ShanLi5129的個人專頁

今日lunch同同事一齊去附近呢間春芳號買肥仔水，慶祝星期五嘅蒞臨。未飲之前已經俾佢哋嘅包裝吸引住，好有藝術感同埋有特色，除咗茶飲之外，原來佢哋都有推出吐司，都幾吸引。我哋嗌咗三杯嘢飲，分別係紫薯珍珠鮮奶綠$40、地瓜珍珠鮮奶茶$40、豆花奶茶$34。 《紫薯珍珠鮮奶綠》 $40紫薯味都幾出，但係又唔會搶咗綠茶嘅味道，平衡得好好，而且值得一讚係啲珍珠好煙靭，有微微嘅黑糖味，揀咗微甜真係只有輕微嘅甜度，啱晒我。 《地瓜珍珠鮮奶茶》$40同紫薯一樣地瓜味都係幾突出，呢杯因為係奶茶，所以就冇綠茶咁香，但係整體黎講都好飲，甜度適中。 《豆花奶茶》$34呢個我哋轉咗鮮奶茶加$4，佢嘅豆花好香豆味，同埋好滑，好似食緊豆腐花，配埋奶茶真係幾唔錯。 另外我哋嗌咗紅豆吐司同埋芋泥肉鬆吐司，即叫即整好夠熱，餡料好多，好味！有機會帶埋其他同事嚟試。…查看更多

今日嚟旺角呢邊食嘢，順便行陣街，經過呢間餐廳覺得好啱心水，又有煮食又有甜品，特別係佢哋嘅疏乎厘pancake，見到都有興趣。餐牌嘅選擇真係幾多，搞到我哋都揀左好耐野食。《UNI & Scallop Linguine》$178海膽味都幾重，而且意粉好Creamy，口感幾好，唔會好林！帶子大大粒好正，有半熟感覺！《鵝肝漢堡》$138漢堡唔算好大大個，但係入面嘅配料十足，漢堡扒亦都夠Juicy，包面頭脆脆地，質感軟熟，整體都幾好味。《quesadila》$79好耐冇食過呢種墨西哥薄餅，裏面夾住好多雞肉同埋芝士，仲有幾款醬汁配搭，我自己最鍾意牛油果同cream cheese，真係好好味。《抹茶疏乎厘pancake》$119點可以唔食佢哋大熱嘅pancake!我哋揀咗抹茶味，估唔到有少少回甘嘅感覺，抹茶味好濃郁，好好味，疏乎厘嘅質感都好軟熟，唔會太濕，啱啱好。 總括嚟講，呢間西餐廳嘅選擇豐富，食物幾好環境又唔錯，都幾適合聚餐。…查看更多

今次去嘅泰國餐廳係🌟米芝連推薦大廚主理。一入去就覺得個裝修好靚，好有泰國🇹🇭feel，食慾已經大增。今次我哋兩個人叫咗一個飯，一個面，一個串燒同一個小食。👍🏻👍🏻👍🏻推薦：個麵係安格斯牛肉牛筋牛𦟌牛丸船麵，個湯底好濃郁，但唔會太過鹹，啲牛筋牛腱好好食，好林好香好入味，似係炆咗好耐。👍🏻👍🏻👍🏻👍🏻👍🏻大推：另一個主菜係蟹肉炒飯，完全估唔到蟹肉原來係一嚿嚿，唔係一條條絲，全部都係蟹鉗肉，份量都幾多吓。🍢🦑個串燒就係燒魷魚，爽口得黎一啲都唔韌，熟度啱啱好。侍應亦都好細心地幫我哋剪都細細舊，方便我哋食。🍳🐟而小食係鹹蛋魚餅，係喺魚餅入邊釀左粒鹹蛋黃。平時食鹹蛋黃通常都會好滯，但呢一個可以同個魚餅融合，味道啱啱好，另外配埋泰式辣醬，感覺更加清爽。🥤🥤然後我哋仲叫咗兩杯嘢飲，泰式奶茶同泰式檸檬茶。🍋檸檬茶味道好特別，有香料味，而泰式奶茶就好香濃。 🤵🏻順帶一提，侍應服務態度十分好，會好細心咁問要咩甜度，提醒我哋泰式飲品本身係會偏甜，結果都好好飲。😃😃總括而言，今次用餐體驗很好，有機會再encore。…查看更多

