moey的个人专页

終於試到太古坊新開嘅鏞鏞啦~~ 🙌🏻 呢間係鏞記嘅副線品牌,之前喺K11都見過,今次趁假期特登去試吓!裝修好靚,入門口已經見到墻上好得意嘅鵝群壁畫,仲要係手繪 架~~環境舒服企理,加上有露天座位,絕對係放工約朋友食飯嘅好地方🌿我哋叫咗:🦐椒香雞樅蝦多士 -多士夠脆,蝦就好彈牙,配埋雞樅菇嘅香味,好特別🦆鏞記正宗燒鵝 – 一上枱已經聞到燒鵝嘅香味,皮酥肉嫩,油香四溢又唔會好漏✨ 絕對係店中招牌之作,不過以份量比預期少咗D，4個人食完仲想再叫😅🥩粵式脆皮燒腩仔 - 皮脆到好誇張!肥瘦適中~~🐟碧綠甫魚鱈魚球 - 意外嘅驚喜!啲魚新鮮彈牙,配埋時令蔬菜好清爽,而啲甫魚粉(即係香港人成日講嘅大地魚)令個味道層次豐富咗,唔會覺得單調😋價錢中上,一個人大概$300-400,勝在味道好,環境舒服,服務態度又唔錯,適合請客食飯或者同三五朋友餐聚。🎊加分位:•⁠  ⁠環境企理,氣氛好•⁠  ⁠燒味品質有水準•⁠  ⁠服務態度專業扣分位:•⁠  ⁠部分餸菜份量唔算好多總括嚟講值得一試,下次想約人食飯絕對係個好選擇! 💫----------------味道 4/5環境 5/5服務 4/5衛生 5/5抵食 4/5----------------總評分 8.5/10----------------#太古坊美食 #粵菜推介 #鏞記新店…查看更多

韓家莊韓式燒烤地址：佐敦彌敦道233-239號佐敦薈5樓全層日式放題，自助餐，韓燒都各有各好，成日揀食邊款，都要諗一大輪。今次黎韓家莊俾我滿足哂3個願望，自助韓燒任食！ 一入門口，地方大，夠光猛，好多卡位，座位闊落舒適。頭盤熟食各種肉類甜品飲品，每項都選擇眾多，絕無欺場。 諗住食三文魚刺身，但一埋到去就見到得番幾件，都唔敢食，就問下姐姐幾時會再拎新鮮出泥，姐姐就話啱啱拎出泥架，俾客秒殺淨呢幾舊，一陣就冇埋架喇。咁我就梗係快快手手夾埋佢啦，無耐就拎新一盤出泥，真係即刻好多人埋去拎，姐姐果然冇呃我。食得自助餐，就梗係樣樣都要試，我就每樣都拎一件。炸物保持到溫度，依然脆口，熟食牛尾又好肉，炆得又夠林，咖喱炒蟹好吸引，色水好靚，雖然唔夠大隻，但口感都好足。 終於到開始食正餐，燒肉時間，食韓燒最怕D 肉好大雪味醃到好咸，但呢度唔會，食得出肉味，有醬汁既味道。 亦有醬汁區隨意調味，迎合唔同人，夠細心。讚！ 燒左一兩個Round，姐姐自動幫我地換鐵板，我食過咁多次韓燒，次次都要"求"人幫我換，但呢度竟然自動幫我，印象真係好深，服務態度一流。主菜都食到好飽，但望到甜品有好多選擇，都忍唔住食多碗豆腐花，好滑。 晚餐正價時段，以食物咁既質素，仲要咁多款啤酒汽水任飲，價錢都只係每位$188, 10點後宵夜仲有8折添呀！呢一間韓燒性價比好高，真係數一數二，下次要再黎！--------------味道 3.5/5環境 4.5/5服務 4.5/5衛生 4/5抵食 4/5--------------總評分 7.5/10-------------- …查看更多

Oppa Coffee Bar Restaurant尖沙咀金巴利街1號F地下自韓流襲港，韓國菜就開始久唔久都食一次，來到尖沙咀，就梗係要入韓國街食啦。天氣涼涼地，想食下熱野，行到呢間 Oppa Coffee Bar Restaurant，即刻俾佢門口張poster吸引住，個特色菜寫住火辣辣的熔岩「芝」味』，再望見佢D芝士勁多拉到勁長，見倒都流口水，一於入去試一試佢！ 一坐低侍應Oppa就熱情招待，奉上清香既麥茶同好得意既砧板Menu，菜式比其他韓國菜館有較多選擇，新式芝士fushion菜式同傳統韓國菜式都有，咁第一次泥Oppa 就梗係要食佢主打既溶岩芝士啦！ 我地兩個人叫左秘製章魚蛋漿芝士溶岩炒飯，芝士排骨同醬油無骨炸雞。開頭仲好大鄉里，以為好似鐵板餐咁要等好耐，點知傾左一陣計，就好快上菜喇，原來係係我面前燒架！侍應Oppa 係我地面前好熟手咁倒蛋漿同芝士落去，再用火槍即場燒溶芝士，果然好似芝士溶岩一樣，佢一路燒我口水一路流，再撈暈佢地就食得！芝士味好香蛋漿好滑，食到粒粒既章魚，加埋個秘製漿汁，真心值得推介！ ($168) 之後再上芝士排骨，又係係我面前整，侍應Oppa 真係好忙，哈！ 今次更加高技巧，需要先熱溶D芝士，待正軟身的時候，就捲上排骨。一眼望到製成品覺得似腸仔包好搞笑，但食落呢？就真係唔講得笑！本身排骨的香濃醬汁已經好入味，肉質鬆軟，配上的芝士，香濃岩岩好，所以既多左一種口感，但又唔會搶去排骨既味道，好野，係一道細心又特別既菜式。($275) 秘製章魚蛋漿芝士溶岩炒飯＋芝士排骨＝超完美既配搭！芝士控表示唔停得口，冇咩事我都係繼續食野先⋯⋯ 醬油無骨炸雞，由於無芝士，所以侍應Oppa 終於可以抖番一Round。溫度火喉控制得宜，每一件炸雞同每一條薯條都係炸到金黃色，雞食落好滑好嫩，完全唔似炸過，醬油味亦都味道啱啱好，而我加左少少錢揀無骨，更確實係明智之舉，因為真係食得暢快好多。配菜醃蘿蔔都好爽甜，食完胃口大開。($198) 食炸雞，當然要配啤酒，睇睇個drink menu，原來除左啤酒米酒都仲有好多款揀，今次就試左呢款Peach & Raspberry Fruit Cider 蜜桃紅莓果酒，好香桃味，酒味唔重，易入口味道極好。除左呢個味都有好幾款果味可以揀，好少見餐廳一款酒會提供咁多口味既選擇，誠意可見一班，絕對值得一讚！($58) ---------------- 味道 3.5/5 環境 3.5/5 服務 4/5 衛生 4/5 抵食 3/5 總評分 7/10 ----------------…查看更多

