kitying1124的個人專頁

工作有點悶，午飯時間決定出外走走，同事介紹這家附近新開的外賣店。店面乾淨利落，食物井井有條放在雪櫃或暖櫃內，有沙律、便當、冷麵、關東煮、飯卷、小食等。本想試試Yakisoba，但已售完，轉買份量較大的cheat day bento。chicken burger maki也很吸引，猶豫不決的情況下，也買來當下午茶。日式食物賣相不會令人失望，便當內有唐揚雞塊、椰菜餃子、飯、蔬菜及前菜，前菜醃得清新美味，確實令人開胃，雞塊嫩滑，成功保留肉汁，椰菜餃子餡料有份量，飯也有加入醬汁和枝豆，西蘭花和玉米旬烚得剛好，坐在陽光下、吹著海風，吃著美味又健康的日本便當，身心好像去了一趟小旅行。chicken burger maki - 牛肉、芝士、紫菜和醬油飯是必勝組合，對我來說稍為辣了一點，但作為工作中的energy booster，也算稱職。…查看更多

朋友介紹，原來灣仔呢棟大廈咁多餐廳，呢間仲要裝修得好有格調。6點半去到仲未天黑，望住街景一坐低感覺relax。menu簡單直接，我地每人一set。餐包預先切開兩邊，每邊都烘過，可以加肉桂牛油或者普通牛油食，好食到我要encore牛油Caesar salad菜好爽脆，有齊芝士碎同麵包粒，加埋流心蛋食原來好夾，有心思椰菜花湯唔係creamy 嗰種，平日我會鐘意creamy多啲，不過有咁多款appetizer，好彩個湯唔漏Chimichurri grilled chicken令人驚艷，醃到岩岩好，味道有層次，應該加左青檸汁，非常惹味。兩塊雞扒都係厚切，我地留肚食甜品，打包左一塊返屋企，屋企人大讚嫩滑juicy，好少餐廳整呢種味道。牛扒有炭燒味，叫左medium就真係medium，脂肪比例岩岩好，牛味極香濃。醬汁可以揀pepper sauce或者black pepper sauce。整體黎講，呢度嘅主菜好有水準，令人難忘，薯條有得任食，不過主菜份量好多，我地食一round就夠。最後share埋個心太軟，食得出朱古力係靚野同埋係75%或以上，朱古力多牛油少，唔會感覺油膩，夾埋雪糕一齊食係一大享受。望住個天空由光變暗，街燈慢慢亮起，同朋友過左非常relaxing嘅兩個半鐘。…查看更多

喺附近開會想搵快嘢食，中環嚟講呢度價錢好ok，招牌押上炸魚薯條，應該有保證。酒吧格局，門口有張吧檯，入面係Open kitchen，加埋好chill嘅音樂，下次應該要happy hour嚟。炸魚薯條盒內舖上扮報紙嘅吸油紙，炸魚粉漿厚度、調味適中，魚肉嫩滑，配粗薯條、lemon wedges同醋，係正宗英國食法，aioli醬蒜味剛好，食食下想去旅行嘅日子，幾時可以再自由咁飛呢羊肉漢堡配薯餅香港唔多地方有羊肉漢堡，見到即叫，係我第一次食，好有驚喜，羊味好濃，肥瘦同質感都岩岩好，芝士係good match👍🏻…查看更多

放工後喺中環行去PMQ途中見到呢間店，好熱嘅天氣，好斜嘅路，好彩有凍飲。賣相幾靚，黑白分明，個杯加左張紅色貼紙好有古早味，店員建議撈暈飲，我就先試一冷一熱嘅衝擊，鮮奶夠滑夠凍，黑糖珍珠暖暖地、煙韌入味，份量夠多，飲到尾都未食晒，撈埋芝蔴係新嘗試得嚟係夾嘅，仲有都幾飽肚。睇住店員整嘅過程都好治癒，店員加完芝蔴粉後會好細心咁抹返乾淨杯底。店內有張高檯可以堂食，望住街景放下空發下夢都幾好，係放工後一個好去處。…查看更多