深水埗呢邊好多嘢食，但係上海菜餐廳唔多，咁啱見到呢間就覺得幾吸引。佢哋有特價嘅晚市套餐都幾抵食，價錢親民，所以見到好多街坊客。我哋嗌咗砂鍋雞二人餐$288有¼隻嘅砂鍋雞，砂鍋雞切件，湯底嘅雞味都幾濃郁，可以直接飲，仲有娃娃菜，所以湯底好香甜，好飲。《招牌鮮肉爆汁小籠包》小籠包真係有驚喜，外皮啱啱好，唔會太薄，亦都唔會太厚，食起嚟係有口感，入邊嘅湯汁好多，真係做到爆汁！《宮保雞丁》呢個比較似住家菜，但係雞丁炒得入味，辣辣地，用嚟送飯真係一流，而我哋嗰飯揀咗菜飯，好味。《豆沙窩餅》呢個豆沙窩餅不過不失，個皮有啲腍，我估未必係即炸即整，但係紅豆唔算太甜。《黃金蝦球》估唔到呢度嘅黃金蝦球有出面港式小菜嘅水準，鹹蛋黃味好香濃，蝦球大大粒口感又好爽彈，值得推薦。《酸辣湯一位》$38食上海嘢梗係要嗌酸辣湯，辣辣地入邊嘅配料又好豐富真係好開胃。…查看更多

今日同老公諗住嚟海旁食晚餐chill下，一search之下，發現呢邊都有Urban Coffee Roaster，因為之前喺尖沙咀點食過覺得好味，所以就揀咗呢間。沿用返佢哋一貫工業風嘅設計，好靚好有feel，成個場嘅座位都非常闊落，坐得舒服。《炸魚薯條》$118食西餐，當然唔少得炸魚薯條，呢個鱈魚柳皮薄，又脆口，而裏面嘅鱈魚冇雪藏味 而且口感好滑，薯條亦都好脆。《辣肉腸炒鮮魷魚》$88老公好鍾意辣肉腸，不過因為辣肉腸本身比較鹹配埋清清地甜甜地嘅魷魚就啱啱，呢個配搭真係幾出色，魷魚本身大甜味又林又爽口。《明太子忌廉意粉烏魚子》$148一向都好鍾意明太子嘅意粉，呢個都做得好好，意粉軟硬度適中，明太子味好濃郁，意粉本身亦都好掛汁。《手打安格斯牛肉漢堡配薯條》$138漢堡好大個，餡料充足，漢堡不下Juicy而且唔會一咬就散晒，牛味濃，包嘅面亦都脆脆地，整體嚟講口感幾好。食西餐，當然要配杯啤酒，佢哋而家做緊套餐優惠，嘢食加杯啤酒嘅套餐，價錢好合理！總括嚟講呢間餐廳嘅味道唔錯，價錢都唔貴，有機會會再幫襯。…查看更多

今晚諗唔到食乜，經過金鳳見到唔使排隊就即刻入。呢間金鳳係新開，環境好好同埋好乾淨，坐得舒服。扒嘅種類好似比之前選擇更加多咗！《美國安格斯肉眼扒餐》$202套餐跟餐湯、飲品，仲有餐包！好鍾意佢哋嘅餐包，好軟熟好好味。忌廉湯味道都唔錯。今次肉眼扒揀咗黑椒汁，扒好juicy，筋同埋脂肪都唔算好多，煎得又淋，同埋黑椒汁真係好好味！仲有薯格添。《每月晚餐A》$178帶子西冷牛扒，同樣揀咗黑椒汁，個人比較鍾意西冷，因為嫩啲肉味冇咁重，好正。呢塊西冷好軟嫩。 總括嚟講，金鳳仍然係平民扒房嘅Number one，下次會再嚟幫襯。…查看更多

喺日本都見過依間拉麵，終於可以喺香港試一試鍾意芫荽嘅朋友，一定唔好錯過佢嘅芫荽辣麻味噌拉麵。聽到隔籬枱話好好食。今日叫咗兩個拉麵：炒芽菜辣麻味噌拉麵（走辣）本身以為依間拉麵淨係出名食麻辣，但係點知走辣湯底都係好濃郁，好香。 本身好鍾意食芽菜，加上拉麵 🍜 更多層次 更爽口。特別既係佢既麵，比較粗身同埋爽，掛到湯汁 好好食。 另外 碗麵配一舊豚角煮 全隻溏心蛋 同一條粟米仔。 豚角煮好入味，好淋，唔會攝牙啦。 肥肉同瘦肉層次分明 口感豐富👍🏻 。 最後， 溏心蛋 蛋黃係橙色流心 好有食慾😻 另外，一碗特製麻辣味噌拉麵 。 有兩舊豚角煮🥹 好羨慕。 男朋友話湯底好香 麵質都係粗身爽口 掛到汁 😍 會再嚟食👍🏻👍🏻 本身好想叫埋餃子，不過食完碗麵實在太飽，最後都係冇叫到，下次要試吓舖頭推介嘅餃子👍🏻…查看更多