Y Pasta銅鑼灣駱克道459-461號The L. Square14樓咁啱我今晚要去Sogo買野，買完就過黎慢慢揀食邊間好野先…銅鑼灣近排呢多咗幾幢飲食大廈，登龍街、耀華街等，上年尾入伙的還有這幢駱克道嘅459號，不少blogger同記者都有介紹過既，今晚我地想食要餐，就吸引左我地啦兩個你就上嚟啦！其實呢幢大廈地盤都不算太大，上到嚟一眼睇晒地方方正，是大概十零張枱嘅中型餐廳，如餐廳玩浪漫feel其實係OK既，這裡可以坐到30零40人到啦！晚上7時左右上到來都未算好爆，唔駛等位就有檯，感覺比較舒服，這裡好適合三五知己傾閑偈Feel，這裡還有一個面積都好大嘅既半開放式西式嘅廚房，相信要對自己廚房嘅出品有番咁上下信心既先可以來做到半開放式廚房吧！而今晚廚師推介嘅就有我最鍾意嘅黑松露菜式，咁當然我就會一定會試吓佢嘅黑松露醬鮮帶子長通粉＄108，此外還叫了....香濃野菌湯＄28龍蝦湯＄48加酥皮 $0海鮮大會＄138玫瑰花茶＄28紫薯鮮奶＄32上台都好快，幾分鐘後就先來個餐湯同靚靚玫瑰花茶，餐湯是香龍野菌湯，野菌湯非常之驚喜也好味，夠Cream，也有鮮味，而鹹味適中，你知啦，野菌湯夠杰身先好味架嘛，味道也是我好Nike嘅！而花茶用的英式茶壺夠美觀，可自由擠壓去增加玫瑰花茶嘅香味，其實也可自己加些白糖來吊下味更好，飲落都好有悠閑嘅感覺！興左紫薯咁耐其實我都未真正試過紫薯鮮奶，佢上台呢就有個心形拉花，不過其實真係拉得唔多靚....哈哈! 不過有好香奶味，紫薯味OK，淺紫色的飲品也比到食客優閒的感覺，由於奶泡份量比較多，所以飲落有淡淡的清香嘅！跟住就到酥皮龍蝦湯上枱喇！龍蝦湯嘅鹹味非常之濃烈，龍蝦味好出，酥皮就正正常常啦，湯好味值得一讚嘅！大概等左十分鐘左右我既黑松露主菜上台喇!! 有三粒帶子，帶子兩邊也煎得幾香，而黑松露嘅香味也慢慢滲出來，雖然唔係用上等的帶子，但佢地都算好肥美，感覺係用咗中上質素嘅帶子嘅！主菜海鮮大會裡有好大塊龍琍柳，而青口數量亦都好多，青口也頗新鮮，而蝦肉亦都爽脆，好難相信用呢個價錢($138)能在銅鑼灣食到這麼大份量嘅海鮮大會，應該都算係抵食吧！試埋甜品先，問待應凍櫃內的牛奶布甸是否今天新鮮貨，係就叫埋來認真試吓，奶味出奇地香濃，完場前有這個輕量版的牛奶布甸來作結幕Encore都算得上是好滿足呀！----------------味道 3/5環境 4/5服務 3/5衛生 3/5抵食 3/5----------------總評分 7/10----------------餐廳Menu:-…查看更多

