DaphneWongggg的个人专页

今日嚟到灣仔既《戀》，地點有點兒隔涉，店舖裝修以居酒屋為主，但店內氣氛就冇乜居酒屋feel。野食方面叫左一口和牛、吉列炸蝦、雞白湯嫩雞烏冬。一口和牛（$128）生熟度適中，肉質嫩而不老，唯獨牛肉味道普通，缺乏和牛油脂香，底部放了大半個洋蔥，份量一般但尚算可接受。吉列炸蝦（$88）有五隻，皮薄肉厚，冇油益味，亦唔會食到成口油。雞白湯嫩雞烏冬（$128）用上普通稻庭烏冬，唔係手打個種；雞白湯味道一般，雞味唔濃，雞肉肉質亦比較鞋，價錢較貴。整體嚟講小食比主菜好，餐廳亦有做緊酒精飲品優惠，鐘意飲酒既人都可以留意下。…查看更多

佐敦市政大樓下面兩層係街市，最上個層係食肆，外面仲有個露天天台仔，可以比人食飯中途出去食個煙。入面有兩間大排檔，當日比較早入座，所以人客唔多，枱與枱之間位置都唔迫。野食方面叫左黃金魷魚、黑椒牛仔骨、豉油皇鵝腸、七味豆腐、咕嚕肉。見到好多人係到飲酒玩骰盅，睇嚟都係個街坊聚腳既地方🙂每碟餸既價錢唔平，但份量都多。味道方面黃金魷魚同七味豆腐最好食，魷魚鹹蛋黃味濃，豆腐椒鹹味適中，唔會太鹹，兩者炸皮厚度適中。唯獨肉類鬆肉粉落得太多，多到有啲苦同乸喉嚨，希望師傅可以改善下。…查看更多

而家好多餐廳都sell一人前，一人前邊爐，一人前燒肉，呢間《燒肉一番》就正正係用呢樣野做賣點。店舖位置係葵廣後面，有啲難搵，但餐廳面積大，坐得舒服。今次叫左個牛肉三盛，揀左牛舌，牛小排，牛板腱，另外加左份雞腿肉，芝士年糕，一口芝士小食。芝士年糕$19兩粒，一口年糕$19三粒，即炸熱辣辣，炸得岩岩好，唔會太燶。每一份牛肉份量都好多，當中牛小排質素不錯，牛舌係薄切既，但我比較鐘意食厚切，所以將三塊夾埋一塊食，感覺會良好啲。雞腿肉嫩滑，不過要燒比較耐。過下燒肉癮嚟講都還可以。…查看更多

近年嚟嘅傳統大排檔買少見少，取而代之咗好多新興嘅大排檔style餐廳，當中就有一間遠近馳名甚至一位難求嘅餐廳，就係楚撚記大排檔啦~今次放工就馬上趕過嚟，平日7點時段都接近滿座，建議大家一定要預先book位！餐廳裝修充滿懷舊香港風味，亦都有唔少打卡位啱晒鍾意影相嘅朋友仔😝七味黃金炸一口金磚豆腐豆腐嘅質感炸至外脆內軟，配上特製嘅七味粉同椒鹽，惹味得嚟又唔膩，建議飲酒嘅朋友就一定要叫！絕佳下酒菜🤩菠蘿拔絲咕嚕肉咕嚕肉以梅頭肉製作，肉質軟滑！除咗菠蘿之外亦都加入咗蜜桃，呢一點值得一讚，為整碟咕嚕肉帶嚟清新嘅感覺！香爆黑椒牛仔骨煲牛仔骨有鑊氣，非常入味，牛肉軟腍肥瘦適中，配合黑椒汁送飯一流！楚撚豬油撈飯極邪惡但好好食嘅豬油撈飯😆豬油沾滿每一粒飯，十分香口，必食之選！…查看更多

泓一可以話係香港頭五名受歡迎既店，兩年前第一次食雞白湯個陣有驚艷到，雞味濃郁到好似有十萬隻雞係個口到咁，而家質地順滑，麵條幼身偏硬，掛湯能力十足，當時$88一碗嚟講確質值得encore。係一個月前泓一話要裝修+研發新湯底，於是就有新出既鏗魚湯同新配方既雞白湯，店長聲稱係用上日本雞殼煲既，舊版湯底會偏白，新版會偏黃；但雞味方面，新配方確實失色不少，啲雞蕩失哂路，只係食得出鹹味，加啲檸檬汁會好少少，但都係失望。另外洋蔥本身由細細粒，變左做一條條，呢樣我認為係唔好既地方，本身一粒粒既洋蔥可以夾雜係麵條之間，中和到雞湯既膩，而家變到一條條就洋蔥味太出，搶哂雞味。值得一讚既係叉燒味道同質地都有進步 但比起之前就細塊左，荀就一樣咁好食。附上新舊版圖片 大家可以自行比較下其實泓一最好食係背脂醬油，唔怕肥既朋友可以去試下…查看更多

