eatingmoment的个人专页

係觀塘食lunch，平時食開的茶餐廳已食厭，於是試下呢間叁拾茶記😋每日都有特定午餐，今日星期四，我就嗌左沙嗲汁雞扒煎蛋撈公仔麵，飲凍奶茶(+$3)。等左五分鐘野食就黎，其實一開頭期望不大，但黎到又覺得ok 喎！唔好睇少佢，個麵份量其實唔細！賣相都幾靚，再加埋隻半熟既蛋，真係幾好食。不過沙嗲汁的味道可以再濃啲就更好。雞扒煎得好，皮脆肉嫩，幾咸，一啖雞一啖麵就最正😀野飲建議大家嗌少冰，因為佢既冰底真係非常多冰🤣…查看更多

呢日係新蒲崗辦完正事，就同朋友去左荷里活廣場搵野食，睇左幾間，最後都係比pizzahut 的芝士批吸引住🤤一坐低我地即刻嗌左個芝士輪盤扭扭批二人套餐($307)。呢個二人餐要揀一款湯，前菜，飯或意粉同芝士批。仲有兩杯餐飲。仲可以加錢食小食，不過我地驚食唔晒就冇嗌到。餐飲總是最快上的，我揀左杯英式紅茶(+$3)，朋友嗌左凍檸水。自己倒奶同茶，可以自己控制比例和份量。忌廉蘑菇雞湯，材料全部都切到好細粒，個湯就好重忌廉味🤤拿破崙醬汁肉丸同大蝦蜆肉焗飯🍤肉丸應該係豬肉丸，我就冇試到。大蝦蜆肉焗飯，個飯份量唔算大。雖然成個飯唔大不過入面既材料就真係好足。好味！😋食到呢到我未算好飽，而好想食的芝士批，等左十五分鐘都仲未岀場。當我地催完個侍應，過左十秒左右主角就岀場🤣芝士批係有兩款揀既，我地就揀左帆立貝熱情芝士輪盤扭扭批，外型真係超吸引！口水都滴埋落黎，堅持影多幾張相先🤣個批材料有帆立貝，一推椒同洋蔥。帆立貝份量就真係唔算多。不過個批邊就補救返晒。超。級。好。食。黑松露蘑菇醬芝士bite，入面有兩款芝士架🤤 又唔會話食到好漏，呢個批邊真心推薦。其實自己平時好少食pizza hut，一食就食到高質pizza，真心開心。好耶！😀…查看更多

夜晚係觀塘收工肚仔餓，由裕民坊行到差唔多牛頭角，就係為左食三多炸脾。大家都知三多既總舖係係大埔，不過我就真係甚少係嗰邊岀沒，所以唯有一試觀塘舖！夜晚九點幾去到，咪就係啱啱miss 左佢個有野飲既套餐囉🤦🏻‍♂️ 唯有散嗌咋。所有雞脾($30) 都可以加錢配意粉或飯，雞脾仲有得配沙律。不過我呢啲冇益熱氣既人，就問老闆有冇得轉薯條，老闆就好好人咁話幫我轉！😋 開心！嗌左十分鐘左右，野食終於黎，真係好餓呀！雞脾就真係大大隻，薯條係大大條粗波浪薯條，份量正常。雞脾雖然係炸但唔會話勁油，咬落去熱辣辣仲有汁！雞肉唔會話炸到老晒仲好滑，果然係正！一路食一路睇餐牌先發現原來有得揀辣！愛吃辣的朋友唔好睇漏眼錯過啦🤦🏻‍♂️不過呢個炸脾薯條🍟咁就$47，姐係薯條其實係$17，我就覺得下次可以淨係嗌返雞脾，或者套餐會抵食啲😋…查看更多

網上介紹呢間咖啡室既牛尾通係好食既，不過因為我唔食牛，唯有試攻其他野食。黎到澳門除左葡撻必食之外，仲有就係一定要食豬扒包。我就係興記見到有雞扒包，一於試下。今次嗌左雞扒包($26)同凍奶茶($15)！嗌完五分鐘左右野食就上枱。先試凍奶茶。凍奶茶都成$15 一杯，飲落好淡，茶味較重，簡單啲講其實就係唔好飲🤣 個人認為免試。黎到主角雞扒包，其實個份量黎講唔算大，如果男人／大食啲既淨係食個包一定唔夠飽。不過呢個雞扒包既包咬落好脆，應該就有烘過，個包係好食既。雞扒唔算好厚但真係幾好食，不過留意塊雞扒係有骨既，唔好以為啖啖肉呀🤣今次對興記既飲品都幾失望，性價比又唔算高，下次未必會再黎食。不過興記既雞扒包都可以一試！…查看更多