韓舍旺角彌敦道593至601號創興廣場9樓韓燒步飛我一向都非常之感興趣，知道旺角創興就有一間Fusion野，聽聞有好齊既自助餐菜式再配韓燒爐，今晚又點可以唔嚟試吓呢！其實大家都知去創興成日要等lift上樓，其實只要大家唔好遲過7點三來都即刻有lift搭既！我地七點鐘左右就黎到，上到去都唔使點樣等位，下次約人大家就記得喇！甫進門口Recep位都有個幾大等候區，有盞designer型格笑面燈，等候區還有呢部爆谷機，有小朋友既就啱晒喇，如果等得耐小朋友可以食住等，好過金滿庭以前門口擺啲什麼烤茶自斟飲吧！呢個地方好大，全層嘅創興其實大家都想像到可以坐成100人以上，而呢到左右兩個區都好熱鬧！呢度裝修好新淨嘅，而且用上這款新款韓式燒烤爐，抽風機直接對住個爐，我地開爐唔覺好熱又無乜油煙！:)待應好細心見我地一埋台就放咗一碟幾齊對嘅三文魚同埋魚腩嘅刺身，以我地二人份量都叫OK啦，而三文魚味夠魚味，刺身來講你都算係滿意既！食完刺身之後當然要出嚟睇下巡下啦，門口位一入嚟嘅我哋就見到有壽司吧同埋甜品區，還有飲品區，有沙冰同埋汽水嘢飲，特別在於還有部乳酪雪糕機喎！還有埋Toppings, 帶埋小朋友就啱晒啦！ 冷盤選擇都比得上酒店，好像我like的凍蟹凍蝦一樣有，我見仲添貨得幾密！當然要攞主角肉類來燒烤先啦，這裡的豬牛羊雞魚菜真係非常之豐富呀…有黑椒牛肉粒、牛肉片、牛仔骨、雞腎、香辣雞翼、原味雞翼、韓式辣雞、燒腩肉、豬腩肉、叉燒腩肉、鮮魷魚、羊扒、秋刀魚、多春魚、炸魚片、紅布腸、豬頸肉、獅子狗、豬肉餃、芝士腸！包羅萬有！原來這部新派燒烤爐熱力十足：客人唔覺好熱嘅，但燒起肉來都好快，大概三兩分鐘就已經要反轉另一面來烤喇，用靚爐都幾滿意！ 而熱葷類都有好多選擇，有豬腳薑、洋蔥焗新薯、口水雞、鳳梨雞柳、泰式紅咖喱鴨、黑椒味牛肉、牛肉燒賣、魚肉燒賣、炸魚柳、忌廉菠菜龍利樓、咖啡豬仔骨、焗蠔等今晚嘅例湯就是青紅蘿蔔豬骨湯，好多料，都幾有老火味道架！而蔬菜類都好多選擇，有粟米、冬菇、南瓜、雞髀菇、紫洋蔥、茄子、三色蕉、四季豆、菠蘿、翠玉瓜等另外還有一個重點美食....就是廣島蠔粥，這個粥真係非常滋味，蠔味也好濃，同我哋食開嘅水蟹粥更加香，係今晚主要嘅亮點! 真係唔食唔得呀，我仲一口氣食咗碗半添！ 當然食完唔夠喉既就可再去壽司吧嗰度再叫多兩客三文魚刺身，還來好好幾件壽司，這裏還有鰻魚內火炙三文魚都唔錯嘅！ 好喇到左尾聲嘅甜品部份嗱！咁當然既然我係一個朱古力控既話，就狂攞晒所有多款嘅朱古力甜品，佢哋多數都係擺咗喺呢幾個冷凍櫃內，令我想起佐敦龍堡酒店那二樓步飛! 有Mousse蛋糕同埋有幾款糖不甩類嘅酒品，品質嚟講呢都算中上嘅，當然唔好期望放題燒烤店的自助餐甜品會有文華酒店既Level啦，但我都已好收貨，你地來也不會巧失望嘅！ 咁加上呢到仲有一樣好好玩嘅甜品就係佢有一部棉花糖機啦！自助餐的自助棉花糖機喎! 好貼題嘛.....其實做法好簡單，開咗部機之後就落一兩羹白砂糖落去中間嗰個洞內，就用旁邊佢預先剪好嘅長紙筒，自己鍾意整幾大夠嘅棉花糖就悉隨尊便，我就玩白砂糖，你睇成支聖火火炬咁，同London Eyes影翻張相先，係咪好型呢？臨走之前再黎埋碗芝麻糊確實係非常之滿足啦，今晚有這裡可以試到咁多中式韓式同埋日本嘅嘅放題共惹一爐，其實呢個自助餐品種選擇都算得上酒店級數，每位都只係$200鬆啲其實係幾超值，也值得推介一下！去開酒店自動餐，用一半價錢來韓舍試下，你應該不會失望的! 哈!----------------味道 4/5環境 4/5服務 4/5衛生 4/5抵食 4/5----------------總評分 8/10----------------…查看更多