好湯好麵一直都係名氣餐廳，幾次經過都大排長龍食唔到，今次預岩時間唔洗排隊都食到喇花膠佛跳牆＄178，價錢不菲，但確實物有所值。可以見到用料一啲都唔馬虎，而且份量都好多。魚肚洗得好乾淨，唔會有沙，鮑魚帶子鮮甜入味，生熟度都掌握得岩岩好。湯底濃郁順滑，飲哂成碗都唔會覺得口渴，而且感覺到黏口，充滿骨膠原。麵方面用上扁粗陽春麵，掛湯能力十足，有咬口唔會太淋，整體來說十分出色，絕對可以再次回顧！另外當日天氣炎熱，係外面等開門時店員有遞上紙扇，值得一讚…查看更多

聽男朋友講呢間餐廳以前主要係酒吧劈場嚟，而家成個格局都唔同哂～聽講有時仲會有live band前菜方面，叫左個黑松露油芝士薯條，份量都幾多，炸得好脆口，黑松露味重，但由於淋上黑松露油，有啲薯條浸到林左，如果轉用黑松露醬點嚟食，效果應該會好啲。另外叫左個焗田螺，有驚喜！田螺粒粒都大隻，薯蓉好香滑，吸左田螺既汁更加顯得鮮甜甘口主菜方面叫左10oz安格斯牛扒，五成熟，熟度控制得好好，另外牛味都好重，嫩口唔老，唯獨係筋部處理可以再好少少之後叫左份紅蝦手造意粉，擺盤非常靚，另外紅蝦好大隻，熟度大約7成熟，鮮甜爽口，另外意粉蝦汁都好濃蝦味，美中不足之處係意粉質地較淋，意粉份量都唔算好多，如果拎到個平衡會好好多Overall呢餐飯都好滿意，值得一試！…查看更多

米線關注組長期都有人討論既麻辣川米線，地理位置有少少隱閉，店舖採用自助QR code落單形式，當中仲可以揀米線質地：爽啲/淋啲，比較特別既係除咗芽菜同韭菜仲有菜脯粒，唔係間間米線都有。而唔係酸辣愛好者既我叫左三餸麻椒米線。呢到既辣度都幾辣下，平時食開譚仔五小/三小辣，呢度食小小辣已經覺得辣。平時冇食開辣既人食BB辣好喇！湯底好香，唔會得個辣字；餸方面推薦豬軟骨，肉質嫩滑唔會好肥，而且滷得好入味。比較特別啲既係佢有黑柏葉，有興趣嘅朋友可以一試～…查看更多

長沙灣涼茶舖隔離既呢間堅正，望落裝修唔算好吸引，但日日都見到好多人食炸雞髀，於是有日下午茶都去左食。雞髀既size真係好大隻，薯條份量都唔少，但就係普通既茶餐廳薯條質素，大家都唔好expect too much炸髀一咬落去就feel到好多肉汁，火喉掌握得好好，一啲都唔乾，而且肉質非常滑嫩，亦唔會炸太耐而有燶味。師傅用生炸既方式，雞皮好薄好脆，唔似出面個種沾炸粉再炸，最欣賞既係，雞髀本身醃製得好入味，完全唔需要再加任何調味料 包括鹽。好出色既炸髀 之後再試過幾次都keep到水準！不過車仔麵就失色好多 可以唔試😂…查看更多

長沙灣冇乜台灣野選擇，經過呢間野就諗住入去支持下小店，點知勁失望。叫左個滷香雞髀肉燥飯，一嚟到見到西蘭花同蕃茄已經心知不妙，肉燥配蕃茄完全唔知咩事，完全唔夾，啲西蘭花又好硬。肉燥完全唔係台灣風味，但又唔係港式風味，奇奇怪怪，又冇乜汁。另外啲雞，明明係雞髀但都可以煮到勁乾，超「鞋」，又冇味，相信大家睇相已經見到有幾乾。成餐飯最正常已經係個兩碟配菜，但都完全稱唔上好食。與其請咁多打手去宣傳間店，不如試下整好啲野食先？真係超失望，食左一半都冇就食唔落。…查看更多

