Ew123456的个人专页

其實朋友都有同我講過唔好食，不過人就係咁，唔信邪，係要以身試伏先心息。呢排成日想食花甲粉，所以就嚟試吓，諗住呢啲無食啦😅最多咪淡啲。點知佢就真係出事。嗌咗花甲粉+$15要魚腩，冬蔭功湯底嘅。個湯完全唔似冬蔭功，唔知想點，好鹹；花甲有少少沙，最恐怖係有兩隻勁樣衰癡哂藤壺嘅，見到都唔開胃🥲就算未必有健康/ 衛生問題，但係連殼上啲咁核突嘅嘢都接受唔到囉...；魚腩唔熱，腥嘅。$78，整體我會畀0分。請都唔會食嘅程度。…查看更多

放假諗唔到食乜，想去嗰幾間都排哂隊。見呢間唔駛排隊就諗住試吓，結果發現紅日都唔駛排隊嘅其實都係伏😓嗌咗個椰漿炸雞髀飯同咖哩雞飯，仲有一個咖央多。成餐得個咖央多正常。咖哩雞嚟到得一隻雞搥，隻雞係白烚嘅，完全無任何調味；炸雞髀飯個髀就超鹹，髀位都竟然可以係嚡嘅😓椰漿飯好甜，未食過其他，唔知本身係咪應該咁甜，但咁樣二百幾蚊，簡直覺得貼錢買難受。平時好少浪費食物，但今次真係食剩大半兜，難食到要即刻寫個負評警世。…查看更多

Bookmark咗呢間一排，又有朋友介紹總店好食，見佢開咗去旺角咁方便就同老豆去試吓。嗌咗個芋泥包、千層糕同蝦餃燒賣。嘢食未上，第一眼已經見到個碗同隻羹未洗乾淨。之後第一籠上咗個千層糕，咬第一啖就見到未食嗰嚿有一條毛攝住喺中間。我驚自己睇錯，360度睇多次，好肯定係攝住喺個餡中間而唔係有條毛黐住喺側面。但因為係同老豆食，費事掃興，就叫員工換咗佢就算。不過食完今次無下次。為咗畀負評要寫多幾隻字，想補充籠燒賣等咗好耐都未到，要主動催單先有，上枱時仲要串一串客人；千層糕攝住條毛亦無主動話道歉，好彩我影咗幅相。…查看更多

專登等到下午一點，但話今日無lunch  set  (非假日）。明明佢自己張menu係寫「假日&例假日除外」，我仲特登google過咩叫做「例假日」，根本就唔包括節日前夕。如果係要驚死蝕，建議餐牌寫明「節日前夕不適用」。而家搞到人哋滿心歡喜期待下午一點去試佢個lunch set，但等咗咁耐，去到先知話無得食，問完之後見到有其他客人都係話「吓，今日唔係假期都無得嗌lunch set？」餐廳係咪應該要檢討吓自己，台灣同香港文化未必相同囉。…查看更多

其實已經試過呢間幾次 但係次次都唔掂 不過因為得呢間西餐平平哋 諗住畀多幾次機會 但係今次真係唔掂到要特登寫個食評嗌咗個咖哩牛腩飯 啲牛韌到好似橡筋咁🥴有啲就老過煲湯肉 成$58 仲要有毛嘅（我知有毛係正常 咁豬腸有屎都正常 咁唔通就照食？）以後都唔會再去食為咗湊夠數畀個劣評佢 咁我唯有寫多幾隻字之前食過全日早餐 個魚無味嘅 個雜菌炒蛋就得唚油膱味 另外亦試過平日午餐 個紅湯鹹到要洗腎 焗魚飯同樣地 條魚都係無味嘅...唔明白點解會有咁多好評 馬鞍山就算係美食沙漠都唔應該降低標準囉…查看更多