Espuma灣仔皇后大道東202號QRE Plaza 25樓今日約咗朋友去新喜帖街行街，行到灣仔合和附近，即刻諗起上一次好好食嘅尖沙咀Espuma，還未試佢金鐘分店！如果大家有睇過我嘅對上一次Espuma的食評，上一次我有一篇叫永不倒的傾斜，想起也回味！呢度環境比尖沙咀嗰間嘅感覺還要舒服，亦都比較浪漫，可能地點比較近合和，要適合灣仔白領嘅口味吧!!薯條就食得多啦，但今次呢度有一個黑松露醬芝士薯條$68，淨係聽個名就已好吸引啦！大家都知道我是一個黑松露控，咁我又點可以唔叫黎試吓呢?! 上枱賣相OK啦，不算是超吸引，但係佢個賣點就是上面既黑松露粉，係非常之香嘅，而薯條就炸得正正常常，但配搭上帶有黑松露味道的蛋黃醬呢，就又香又酸又很夠脆，共冶一爐，惹味fusion菜式，非常之開胃，作為第一個前菜已經係一個好嘅開始啦！飲品方面我哋就叫咗個招牌呢新鮮生果茶＄42 ,Orange Squash＄42, Ice Grapefruit $48 同埋Sangria Red $98 新鮮生果茶當然係冇得彈啦，非常之香甜，每次呢叫生果茶都係比到食客輕鬆愉快嘅感覺嘅！而焦糖單骨雞翼$68呢上次喺尖沙咀店都有食到，所以今次呢亦都不能夠抗拒，再叫多次單骨嘅焦糖雞翼，呢到亦都係keep到水準嘅，單骨雞翼非常之易咬易食，小朋友來到就一定會好鍾意喇！當然都要叫翻個意粉飯麵醫肚啦，侍應小姐都有推薦我地叫M7號嘅海鮮西班牙炒飯，有兩人份量嘅，但上次都已經試過那個西班牙炒飯啦，今次呢我地就叫試下佢個黑松露醬炒鮮什菌嘅寬條麵$108，黑松露控嘛!! 上枱時也有沙律菜放上層的，寬條麵都煮得夠冧，而黑松露味就不算是超濃烈，$108亦都相對抵食!上次尖沙咀店我哋冇叫到德國鹹豬手，今次人多就一定要試試啦！上枱個賣相已經攞滿分喇，份量也很大，而且就咁睇已睇得出佢烤焗燒得非常之到位，等我切開比大家睇下啦… 香脆鹹豬手$238你可能以為佢燒到好似好濃過左火，誰不知入邊都係仍然保持到Juicy，不太乾身就自然夠味啦！今晚其中一個Main就是這個木盒煙燻烤安格斯肉眼牛扒$328喇，也是這店其中一個名菜，好像每天也有限制數量的，好彩這晚也能夠叫上一份，這份安格斯，等左約廿分鐘終於到喇，上檯嘅時候真係幾架勢，待應小姐捧個大木盒來，打開嘅時候一陣白煙就散去了，其實我都攞唔切部相機出嚟影相比大家睇添....哈哈!! 待應拉開個木盒蓋，我地也聞到好香的煙燻味！木盒內的主角就出場喇…佢就係十安士份量嘅安格斯牛扒，配菜薯菜份量也好多，而我哋今次叫嘅係七成熟，牛味都幾濃，也好切，扒面層也保留有煙燻香味，安格斯一向都是我們的飛佛，唔會差得去邊，這個木盒好睇也好味！呢度用嘅餐桌用品都好有心思嘅，你睇下佢用嚟裝牙籤嘅小盒仔，同用上剛才那個煙燻木盒同一樣嘅飛機木板，食完塊安格斯櫻扒後待應小姐才適時奉上，感覺服務到位！今次我哋揀嘅甜品火鍋$88，冬日限定嘛，冬天就黎過嘛，仲唔試下就飲恨喇！上檯好大塊嘅方形嘅木板，上面就有四大粒有棉花糖啦、福餅啦、竹炭芝麻芭芙、有上次食過既兩塊細心型招牌窩夫、麻薯、雜菓杯，及最重要嘅紫薯甜醬火鍋啦！唔駛講野，個紫薯甜醬確實甜到漏，就算窩夫本身唔夠甜都無問題，乜都點下個紫薯甜醬火鍋，巧巧味，也好玩!我又發現呢到有好多情侶來慶祝生日喎，附近已經有兩台，這間Espuma同尖沙咀店最大嘅分別就星這家比較浪漫，而尖沙咀店就比較多少女團少女一啲！----------------味道 4/5環境 5/5服務 4/5衛生 4/5抵食 4/5----------------總評分 8.5/10----------------餐廳Menu:-…查看更多

紅螞蟻 Red Ant Restaurant屯門屯門鄉事會路83號 V City 1樓8號舖復活節假期就一家大細就入去屯門既V city行街街，下晝行得肚餓就去佢既Foot Spots搵食，落去地下果層就有全層好野食，有好多間餐廳可以選擇…有羅麥記、咖喱屋、米Pizza、越悅同埋牛角，還有我哋今日下午茶的紅螞蟻！門口大大個餐牌有下午茶餐同午餐，我哋就揀咗四個餐而凍飲就加＄3。(茶)淡咖喱吉列豬扒蛋包 58.00(茶)蜜汁豬軟骨麵 42.00(茶)雞扒麵 40.00 (茶)紫菜魚卷麵 40.00 (餐)熱朱古力熱柑桔檸蜜西冷紅茶凍檸檬茶 3.00 總金額 $183.00可能下午茶餐的關係，這個蛋包飯真係好細碟，不過咖喱嘅味道係非常之香嘅，原來我睇返菜單，佢嘅咖喱係用乳酪做的，所以有點與眾不同，雖然細碟但好味搭救。而豬骨麵同雞扒麵都普普通通不過不失，佢用嘅係比較幼身嘅米粉，味道就偏淡。而紫菜魚卷麵就非常之好味啦，那幾片紫菜魚卷炸得非常之香，每片都好濃的紫菜味，確實係回味無窮的。----------------味道 3/5環境 4/5服務 3/5衛生 4/5抵食 3/5----------------總評分 7/10----------------…查看更多