成日見呢間野好多人食，又咁多好評，諗住實冇伏，點知就入左個勇者塔到。叫左個豬大腸豆卜瘦腩肉麻辣米線，點知五舊大腸入面，有四舊都係咁既樣，超多肥膏，食落去仲臭臭地，好明顯就冇洗乾淨，好嘔心。瘦腩肉 可能係我唔岩，但我冇諗過佢真係瘦到好似煲湯啲瘦肉咁，鞋到攝哂落牙罅。湯底方面，佢既辣同佢既湯底既味係完全分開，完全唔融合。我好鐘意食米線，但連鎖米線店雲桂x都仲好食過呢間，或者小店金西x都好食過佢100倍。難食到好嬲，仲要環境好污糟，成地都黑蚊蚊，仲有啲跣腳。廚房出米線個陣會將張單浸落碗湯到...食左一半就走左 no next time…查看更多

經過登龍街成日見到麵尊排長龍，今次終於食返次，叫左豬皮豬紅豬腸雞尖米粉，配腩汁。餸既份量好多，豬紅好入味，唔腥，質地唔會太軟爛。豬皮豬腸處理得好乾淨，冇毛冇肥膏，整體餸既份量同味道都係出色既。但食到一半開始覺得成碗野真係好鹹好鹹，自問平時都食得重口味，但真係鹹到係咁要飲水。食完之後全日都好口渴要係咁飲水。如果改善到呢樣野既話，相信會更加好。（事後聽朋友講魚皮好好食，可惜我冇叫到，等個腎recover返之後會再試多次😂）…查看更多

今次嚟到呢間位於工廈入面既fusion餐廳，一開始就上左湯先（南瓜湯&海鮮湯）飲哂啲湯之後先上麵包，覺得個次序怪怪地，食包個陣好dry，湯方面，海鮮湯龍蝦味濃，亦有海鮮係入面，南瓜湯就可以做得濃稠返啲，略嫌唔夠濃郁。然後就有鵝肝批同帶子，帶子鮮甜，但溫度可以熱返少少最驚喜係main course 我地揀左黑鱈魚同m5和牛牛，魚煮得好滑，一啲都唔鞋，加埋味贈醬底更加突出到魚既鮮甜味。而m5和牛既生熟程度都控制得好好，好香牛味，又亦唔會好多筋/好多肥膏，不錯…查看更多

三人行，每位$160，另加開爐費$50，點知連一包炭都唔包，要每包$20額外買炭。野食種類少，肉類只得雞翼、雞牛豬扒、金沙骨、叉燒粒、漢堡扒、咖哩魷魚。基本既豬頸肉冇，雞腎冇，牛仔粒都冇。蔬菜方面只得茄子、三色椒、雞脾菇、南瓜，好基本好基本既牛油金菇，竟然要加$20一兜，燴蕃薯要$10，棉花糖又要加$30一包，牛油又要加錢買。其他燒烤場，呢啲野食係基本款，任食。雞翼又整得唔入味，叉燒得個鹹字，真係好一般。飲品就正常，每人包一枝大水，加一罐罐裝飲品。雪糕當然就要收錢，大約$15左右，款款唔同。好失望好失望既一次bbq，雖然係黃店，但真係撐唔落，唯一可以稱讚係環境靚，地方乾淨，但一定冇下次。希望可以作出改善調整。…查看更多

而家夏天咁熱好岩食雪糕，紅磡呢間《Sweet Craft》主打手工製雪糕/飲品，雪糕分別有抺茶 ($34) 同芝麻味 ($32)，可以外賣或者堂食。店舖採用開放式廚房，所以可以見到職員煮芝麻同綠茶既過程，十分有誠意。呢個價錢嚟講，呢杯芝麻雪糕都算物有所值，芝麻味好似芝麻糊咁濃，冰粒大細岩岩好，雖然質地未算超級滑，但唔會有鞋口既感覺，底部仲有脆脆米同穀片，我覺得如果可以有得自己揀配料就更加開心！本身以為一個人都食得哂，結果同男朋友兩個人先食得哂，經過紅磡既朋友可以一試呀～整體評分：7.5/10…查看更多