gplus02的個人專頁

服務態度好差。今日去呢度食晏，衛生情況一般，間唔中有啲蚊滋飛上枱面。嗌咗個人蔘雞湯飯，水準普通，冇人蔘味。但係因為佢係$68冇收+1 ，我會收貨。到我走出去櫃檯埋單嗰陣，有一個中年男人、戴粗黑框眼鏡收錢，當時佢話$68，然後我拎張$100紙講「$100」，跟住佢串串貢咁同我講「我知道，我睇到」。當下我係呆咗言，唔知點俾反應。我講返俾幾多錢佢，為免一陣間找多找少咗錢，大家有咩誤會就唔好。難道我唔可以講我俾幾多錢佢找嘅咩？如果佢用啲咁嘅態度服務顧客，咁佢唔好出嚟做啦，做服務業做到咁唔想做。用餐體驗，唔單只係食嘅嘢，仲有環境，同埋服務。平心而論，呢間嘢食物對得住價錢，因為佢收費唔高，相對嚟講，佢食物水準亦都唔係高，但係竟然無緣無故咁樣用言語不禮貌對待食客，我唔會再幫襯。而家成日話香港人北上消費，國內嘅服務好好，咁我諗呢間小店應該好好反省，自己係咪有咩做得不足嘅地方，因為，咁嘅服務態度，係佢自己趕客人出門口㗎咋，就算日後執笠都唔抵可憐，我又何必貼錢買難受呢？如果唔係呢次咁冇禮貌嘅事件，用餐體驗我都會叫OK，但係而家我係會話唔OK囉。…查看更多

尋日第一次去明寶石餐廳食下午茶餐，嗌咗個薄牛扒湯米線，唔駛加錢包埋杯熱檸水 ($68 + 10% = $75)。以 $75 一個下午茶餐，我o既觀察係：1. 薄牛扒：有部份肉係正常口感，但有部份係淋到似梅o既口感，攪到我唔敢吞落肚（比用疏打粉乸過o既仲淋）。2. 米線：比預期中少，如果要具體比喻係大家樂湯粉下午茶餐3/4分量。3. 收得 +10%，但係水都無勘杯嚟。去過某啲連鎖店下午茶，係 waive 加一的。應該用免+1作為招徠，如果佢好想吸引人消費。佢只明寶石餐廳唔係名餐廳，如果以呢個水準交到上述水準，我只覺得值 $50。如果收 $75 先為到皮，就要做到相應質素。早知唔好嫌遠唔好怕餓，行遠少少去波士頓餐廳食。…查看更多

有一段時間冇去呢間小店，今日去呢度食晏，發現Menu改晒（午市同晚市都適用），選擇多咗之餘，仲可以俾食客選擇要唔要套餐、或者需唔需要加配小食：靈活性增加咗，希望可以吸引到唔同要求嘅客人。睇得出小店用心變陣，喺而家呢個經濟環境下努力求存。選擇困難症下，最後揀咗燒魚配白飯，另外再升級做套餐。雖然價錢平咗，但估唔到依然可以保持水準，而且食物上到枱面熱辣辣好好味，而且店員仲好親切有線，會主動同我講有得免費加白飯。希望佢可以繼續生存，咁我又可以有口福啦。😊…查看更多

一向鍾情有質素小店，而做和牛🐮嘅小店又唔多，和牛88係心水。放工唔知食乜就諗起佢。坐低咗見到有一人dinner set，價錢就豐儉由人，$128-$238，有沙律小食main 同飲品，都有幾多嘢。於是我嗌咗日本產和牛湯烏冬套餐。沙律食材新鮮，人流少，可見店家無因此降低食材要求。小食就點咗燒鱈魚片，香、脆、熱的，睇得出啱啱整起即上。同行嘅叫左牛肉薯餅，炸得鬆，食到有牛肉，熱到出煙，好味。至於和牛湯烏冬🍜有驚喜，湯底清淡，而且好飲，烏冬滑身而且有咬口，至於和牛我都冇咩可以彈，重牛味亦嫩。連伴菜：日本南瓜、西蘭花、蘿蔔都係有煮熟過先放入去碗，睇得出用心。飲品加10蚊點咗個柚子梳打，好爽質素對得住價錢，但我眼見十個客都無，可能市道太差啦😞，唯有希望佢越做越好。原來仲有二人dinner set 喎，係sukiyaki 😍有機會可以試埋。…查看更多

