warnIng仔的个人专页

早餐、午餐及下午茶經常叫外賣，澳門茶餐廳真係唔錯嘅選擇。送餐速度快，落order同送黎嘅食物次次都好齊全，而且好貼心。例如早餐，會分開湯同公仔麵，麵唔會因為送到黎發曬變得唔好味。每個外賣盒頂都會有張紙，寫返盒入邊係咩食物，讓人一目了然，唔需要打開蓋逐個睇。葡撻真係好好味，次次下午茶都會order幾份黎食，加埋杯奶茶非常好雖然嗌外賣咁多膠盒同埋發泡膠盒好唔環保....如果餐廳可以有D新嘅改善會更好。同埋下午茶嘅雞翼會烤得比較乾，差小小，可以改善改善。…查看更多

早收工同朋友去食糖水，路邊發現呢間甜品店，唔洗等位，睇餐牌感覺好似好好味，就決定係呢間甜品店食糖水。店員帶我地到其中一張二人枱坐低，之後都未夠三分鐘，店員叫我地去第二張枱坐，因為門口有8位等緊。咁我同朋友都唔介意嘅，因為旁邊還有張四人枱係吉嘅冇人坐，合拼埋一齊可以坐。於是我同朋友調去近門口嘅一張四人枱。嗌完野食之後，店員又同隔離枱嘅內地客人講，食快小小，出邊有6個人係度等緊位。我聽完....非常詫異，叫個客食快小小，呢d咁嘅說話都講得出，真係第一次聽到，離譜！未夠1分鐘，隔離枱嘅幾個內地客人真係埋單離開。個同事又叫另兩個內地客調枱，因為出邊有客人等緊位。兩位內地客人於是坐係我地張枱，睇佐一陣餐牌，於是決定離開，因為店員嘅安排實在太差了。經常叫客人調枱，又叫人食快D埋單走。然後出邊等緊位嘅6個人即刻入黎坐低。未夠5分鐘，突然聽到廚房果邊有個水bar嘅員工大鬧，食完咁耐又唔埋單離開，坐係度等金執啊⋯⋯類似咁樣嘅說話，講得十分難聽，而且非常大聲，門口都聽到佢係度鬧人！就見到一位女士拎住張單，行去收銀台，同個收銀嘅同事講，叫佢睇睇落單時間，依家幾點，食佐幾耐時間，究竟可以食幾耐時間。個男店員都有一一作答。個女士8:47分落單，9:20被逼趕走離開。其實半個鐘咁上下嘅時間。我就望一望張單，上邊有寫繁忙時間享用時間為30分鐘，非繁忙時間為60分鐘。再睇下我朋友，佢10分鐘就食完，我仲慢慢食緊。我問朋友，你估個店員會唔會叫你走，因為你已經食完。又問朋友，你估店員會唔會再次叫我地調位走，俾出邊等位嘅客人坐。唉。我好明白尖沙嘴人多地方狹窄，做生意唔容易。但咁樣嘅服務態度，咁樣嘅安排真係唔得掂。就算你D甜品幾好味都冇用，咁樣嘅服務態度唔會再幫襯第二次。:(點解做生意會做到好似佢地咁....短短20分鐘，發生佐咁多令人難以置信和難以接受嘅事實，以後都唔會再黎呢間。快快食完快快埋單走人算吧！唔想再坐多一分一秒，費事無端端被人鬧同趕走影響心情。…查看更多

收工同D同事去食，燒肉宵夜放題任食，真係食到好飽好滿足。店員嘅服務態度亦好好，好周到貼心。order同埋送黎嘅食物份量都係冇太大偏差嘅。有前菜，刺身，熟食，炸物，烏冬...一路食一路燒野食，perfect！全部肉類都好夠味，唔係落味粉又唔洗點醬油。蝦真係不得了，無論係甜蝦定係燒蝦🦐，真係新鮮好味，必點必食再飲返小小梅酒，真係不得了，好有feel。甜品方面，唔知係咪太夜去，選擇唔算太多。總體都係好滿意…查看更多

服務 質素 價錢.... 唔係咁滿意滿心期待諗住黎食呢度嘅龍蝦餐飲食我認為一般。龍蝦濃湯有蕃茄味係咩玩法？只能說價錢同質素不成正比。至於環境服務方面，我係2樓食，地方唔算大啊張枱可能有點破損，要用膠紙圍邊，但未圍嘅部分就痴立立，就真係唔係好接受到⋯⋯我有留意其他食客嘅表情，見到對於安排嘅座位唔係太滿意，可能因為太逼吧。可能我鼻敏感啦，一出電梯聞到一陣酸叔味，好似垃圾味.....到員工方面，我理解佢做唔切，因為由頭到尾服務7枱人20幾個客又真係難嘅⋯⋯但係唔好玩啦，一間餐廳連餐牌都唔預備多幾份點得啊！⋯⋯坐底之後水都冇一杯⋯⋯要人叫先比，咁稱唔上服務啊⋯⋯仲有，上菜嘅時候，就咁放係枱嘅角落一邊....收碟果陣，完全冇禮貌，係度等我地客人拎俾佢。拎俾佢我唔介意，唔該都可以講聲吧......所以當我想要茄汁點薯條嘅時候，佢話轉頭比我，佢最後比我嘅係唔記得左⋯⋯我都廢事再叫多次啦😐可能你覺得，我地咁奄尖聲悶，咁有要求不如去酒店食啦.....但係收得咁貴仲要加埋服務費....唔該俾d服務俾d質素！…查看更多