wowolascelle的个人专页

跟朋友嚟食三日月日式鐵板燒，鐵板師傅經驗豐富，無論視覺同美味都帶嚟享受～三日月極上一人前鐵板餐$998/位，包含前菜、沙律、刺身、生蠔、鐵板菜式、茶碗蒸、炒飯、湯同埋甜品，好豐富呀！前菜三小點包括有醃漬茄子🍆芝麻豆腐同埋煙燻雞肉，充滿日本特色，尤其芝麻豆腐芝麻味超級濃郁。沙律造型美觀，蘿蔔絲同埋一啲生菜，上面放有魚子，醬汁酸酸地，口味清爽。極上刺身五點包含油甘魚、帶子、牡丹蝦、赤身同埋拖羅，好新鮮！日本生蠔夠大隻，要分開啖先食得完，好肥美。鐵板南非鮑魚用牛油煎好香口，鰹魚醬汁鮮味十足。帝王虎蝦超大隻！蝦肉爽口彈牙，蝦頭仲有好多膏添，用蟹膏煮嘅汁，令到佢味道更有層次～茶碗蒸比外面食到嘅滑好多，原來唔係雞蛋加水，係用咗高湯，所以特別鮮甜。鐵板燒美國安格斯牛柳牛味濃郁，油脂分布平均，齒頰留香，配搭日本野菜南瓜、香菇、蓮藕同埋蘆筍，真係好豐富呀！食完鐵板燒，加上炒飯，真係大滿足，炒飯加入左酸梅醬、櫻花蝦等等配料，仲有鰹魚湯可以整茶漬飯，雖然好飽但係都全部食晒，之後仲可以飲埋碗味噌湯。整體來講性價比高，下次要再嚟啊！…查看更多

最近網上見到一個清酒x海鮮品味體驗之旅 覺得好有趣吖原來係jfoodo同埋南海一號一個推廣日本清酒嘅活動總共可以品嚐三款清酒同埋四道菜式又鮑魚又大蝦 真係好美味而且仲有唎酒師即場講解真係長知識啊🔸蠔皇原隻鮑魚 配 黑龍 九頭龍 逸品 第一隻清酒 充滿花果嘅香氣 入口有驚喜 竟然係香蕉嘅味道 甜甜地好易入口 配上蠔油烹煮嘅原隻鮑魚 鮮甜彈牙 飲一口清酒再食一口鮑魚 味道更提鮮 🔸金榜醬大蝦 配 月桂冠 愛說話的鯨魚 純米酒 第二支清酒米味重啲 入口甜好多 今次嘅配搭比較特別 罕有地配上海鮮 唎酒師話通常會怕清酒嘅甜會蓋過海鮮嘅鮮味 但因為呢道菜式加入左好多香辛料 而呢支清酒更夠帶起層次 令辣味提升 更顯胡椒同辣椒等調味嘅layering 🔸竹笙釀鮮露荀 • 脆米斑肉炒飯 配 Miyasaka 山田錦 純米吟釀 炒飯用上鹹蛋黃、蛋白、脆米同埋石斑肉 另外再配上爽脆竹笙釀鮮露荀 味道囗感非常豐富 而最後呢支酒帶微碳酸口感 清爽解膩 而且令青菜嘅味道更突出 可以話係呢一餐嘅完美句號…查看更多

每次食日式放題，我都會選擇大喜屋，覺得CP值高，同埋啲魚生夠新鮮啊！今次就同朋友去左觀塘分店，坐得都舒服，平日夜晚都好受歡迎👏🏼 刺身三文魚、油甘魚、北海道帶子、甜蝦，都新鮮肥美！除此之外，仲食咗炸物天婦羅、串燒、煮物等等。個人推薦：王牌燒乳鴿王❤️竟然有乳鴿食！真係必食之選～牛油粟米🌽好香牛油味，每次必點泰式咖喱軟殼蟹，咖喱同埋蟹分開上，仲有蒜蓉包可以點咖喱汁燒香草羊鞍，羊味濃，咬落啖啖肉風味淋燒魚乾，好香口，點咗兩次！完全就係食到停唔到口燒溫室甜菠蘿🍍香甜美味，菠蘿勁Juicy芝士竹輪卷天婦羅，咬落會爆芝士，好邪惡㗎！芝麻雞翼，剛剛炸起好香脆，佢每次必食之選~另外除咗QR code落單之外，仲有自助區有沙律吧、熱菜、各種甜品、雪糕雪條同埋飲品，真係琳琅滿目，食得好過癮呀！…查看更多