今日放工諗唔到食乜，經過銅鑼灣就去咗老字號嘅新巴黎越南餐廳，夜晚七點幾加埋10個人都冇，坐低就嗌咗一個火車頭越南湯檬，有牛柏葉牛丸，同埋牛肉。因為好少客，唔使3分鐘就有得食，熱辣辣湯底夠味冇味精，牛肉都算多，而且質素幾好，至於牛柏葉同埋牛丸就正常發揮，蘿蔔都入味。包埋洛神花茶，甜甜地幾好飲。坐咗半個鐘，客人一半都唔滿。埋單先至$70，而呢個質素絕對交到功課，值得有更多人幫襯。另外想講埋環境乾淨，坐得舒服，而且店員服務有禮貌。…查看更多

和牛 88 之前o係銅鑼灣搬過o黎太古地鐵站附近，知道佢仲係試業中就趁晏晝去試一試。雖然 openrice 話o係鰂魚涌，但其實近太古出口。兩點鐘倒人流唔多，枱同枱之間都唔會近，坐落感覺幾舒服。天氣好熱，就嗌咗個以前食過o既招牌燒和牛冷烏冬。上菜，除o左個 main 外，仲有漬物，味噌湯，仲有沙律。一睇個set 已感到用心，沙律菜好新鮮，而且和牛好靚亦都食得出燒味，冷烏冬都有咬口彈牙，presentation 都靚，估唔到味噌湯幾好飲，唔係死鹹。明明係有質素o既小店，希望附近o既街坊可以多啲支持啦。…查看更多

食晏時間見呢間餐廳評價都幾好，就入去一試。一入去好彩仲有位，當時已經九成滿座。先講服務，由落單到有得食，相隔五個字，當我見到隔離枱遲過我入座但又好快有得食，係唔明點解我要等咁耐，酒樓小炒都一早炒好吧，我仲要之後有野要做，到上咗菜我只能夠用少於三個字的時間極速放入口。我諗餐廳需要留意一下 time management。講完服務講食物，點咗個「檸檬香草虎蝦。大地魚蝦籽醬意粉」，意粉質地唔錯，算 al dente，個醬就無咩味，我要自己加 nabisco，兩隻虎蝦幾大但應該係雪藏，無咩蝦味。不過有挑蝦腸，呢個抵讚。環境方面，由於 open kitchen 而且店面唔大，所以都幾大陣油煙味，如果介意的朋友就要注意埋啦。今次我 overall comment 係一個喊樣，食物以呢個價錢來講可以接受，但一個綜合評價就包含埋服務同環境了。…查看更多

今晚六點幾經過呢間小店，位置幽靜自成一閣，裡面只有一個客人同一個店員。坐低就嗌o左素牛排豆乳味噌湯烏冬。等o左一陣，熱辣辣o既湯烏冬到啦，先飲一啖豆乳湯，有味噌同豆乳味，balance 得幾好，適合喜愛味噌o既朋友。烏冬質地有水準，又滑又彈牙。自己就好少食素肉，因為覺得好假，點知原來都唔錯，幾有新鮮感。食完之後仲見到有 drip coffee 賣，如果有 coffee lover 都可以買啲返去試吓。巿道睇o黎好差，一間環境同食物都有水準o既小店，當我離開店舖時，裡面只有店員一個人，真係可惜。趁仲有機會支持小店，就好好珍惜，因為小店唔一定可以生存得到。…查看更多

