今次係我同女朋友第四次黎Catio，由間野啱啱開果陣已經有幫襯。 我好深刻當時好鍾意呢度，個個員工、老細對客態度都好，環境又舒服，貓又靚又好玩。貓cafe對食物當然沒有太高要求，但飲杯咖啡都有拉花幾開心。嗰時仲有做買一送一優惠，坐成兩個鐘都係幾十蚊仲有貓玩邊度搵。嗰時其實都擔心店點樣維到皮。但今次呢同個感覺完全唔同，明明老闆娘都係嗰個人，由神情已經睇得出佢心情好差咁，好似我爭佢錢咁。因為人多想book定張枱，打電話打幾次冇人聽，IG message又唔覆，第二日打過去先有人聽。人多朋友遲到，前後腳到餐廳正常。天氣熱我同女朋友都想入咗去先，都嚟過咁多次自動自覺帶鞋套想入去。啱啱入嗰個玻璃門就畀老闆娘閘住嗌我退返出去，（真係嗌，我冇打錯字），原來係想問清楚我哋同朋友分開計時定係等埋一齊計時，但語氣真係可以好啲囉，我唔係約咗朋友嘅話我走咗喇。你可能想叫我等埋朋友先一齊入，可以係出面等。但我入去玻璃閘內企係度嘆冷氣唔玩貓等都得掛，使唔使咁緊張呀。出面又冇冷氣而家成三十幾度。同埋我夠知要掃安心出行啦，唔使講兩三次嘅，你反正都會用手機掃我個針卡㗎啦係咪？咁緊張做乜嘢？做乜係咁催催催？話說而家入場費60蚊個鐘， 只有第一個鐘包一杯嘢飲。我以前記得係冇入場費㗎， 咁香港地做生意你養貓要花咁多錢， 環境又叫舒服收入場費無可厚非。 咁你呢個規矩下，其實我第一個鐘未夠飲完杯嘢賣單走出去，一陣再入返嚟，其實你係咪要包多杯嘢飲俾我。🤣嗌嘢食係掃 q r code有部機提自己去拎，我記得以前係有得送埋上嚟㗎喎。不過呢樣都小事， 但係見到老闆娘整嘢食，整好曬擺咗喺度好耐部機先響咁囉。我淨係嗌杯嘢飲都等咗40分鐘。 消費唔起兩個鐘的客人記得十幾分鐘內飲完即刻走呀！我叫咗水果綠茶， 無水果味只有茶包極淡嘅茶味，明明嗌凍嘅變咗溫暖嘅。女朋友嗌咗杯玫瑰拿鐵不過不失啦但又話一個鐘包一杯嘢飲，原來玫瑰飲品又要加十蚊喎，但你落單系統嗰度冇講㗎喎！係你入門口個櫃檯度有一張a4紙有一句提到咋喎，仲要咁細隻字。好啦卒之坐得耐想走啦，臨走老闆娘呼喝一句：自己掉垃圾。真係燥咗，唔該、唔好意思，唔識講呀？或者你講嘢有尾音都好啲呀，我而家畀緊60蚊個鐘入嚟涼冷氣呀，有返少少待客之道好冇呀。你可能會話：我有寫喎你冇睇咋喎。哦又係喺牆邊嗰張a4紙。你估軍訓咩證要入嚟睇曬你啲a4紙上嘅規則先可以坐低？你估自己啲嘢好好食咩，朋友有嗌嘢食㗎，食完喺度鬧我揀呢間囉。唔食後悔（因為真係餓），食左更後悔！對比錢嘅客人都可以態度咁差嘅，你可想而知對啲貓係點啦。其實我認為收入場費呢件事真係唔好，寧願有每小時低消鼓勵啲客人喺你度食嘢，同時認真做好幾樣食物，唔使難唔使花巧做好幾樣就得。黎得貓cafe對食物飲品自然低少少㗎喇，但係真係至少要有個限度。小店？好自為之啦。…查看更多
見網上評價好好就來試下。首先呢間冰室座位好逼，環境好嘈。長沙灣姐，又唔係中環洗唔洗逼到咁。講返食物，星期日都有下午茶餐。所謂海苔薯條，海苔少之有少，薯條無調味同埋係凍嘅。漢堡就不過不失啦，叫擺得入口。炒飯無乜料亦無乜調味，想加啲鹽又變咗加幾粒米（鹽樽入面嗰啲米粒） 。🤣唯一可取係樽仔奶茶。有奶香茶香不太甜，好飲。服務方面，我地兩位一坐低就送錯咗個咖喱飯黎，果陣真係凳都未坐暖。有用腦都知未嗌野食啦，仲要我提😴。之後另一個阿姐，拎住幾百樣野食咁行咗兩條巷，大大聲週圍問有無人嗌咗凍檸茶。唔講真係以為去咗街市。短短一餐飯，俾伙記無禮貌咁打擾咗兩次：一次係我食食下飯，拎我枱旁邊份Menu俾第枱客；一次係拎我枱旁邊嘅叉俾第枱客。當中過程一句唔好意思都無。其實只要講多一句就無事，但偏偏呢間餐廳就係唔做。食咗大概二十分鐘，女朋友嘅熱檸蜜仲未黎，因為已經催過一次，到就食完都未黎。女友：杯熱檸蜜唔想要喇，等咗好耐，又催過一次。阿姐：咁熱檸水要唔要呀，一秒鐘拎俾你。女友：都係唔洗喇，麻煩取消咗佢。阿姐：熱檸水好快咋嘛，咁都唔要～咁耐無上杯飲品，想取消都要有說話聽真係🙄。差啲反枱爆粗。🤬之後另一同事唔出聲將新單擺係我枱面。又係唔好意思都無句，唔通我錯呀？
