孩提時有花生椰絲的日子一去不復返。花生醬與牛油取而代之，肥夾膩。所以我想話，再好食的格仔餅，永遠都不能從我手上拿 A，因為已經不存在。…查看更多

識飲咖啡的，唔使睇喇。少飲咖啡的，可以一睇以下經驗。何謂專業，好簡單。有日剛好見Felix 在場，小弟叫一杯espresso，佢問：你想要full double shot 還是double coffee in single shot？噢！ 雖然全行知Felix 唔係普通人，但至少問出一個唔普通的問題。我當然答，double coffee in single shot，少水特濃，好過飲多啖水啦。當然之後唔使講，回甘依然，毋須多言。再幫襯，另一個後生仔沖，同佢單聲話少水，無問題。諗起 Mxcafe，double 會俾個大杯你，硬係有點啼笑皆非。下次試下要佢地細杯，會有咩反應先。一定報告。…查看更多

想分辨一間甜品店係買外料番來撈，好簡單，就係睇有無杏仁糊。如果係無自家製作o既店，通常都唔會賣杏仁糊，因為少人食，二來杏仁糊難做，三來材料唔算平，所以如果間舖無，通常都好大有限。講左咁耐，無非都係想講呢間野自己做自己野。杏仁糊好夠杏仁味，仲食到有點兒苦味，即係有北杏，咁食左至有用o架嘛！有部份甜品店如石X坊，唔想人地食到苦而無落北杏，咁就認真不幸。北杏可以止咳潤腸，肺唔好食多碗就最正，尤其冬天，大家明喇。除左杏仁糊，桑寄生蓮子蛋茶都係唔錯的，可以唔要蛋都得，平少少。其他甜品，就中規中矩。呢間舖怪就怪無人做過訪問，都算係老舖，無理由喎？還是因為唔想太人來，所以唔做呢？講真，樓梯底頂頭，有人排隊都好大鑊，識食自然會搵啦。…查看更多

當係旺角諗唔到邊間食的話，唔去老爹，呢間算係咁喇。冬蔭面當然係食冬蔭湯河或面，嚴格來講，佢個種辣味只算係吊味，連唔食辣o既同事都受到，你話可以有幾辣？唔夠辣，自落一匙紅粉，OK晒。至於咖喱，食過一次，東南亞式，椰味為主，勁力就真係普通，唔難食都算係咁啦，不過就無必要再食囉。推介：豬頸肉金邊粉，香茅豬扒金邊粉都唔錯。雞翼就略嫌細喇，至於炒飯面之類，見識過 人地食，除非想好飽個隻，好似就麻麻地囉...…查看更多