andiliii的个人专页

唔知係咪因為Mill Milk阿京介紹，近排呢間餐廳午餐時間特別多人排隊，今日經過決定試下。黎到先入門口攞飛，我地係平日大概12:45到餐廳，6個人大概等到1點就可以入座。餐廳入面大概30人座位，見其他人排隊都唔算耐，店員安排搭枱坐，但座位未算太逼。我今日叫左香茅豬扒撈檬，上菜時真係嚇親，塊豬扒係極大塊，炸完仲有足足1cm厚，同埋size比正常餐廳既豬扒大一半，一切開見到豬肉脂肪量好高，d紋理直頭好似豬頸肉咁，食落口好香又容易咬，成塊扒連骨頭位都完全唔韌。下面既撈檬不過不失，個汁冇乜辣味，附送兩粒仔牛丸。冇跟餐飲品，外加飲品多數都係比較貴、要30-40蚊杯既特飲，我飲免費茶水都夠啦，有少少青檸味好解膩。$74免加一既價錢真係一流，男士們都一定食到飽。我見有其他食評講到店員態度問題，我今次黎食就覺得店員都有禮貌既，不過見到d食客不停流轉，同埋店員見到你食完就執枱好快手，又比濕紙巾大家抹手，都會感受到食完快d走既無形壓力。食完出黎都見到成10個人等緊堂食或外賣，認真犀利！…查看更多

自從挽肉與米開張到依家開左兩間分店，網上一直有人討論到底好唔好食，同值唔值得排咁耐隊去食。今次係用牛角銀會員優先預約，我係早一個月左右預約既，book左尖沙嘴店星期日11:15am，當時睇見時間表都頗爲滿。今日我的1點鐘到店，前面已經有大概20人排緊一條隊逐漸入座，有個哥哥仔企係門口幫忙check in，人就幾靚仔不過態度就唔太積極啦，有幾組客人排左一陣隊先知原來要主動報到，同埋walk-in人士係要排另一條隊既，個哥哥仔都冇set好個指示牌，搞到d客態度明顯有d不滿。等左15分鐘剛剛好11:15分入座，入房前有哥哥仔帶領去點餐機落單俾錢先，然後再推開一大道門入座。餐廳係S型高凳吧枱，聽講有20幾個位置，兩個燒烤爐係正客人前面，距離大概一米半，一入門就見到雞蛋同薄荷檸檬水自取，仲有衣櫃可以自助掛起外套唔怕吸味。入座後感覺係幾舒服既，完全感受唔到燒烤味同埋熱浪，最後離開時成個人都冇咩吸味，呢樣確實抵讚。三分鐘後我既第一粒肉丸上菜啦，連埋半碗飯同埋麵豉湯。第一粒建議原汁原味就咁食，講真食落牛味好淡，肉質出奇地彈牙，少少似牛丸，同埋都幾多汁。但綜合黎講，我覺得真係冇乜特別，真係老麥安格斯包都好食過佢，起碼牛味濃郁好多先啦。試下加埋其他醬汁一起食，我覺得係檸檬醬同蒜粉最搭，一個解膩，一個提香，但整體都係好普通。第二粒肉丸等多左10分鐘，今次配醋蘿蔔絲同柚子醋，個醋汁本身味道都係普通，得淡淡地既酸味，容易入口，蘿蔔絲粗得黎冇蘿蔔既清甜，雖然可以解膩但對粒肉丸既味道冇提升。之後一粒肉丸唔知點解等得特別耐，應該有15分鐘，我見其他人都係淨係食蛋黃，我就蠢左當壽喜燒咁打勻左隻蛋當蛋汁點黎食都係嗰句，粒肉丸本身牛肉味就已經係淡，有蛋汁加持都只係好少少。最後總結：唔值得辛苦排walkin，埋單$162.8係咪值得book枱一試就睇個人啦。我都係返出去先啦…查看更多

自Kumo開張未夠兩個月就執笠，牛角集團兩個月內裝修完成開返間和平飯店，新開張即刻有好多優惠，有$48午市飯餐，免茶芥同買單點餐單78折。今日同幾位同事去試下，我自己試左京蔥爆牛肉飯，比大家睇下個樣先：先講上菜速度，用手機QR code落單，幾乎一落單就上菜，好明顯係全部煮好曬，好似兩餸飯咁好快可以上菜。我地呢枱叫左蔥爆牛肉，獅子頭同埋糖醋魚柳，講真食個$35兩餸飯都多肉過呢道好多，我嗰碟牛肉有6-7塊左右；獅子頭只有一粒，6cm大；糖醋魚柳最衰，好似咕嚕肉咁細粒，都係得4舊咋！味道認真仲差過好多街坊兩餸飯店，牛肉冇乜味，食得出煮左好耐，連飯都好乾硬，飲品、油菜要另加10蚊。講真冇開張優惠的話，冇需要黎試呢個$48午餐。同一商場甚至乎隔離牛角食用一價位抵食好多。…查看更多