重慶燒燒烤專門店Chung King BBQ Restaurant佐敦渡船角文英街33號地下今晚心血來潮想食串燒或者燒烤，一想起要食燒烤就即時諗起佐敦文英樓，我知道那裏有好多間串燒及燒烤店，大部份食肆都集中在文英街的。晚上七點左右來到，條街就已經好多人，這家重慶燒，除了有燒烤及串燒之外，還有很多特色嘢食，這裡還有烤活魚，就揀這間啦！ 這間燒烤專門店外邊也有兩張食煙戶外檯，早已俾人訂枱了，當然啦，文英樓是最適合揸車人士來找好嘢食的地方，有兩張戶外檯當然最吸引啦！室內大約有十幾張枱，也很有燒烤店的味道，而菜單內容非常豐富，明顯比其他串燒燒烤店的選擇還要多，計埋飲品及牆上推介既活魚蝦海鮮菜式選擇，我估冇200都有180項！當然我唔會放過叫烤活魚嘅機會啦，這裡還有雞煲，真的應有盡有，相信燒龍蝦或者魷魚也是這裏的特色。還有飲品也非常特別，也有唔少選擇，今晚就不飲酒了，也應該叫翻D下火的飲品，我們一口氣就叫了三杯飲品，第一就是鹹柑桔，第二杯就是加多寶，第三杯就緊要喇…蘆薈西柚果纖蜜＄35，這個特飲當然要大啦，因為上枱後你望吓… 原來他們是用Hoegaarden的玻璃杯來上檯的，這個算是這裡的特色，非常誇張，啱晒相機食先的我們！當然好味道啦，我也食到西柚肉及蘆薈啫喱！ 最先來的是兩隻燒象拔蚌，份量不是很大，做前菜啱晒(用象拔蚌做前菜好做有點串Sorry…哈哈)，香料好足，蒜香味濃，也燒得剛剛好不會太韌啦！到主菜烤鱸魚上枱喇....與市面食開的烤魚一樣，有一個小石油氣爐上面放一大盤烤魚，這裏好有川菜特色，鱸魚上下左右都充滿着大量香料，其實烤魚上枱已經滾熱辣，可以即刻開餐，下面個爐其實主要都是保溫同煮熟埋烤魚旁邊的瓜菜，來增加香氣。那我就不客氣啦，夾起魚身生就見肉質非常之嫩滑，所以選較少骨鱸魚就比較o岩我地，而且辣度十足，我估這鱸魚有約一斤重，配料充足，還有冬瓜娃娃菜，幾個人食就啱晒啦，由於有花椒與八角，香味濃郁。 食串燒再加埋這川菜烤魚，唔叫翻罐加多寶都唔得啦!!再來燒煙肉鵪鶉蛋＄18 ,上枱賣相好靚仔，煙肉卷著鵪鶉蛋，見到就想即刻放落口，煙肉燒得剛剛好，不會太乾身，煙肉味濃，最好不要分開食，與鵪鶉蛋咬落去，蛋味中和煙肉的鹹味，非常惹味！ 食燒冬菇、雞肉豬肉串、燒腸仔及燒大蔥是我們去串燒店的指定動作，而每張枱上也提供了孜然粉及辣椒粉，我當然要試吓他的孜然粉啦！大蔥燒得剛剛好，而腸仔就正正常常，燒冬菇我加了孜然粉味道就變得好出，香口也不會太乾身，我最怕食串燒店就是燒得好乾，重慶燒在乾濕度方面也控制得好好。 還有燒雞翼，外面睇燒得好脆，不需要落孜然粉也香味十足，雞翼面亦都有燒焦，有肉汁流出嚟，這個燒雞翼我不能給佢滿分，雖然好味，但始終燒得過左火！也叫了一串花枝丸及芝士丸，花枝丸煙韌又有魷魚味道，而芝士丸就有驚喜了，中間芝士爆漿，味道濃郁，兩院丸放在一起上枱是最佳的選擇！ 還有一樣特色食品，就是燒甜菜蜜香蕉＄15 ,上枱賣相還以為他們是茄子，上面有好多朱古力醬，我估應該是Nutella，反轉睇香蕉皮已被燒焦了，大家都知道香蕉如果熱食係非常之甜的，而這碟也不例外，甜度十足，我們也非常之喜歡！ 而燒粟米上枱就非常之大條，燒得也香甜，正正常常，建議大家下次叫一支就好夠被食架喇！燒菠蘿算是今晚另一個驚喜，上枱買相其實不是太吸引，但咬落就極之香甜，菠蘿味濃同好多汁！ 燒帶子上枱就連埋好大隻帶子殼，賣相靚仔，以帶子早已被上下開邊了，所以香料能滲入整隻帶子，可以分兩啖或分享家人品嘗，香料就有蒜蓉香蔥及豆豉，而帶子軟滑夠好味！燒大海虎蝦，好大隻，接近一尺長，香料就與燒帶子相若，香味十足，最驚喜的是兩條竹籤早已穿過大虎蝦的蝦身，所以一口咬住隻蝦一拉就除晒成隻蝦殼，啖啖肉回味無窮！肉質juicy好味!!----------------味道 4/5環境 4/5服務 3/5衛生 4/5抵食 3/5----------------總評分 7.5/10----------------P.S. 我見這裏有好多支存酒，上面寫滿晒人名，相信深夜時份…這裏也有好多人來飲酒傾計食嘢既好地方！餐廳Menu:-…查看更多