我每次黎到澳門，不得不吃既係lemoncello 既雪糕🍦 行到成身汗熱到死，雖然而家周街都有雪糕食，但我最推薦既都係lemoncello!入到門口，已經眼花繚亂，各色各樣的雪糕比你揀。店員見到你入黎都已經即刻比唔同味你試。檸檬車露味就每次必食啦，今次試左番石榴味，十分推薦！佢同想像中既番石榴味唔同，比較酸但味道好清新😋 雙味夾埋檸檬車露真係好正！Lemoncello 一樣都係有筒同杯揀，不過佢既雪糕，尤其檸檬車露味都溶得比較快，我就鐘意用杯多啲😋 單味MOP30，雙味MOP35，我就覺得真係好值得食！🤣…查看更多

同朋友去到澳門，佢地都推介食黃枝記，話伊麵同撈麵都好好食。今次我就試左雲吞撈麵(MOP50)。雲吞撈麵有四粒雲吞同一碗蝦湯。雲吞皮薄餡靚，每粒都有隻鮮蝦。蝦湯就真係好重蝦味。不得不讚，黃枝記既撈麵真係好好食，好彈牙。不過成個麵份量就唔算太大啦。澳門咁多美食，如果好鐘意食麵類既都不妨一試🤣…查看更多

平日同fd 子在銅鑼灣覓食，諗左好耐唔知食咩，行開誠品，醒起希慎有footcourt，就決定係嗰到食晚飯。行左一轉，果然都係日式野啱我口味。可能佢個位係最入，隔離排晒長龍佢都係冇人既。不過我今次試新野既勇氣就帶到間不錯既餐廳落袋啦🤣有好多款不同的野食，有咖哩飯同烏冬。頭頂都有menu。仲有關東煮食😋我今次嗌左咖哩炸蝦飯($58)，野飲可配汽水或者雀巢檸檬茶。落單後都等左五分鐘先拎得，份量都嚇一跳，原來成個餐仲有前菜同湯。前菜有醃芽菜，酸梅同蟹柳。湯係普通日式麵豉湯，有海帶同洋蔥。我自己就加左五味粉落個咖哩飯到，惹味啲呀嘛😏 咖哩材料都幾豐富，有磨菇，洋蔥粒同薯仔粒，唔算太辣。配埋我食咖哩最鐘意一齊食既醃蘿蔔，真係好好食，味道絕對比得上賣貴成倍的日式咖哩飯專門店。炸蝦有兩隻，賣相都幾好架。炸粉不會太厚，不過蝦就唔算大隻，成個飯主要都係靠咖哩黎餸🤣 不過咁既價錢食到咁既質素，仲有咁多野食，直情可以叫性價比高添。呢間仲有炸魚餅食，都幾吸引，如果係foodcourt 唔知食咩，我都幾推薦呢間👍🏻…查看更多

平時同事都有提開呢間餐廳，不過好少去呢啲藝術氣息重既地方，自然冇試過呢間。今次機緣巧合去到藝術中心做野，晏晝就一於試下。中午一點，餐廳已經滿座，多數顧客都係上班族。我地等左約十分鐘先有位。中午一時十五分，我地嗌野食時，好多都已經賣晒，然後海南雞飯得返白飯，咁早已經賣晒，真係好掃興。我就試左咖哩雞飯，加$12 飲柚子蜜。我既咖哩雞飯竟然最早到，落單後一分鐘已經送到，仲快過野飲。飯同兜雞都唔算熱，有理由相信係已經一早擺好碟，有人落單就拎岀去而已。雖然個飯望落份量正常，但其實都有好多飯。咖哩入面有薯仔同雞，薯仔煮得唔夠淋而且唔入味，不過雞肉就幾好食，份量都幾多。咖哩唔算好辣但幾香。成個飯食落勁飽肚。佢既野飲好細杯，如果一杯咁既特飲要加$12 ，就真係唔算抵飲。下次去開藝術中心，呢間就未必需要試了。…查看更多

