KuraKura0928的个人专页

衛生情況欠佳。身為日本餐廳，一拉開櫈，成張紅色絨櫈充滿麵包碎，檯面都係。咖啡杯癡笠笠，明明我杯嘢冇糖架⋯⋯今日叫左下午茶Pizza包，日本果個好食，一開始Komeda係香港開時都好好食，點知質素係保持唔到。伴碟沙律好大份，沙律汁開胃好食。個份量冇少到。包極厚極大方，但厚得滯，唔脆，芝士比之前少咗好多，成個Pizza包咬落去太厚實呆板，個質素有啲似屋邨麵包屋。咖啡反而保持到水溝奶嘅水準。本來仲想叫冰與火，日本好好食，但諗起上次嚟果時已香港冰火都唔太好食，都係作罷。食完個Pizza，好慶幸自己冇一錯再錯。Overall有啲失望，短期都唔會再嚟。…查看更多

每次行過都覺得香，1/1就試下。鋪頭唔比比左錢後試味，無所謂，爆谷無話難食得去邊，我一口氣買左2包鹹爆谷——咸蛋黃 & 川辣。時值7PM，鋪頭冇人，但唔知點解都要等5分鐘，有個職員入左後檯間房唔知做咩，好在我唔趕時間。買完即開嚟食，一秒後悔點解唔買住一包先。味道兩隻都係死鹹，分別在一隻有辣味，完全冇咸蛋果種油膩帶沙嘅口感。川辣真係鹹到送飯都嫌鹹，鹹到打冷震; 口感淋到好似咬緊發泡膠粒，我明明即買即食，爆就冇，谷氣就有。結論：完全明點解唔比試食，試過我肯定唔會買。…查看更多

見餐牌好吸引，晏晝過左食飯時間都勁多人，諗住有食神，點知敗興而歸。裝修好80年代大排檔，播嘅都係果段時間嘅歌，然而廚房係一班唔似煮得出地道嘢嘅同胞。食落完全係四不象，肉骨茶同咖央都係去返蘇媽或蘇山絕對好食好多，或者自己煮可能仲好食；個腸粉同個炒蛋最好食係啲蔥同自己加嘅鼓油；小籠包個皮仲厚過胎盤⋯我都係去永旺買韓國急凍小籠包仲皮簿餡靚。食完之後都幾嬲，貴就唔貴嘅，但難得嘅卡路里Quota就咁嘥咗。但我覺得班佳麗不如考慮做返米線可能會好食好多。…查看更多

辣子雞$25雖然平，但冇諗過係一小碟罐頭五香肉丁碎末嘅嘢。味道極鹹、極苦，唔係鹹到苦，係真苦，花椒味好重，麻卻唔覺有幾麻。雞肉又乾又柴，硬到砸死一窩老鼠。但就算撥開啲花椒泡椒，忍受一堆芡同勁柴嘅肉後，仍要忍受碎骨，證明係真肉。肉碎咁嘅大小都仲有骨，可謂麻雀雖小。成碟嘢化學感重。蝦滑酸菜米線蝦滑好足，有7-8粒，但冇味。湯底少麻唔夠酸，冇酸味，有花椒苦味。米線偏幼，麵質不錯，但不能揀麵軟硬度。蕃茄簿過我條命，冇質感冇蕃茄味，完全唔明佢存在嘅意義。芫茜蔥自己出去夾。最奇怪係湯匙都要自己出去果個似放匙羹亂葬崗嘅櫃度攞，而唔係每檯都有？店員攞麵嚟插多支匙羹難度好難？椰香拿鐵（個名好似係）冇得揀有冇糖，因為本身冇糖。似炭燒啡，冇椰香。但唔太好飲。店有中國市井風音樂，好有一種羅湖城嘅感覺。…查看更多

如題。全鋪頭應該冇嘢夠呢份餐點睇落去咁健康。酸種麵包、藜麥、芝士、提子燕麥乳酪，仲有令心理好健康嘅煙燻牛肉同炒蛋。香港Cafe好多嘢唔係太過Pure太True太輕盈到你唔明點解要比錢出去食，就係太多精製食物，睇到條腸已想像到佢幻化成水泡個樣。但呢種配搭真係啱我呢啲想食得打飛機式健康嘅人。雖然，我想舊芝士大舊啲，果醬多啲，但食完係完全夠飽。重點係份嘢擺盤咁靚，實在冇理由將佢炒返一碟變返做蛋牛治。分開每樣食兩啖，呷啖咖啡，再食一啖，非常有利飽足感。於是你明白，Cafe最精貴嘅地方係，哪怕份嘢少過常餐好多，但你可以用比係澳牛食多五倍嘅時間去食。是日閒日，我一點去，唔洗排隊直接坐底，食得好疏肝。…查看更多