HeSheEat旺角白布街22號藝興大廈地下4號舖今日中國情人節，晚飯一定找家好野慶祝下啦，Openrice上聽過這家人氣長龍店好耐都未黎試下，佢有旺角同銅鑼灣兩家分店，旺角好評多D喎！就先來這家啦!這裡分上下兩層，下層樓底好高，不過就得幾張檯，大部份檯在樓上雅座 樓上又分了三個sections, 都幾闊落，背景音樂也好舒服！呢度的菜單圖文並茂好多選擇(Menu放在食評之後)，佢亦都會有今日廚師推介，我哋睇咗好耐，今晚呢就揀咗以下呢幾個好味菜式同飲品：-士多啤梨玫瑰茶 $45燕麥乳酪奶昔 $38炸魷魚圈配他他醬 $69帶子青蘋果焦糖合桃蜜糖芥末醬沙律 $88加拿大海膽意大利飯 Sea Urchin Risotto $148All Day Brunch Set (Classic) $98綠茶心太軟 $59特濃朱古力慕絲 $69 先上枱嘅是兩杯好靚嘅飲品，這個士多啤梨玫瑰茶，女職員話俾我哋聽開頭飲嘅時候可能只會有玫瑰花茶未但當上面嘅士多啤梨說吧慢慢用咗之後就會非常之好味，我哋試過頭幾啖飲好重玫瑰味，但食到中段士多啤梨味才走出來，這杯飲品酸加甜，感覺非常清新！ 至於燕麥乳酪奶昔.....味道係我前所未有試過的，估唔到乳酪奶昔加埋燕麥會撞出這種咁嘅味道，我哋異口同聲對這杯飲品讚不絕口，真係好好味，相信係第二間餐廳也飲不到，下次再來旺角我都應該會在叫這杯飲品外賣！絕對係5星飲品!!頭盤未到就來了兩杯飲品已經比到我們這麼大的驚喜，怪不得HeSheEat是一間旺角人氣長龍店啦!這個炸魷魚圈配他他醬，上枱非常之香，魷魚圈炸得非常乾身，魷魚圈原本是非常之鹹的，但點這個酸酸地的他他醬，算為魷魚圈帶來一種好好味嘅組合，而食每一口魷魚圈就好似拉條橡筋咁，玩味十足，魷魚味也突出。沙律上枱的賣相非常靚仔，而那兩粒帶子就相對細隻，火箭菜同牛油果加橄欖油份量調節得幾好，感覺好Fresh！大家都知道我是一個意大利飯控，既然廚師今日推介了加拿大海膽意大利飯我又怎可以！抗拒呢？上枱的時候，我見意大利飯浸在濃湯裡，而海膽味濃，而飯入面亦會食到有魷魚粒同埋蟹肉，味道就偏淡。這裏的All Day Brunch Set，有三個不同的選擇，肚餓的可揀多肉，色素的可揀素餐，亦都可以取其中間，我這Brunch Set取中間的，即Classic。其實上檯份量好多，牛角包好新鮮，炸薯餅也炸得好香脆，最大賣點就是那個薯蓉，非常香濃，我相信那薯仔是經過鹽水煲過再攪成蓉上碟，所以薯味道非常濃烈！食到尾聲當然要叫這裡的甜品吧，這裡的甜品Catalogue實在影得太靚啦，我也不知怎樣選擇好，先來個綠茶心太軟，上台的時候也有七分藝術感，那球雪糕就不用多說，重點是那個綠茶心太軟，當我用叉在中間劏開就有綠茶糖漿流出來，焗得剛剛好，味道也非常之香甜，綠茶味濃，而份量也不是很大，所以飯後有這甜品非常之滿足！最後上枱嘅亦都係今晚嘅一個重點.....就是特濃朱古力慕絲，放在一個好似種花或放學生時期小星星(大家還記得那些年嘛?)的玻璃瓶入面，裝住好多唔同嘅朱古力及朱古力碎又有合桃，上層是一球朱古力雪糕，最上面也鋪滿朱古力粉，相信是Oreo餅碎，而雪糕下邊就有大量小朱古力粒、合桃及朱古力香脆等，口感層次豐富，亦都食得出好有酒店甜品質素嘅朱古力味道。食到中間其實已經回味無窮，而底部還有牛奶朱古力及榛子朱古力醬襯底，大家下次來一定要叫這個無敵既朱古力慕絲甜品。--------------味道 5/5環境 5/5服務 4/5衛生 4/5抵食 4/5--------------總評分 9/10--------------餐廳Menu:- …查看更多

夢工房西日料理葵芳葵義路2-10號新葵芳花園好爵中心商場1樓其實我都好少去葵芳，今日好友生日，當然在Openrice找家近佢既好野食，據聞夢工房放題性價比高，請來試試佢吧！其礎收費兩小時放題$168+升級版$78生蠔松葉蟹每人$168, 當然有人生日梗有大食大啦，加上…這個價錢又真係唔貴嘛！ 這裡有分入面同出面兩大庭，我早book就有出面個梳化靚位，環境真的好舒服！飲品任叫，除了有常見的康師傅外，驚喜位還有暖既康師傅在一個暖既維他奶櫃內，認真夠窩心！甜品櫃也夠豐富，有牛奶公司雪榚同百福豆腐花，但更窩心的是佢有埋Yogurt，仲有幾隻味，呢牌晚晚出街食，一陣食翻兩個乳酪先！ 食品種類非常豐富，當然二話不說就先叫刺身，基本上所有紙上既都想試…三文魚甜蝦Tuna墨魚片立魚蟹腳甜蝦無走雞，佢上檯既原來連埋升級版既生蠔松葉蟹放在一起…勁吸晴呀！當然先滿足手機先啦…佢肚餓嘛！哈哈！刺身就正正常常，Tuna同三文魚都屬中上，不過就要講下那幾隻美國生蠔，真係足手掌咁大隻，味道好鮮，不是超腥味那種，比好多酒店步飛的小蠔更正，如有朋友好少食生蠔的就一定會喜歡這款較易入口的，美國大蠔算是這晚其中一個驚喜。餐廳一早已放了兩套開蟹剪同點蟹茄醬，用來比我地拆松葉蟹腳，蟹腳都幾多肉，蟹蚶肉也好易起，蟹肉感覺新鮮。天婦羅都食得出是新鮮新油炸出，香脆好味！我地了天婦羅蝦南瓜番薯等。 燒蠔同蒜蓉燒扇貝都幾好，但省嫌細隻少少，不過任食既又有乜所謂呢?! 黑松露帶子壽司夠香又好味道，估唔到放題都會入黑松露黎上碟! 至於其他壽司就正正常常喇!我見這裡個個枱面都有一個台小火鍋，我哋當然也唔執輸啦，簡單點左幾樣丸粒冬菇肥牛海蝦同燒賣，一次倒晒落個火鍋裡，放題就是要這任性嘛！ 炸三文魚頭非常香脆！ 我們也有叫到梅酒及清酒，清酒正正常常，但梅酒就非常之甜，懷疑是餐廳自己浸的，梅味十足！ 生蠔唔夠喉，就額外再叫多四大隻先夠盡興嘛！ 清酒煮蜆酒味濃，肉質可以，份量都幾多喎! 羊架最後進入甜品階段，先試下咖啡布甸，非常香濃咖啡味也相對好味道！ 近來差唔多每晚都出去食得晚飯，難得這裡有提供牛奶公司的乳酪，我一口氣就吃掉兩杯了！哈哈！ 另外還有一個驚喜，就是外邊都買不到的榴槤雪條，相信是來自泰國或印尼的，你們要相信我，放題臨尾一定要食這條雪條，唔知點解非常之有貓山王的榴槤味道，我朋友一口氣就吃掉兩支！如果你哋知道邊度有這款賣就請話俾我知！一定要再買來食！這餐放題也因為這條小小的榴槤雪條變得好滿足！味道 4/5環境 3/5服務 3/5衛生 4/5抵食 4/5總評分 7.5/10餐廳Menu / 其他柯打紙:- …查看更多