最近見到呢間新開的台式飲品店，今日去開旺角，一於試埋佢！😋門面都幾靚喔。呢間都有好多款黑糖飲品，例如黑糖珍珠奶茶，黑糖珍珠奶綠，仲有黑糖珍珠烏龍。我就揀左黑糖珍珠奶茶。雖然佢有得改甜度，不過原來佢既甜度係改緊黑糖既份量。我就怕太甜，今次嗌左半糖。等左五分鐘左由飲品就黎了。我以前都係飲開黑糖鮮奶，今次係等一次試黑糖奶茶！飲之前係需要將佢搖匀架。搖完之後都仲幾靚🤣佢既黑糖味唔算好岀，成杯飲落黑糖味係若隱若現，唔知關唔關我叫左半糖事。珍珠好有咬口但略嫌唔夠煙靭。佢既黑糖飲品性價比好高，呢杯黑糖珍珠奶茶都只係$20，完全值得一試！自己第一次飲黑糖奶茶，覺得陣味好複雜，我都係就鐘意飲黑糖鮮奶多啲。…查看更多

雖然水果茶比起珍珠奶茶健康，不過基本上我都好少飲水果茶，飲到最尾，啲水果都唔知食唔食埋好🤣幾次飲一芳都係飲粉圓奶茶，今次一於試下最岀名既水果茶！今次試左一芳水果茶，少甜少冰。少左甜覺得杯野鮮左好多，唔會得死甜味反而多左水果味。入面既水果種類唔算多，有蘋果，橙同百香果。我食左入面既生果，覺得唔甜而且都冇乜生果味，可能佢地既味道已經去晒液體嗰部分啦😂 一芳既中size 份量一向唔算多，性價比黎講我就覺得唔算高，因為一芳既野飲其實都幾貴。下次寧願飲第二間。一芳既水果茶，試一次囉。個人覺得飲水果茶既話真係可以少甜，健康啲之餘都可以飲到多啲真水果味。…查看更多

偶然經過好景，發現一間未飲過的台式飲品舖，超愛珍珠奶茶的我，決心一試。望一望menu，發現基本上奶茶類只得一款，就是琥珀珍珠奶茶。都好，不用睇到眼花撩亂又揀餐死。舖位不大，店內裝潢幾特別。等候期間，見到好多人嗌水果茶，不過原來呢間不是主打奶茶而係養生美容的桃膠，下次有機會先試🤣今次嗌左琥珀珍珠奶茶，走糖少冰。因為甜度要改，都預左要等一陣先有。佢既杯係好似咖啡店既杯🤣 琥珀珍珠係金黃色既珍珠並不是平時的黑珍珠。成杯份量不算大，但珍珠份量都多。珍珠咬落十分煙靭，好有咬口！我超級鐘意佢既奶茶，茶味同奶味都好夠，真係好好飲！而且呢間舖頭好有良心，我嗌左少冰，成杯真係得幾粒冰，證明奶茶份量係佔好多架！下次有機會一於要試下桃膠飲品！…查看更多

自從香港多左台式飲品店，我就迷上左珍珠奶茶。然後前排又突然興起黑糖鮮奶。雖然興左一排，但我既第一次係係台灣飲既珍煮丹，又平，又大杯，亦唔洗排到天荒地老。一芳水果茶，其實我都飲過幾次，但係一直都同黑糖無緣。世上最遙遠的距離係啱啱輪到你既時候冇晒黑糖，然後只好飲其他野。今次心血來潮，食完午飯經過一芳，又見唔太多人，即刻狗衝！星期六下午時間，雖然都有條短短的隊，不過由排隊到攞野飲，十分鐘都唔洗，開心！😀終於試到黑糖粉圓鮮奶($30)，好感動。野飲黎嗰陣係層次分明既，亦都見到佢既黑糖並唔多。底層的珍珠係暖笠笠，上面既鮮奶有冰所以是冷的。我太心急一野就隊左支飲筒入去，然後就唯有用飲筒搞均啦😹冰同糖我都冇特別要求要走，不過建議少冰，頭嗰幾啖連奶飲真係好正，去到後尾啲奶味會淡晒。甜度黎講成杯飲落又ok 喎，唔會話非常甜，頭幾啖黑糖味都重，不過飲到一半就開始所剩無幾了。粉圓有咬口，唔會太軟或太硬。真係飲到台灣味道！飲完呢杯覺得都幾飽肚，中杯$30，大杯$33，又真係大杯好多架。我又覺得大杯都幾著數。雖然台式野飲愈開愈多，又愈來愈貴，不過一芳既黑糖粉圓鮮奶都值得一試！…查看更多