暫時仲未去到日本，唯有去食omakase 解解鄉愁。呢間位於旺角新開業嘅<升>，做緊promotion，二人同行一人半價，晚市計返每人都係七百幾蚊，好鬼抵食！雖然平，但係食物非常之有水準，用料都幾高級，無論賣相、定係味道、定係整體服務，都令人非常之滿意！晚市有三個價錢，$680/980/1280，我就揀咗中間嘅，包含前菜（3點）．特選刺身（4種）．手握壽司（7件）．手卷．一品料理．茶碗蒸·湯．甜品，勁豐盛，食到超級飽。前菜：蝦水雲+土佐啫喱炙燒鰹魚磯煮鮑魚配鮑魚肝醬三款各有特色，頭兩款酸酸地好開胃特選刺身：鱈魚白子蜜柑鯛梭子魚煙燻鰹魚口感味道每款都唔同，好刺激味蕾！一品料理：西京燒銀鱈魚銀鱈魚肉嫩滑，配上西京燒嘅煮法，好香口！壽司：石垣貝車海老北寄貝鰤魚秋刀魚大拖羅北海道馬糞海膽呑拿魚茸蘿蔔手卷壽司每款都好唔同，全部日本空運到港，新鮮又肥美！食完壽司同埋手卷已經好鬼飽，仲有蜆肉清湯同埋松葉蟹茶碗蒸，個蒸蛋好滑溜又足料。最後甜品仲有九州富有柿、蒴餅配北海道紅豆，真係大滿足。…查看更多

朋友推薦嚟到呢一間蝦蝦燒，一個價錢兩個半鐘頭任燒任食，食物種類選擇繁多，包括有各種肉類，豬牛雞蔬菜海鮮一應俱全，尤其是係海鮮區，擺放整齊而且好新鮮，扇貝、鮑魚、蜆、蟹等等，簡直好似街市魚檔咁樣咁多款式～每張枱有一個燒烤爐，吸味功能幾好燒完唔會成身都係味道，燒烤爐睇落好似唔係好大但係其實燒到勁多嘢，因為上下兩層都可以用！旁邊就有一個魚缸，入面有新鮮嘅流水大頭蝦，可以自己揀選，夾入冰桶整暈佢再剪走d鬚可以擺去燒，肉質爽口彈牙，而且蝦頭係有膏架！真係超正。職員仲會久不久加入活躍亂跳嘅鮮蝦。除此之外雪糕同埋飲品都係無限量提供，無論汽水定係無糖飲品都應有盡有，真係食得好滿意呀！…查看更多

好耐冇食過牛大人，得知元朗開咗分店，即刻同屋企人去試吓。餐廳環境寬敞舒適，坐得都幾舒服，由於屋企人生日，所以就食豪d，揀選左最貴嘅套餐「澳洲極上和牛套餐」$318/位，食物款式選擇好多，用QR code落單好方便，外面仲有自助區有各種台灣直送嘅丸類、同埋各款蔬菜等等，琳瑯滿目！飲品都好有特色，尤其是幾款冷泡茶，例如白桃烏龍、桂花烏龍、菊花普洱等等，配合火鍋最適合～消滯解膩！每一位仲有贈送和牛牛丸兩粒，肉類方面最鍾意就係M5和牛同埋北海道十勝豚，和牛M5牛肩卷油花分布均勻，牛味濃郁又不油膩！另外私房鴨血都係必食之選！一煲仔有三件，有少少胡椒味，口感好滑～海鮮方面我鍾意海蝦，入口爽口彈牙。沙白鮮味十足又冇沙，蟹子墨汁漿口味特別，好足料而且夠爽口。屋企人仲另外嗌咗杯西鬼啤酒 ($68)，佢係一款得獎嘅台灣手工啤，酒精味唔濃，好易入口！兩個鐘食咗超多野，臨尾仲有雪糕或者台式仙草做飯後甜品，真係超滿足呀！…查看更多