新越越式料理 Pho Le九龍城福佬村道41號地下今晚約咗朋友去九龍城晚飯，幾條街行來行去都未決定到去邊間餐廳到食，行到福佬村道就見到這間越南餐廳門外寫住有生牛肉河，即時觸動了我的神經，就入左去喇，哈哈！ 這裡裝修簡約，以白色為主，牆身、枱及藤椅也是純白色的，樓底就非常之高，感覺舒服，傾計o岩晒！這裡有單張說他們是從越南胡志明市的牛肉河粉名店買來特許經營權在香港開店的，所以這裏的生牛肉及湯底也應該較地道，我也直接選了生牛肉湯河$46，此外也選了咖喱海鮮炒飯，再加芝士蝦丸及鮮蝦炒西蘭花，飲品方面我地就試吓越南33啤酒$28及我好耐未飲過的越式滴漏咖啡，跟餐只需加$10咋(原價$25)！ 生牛肉湯河生牛肉湯河賣相非常有台型，加上大量香蔥芽菜，及另外供應一籃香葉與青檸，生牛肉切得好薄，牛味濃郁，河粉份量就相對較少，湯底確實有牛肉味，咸度適中。至於咖喱炒飯份量適中，不算是太香，內有魷魚及蜆肉碎，加了少量青椒粒，少少微辣。越南333啤酒$28越式滴漏咖啡$25之後就飲品上枱，包括我的滴漏咖啡，望住滴漏杯一滴一滴慢慢咁向下滴，確實能洗一天工作辛勞的壓力，大約滴漏了八至十分鐘，咖啡杯就已有七成滿，而杯底是煉奶來的，不用加糖就已甜度適中，好耐未試過這種”咖啡走”喇！咖啡味十足，份量雖小但也足夠回味至於鮮蝦炒西蘭花，西蘭花炒得幾香，也爽脆，不過三隻蝦就比較細隻！ 蝦丸上枱熱力的人，外脆內爽，蝦肉也鬆化，最大驚喜是入面中央部份有芝士，所以這個蝦丸口感層次豐富，香脆可口好味!--------------味道 4/5環境 3/5服務 3/5衛生 3/5抵食 4/5--------------總評分 7.5/10--------------餐廳Menu:-…查看更多

Amour Garden Grill & Bar 旺角豉油街15號萬利商業大廈4樓 今晚晚餐在旺角，我地一向都想坐得舒服，在旺角去樓上Cafe就最o岩喇，仲記得信和斜對面有家巴黎鐵塔Cafe, 去到原來已經無左，那就上Openrice再search，這裡附近就有Amour, Amour法文就是墜入愛河，就等我地來個浪漫晚上吧！我地早來，6點九到，都有三四檯客，全場有十幾張檯，中庭放了兩大部標準酒吧的飛標機，燈光好柔和，音樂非常舒服，多數播台灣情歌同Jazz, 過了晚市就變身樓上酒吧，所以Amour營造浪漫氣氛確有一手。這裡的Set of Two好抵食，$268就有沙律同埋頭盤，仲有埋甜品添！餐湯-磨菇湯先來餐湯蘑菇湯細細玩帶埋相好靚，幾Creamy ,幾重蘑菇味。 惹味Amour肉丸雙重奏 頭盤有四粒小肉丸配有茄汁及薯蓉墊底，肉丸應該係煮好後再煎香左才上台的，幾香又真係無講錯幾惹味，咁話好快就比我地清晒啦！輕食吞拿魚波菜沙律沙律絕對不容錯過，雖然細細碟賣相一般，但係那個波菜生菜配下面那吞拿魚醬一起食嘅時候又非常美味，清新吞拿魚味好濃，那個酸酸甜甜的味道實在不是出面一般吞拿魚醬可比，這個沙律可以值得有四星半嘅！ Garden什菜堡好啦主菜嚟啦…今日睇個主菜雜菜堡…賣相好靚仔，個麵包非常之軟，其實我好耐未食過咁鬆軟嘅麵包皮，你哋睇相就見到個面皮得有幾鬆軟，而入面除咗番茄之外就充滿着好大量嘅蘑菇，所以食嘅時候就要好有技巧同特別小心，不然就好呢咁hea喇！這個又有前菜又有沙律再加埋呢個份量，一般食客來講其實都已好足夠啦，蘑菇也煮得好香，整體滿意！ 黑松露海蝦燴飯 另一個主菜又到啦，大家都知道我係一個黑松露控，所以這個黑松露海蝦燴飯我又要試真喇，上檯嘅時候黑松露味其實不算太出，但食落都好香，此外，那三隻大蝦，就非常之彈牙啦！一般黑松露主菜都會配意大利飯的，這個飯叫得做燴飯其實就不要期望會同意大利飯同味，但佢地都做到七成意大利飯嘅效果，就較意大利飯乾身，未及Risotto黏身，但粘米燴過上湯上檯也算有誠意，而海蝦新鮮，也煮得爽口，樓Cafe當然就考功夫啦！四星個飯無走雞…哈哈! 至於兩杯餐飲，熱柚子蜜正正常常不過不失；而榛子咖啡就係我的至愛，我不嬲最喜歡的就是Nutella的味道，上檯嘅時候咖啡沒有拉花，但看到奶泡表層沖得飽滿，打得幾好，咖啡都夠熱，飲榛子咖啡其實不用落糖的，只要攪勻底部嘅榛子醬就成杯咖啡都會好香濃，這杯也不例外，也滿意這杯咖啡。 甜品-木糠芝士蛋糕 其實旺角樓上Cafe好多，而這間環境好舒服，菜式也有好多選擇，食吓野或傾計傾得耐左亦都可以去中間部飛鏢機度玩翻兩手，好快又過了一個juicy既晚上喇！-----------------味道 4/5環境 4/5服務 4/5衛生 4/5抵食 4/5--------------總評分 8/10-------------- P.S.後記加上外邊有一個大型露台，我睇大概都有成千呎，晚市他們也有提供BBQ燒烤晚餐，基本每位＄168就有啦，你都可以加到多100幾十蚊升級版加多啲海鮮或者生蠔，下次我地多D人黎可試試！燒野食加室內掟鏢也過癮！ …查看更多