夜晚睇完戲有少少餓，黎到有飯食既mos cafe，不過我都係鐘情佢既漢堡多啲。今次就試左炸蝦漢堡($25)，跟左雞塊餐($25)。點餐後店員會比個號碼牌你，坐低將個牌擺係枱面，店員就會將食物送上黎。晚上九時，餐廳都仲係好多人，但未算滿座。等左幾分鐘，店員就送上食物啦！🤙🏻送餐時店員仲會講唔好意思要你等咁耐，真係好有禮貌🤙🏻Mos burger 既漢堡，賣相就係靚囉！蝦堡入面有沙律醬，內容就有炸蝦堡同生菜。個包真係好鬆軟，咬落好鬆化，同平價包就係唔同。蝦堡個內容當然就有蝦啦，啲蝦係真係一隻隻咁係入面，並不是切開左的。不過講真個蝦堡就唔算熱，應該就擺左一會兒，但都算脆既。每次食mos burger 都必嗌既摩斯雞塊，食過一次真係返唔到轉頭，今次仲要係啱啱整好，熱辣辣！咬落去嗰下除左好熱，就係食到個雞塊係有汁係入面！唔似麥記嗰啲咁炸到乾憎憎，真係超級好食！如果想食質素高少少既漢堡，絕對推介大家食mos burger，質素真心高架。…查看更多

工作關係又黎到太古。原來太古既朋友平時食飯都會揀黎food court，雖然成日都冇位，但流動性高，只要等多一陣通常都會有位。今次同朋友係下午茶時間黎到foodcourt 食飯，當然冇想像中咁多人🙂雖然太古foodcourt 有唔少選擇，但係我想食飯既心，始終都係引領我食北之坂🤣今次嗌左咖哩雞扒飯，由於跟餐有太多野食，我都係揀左單嗌就算。個飯超級快就有，比完錢返轉頭，個雞扒飯已經等緊我💕 第一眼感覺雞扒好細份！講真個飯唔算熱。而屬於日式咖哩飯既佢，一啲都唔辣。雞扒都唔算厚和大份，但都叫煎得幾好食。咖哩黎講，份量夠配晒成個飯，幾香同惹味。我覺得咖哩飯唔可以少既配角當然一定係醃蘿蔔！食咖哩飯只要有佢，味道層次係絕對會昇華！北之坂的咖哩飯做得不錯，呢間係food court 云云餐廳𥚃面，我覺得真係幾抵食同好味！…查看更多

以前第一次食薩利亞，朋友話係好抵食，點解抵食？因為就算叫好多share 食，價錢都唔貴。但係要叫好多share 食既背後，就係佢每樣野既份量都唔多🤡 本人食量比正常多少少，講真淨係食個雞肉薩利亞真係唔會飽，有時叫得兩份黎價錢又唔算抵。亦都試過同大食既男友人一齊食，最後真係嗌到一枱都係先夠食🤦🏻‍♂️今次就係午餐時間黎食，唔算繁忙時間但都要等五分鐘左右。Lunch set 去到1700，但因為真係好想食carbonara，於是放棄左較抵食既lunch 而嗌左温泉蛋卡邦拿那意大利粉($32)，同香辣腸($17)。我諗因爲唔係嗌lunch set 關係，等左成十五分鐘，催左一次，野食先黎，真係等得有啲耐。好似之前咁講，野食的份量不多。香辣腸有驚喜，真係熱同埋幾juicy，咬落去會噴汁。但我就覺得薯角陣味好奇怪，麻麻地。可能因為等埋香辣腸既關係，意粉已經唔意，好失望。每次食薩利亞，我都真係要嗌兩份先飽，下次都係一大班人一齊黎嗌野share食，可以乜都食啲，感覺上抵啲！…查看更多