近日到了一間位於中環蘭桂坊的日式餐廳T8 Japanese Cuisine享用了一頓高質滋味鐵板Omakase，餐廳裝修精緻，以日系風格為主調，環境舒適，能邊吃邊近距離欣賞廚師巧手廚藝功架，更可與廚師交流❗店員殷勤有禮，服務貼心。今次享用了期間限定夏祭海鮮套餐 $1680@此餐共包括9項美食：1️⃣前菜- 海膽松葉蟹肉果凍以賣相精美的鐵盒盛載，海膽香濃細幼，松葉蟹肉新鮮，高湯啫喱清甜！2️⃣時令刺身2品 - 厚切中拖羅及赤貝厚切中拖羅肉質鮮嫩，味道鮮甜，入口溶化！赤貝鮮甜，肉質爽脆幼滑，帶海水鮮味！3️⃣蠑螺壺燒蠑螺壺燒即叫即製，熱炳炳上菜，螺肉質爽口，以清甜高湯湯泡製作，鮮甜美味。4️⃣鐵板燒蟶子王鐵板燒蟶子鮮香滋味，肉質非常彈牙，還配有蒜蓉牛油，帶淡淡焦香，十分滋味。5️⃣鐵板燒明太子煮蜆以清酒燒製的煮蜆，蜆肉肥美鮮嫩，配搭明太子，咸度適中，十分惹味。6️⃣鐵板燒斑馬瀨尿蝦這是一隻份量十足的瀨尿蝦，含有豐富香濃的瀨尿蝦膏，肉質鮮甜，加上烏魚子碎，配搭豐富滋味。7️⃣櫻花蝦炒飯這款鐵板燒炒飯以滋美櫻花蝦、雞蛋及香蔥炒製，粒粒炒飯帶淡淡焦香，十分惹味❗️8️⃣湯 - 鯛魚濃湯這是以份量十足的新鮮鯛魚熬製而成，配搭日本昆布，帶香濃鯛魚味，车分鮮甜滋味！9️⃣甜品 - 香蕉天婦羅配紅豆雪糕黃金香脆的香蕉天婦羅配搭冰涼透心的香甜紅荳雪糕，冰火交融，甜而不漏。此日式餐廳食材新鮮，非常用心製作每一款食品，能與廚師交流互動，店員服務週到，環境舒適，十分推介給喜歡日本料理的朋友❗…查看更多

冇得去旅行，唯有多啲喺香港搜羅其他地方美食。今次搵到呢間美式風格嘅酒吧餐廳，雖然位於旺角，但係因為食客同店員都係外國人，完全感覺唔到自己喺九龍，氣氛好chill！餐廳仲有一部黑膠唱片點唱機，充滿美式復古風格。逢星期三仲有雞翼特價$6一隻，超抵食～朱古力奶昔唔想飲酒，所以飲咗一杯非酒精飲品，奶昔有幾款口味，朱古力味超邪惡！入面有五顏六色嘅m&m朱古力，仲有朱古力漿～口味濃郁，充滿美式風情。燒汁手撕豬肉漢堡非常值得推薦❤️燒汁配上手撕豬肉條，香口惹味，而且份量好多一定夠飽，配有兩款配菜可以自選，可以選擇薯格、沙律、薯蓉、薯仔沙律、忌廉粟米粒、煙肉炒豆角等，好多款選擇㗎！南方炸魚柳拼煎蛋魚柳肉質鮮嫩唔會腥，大大件咁樣，仲有兩隻太陽蛋添，係好特別嘅一款早午餐🥣香炸雞中翼呢度嘅雞翼都係必食菜式之一，有好多隻味道可以揀，例如蒜香芝士、水牛城辣醬、檸檬黑椒等等，今次我就試咗蜂蜜燒汁，甜甜地，醬汁都好多沾滿成隻雞翼，夠晒惹味！…查看更多