屋企人食過推介我試，又咁啱撞著 Easter，個個都飛出去，反正留港消費就支持一下小店（有時都想支持小店，現實係唔係咁多小店食物有水準/好食）。1230 hrs 東大街，好幾間舖頭都已經排緊隊，Cafe Cabin 都要，我就排第十個，等咗半個鐘倒入座。嗌左兩樣o野：(1) 洛神花檸檬茶：好大壺，水滾係基本，難得唔係用茶包，係用茶葉泡成，洛神花同檸檬味都係出o既，balance 到。(2) 白酒大蜆扁意粉：驚喜。落單時店員問我蜆肉要唔要全熟，我話唔要，證明係正確o架。首先蜆肉每隻都好飽滿而且味道好鮮，仲要係無沙呀。扁意粉煮得 al dente，好o岩我口味。調味適中唔會鹹，仲真係食到酒味。但因為限量，如果想食就唔好 tea time 去以免白行一趟。服務：有禮細心。最後埋單，原來唔駛加一，呢餐好抵食，而且可以回頭 + recommend 俾朋友。好多人推介 waffle，下次都想食吓。…查看更多

臨近母親節又要諗食乜，建議不如食柴門（之前都係食午市），見到套餐都o岩食就電話訂座，仲有九折，問o左原來成晚剩係做一輪生意，可以慢慢嘆~唔打咁多字啦，直接睇圖啦。麵包如圖共有三款，都係又熱又軟熟 ，有麵包香。成塊多士面都舖左唔少蝦，蝦好新鮮而且爽口，成塊多士熱辣辣。菜好鮮，有生果配埋燒三文魚好清新。套餐係要 +$28 轉燉湯。呢個湯係全個套餐其中一個 highlight，首先溫度係持續地好熱，enhanced 成個進食過程o既體驗。雖然話花膠係送，但係好多而且好厚。湯好入味而且好清。成盅燉湯好多餸，全部都好入味（例如海蔘）。乾o左呢盅湯已經飽o左一半了。出色o既 main，先唔好講一隻 6 頭蝦驟眼睇係幾震撼（好大隻），食材好新鮮而且廚師處理得好好，食落係爽口彈牙，無得彈，而且火喉拿捏得好好，微焦好香口。帶子都好大粒而且好鮮，同蝦一樣，煎得好香。最後講埋闊條麵，個汁係濃蝦汁，texture 處理得好，唔會好杰或好稀，掛倒上闊條麵，闊條麵咬落有勁。食到 main 已經飽，但…隻碟我係清晒。其中一樣鍾意呢間餐廳地方，但佢會盡量用生果入饌，雲呢拿雪糕球配合唔少幾大粒吓o既蘋果肉，清甜之餘亦解膩。朱古力唔駛多講，有可可味但唔係死甜，o岩我口味。…查看更多

生日就梗係搵個理由食好西啦！不過而家疫情爆得好犀利，去旺區食o野又唔係好安全咁，始終人流太多啦。又想食得滿意又想放心，自不然諗到柴門。上幾次o黎到都遇唔倒牛柳，好回味，今次即管試吓有無得預留牛柳，店家好友善，願意安排餐牌以外菜式，提一提大家，法式油封鴨腿都有得預留。湯係蘑菇湯，仲有麵包同埋有橙汁o既春卷沙律。麵包好軟熟又實在，配上濃濃蘑菇味又夠熱o既蘑菇湯好出色。每次o黎呢度食沙律，除o左用料新鮮外，個 dressing 都係用生果造成，效果就係食落好清新唔會油膩（年紀大愛養身，放落肚要好味亦要對身體好）。主菜係阿根廷牛柳，有一段日子無食佢o既牛柳，無令我失望。油脂低但肉味重，而且亦都腍身唔會鞋，再加上個面有少少焦同脆身，加埋好好味，唔駛點汁都足夠啦。Happy Bday to me~ 甜品我揀左辣椒朱古力餅，香濃朱古力配上一點辣，食多件都仲得。另外，屋企人今次嗌o左法式煎焗鮮鴨胸 跟 煎鴨肝，估唔到法國鴨胸可以咁多肉，而且好重肉味，唔知我以為食緊鵝呀。員工有禮充滿笑容，除左環境舒服傾倒偈，食物好味（要持續保持質素唔係易事），員工服務亦佳，都好難唔做回頭客。…查看更多