一年前食過覺得麻麻，但今日因為冬蔭牛牛滿座、樂都冰室裝緊修、農情味星期一唔開，又見呢度轉左menu好似唔錯，所以又俾多次機會佢。兩個人加一個坐住bb車嘅9個月bb，被安排坐喺室外一張二人檯，位置幾闊絡，可惜坐低落order後，附近幾枱就陸陸續續開始吸煙，唔係叫左野食真係想即走，但order左惟有要求轉坐室內位。一個似係老闆嘅人安排左一張近門口嘅三人枱俾我地，一坐低佢就嫌我架bb車阻住，問我bb可唔可以坐櫈，但係冇bb櫈提供，試問一個9個月bb點坐到喺一張大人櫈？我bb係細粒嘅，點睇都唔會過一歲，佢咁樣要求我地有少少呆左，不過只係禮貌話佢未坐到大人櫈，會盡量將架車放埋d。當時附近嘅枱都未有客嘅。。。之後疑似老闆每次行過都會望住我架車，可能係擔心撞到啦，但嗰種注目禮令人感覺麻麻。食物冇咩大問題，係份量較孤寒，黑松露蟹肉露荀菠菜闊麵只得三條約3cm長嘅露荀，蟹肉大約有奶茶匙仔1/3匙，我食量中等，都要飲埋杯野先夠飽，飲品百香果茶都係普通糖漿開嘅飲品，不過不失。另一個叫左軟殼蟹南瓜意大利飯，個闊麵食完後先上，相信係需要炸蟹，因為下段嘅原因，5分鐘食完，都唔記得咩味。食到一半大量（真係極濃烈）煙味由室外攻入室內，我地兩個大人開始咳同喉嚨乾，職員見到都冇咩行動，可能都慣咗係咁，惟有自己快手快腳走人。總括嚟講，呢次機會唔應該俾，亦都冇下次。…查看更多

星期六兩口子放工已經係下午茶時間，由於超級極度肚餓，兩個人叫左成4樣野。咖哩吉列豬扒飯嘅咖哩汁比起以前稀左，好彩夠味唔太辣，加左少少椰奶，撈飯食幾好，呢度嘅吉列一向唔錯，豬扒大塊炸得鬆脆。魚柳包薯條實在係大滿足，粗薯熱辣辣又夠多，魚柳包有魚柳有番茄有生菜有他他醬，個包加牛油烘過，絕不欺場。西多士有花生醬有牛油有大量糖漿，花生醬連麵包角位都有，岩岩炸起冇理由唔好食啦。雜果沙律一黎到我地有少少嚇親，有成4個scoops咁多，新鮮蘋果粒薯仔粒同罐頭雜果椰果都有，係同我想像中一樣嘅茶餐廳雜果沙律，好食超級飽嘅午餐連下午茶。…查看更多

提早數天預訂了這裡的earl grey tea whole chiffon cake，準備在星期五晚為家人送上小驚喜。想著晚上可以吃蛋糕，整天心裡樂滋滋，在納悶的2020年，真的需要為自己製造快樂。從不會把到La Famille取蛋糕的工作假手於人，因為每次到訪都可以欣賞到櫃內精緻美麗的小蛋糕，令人會心微笑。附上冰袋、蠟燭、鋸齒刀、保冷袋，店員說要在1.5小時內放回雪櫃，我大約一小時後回到家，保存得不錯。登登登登，伯爵茶蛋糕登場了！不是聖誕蛋糕，但蛋糕面的小圓球充滿節日氣氛，小圓球其實是朱古力脆米，一口茶味蛋糕一口朱古力脆脆實在美妙。忌廉是一貫La Famille式的輕柔，夾雜著自然、實在卻不搶喉的伯爵茶味，如雲朵細滑，不過甜，不油膩，伴著熱茶一起享用，是悠然自得的星期五晚上。忌廉輕滑，我們即使吃多了也沒有罪惡感呢。比上次到訪時增添了很多新口味，圖中的香濃開心果味是我下次的目標，聖誕版大甲香芋也很有冬日感覺！！特意拍下不同呎吋的蛋糕 for reference，左邊是1.5lb/17cm，右邊是我今次買的1lb/15cm。…查看更多