網上見到呢間火鍋店既湯底非常有特色，主打手工湯底，例如頂級花膠雞煲翅鍋、北海道3.6白色戀人鍋之類，感覺幾特別，與別不同餐廳裝修別致有時尚感，寬敞有空間感，真係幾舒適揀左一陣終於決定試一試個火焰沙白蟹鍋($328)，見下火焰鍋到底有幾火爆店員會親自處理呢個蟹鍋，因此會有點火環節，炒一炒蟹同蜆之後加少少酒再點火，之後再加湯煲一煲，蜆同蟹既解香味立即撲鼻而來，再加上芫茜同埋芹菜，香味更多豐富，更有層次湯既味道好鮮，味道較濃比較咸，海鮮既甜味非常特出蜆肉同蟹肉同埋鮮美味，蟹肉唔算多但都白白嫩嫩，蜆肉都幾飽滿另外我地都叫左其他食材，包括:招牌牛肉拼盤($388)手打鹹蛋黃蝦丸($52)手打墨魚滑($98)自家製黑松露蟹肉餃($68)皇帝菜($68)炸枝竹($38)荔枝梳打招牌牛肉拼盤包括有手切牛、安格斯牛肉、牛舌、牛胸爽、牛心椗同埋牛柳粒。手切牛味道雖然唔及牛胸爽濃郁，但個人覺得牛胸爽過份油膩，手切牛油份適中。其他牛部分正正常，無太大驚喜。反而自家製黑松露蟹肉餃要推薦，食落同其他餃子唔同，手工餃個外皮確實係煙韌有口感，內餡都好特別，有菇粒同蟹肉，好有咬口。手打墨魚滑好滑嫩，都幾彈牙，而且有一粒粒既墨魚係入面，口感豐富。手打鹹蛋黃蝦丸反而無其他咁有驚喜，可能比較細粒，但入面既鹹蛋黃味道都好濃幾強烈，鐘意食鹹蛋黃既人一試無防。…查看更多

同朋友慶祝生日，食buffet又覺得太貴，所以就諗住食日式放題。日式放題越開越多，不過個人都係最鍾意大喜屋，質素最穩定！Book咗平日嘅夜晚7:00食，生意都好火爆，好受歡迎👏🏼食物選擇都好多，上菜速度好快，而且冇漏單，職員服務好殷勤勁收碟勁快手～真係可以食足兩粒鐘，收費好合理，平日都只係$258一位。食物款式好多，必食嘅就當然係刺身，我就鍾意三文魚、油甘魚、赤蝦、帆立貝，全部都新鮮肥美～仲有好多款好特別嘅壽司，例如蒜香青蔥燒牛肉壽司同埋海膽手卷，我都覺得佢係必食㗎！仲有熱食比生野更優秀，例如爆炒鱔片，勁有鑊氣～燒鰻魚細細件，又肥又汁多！廣島蠔，醬汁香濃～蒜蓉芝士焗大蝦🍤大大隻，厚厚一層芝士勁邪惡！飲品款式都超多，無糖藍泡茶係我嘅首選，就算熱飲都仲有好多款添啊～自助區仲有甜品、沙律吧、同埋無限量嘅雪條～真係超豐富呀。整體來講性價比真係好高！…查看更多

放寬堂食限制，想同朋友仔去食海鮮，西貢又嫌佢貴，諗諗吓就睇OpenRice來到三聖邨評價好高嘅棠記海鮮小廚，可以喺外面海鮮街市買好海鮮（價錢都好合理），然後拎入去餐廳加工，加工費$75一斤，價錢相當公道。除此之外，仲有提供各款小菜可供選擇。菠蘿咕嚕肉 ＄138必食之選，咕嚕肉冇骨，肥瘦適中，咬落爽口，皮又夠脆。使用新鮮菠蘿，酸酸甜甜真不錯👍🏼炸鮑魚呢種烹調方式真係第一次試，鮑魚爽口彈牙，面頭脆皮，夠晒惹味。招牌鹹鵝$158鹹鮮之餘帶點鵝香，果然係招牌菜！鵝肉非常入味～…查看更多