喺上環返工，早2個字電話落單，行到食店俾咗錢之後，收錢嗰個阿叔叫我出去門口等一陣，等咗幾個字覺得唔對路，就返入去問我碗米線得未，然後店員好快咁拎袋外賣，仲話已經擺咗喺入面好耐，阿叔喺店員背後閃出仲講句sorli。嗰吓我即刻著咗，我唔知碗米線喺我俾錢嗰陣ready 未，但好肯定淨係識得收我錢，然後柚我喺門口罰企。食晏得一個鐘先要電話落單慳返d時間，拎到返公司快呑完又到lunch break 尾聲，你叫我日後仲好唔好幫襯你？如果阿叔做唔嚟樓面，不如調佢去唔駛對外嘅崗位，亂晒籠，受苦的只係食客。…查看更多

有事去一轉柴灣，又遇著食晏時候，想喺柴灣食得舒服又有質素保證，我剩係諗到柴門。點咗煎焗西班牙黑毛豬肩肉配紅酒汁 set lunch。之前食咗前菜先（值得一提係餐前麵包都係餐廳自己烘焙），熱辣辣o既食物都係美好的，無論麵包（烘到脆）定係西湯都熱得恰到好處。其實我想食柴門唧法式油封鴨腿，可惜太受歡迎一直緣慳一面，唯有再次先啦。主菜到，隻碟係暖笠笠，原本以為豬肩肉咪又係一塊豬肉，我實在太愛個皮，佢整到好香好脆，好似炭火燒過咁。我一向鍾意食柴肉，唔鍾意食肥，塊豬肩肉有少少肥，但好味，食落爽口，而且夠厚好咬口。可惜因為趕住走，無機會嗌埋點品，下次補番。…查看更多

以為柴灣係美食沙漠，點知網上見到佢，又知道星期日休息，就趁星期六晏晝去試吓。嗌咗牛柳午餐，叫左七成熟。先上前菜，有三樣嘢：蘑菇湯（湯魷魚蘑菇味都好濃），一片麵包（酸酸o地好醒胃），仲有柴門特色沙律（有生果同埋蔬菜嘅沙律，味道好夾食材亦新鮮），已經喜出望外。主菜牛柳雖然七成熟，但係煎得好嫩，牛味都好出。同行者點左香煎珍寶大虎蝦拼帶子，蝦味香到呢⋯⋯帶子又滑又鮮甜。食完已經大滿足，又口痕點咗個辣椒朱古力餅，食完d辣有後勁由喉嚨湧返上嚟，幾特別。另外，店員親切有禮，環境舒服亦都適合傾偈。令人充滿驚喜的餐廳。💛…查看更多

市區竟然有咁平o既午市自助餐，用信用卡優惠大概一位 HK$150。款式唔算好多，但以呢個價錢已經叫做做得超出期望，又可以舒舒服服坐幾個鐘吹水，又可以食吓自助餐，呢度係不錯選擇呢。職員收碟都叫做無偷懶。食物未必驚為天人，但至少企理。壽司比較可怕，用個鉗夾即使幾輕力，都係一碰就散，攪到只能夾倒半舊飯加埋上面片魚生。生果幾好，種類算多而且幾新鮮。印度薄餅好味。沙筆都唔錯。咖啡奶茶我無飲，不過聽講係快餐店水準。…查看更多