今日去荃灣買野，又係發掘好味外賣餐廳嘅時候。呢間Ann Mamma我留意左好耐，喺openrice見有食評話佢有做外賣，去開附近一定要一試。午餐有9款，價錢包括一杯$28飲品，選擇幾多。等外賣期間坐喺店內，感覺清雅舒適。外賣預備得好快，10分鐘內就有。外賣用長型紙盒裝住，又靚又環保，份量都好足。泰式乾炒河粉(豬肉) 用上我最愛嘅闊河粉，口感好又掛汁，豬肉同蔬菜份量平均，有菜有肉感覺健康，顏色都好靚。泰式無骨滷水豬手飯分兩個盒裝，有一整盒白飯同大半盒豬手。豬手炆得入味又淋，調味岩岩好，個汁用黎撈飯食，唔經唔覺真係可以食哂成盒飯，點豬手嘅酸辣汁同一般現成酸汁唔同，餐廳應該有加左其他材料，味道有層次，勁好食。午餐包嘅飲品好吸引，我地叫左西柚梳打同埋泰式青檸茶。西柚梳打味道天然，仲有新鮮西柚肉，加埋冰凍梳打，好清新。泰式青檸茶茶底香濃，加左一整粒青檸入去，同泰國飲嘅味道勁相似。不愧係我期待已久嘅餐廳，我好滿意，亦都期待疫情減退後可以再去堂食。…查看更多

疫情期間要減少出外，但日日煮飯其實好攰。。。每星期總會有一兩晚買外賣。今晚落雨，方便快趣去左附近呢間金記。入到餐廳做返探熱等動作後直入cashier叫野食。晚餐以扒為主，是日精選係肉燥飯，聽到店員同電話入面嘅人講精選會日日轉，有時係肉醬意粉等等。我地最近叫凍肉已經食左好多扒，今日唔叫晚餐。叫左焗芝士雜菌意粉同咖哩吉列豬扒飯，另外用半價加左凍檸菜同凍檸蜜，外賣冇額外收盒錢。焗芝士雜菌意粉用鍚紙盒裝住，芝士汁份量夠，每一啖意粉都掛到汁，但唔會好鹹好滯，雜菌比想像中多款，有蘑菇、秀珍菇、冬菇同一種黃色類似秀珍菇，仲有少少西蘭花，係健康之選。咖哩吉列豬扒飯超正，有一盒飯加雜豆、一兜咖哩汁同埋用紙袋裝住一塊巨大豬扒（好似出面買鹽酥雞扒咁大！）。咖哩汁多到浸住個飯食都得，係帶有辣味嘅惹味咖哩，完全唔食得辣嘅人應該會覺得幾辣，但我地兩個食得好滋味。塊豬扒炸得均勻又鬆化，大滿足。飲多啖凍檸茶，茶底唔錯幾濃，感覺冇咁熱氣。茶餐廳黎講絕對可以翻兜，影低餐牌for之後用。…查看更多