清明節假期同朋友共6人去食，由於係紅日生日冇任何會員優惠，6點半入座準時90分鐘後交枱。一入座先上黑糖包，大家都食開味道冇特別，但我記得以前係其他分店食會叮返熱？今次兩份包都只係室溫，感覺味道香味都差少少。前菜叫左四樣：- 周打蜆湯：非常濃郁，根本成碗都係湯料，陪黑糖包食十分好味又飽肚- 煎吞拿魚：黑椒味到好重，改過曬吞拿魚既腥味，個汁酸尾尾都幾夾，推薦一試- Chicken cobb salad：份量巨大，6人每人分到一碟，我冇加汁去撈但係材料本身既汁水已經夠曬，雞肉唔老同埋幾好味。雖然價錢好似好貴，但呢個份量黎講我覺得好抵食- blooming onion：呢個應該係outback既名菜，不過我本人都係第一次係呢道食。唯一感想就係：好油啊！成個碟底都係油，頭五分鐘食落都仲覺得脆，後來我淨係食到花瓣既末端，底部沾滿油既部分真係頂唔順。個醬我相信係千島醬，由於個洋蔥冇乜調味，配千島醬或者茄汁會惹味好多輪到主菜啦，我地叫左個porterhouse五成熟，但成品應該有八成熟，而且人人把刀都好鈍，認真使盡了九牛二虎之力先拆到舊骨出黎肉質唔使講，煮到咁熟好極有限，但尚算有肉味。份量黎講6人每人只分到3-4舊左右。配菜揀左loaded potato，一如既往既好食；另外揀左蔬菜，一半都係紅蘿蔔片大家睇路最後甜品揀左兩樣未試過既：- 朱古力蛋糕：好甜好密實，一入口就醬住成個口腔，溫度又唔凍又唔熱，硬係覺得怪怪地。雪糕上菜時已經半溶，食落覺得係香精雲呢拿味。我鍾意唔太甜既甜品，我下次就唔會再點呢樣啦- Tiramisu：朋友話食得出佢用左ricotta而唔係mascapone黎整，其實我覺得冇分別，因為都係唔正宗，唔好食。整體食落都係得個甜字，冇乜其他味道，直頭連d手指餅都唔係好食得出，底部浸既expresso份量好少，整體評價就係冇味，唔建議。我之前係其他分店食開brownie配雪糕，係outback既招牌甜品，認真好食過曬呢兩樣除左以上菜式，我地每人都有一份飲品或湯，埋單每人250多少少。呢個價錢咁多款式可以話抵食，但好唔好食就見仁見智。加上近來全線好多分店結業，做左好多年既信用卡優惠都講明今年內唔會有，睇怕呢間餐廳都命不久矣，大家要珍惜食到outback既日子。…查看更多

幾個月冇黎荔枝角分店食，今次12點令來到攞飛，連網上訂位都要等成30張飛，不過最後都係等十幾張台就成功入到啦。今次試左好多新款壽司：北海道芝麻醬油漬寒鰤魚：口感好特別！好似啫喱咁，但唔太食得出魚味，朋友話冇醬油漬味道好食好多。醬油漬味道唔濃，芝麻唔香同埋有d影響口感添寧願佢唔落北海道芝麻油香炙燒鱈魚子海苔包：都幾好食既，但鱈魚子唔係特別香或者特別鮮味，不過呢個價錢絕對值得一試蔥三文魚軍艦：唔推薦，好肥但唔香，感覺比普通三文魚腩壽司漏斯氏平鮋天婦羅壽司：幾好食，魚肉都算滑，味道似九肚魚，荔枝角店炸得唔錯，夠乾身，推薦一試雷神卡達拉娜：唔知點解我食落有炙燒鰈魚裙邊既味，明明我已經食左薑清返個口朋友表示幾好食，但餅底唔似正常雷神乾有d脆脆今次兩條友加埋食左兩舊水咋，新款壽司夠抵食，值得一試…查看更多

同事搞聚會，有人食過呢間話幾好食，睇過其他食評話差心中有疑惑，但結果冇想像中差。落座先上一大盤功夫茶，一人一杯仲有多。今晚一枱十幾個人，點左一個圍餐再後加左條蒸魚，平均每人6舊水多少少。鹵水拼盤幾好食，鵝肉熟度剛剛好唔會老，蒸魚都整得好滑，其他功夫菜味道唔錯，未至於好食到返兜。唯一覺得較爲差係炸物拼盤，除蝦棗外其他好似冇乜味咁，又唔係炸得特別脆。在場侍應年紀都大，比較hard sell，但服務態度可以。整體黎講偏貴，都食得過，勝在坐得舒服又唔限時。…查看更多