行過旮旯頭，冇諗過有間漢堡包+串燒鋪。比起虹橋其他地方，呢度可以講係別有洞天。烤肉味係微風中散開，有貓行過，同好友曬住太陽大啖漢堡大啖肉，身旁兩三行人信步而過，比任何一間cafe仲要chill，真係有種渡假嘅錯覺。第一次點嘅係菇漢堡、炸薯餅、熱朱古力、燒豬肩肉。炸嘢幾時都好食。肉嘅調味同口感正常。但最出色係個朱古力。我懷疑受到價錢沖擊而覺得好食，所以二訪。其實其間我都試過唔同餐廳嘅朱古力，貴嘅同更貴嘅，但呢間，飲完第二次，我可以確定，係我的最愛。一份食物味道可以好豐富，但唔代表每樣元素都互相配合。哪怕係朱古力呢啲看似簡單嘅飲料。但呢杯嘢，可可嘅香味、油脂帶嚟嘅醇厚嘅口感、豆嘅酸苦甜度，每樣嘢都配合得洽到好處。我飲過熱同凍，凍飲係冰融咗後口感冇被太影響，你就知杯嘢幾肥仔。唯一要挑剔嘅係，凍飲粉粒感比熱飲明顯。薄荷朱古力一樣好飲，比原味清爽（心理上），味道同綠色薄荷朱古力如出一轍。小店之後會有多啲居酒屋串燒小食，仲有啤酒，希望可以同好友再訪～…查看更多

首先服務好好，老板娘好熱心，笑容好溫暖。然後馬拉糕就算放到第二日食一樣好食，個人覺得係必食。魚餅又香又脆，不能錯過。蝦春卷都係。南瓜粥又甜又綿，調味剛好。糯米雞又大又好食，但第二次食係濕左啲啲。有次食有冰糖桃膠，好食，可惜而家冇。而家係芒果糯米糕，我本來都唔喜歡食。我呢啲冇湯水既人會飲燉湯，唔係話好夠味，但起碼冇味精味。金錢肚同牛栢葉好夠味，係油左啲啲。蒸飯正常味，不過勝在平。腸粉都幾夠滑，唔錯。選擇唔多，但人手黎講，完全明白。…查看更多

比左好多次機會，每次食完一輪，比多次機會，都係失望。葡汁雞皇飯好食，雞多有味，汁很香，送飯一流，但除此之外所有野都無一例外地難食。生炸雞脾帶子飯-個脾唔熟，入面仲係紅色。碎牛治-難食，太油。雲吞撈-簡水味重到澀口，食左半碗已經吞唔落。常餐-好啦，揀個出事率最低既，可以連公仔麵都難食⋯⋯滾水浸福麵都軟過佢，湯好似滾水咁，明明有味精包啊。啲麵硬到對面個女人直程要求送返入廚房再煮。凍檸茶澀，但明明外賣係好飲架。冇野好講。…查看更多

一直經過此店都想試，今日終於一嘗夙願，叫左個外面少有既芫茜雞米線。店面地方窄，唔合適大份人士同有小朋友既家庭，但係旺角食野係咁上下。上菜速度快。米線一黎我呢個湯怪急不及待試下個湯。店家標籤湯底無味精，啲膳稿雜誌話可以成碗飲（其實一丁湯底夠大把人成碗隊啦），Well，我只可以講就算無味精都一定有增鮮劑啊雞粉you name it。因為個湯絕對唔係搵雞煲出黎既味。明既，用真雞湯成本咁乸脷工夫又多，就算一個位一個鐘返到4桌都冇用啦。之不過明買明賣，有味精有咩所謂，譚仔南記都可以咁好生意。但你唔係，唔可以話自己係。撇除呢點，湯底晚顏色同隱若既芫茜味很點題。雞件有5、6件，驟眼睇好多，塊頭亦不少，但暗藏殺機。姑勿論有4件都冇乜肉全骨，可能我時運差。有肉果兩件一咬落去，碎骨黎既？可能咁樣好咬口啲？亦提醒大家係旺角鬧市內亦不忘慢食文化，足見店家用心良苦。雞乃是主角，但味道不夠。加$6既菜心份量算ok。配料方面，有生菜3條、冬菰4舊、豆卜3舊、蔥一羹、芫茜若干。冬菰香。麵底份量不算太多。男士陪女友黎食恐怕要靠小食打底。米線索價$58，菜心加$6，加埋一$70落樓。實在唔明連杯水都冇點解要加一。性價比欠奉。總括黎講味道唔差，但味道平庸。但要咁迫又咁既質素，我寧願行多兩間鋪食吉吉家。如果只想食米線，其實太子旺角都有幾家非連鎖小店，$70呢個價錢已足夠食一碗大到獲利回吐既米線+3隻手羽。…查看更多