疫情期間難得出街，下午茶時段喺旺角附近覺得要食返個甜品。行過//甜牙牙//覺得menu幾吸引，分隔措施亦好似做得唔錯(我入去嗰陣仲完全未有人添) ，就佢啦入去之前店員會幫手量體溫同提供酒精搓手液俾我地洗手，入到去之後只可以坐冇打交叉嘅檯，呢間店非常守規，超過一半檯打左交叉，檯與檯之間距離好足，咁樣感覺係安心D嘅。叫左綠茶心太軟配綠茶雪糕同一杯紅豆冰。綠茶心太軟表面夠脆，蛋糕質感同厚度岩岩好，亦都非常流心，綠茶流心唔會過甜，有少少回甘，加埋餅碎食增加口感，我覺得係喺香港食過其中一個最好味嘅綠茶心太軟，綠茶雪糕似係自家製，清爽唔太甜，藍莓同士多啤梨新鮮，紅豆就甜左少少。紅豆冰嘅紅豆夠軟綿，每啖都飲到花奶混合紅豆，喺28度嘅今日飲，透心涼。疫情令人緊張心煩，食下甜品非常舒心。…查看更多

第一次認識呢間店，係因為元朗朋友介紹佢係黃店。今日去開附近買野，見佢lunch set大約$50幾蚊包埋野飲，又有唔少選擇，決定會一會佢。門面望落簡簡單單，原來入面裝修好有泰式風情，加埋背景嘅泰文歌，真係有少少覺得去左泰國小市鎮。叫左兩樣野share食，牛肉船麵湯底好濃郁但感覺唔油膩，加埋4種調味料，令原來嘅湯底加入酸、甜、辣嘅層次，真係更加好食，我每啖金邊粉都連埋湯一齊食~~牛腩份量多、入味、夠淋，牛丸彈牙有肉汁，整體有驚喜，應該係我喺香港食過最好味嘅船麵，比起九龍城泰國舖嘅船麵更岩我口味。豬頸肉飯嘅豬頸肉有輕微炭燒味，外脆內軟，個脆脆邊勁好食，酸辣汁亦都好對胃口，我鐘意用酸辣汁撈飯黎食，餐廳或者都可以學下泰國做法，提供配糯米飯嘅選擇。我揀左跟餐既泰式檸檬茶，朋友+$10要泰式凍奶茶。泰式檸檬茶茶味幾濃，青檸份量慷慨，好清新。泰式奶茶我試左一啖，幾正宗，冇叫少甜都唔會過甜。我幾欣賞餐廳用彩色筷子，食都食得開心d，亦都有泰國特色啤酒供應，絕對有再黎嘅理由。…查看更多

因為疫情大大減少出街次數，今晚難得可以食完晚飯先返屋企，就揀左巴士站附近嘅呢間台灣菜。食物款式比其他台式餐廳多，我地點左香腸滷肉飯、台灣牛肉湯麵、夜市鹽酥拼盤。飲品就要左冬瓜珍珠同冬瓜檸檬。呢度凍飲冇冰，唔會溝淡本身味道。冬瓜茶唔係死甜，加檸檬就清新D，加珍珠就有口感D。珍珠有黑、白兩款，但美中口足係有D會痴埋一舊，用飲管飲唔到。夜市鹽酥拼盤包括花枝丸、甜不辣、蝦捲同四季豆，有台灣夜市風味，調味有層次唔會得個鹹字。蝦捲同花枝丸彈牙鮮味，甜不辣我印象中係第一次食，原來係煙煙韌韌咁，好有口感，加埋四季豆有少少菜好似冇咁邪惡，同埋賣相吸引D，配嘅辣醬唔算太辣，加埋惹味好多。台灣牛肉湯麵餐牌上寫住係手工Q彈麵條，軟硬適中，食下食下好快冇哂，湯底香濃，冬天食有暖身作用，牛腩夠哂淋，溏心蛋超流心！香腸滷肉飯好大碗，滷肉份量慷慨，每啖飯都可以有肉有汁咁食，香腸跟嘅蒜蓉醬好正，令平凡嘅香腸味道增加層次。整體黎講有台灣味道，佢仲有個招牌肉焿湯我因為眼闊肚窄未試，如果我一個人黎應該會食肉焿湯+滷肉飯+冬瓜茶嘅餐。…查看更多