店面細細地，座位唔算好多，坐喺吧枱位，有少少好似喺日本築地市場食壽司嘅感覺～食物選擇上有散叫嘅壽司、丼飯、各款壽司拼盤等。我就揀咗期間限定嘅特選二人餐$680，包含咗蕃茄沙律、麵豉湯、三款刺身、12件壽司及迷你蔥吞拿魚腩丼+迷你饅魚飯。麵豉湯帶有海鮮嘅香味～鹹香十足！蕃茄沙律酸酸甜甜，好開胃。三款刺身都好新鮮肥美，其中鮑魚醃得好入味，有少少酒香。12件共六款嘅壽司，其中最鍾意拖羅同埋海膽，海膽入口即溶冇腥味夠晒新鮮，拖羅油香十足～已經食到七成飽，最後仲來兩碗丼飯，鰻魚無骨唔會腥，又夠多汁。迷你蔥吞拿魚腩丼入面嘅吞拿魚蓉份量超多，鮮甜肥美，加埋醬油撈飯食一流呀！…查看更多

中上環區特別多各國美食，呢間位於上環皇后大道中嘅il Bel Paese 主打各款意大利菜，店內兼營grocery 同時亦有售賣意大利紅酒🍷 芝士🧀火腿🍖同埋各款意大利嘅食材～即係你食完嘢買返屋企煮都仲可以😌店內所有店員都係外籍人士，服務態度好好。餐廳亦都氣氛休閒。有午餐Menu提供，價錢都係百幾蚊非常合理～餐前麵包好香脆又夠熱，配搭油醋汁，忍唔住全部食晒！caprese $138前菜選擇左呢個水牛芝士配意大利蕃茄，份量都好多，仲有橄欖油同埋basil，芝士好厚切有啲煙靭，口感同味道都唔錯。Rigatoni Nduja$168香濃茄汁配上粗管意粉，入面仲有一隻好特別嘅香腸，肉質口感緊實，有啲似肉丸咁，味道好香濃。Branzino alla Mediterranea鱸魚肉質鮮嫩，配上大量蕃茄白酒味醬汁，充滿意式風味！Tiramisü呢度嘅甜品真係好出色，呢度嘅tiramisu簡直係全香港最好食，咖啡味好出，口感一流。Mix berries smoothies混合多種莓果及乳酪新鮮打成，口感清爽，唔會太甜。…查看更多

難得晚市堂食開返，當然要出街食晚餐開心下，銅鑼灣美食多，今日就黎到大澳德發食。打開 Menu 選擇好多，本 Menu 都設計得好有心思，一坐低叫杯龍鳳檸樂飲，爽啊！菠蘿拔絲咕嚕肉，有驚喜，真係好掛汁可以拉到絲，個皮亦都炸得好脆：好味！椒鹽焗鮑魚，一碟四隻，肉質嫩滑，口感好好，值得 encore，果然係餐廳必食推介之一！金磚脆豆腐拼墨魚餅，豆腐一口 size，非常之滑，一口接一口，好快就食曬，至於墨魚餅就好大塊好厚身！鮑魚太好食，所以最後再食鮑魚，今次試另一款，酒香凍鮑魚，同樣都好好味，好入味，正！…查看更多

之前經過呢間Dozy Cafe嘅門口，已經俾佢裝修設計所吸引，不過下晝比較多人，所以就專誠假日早上到訪～樓底好高，空間感十足～水泥牆+復古裝飾同埋枱櫈，感覺都幾舒服😌Mocha朱古力味配合咖啡濃香，層次分明，好飲！Matcha Latte拉花係雪人，好有聖誕氣氛🎄抹茶味好香濃，天氣凍啱晒呀～薯片脆雞三文治配是拉差辣醬脆雞唔會肥膩，配搭拉差辣醬香辣惹味～三文治個包都好香脆。咸蛋黃醬慢煮豬頸肉配自家醃椰菜bagel蛋黃醬味鹹香十足，配合爽口嘅豬頸肉同埋自家制椰菜，口感豐富！尤其喜歡早上冇乜人嘅悠閒感覺，嚟呢度嘆杯咖啡醒醒神，真係一個好好嘅選擇，值得再次回訪～…查看更多