金蒂餐廳 Cinta-J Restaurant & Lounge灣仔謝斐道69號馬來西亞大廈地下灣仔一向多好野食，金蒂餐廳Cinta-J Restaurant and Lounge已經有廿幾年歷史喇，係食傳統菲律賓印尼南亞菜式，每晚7:30起就有菲藉Live band既好有味道既餐廳，好多東南亞既菜式我都未試過，今天Lunch就來試D特別好野！這裡的Lunch set都好抵食，我就選了Crispy Soup Noodles (Tum Yum Style) 冬蔭湯特色雞肉炸麵 $72這裡的炸麵我未試過，友人說一陣你就知…哈哈！過了一陣就送上黎一碗好神既麵來....神麵好高的，我見好像我碗麵上面著左火咁！那些炸麵好大兜，我完全唔知點入手，菲藉女待應見狀一句溫馨提示，教我將其中一邊脆卜卜的炸麵質落去湯到浸浸佢，果然巧巧味，冬蔭湯有少少辣但好香，還有那些豆卜也非常入味。不過每次食這類爆炸麵都飯菜淋漓，食到麵碎一檯都係…哈哈！個麵份量已經好多，跟餐還有椰汁西米露又有無限添飲既奶茶，唔飽都幾難！午飯有個糖水真係滿足，還有黎印尼類餐廳我一定叫當地地道的奶茶，這裡奶茶好正，跟本無需要落糖已好香濃。朋友就叫左個靚靚的印尼黃薑飯Nasi Kuning $78除中間個飯外，其他的配料非常豐富，有炸雞全翼、咖喱豆腐豆角、牛肉片、炸花生同個咖哩汁，有無聽過真人靚過上鏡，呢碟野上檯靚過Menu既Profile pic, 我試左兩啖黃薑飯，炒得幾香，牛肉片味濃也夠林。如果上午開工太枯燥，想lunch來個視覺刺激，重口味的Cinta-J就一定o岩你！----------------味道 4/5環境 4/5服務 4/5衛生 3/5抵食 3/5----------------總評分 7.5/10----------------…查看更多

福門海鮮菜館大角咀塘尾道59,61及61A號地舖星期日去旺角塘尾道，大家路經此地會見到這個四角大鋪，三家大型食肆再加個Shell油站，我地今天就試下潮福斜對面的福門啦!地鋪做酒樓其實好處係方便揸車人仕在附近泊車的，也因為咁所以租貴，所以一般埋單都唔會平得去邊。經理話無位，叫我地上樓上，條樓梯都幾有勢，上到去再高上幾級，有獨特玄關感覺。叫了幾個點心，質量也算得上OK蔥花炸兩腸 $27油炸鬼不夠脆，蔥花有帶出香味三色水晶飽 $24蓮容好Creamy, 甜度適中，皮不厚潮式糯米卷 $24糯米幾香，蒸得也剛好，正正常常灌湯餃 $27上湯好濃，皮夠薄，肉質尚可，無魚翅的，這個$27 ok抵食！ 糯米飯 $21夠香，油不多幾好，臘肉切得夠碎，飲粒也不濂，質數一般發菜蠔豉炆伊麵 $98蠔豉份量好足，蠔豉味道夠濃好正，伊麵也抄得夠乾身，不算太油，質數也中上；不過我就唔知D發菜發左去邊，好彩我年初一開年飯食過夠，否則就大吉利是喇…哈哈！----------------味道 3/5環境 4/5服務 2/5衛生 3/5抵食 2/5----------------總評分 6/10----------------…查看更多

華爾登麵包餅店西環第二街120-126號仁福大廈地舖 今日要去西環攞嘢，下午茶時間有啲肚餓，走到西環水街口見有家餅店，就買了四個蛋撻醫肚！ 呢間鋪頭老闆娘好好，話最後幾個蛋撻就買晒佢免收兩個比埋我，見佢招牌寫住since 1984應該唔會太歎食，我都無睇就買左醫肚先算！雖然賣相好核突都無所謂，但成個蛋撻同皮都無味嘅，甜度不足，大家如果有睇過我D食評，都知道我係一個泰昌蛋撻控，原本都冇諗住簡單食幾個普通蛋撻醫肚都寫食評的，但返到車上食了半個蛋撻後都忍唔住要行翻轉頭影返個門口相俾大家睇！其實唔一定係間餅鋪嘅問題，可能真係我地肚餓貪佢最後嗰幾個蛋撻都買埋佢，呢個教訓就是要話俾大家知，蛋撻千祈唔好買最後賣剩或蛋漿收左水那幾個，更加唔好貪平話送多幾個最後俾埋你果D蛋撻！ 此外，我地還買了一個好可愛嘅天鵝芭芙，食之前都冇影到相俾大家睇，但食到中間，真係冇辦法食落去啦，你哋睇相雖然覺得剩低果本好似好正常，但其實咬落去好硬，食落去係無味嘅!! 我好少俾餐廳劣評的 ,對唔住，今個下晝真係幫唔到你啦！ 不過大家不要因為我嘅劣評而唔去嘗試呢家小店，始終佢都係1984年開業，一定有所質量，此外，你地睇吓佢門口的小食品，上面介紹的文字亦都係有誠意之作，不過大家買之前記住唔好重蹈我既覆轍，買最後嗰幾個蛋撻之前記得要審慎考慮清楚先好呀！哈哈！———————味道 1/5環境 3/5服務 3/5衛生 3/5抵食 3/5———————總評分 3.5/10—————— —…查看更多