今日呀妹到訪，老公又海南雞飯癮起，就喺去街市買餸前黎呢度食。三個人叫左$158「孖寶2人餐」，另加$28配蝦餅。例湯係木瓜南瓜雞腳湯，望住個橙色嘅湯特別開胃，好有營養嘅感覺，飲落冇乜味精感，清甜滋潤。海南雞半隻份量足，元朗大部分海南雞店都係泰式style，而呢度提供黑豉油、微辣醬同蔥油，感覺上比較似新加坡style。雞油飯夠哂入味，黑豉油同微辣醬配飯同雞都好惹味，常見嘅蔥油無奈被比下去，哈哈。兩碗飯夠哂份量，三個人share黎食最後都食剩少少。2人餐除左海南雞半隻仲可以九選一揀一款小菜，我地揀左咖哩魚柳，醬汁夠多同杰身，撈飯一流亦唔會過辣，薯仔夠淋超入味，魚柳明明係好新鮮熱辣，但外皮唔夠脆，較遜色。加$28嘅蝦餅有4塊，抵食又好味，蝦肉彈牙可口，不過要小心燙到咀呀。個餐仲有碟菜，都係一碟滿滿勁有份量，三個人食2人餐加蝦餅都差少少食唔哂，性價比極高，絕對有下次！…查看更多

不是妹妹推薦，我也不知道在士丹利街有這麼一間漢堡店，找了一會才找到，原來是在閣麟街熟食排檔處走進去。裝修很有美國風味，讓我想起在美國的小鎮停車歇一歇的那種小餐館。漢堡有肉食和素食可選，我們點了Cheese Burger和Fish Burger一起分享。Cheese Burger用上美國黑安格斯牛肉，主角牛肉牛味濃且肉汁豐厚，加上芝士非常誘人，生菜、洋蔥和番茄用料新鮮，整體感覺清新、健康。Fish Burger魚柳份量大，炸粉薄薄的不會感到油膩，我很欣賞這家店把麵包皮加上牛油先透徹地哄過，外脆內軟。黑松露薯條奉上時香味非常強烈，味道對辦，一口一口吃過不停。Buffalo Wings酸味和辣度平衡得很好，味道正宗，雞翼炸得香脆，沾滿醬汁，藍芝士醬完全把味道昇華，用來點薯條吃也很配。全店座位一律是吧檯，很chill，有happy hour感覺。中環來說價錢不算貴。…查看更多

上課後約了朋友在大角咀吃飯，貪新鮮的他提議一訪這家新餐廳。晚上八時許才入座，想不到仍有不少人，只是剛好不用等位，真幸運，因為已經很餓了。滷肉飯先到，雖然是小碗，但份量足夠兩個人分享(當時是會點其他食物的情況來說)，滷肉和醬汁份量慷慨，足夠每一匙飯都與滷肉同吃，也很細心地配上酸瓜，間中清清味蕾。飲品隨後以外賣杯送上，杯和蓋都是紙製的，不是最環保的做法，但好處是喝不完可以帶走。古早味冬瓜茶是朋友的，他說味道清爽自然，感覺不是厚厚的黑糖冬瓜糖漿加上大量清水而成的，我試了一口，果然不過甜。我的百香綠茶有很多百香果籽，是由頭喝到尾每一口都有果籽的，茶味也足夠，正合我意。鹽酥雞上碟時熱度夠，調味恰好，外皮酥脆，也得以保留肉汁，好吃。紅燒牛三寶麵包括牛展、牛筋和牛肚，湯底與外面常吃的不同，較清澈但味道較有層次，估計應加入了一些香料，整體來說沒有油膩感，適合一邊喝湯一邊吃麵。裝修很有古早味，例如以台灣路牌顯示餐廳地址，透過窗口望向街外，令人想起在台灣旅行的日子，感覺寫意。…查看更多