今日即興同夏生同埋佢兩位廿三年兄弟入西貢食雞飯，突然醒起校花係碼頭旁邊攪咗間泰國野，所以決定去打個招呼順便支持下。 兩點左右入到黎去到碼頭旁邊終於搵到目的地「泰友會」，臨近巴士總站旁，好容易就搵到，適逢今日落雨，所以好難得地可以靜靜地渡過星期六。一行五人，起初諗住簡單叫支啤酒俾夏生同幾個朋友飲，最後叫咗幾個小食，分別（1）斬咗半隻海南雞、（2）一打泰式生蝦、（3）青咖哩牛腩配薄餅、（4）泰式豬頸肉。不得不提海南雞，雞有雞味（唔係廢話唔係講笑），肉質鮮嫩，重點雞皮夠薄，就咁食已經好香雞味，配搭醬料食更為惹味！生蝦出色，食得更招積，將生蝦放入杯仔，連蒜同辣椒食連埋秘製醬汁入口真係會有「好好味啊！」果種感覺。青咖哩牛腩，牛腩外還有牛筋，煮得恰當火喉保持到肉質同口感，呢個時候重點黎喇！個青咖哩汁好Creamy，又唔會太辣，配合薄餅點汁稱為絕配！之後仲忍唔住要用汁撈飯！最後仲試咗個冬陰公邊爐！配搭兩種肉，我地叫咗牛肉同羊肉（仲可揀雞肉，豬肉），暖身一流！我地叫咗蝦膠丸同蔬菜！蝦膠丸口感出奇地好，且彈牙又有咀嚼感！加湯底真係加返冬陰公，無花無假，真材實料！呢個週末，可以係海邊搵到一間由泰國人廚師主理嘅泰國食肆，同三五知己把酒當歌，聽住舖內一首首耳熟能詳嘅經典歌，傾下偈吹下水望下境，放假本應如此，人生應該如此。食泰國野，唔一定要去九龍城，黎西貢又唔一定食海鮮，下次諗起食泰國野，一家大細男女老幼聯群結黨兩小無猜都不妨考慮一下「泰友會」！…查看更多