好嬲 去咗馬鞍山飲茶 想食蒜蓉蒸鮮魷 無貨 鮮蝦腐皮卷咁common 又無 流沙包 何來的流沙？得1/6粒鹹蛋黃 無流沙 乾啃成個齋包！檸蜜炸蛋散 檸蜜唔係膠狀而係水狀嘅 蛋散淋嘅 摺起啲位直程食唔落 唔會再有下次！為咗打夠200字可以畀個劣評佢 咁我唯有繼續寫呢間嘢點心選擇真係太少 而且兩位係無得揀細枱唔搭枱 一定要逼人畀貴啲錢去茶皇廳先可以唔搭枱 咁咩叫茶皇廳呢 就係啲茶相對靚啲 茶位亦當然貴啲 不過我就完全飲唔出啲茶係靚在邊度 同普通茶葉根本就無分別 而家疫情期間 如果唔搞返好啲食物質素 真係唔駛旨意有好生意…查看更多

其實我係覺得呢間餃子好好食 仲一個禮拜幫襯三次（唔係話有我幫襯好勁 只係想話本身真係好欣賞呢間嘢）但係今次我係嚟畀負評嘅原本總店開喺長沙灣已經想試 但因為實在太唔就腳 就一直都未有機會去試 知道旺角開咗分店 就即刻去試吓喇本身個人唔太鍾意食餃子 prefer雲吞多啲 因為覺得餃子皮太厚 但甜記啲餃子皮好薄而且好爆餡 仲有得揀蕃茄薯仔湯底 真係樣樣都中哂我口味可惜今日諗住去買生餃時 排喺頭位嘅我 畀戴眼鏡嘅男店員要求讓咗畀後面堂食客人埋單時 一個埋完又一個 然後又有一個彪形大漢插隊入嚟話買嘢飲 我先忍唔住出聲話其實我嚟先嘅 仲要畀個阿叔x 我企喺度唔出聲老實講餃子係好食 但係我認為待客之道有改善空間…查看更多

自己本身鍾意食傳統中式糖水 見呢間新開多好評就試吓嗌咗一碗蕃薯糖水（只有熱揀） 一碗熱嘅生磨合桃露本身自己其實要求都唔算高 但有一樣好基本好基本嘅嘢 發覺超過七成食肆都做唔到 就係啲食物上枱唔夠熱！😪咁樣講得 就代表呢間糖水舖都犯咗呢個嚴重低級錯誤😪兩碗糖水上枱個碗係熱嘅 但攪勻入面就係和暖 所以我有啲懷疑係翻叮先會咁😪外熱內暖對於熱嘅傳統糖水我expect佢係會有一定嘅香氣 但如上述所講 因為佢唔熱嘅 所以亦無所謂香氣可言碗蕃薯糖水 啲蕃薯暖都稱唔上 係室溫 無甜味 似煲完湯嘅湯渣 食之無味 棄之可惜 而薑糖湯底就偏澀；合桃糊 我自己就唔太識分係溝粉定真係「生磨」 但因為唔夠熱無香氣呢點已經扣咗一定分數 而唔夠食食落口亦相對會大打折扣 一啲都唔「糊」 好稀 應該稱之為「合桃水」 唔係 我甚至食唔出有合桃味... 整體完全唔合格 唔會再幫襯了 好差好差…查看更多

貪平嗌咗個炸物拼盤 其實整體質素ok 我要求唔高 對我嚟講炸物夠熱同有好食嘅汁已經好夠 cashier 枱面都有好多口味嘅醬汁同味粉 不過我食炸蠔就覺得有啲唔新鮮/ 凍咗啲味怪怪哋 其實呢個價錢我都無expect 食材係啲咩靚質素 所以就無理到 點知第二日就肚屙... 所以奉勸大家可能盡量避免揀炸蠔 …查看更多

第一次食豬頸肉撈檬 我expect 啲豬頸肉係燒香熱辣辣嘅 點知上到嚟凍冰冰 都算喇 因為撈檬唔係熱嘅 可能令上面啲肉嘅熱氣散得快啲喇 第二次食鴛鴦肉飯 滿心期待係熱辣辣啦啩今次 點知竟然都係凍嘅！！！仲要有幾嚿肉係酸嘅🤮🤮🤮以後唔會再嚟食 黃店都咁話…查看更多