呢間餐廳超適合女仔朋友聚會！首先週末完全唔需要等位，去到8點都見到餐廳有一半空位。成間餐廳係露營主題，有部分窗口大枱位置有帳篷裝飾，座位都好舒適。我已經食過兩次Brunch，雖然話brunch實際上5:30前都可以落單，價錢約百令蚊包茶/咖啡，重點係食物好食又超大份，5點令鐘去當晚餐食絕對夠飽，個人推薦煙三文魚班尼迪蛋，下面有大大塊麥包，唔係好脆但質感比一般麥包鬆軟，唔會咬到牙都崩，又夠曬飽肚。我兩次去都食到7/8點先走，完全冇趕人走，服務態度都唔錯，落錯單都處理得好快好有禮貌。睇人流應該好快做唔住，大家快d去支持下啦…查看更多

自啟德零售館開張後，呢間舖頭就經常要排隊，應該係咁多間餐廳之中人氣排頭位。早前已經試過幾次午餐套餐，肉類選擇多，每個餐都配200 g蔬菜盤，一碗飯或者一個公仔麵，有幾款免費湯底選擇清水任裝，平日午餐價錢加一後一般都$100咁上下。平時食開午後雙拼鍋，有牛肩胛同雞脾肉，肉類品質唔錯，絕對好過牛角buffet Lv1/2既質素。湯底方面我自己鍾意藥膳鍋，有藥材香得黎唔太濃味，唔會蓋過曬d肉味。今次特別要讚牛角app免費換既蟹膏蟹肉炊飯，要食完自己個鍋後，留少部分湯底，將蟹肉、蟹膏、生雞蛋、一大碗飯同埋蔥花倒落鍋煮幾分鐘。我今次都係用藥膳鍋底，本來以為蟹肉蟹膏各有一茶羹咁少應該冇味，結果煮出來非常有蟹香，炊飯加左滑蛋質感一流，份量都好大，適合三四個人share，每人有小半碗。個人認為價錢算合理，而且營養均衡，值得一試。…查看更多

啟德零售館新開漢堡包店，剛剛開幕時見人流都好多，最近人流已經減少，趁有位快啲去試吓。我揀咗焦糖洋蔥芝士漢堡包，加單點薯角計埋$100左右，如果跟餐加嘢飲係+$40，有汽水同埋梳打特飲揀。漢堡包身鬆軟，肉餅比較薄，類似smash burger做法，但犧牲肉質既同時煎得唔夠香，有D失望。炒洋蔥冇咩味，加上有辣味既醬汁太多太鹹，完全蓋過曬d味道，唔推薦試呢個包。反而薯角就好好味，外層酥脆，內裡薯仔肉鬆軟香甜，值得加錢試。同行友人試咗炸雞扒包覺得非常好食，下次會試吓。…查看更多

平時都有食開呢間 食晏時間好多人排隊 所以專登提早黎到 12點4入座講明45分鐘後交枱 未人齊已經開始催要幫同枱既人落單 到入座半小時就已經放低單要求埋單 10分鐘之內3個職員輪流過黎催左接近10次埋單同交枱 大佬啊主菜都未食完 仲有超過10分鐘先到講好既交枱時間 出面好多人等又如何？最後我地都係早過預定時間交枱 咁既態度一定唔會再黎食物方面質素越黎越差 招牌豬扒以前會煎得好香 就算成吋厚都好juicy 今次顏色好差白曬曬 內裏就乾到用刀切都有d難切 水吧有漏單…查看更多

TLDR：可以一試，但要留意服務態度以前晚市經過呢條街，見到好多人睇餐牌同排隊，諗住平日放假黎試下午餐。平日午餐menu價錢大概98-128加一，有一個主食加一杯咖啡/茶。主食選擇多，今日試左蟹膏燉飯同埋三文魚籽海膽蟹柳意粉。兩款主食份量適中，係冇咩客人既情況下上菜大約要10分鐘，味道不錯，食曬兩款都唔會有漏既感覺。飲品非常多選擇，包左有近十種花果茶，咖啡，朱古力等，連dirty，piccolo都包，我試左latte同埋黑加侖子茶，比較細杯，味道尚可。唯一既問題係侍應既服務態度。今次係平日約一點半到，現場總共只有三台客人，樓面大部分時間都係同一個侍應生招呼。我地由入門口對booking開始，個侍應好似成日都冇乜反應咁。有幾次客人嗌唔該，佢都好似扮聽唔到咁唔過黎，或者好惡咁講一句等陣啦。又或者叫落單或者比杯水咁，聽完就會行開慢慢做，一d回應都冇。雖然佢冇做咩特別出位既行為，但係成個感覺係佢好唔想做咁，唔耐煩。如果人少已經係咁，客人多既時候又會點？整體黎講價錢同食物質素相配合，如果唔介意服務速度慢，態度麻麻，都可以一試。…查看更多