香港用花為主題既Cafe唔多，恰巧兩樣野都係藝文青至愛，路過貴境，望住花，聞住咖啡香，食件cake，呢種享受仲勁過海陸空三彈齊發(?)。——可惜呢種享受比啲細節位減左分。因為愛花而貢入黎既人，如果唔係純粹為餵飽相機，多少都係一個picky既pussy，很不巧果個就係在下。用花做為主題多少令人有種期望餐廳係想同自然有connection，正面果種。但店內用紙碟紙杯膠叉就減左啲分。高巴檯有得叉電和腳踏位更好。雖然係花為主題，但到cafe部分的綠化和一般cafe差不多，始終人地啲花真係做生意用既。是次叫左latte同檸檬蛋糕。我作為飲開奶啡既偽文中唔識講咩，咖啡偏苦而苦得易入口，只能講同我既味蕾八字夾，對味也夠香。檸檬蛋糕的cream很綿滑不會過於空氣感，檸檬味足但不夠香，味道層次比較單一，如果可以係蛋糕面加檸檬皮碎同少少蜂蜜會更好。咖啡種類比較少，希望有諸如piccolo 同 dirty。講多句，難得有香港店內播的Mondialito同Stacey Kent，很驚喜。如果店內安靜點更好，但這是沒辦法的，花墟既人流同開放式既廚房。始終好評，因為難得。…查看更多

$27雙拼三文治+熱飲。早餐時間，為左一杯好飲既鴛鴦，我特地去呢度叫早餐，叫左芝腿治+熱飲27蚊。一般呢個價錢，就算塊芝士唔熱融，塊火腿都起碼煎過。但呢度可能崇尚無火煮食啦，塊火腿融左雪切完就放落包，芝士除左膠袋切完就放落包，個白麵包仲要有放左一晚既硬硬地既感覺，成個包凍冰冰，完全唔似餐廳會做既質素。還不如前面街口間即叫即整煎火腿融芝士先廿蚊雞連野飲，或者觀塘求其一間走鬼早餐檔。其實日日返工，有個熱辣辣既入得口既早餐就算，差到咁都好難得。等得耐都算，但呢個質素好呃錢，以後唔再幫襯。…查看更多

韓國菜、甜品、火鍋、拉麵、懷舊冰室⋯⋯係香港你諗到既諗唔到既花巧既華麗既都有得你食。但花巧過後，平淡中果一抹鮮味，才是最令人百嚐不厭。我已經光顧過豐衣粥食好多次，最初去旺角熟食中心係唔想再等位，豈料就咁就發現左塊珍寶，一間我願意日日去食既餐廳。佢主打有無數咁多湯飯，我試過既唔多，因為紫菜蠔仔肉碎粥太好食，唔想再試其他野。定價$45既份量等同出面打冷鋪所謂一煲，但其美冠絕果啲被吹棒到天上有地下冇既打冷鋪。湯頭鮮、溫度熱、紫菜香、菜心脆，所有野加埋混和出令人食髓知味既家常味道。當然食咁多次，總有失手既時候，果次蠔唔鮮，但後來再食都保持水準。如果呢檔野個阿叔唔做，我呢世都唔會再想食蠔仔肉碎粥。最近有試過咸雞飯配生菜魚肉湯。雞味濃，飯味香，再配上雞油，比出面所謂海南雞飯好食10倍。配飯既生菜魚肉湯係用黎煮粥既鮮湯。絕不口渴。一個大男人食都夠飽，只係$38。以佢既美味，絕對有資格收double價錢。…查看更多

匆匆在旺角過境，巧遇待望已久的新店，但為了快點逃離人永遠多得像動物大遷徙的旺角，惟有外賣後敗走。餐點選擇多到令選擇障礙症患者窒息，但一個少女感100% up的夢幻芭菲要索價$80。對一個綠茶控窮L黎講，唔駛諗，直搗黃龍叫個綠茶雪糕是唯一選擇。——————————菜式：1836年京都森半宇治抹茶雪糕是漂亮的綠色，先不管放了多少色素，其綠的程度令抹茶正宗感+100%。雪糕帶有清香綠茶味，但稱不上沉穩。融化後於齒頰留有餘香，雖不算綿長。味道有些微茶苦味，甜度很能迎合大眾，但對不嚐甜及綠茶控來說，甜度能稍減，茶味加強一點會更好。雪糕沒有雜誌說的「甘味」，不過縱是即泡熱茶也不見得必有甘味。抹茶凍點香味夠強已不錯。唯一不喜歡是，雪糕口感頗粘膩，不夠順滑。杯底有脆脆玄米，但要食到底先有，其時雪糕都被手溫融化得七七八八，變成綠茶奶昔撈脆脆，可有可無。以一球雪糕的價錢來說可以一試。綠茶控食完表示有種到喉唔到肺的欲求不滿感。——————————店內（open area)裝潢和食具都帶著日式的素潔優雅，連外賣食具都是仿銀器的塑膠，整個氛圍是港女的自拍勝地，港男的約會恩物～…查看更多