見做緊半價所以嚟試吓 無嗌set lunch 全部散嗌壽司 點知咬第一嚿就瀨嘢 我知道正宗壽司飯都唔係凍嘅 但呢嚿飯微暖得嚟仲要黐埋一嚿（啲飯唔係粒粒分明）可能係我食開香港口味唔識嘢啩 但係嚿飯一pat嘢真係唔好食（對我嚟講）無下次...…查看更多

今日想食吓西餐 就嚟試吓呢間 原本想食雜菌risotto 但今日menu 轉咗做意粉 見另外一個餐有risotto我又鍾意食南瓜同菠菜 所以就嗌咗 嚟到之後食落幾好食 南瓜仲有啲一絲絲溶入risotto 但硬係覺得有啲唔對路 諗諗吓 明明我記得menu 寫有菠菜架喎 為免屈咗人哋 我特登問吓waitress 係咪菠菜打蓉融哂入risotto 所以好似唔見有菠菜？ 點知原來要特登問 佢哋先話今日菠菜無返貨 所以無落 其實碟飯真係幾好食 雞胸又juicy 可惜menu 寫明嘅食材無又無事先同客人講 或者 癡嘢喺menu 遮住個菠菜 令人有啲覺得少咁啲嘢囉 希望改善吓…查看更多

今日終於去咗試秀怡開嘅餐廳 嗌咗個醃肉手製闊麵跟水果冰茶 我覺得個冰茶略嫌太淡 可能想健康 天然啲 不過我自己覺得如果有返多少少甜度就好味啲 個闊麵等咗15分鐘左右 個人唔係太鍾意生蛋撈勻之後蛋白漿住個感覺 就咁撈忌廉汁濃味啲好食啲 醃肉有4片左右 略嫌少咗啲 另外建議闊麵可以加個配菜選項可以跟啲炒雜菌 覺得菇味都會令個闊麵更加香 食完正餐嗌咗個焦糖脆脆 嚟到比我想像中大嚿啲 都幾好食 鍾意啲焦糖脆脆 不過可能我重口味/ 畀啲焦糖脆脆冚咗個味 覺得啲cream好淡 都係甜少少好食啲 整體係賣相同味道都同X心好相似 如果Set可以加錢配蛋糕就好喇…查看更多

好日唔嚟食 突然心血來潮想食吓吉列豬扒 就嚟咗太子呢間吉豚屋 嗌咗個滑蛋吉列豬扒set 有杯嘢飲同麵豉湯 嚟到見碗麵豉湯同兜飯一樣大 (即係碗飯細） 但其實食落都唔算好細嘅 整體無功無過 但點知食食吓 望真啲兜飯... 有隻曱甴... 望多幾眼 確定係曱甴 先同waitress 講 waitress 一句「唔好意思」「我換過碗畀你呀」少少歉意都無（只係無反應 但唔係態度差） 我話我成個set 唔要喇就走咗…查看更多

上個禮拜試咗呢間喺附近開嘅新舖 喺門口排咗陣隊 發覺唔對路 問一問員工 先好躁底地話「堂食自己搵位坐喇」（意即我哋排錯外賣隊）一坐底就聽到隔離枱催單 員工（疑似係家庭式經營）就話「叫咗你哋唔好轉枱架喇」將責任歸咎喺嗰枱客人身上 果然 我哋後來嘅碗麵都到 追單客人都未有嘢食 其實啲嘢幾好食 正正常常咁 但秘製辣汁同枱頭辣椒油都唔辣 呢頭無乜好嘢食 基本上正正常常都收貨 但眼見有手抱BB嘅女士入嚟 員工用非常有中氣嘅聲線事先講明「嘢食係會比較耐架吓」旁人聽到感覺到有些微嚇窒 又望吓隔離枱 無啦啦送上一碟另上豬皮 但碗麵又未到 碗麵到咗 又多咗份豬皮 懷疑佢哋都係新手家庭式經營 另外又有一位出單嘅員工 懷疑過於緊張同忙碌又無經驗 緊張到踎低抓頭大嗌... 觀乎一頓用饍過程 比較年老嘅員工感覺應變能力相對上好啲 無咁激動... 我諗等佢哋run多排 熟習吓先 可能都會再去試吓 畢竟食物的確係過得去嘅…查看更多