今日收工突然間想食泰國菜，同事介紹咗我嚟呢間，印象中好似好耐之前都食過一次啦。 店舖好大，要落地底，裝修好有泰式風格，座位闊落。《炸蝦餅》$108呢個炸蝦餅好好味，大大件好爽彈，炸粉唔厚，薄薄一層又相當脆口，而且好香蝦味。《泰式串燒》 $108豬牛雞各兩串，唔乾，食落仲有肉汁，大大份。《原個菠蘿排骨》$138多數食嘅咕嚕肉都係用罐頭菠蘿，呢個用新鮮菠蘿嘅咕嚕肉更加香甜，有菠蘿嘅香味，同埋啲菠蘿真係好新鮮，個底仲有好多肉，正。《泰式炒金邊粉》 $108呢個金邊粉，好特別，有層網嘅蛋鋪喺面，打卡一流，金邊粉味道唔錯，唔會太甜，蝦仁都夠大隻！ 總括嚟講，呢間泰國餐廳嘅味道真心唔錯，難怪咁多人幫襯。…查看更多

今日過嚟Popcorn呢邊睇戲，諗唔到食咩？又咁啱見到呢間burger店，就外賣返屋企食。除咗有好多款burger之外，仲有好多小食可以選擇，每個burger仲可以加錢升級，包薯條或者沙律再加奶昔！《煙肉芝士牛肉漢堡》$85呢個係佢哋嘅招牌，牛肉漢堡都幾厚身，咬落一啲都唔乾，都幾多汁，煙肉煎到好香，配埋芝士真係一流！《牛油果雞肉漢堡》$85呢個都好唔錯，本身我都鍾意食牛油果，份量都幾多，牛油果配雞肉口感更好。《Fish and chips》$125估唔到都幾大份，鱈魚柳冇雪藏味，好滑，而且炸得好脆口，拎到返屋企都仲好脆，薯條係有皮薯條，好好味。 總括嚟講，呢間burger店質素都唔錯，就算外賣拎到返屋企味道都keep到，推薦。…查看更多

今日過嚟旺角呢邊食晚餐，經過阿來就想食泰國菜，因為已經好耐冇食。未到七點樓下已經坐滿人，於是安排咗我哋上2樓，空間都幾闊落。《泰式炸蝦餅》$88同以往嘅味道一樣，炸得好香脆，彈牙，有蝦味！《泰式肉碎生菜包》$88生菜好新鮮，肉碎又多，半肥瘦，同埋炒得夠香，包埋菜好好味！《椰汁雞湯》$68夠酸夠辣，椰汁味好重，重點係入邊超多配料，雞肉同埋蘑菇，又飲又食好飽。《椰汁三色冰》$25嗌咗少冰少甜，略甜，不過味道幾好，飲唔到太甜嘅朋友可能就唔適合。 總括嚟講，阿來仍然係值得一食再食。…查看更多

太耐冇食烤魚，今晚搵到呢間烤魚專門店，好大間，菜式又豐富，除咗有烤魚之外，仲有大量嘅串燒，一入到門口已經見到好大個串燒爐，流晒口水。店內嘅風格似曾相識，裝修幾靚，又有卡位，座位都好闊落，同埋入到去唔會一大浸味，通風好好，就算約朋友食飯都好舒服。同埋餐廳做緊優惠，下午12點至5點入座，烤魚嘅配菜都係任食！好抵！《鮮青椒味青江魚》$289烤魚好似出面啲米線店咁，有得揀少鹽少油😂青椒好多，鋪滿晒成條魚，好濃味，辣度都可以自由揀，魚肉厚實又滑，算好少骨，同埋唔會過咸，好味！《芥末魚皮》$52涼拌魚皮真係非常好食，夠晒辣好開胃，口感爽脆，仲有好多青瓜絲，一次過識到兩種爽脆嘅口感。《串燒組合》$169呢個組合係懒人必揀，因為串燒嘅選擇太多啦，所以呢個就可以唔使揀有48串，而且全部都係我會食嘅，燒得真係幾唔錯，入味濃味得來，但係一啲都唔乾，份量都算多，唔會一串得一兩舊！《至尊水果茶》$43水果茶雖然價錢有啲貴，但係真係加咗勁多新鮮嘅水果，連埋水果食就覺得好抵，味道都好好，仲有椰果唔算好甜！…查看更多

突然間，好想食串燒，係朋友嘅推介之下，專程嚟到呢間喺柯士甸附近嘅串燒店。雖然店舖名有個川字，以為係比較中式風格，但原來入到舖頭之後覺得比較似日本嘅居酒屋。佢嘅餐牌選擇真係非常多。 整體來講，串燒嘅質素都幾好，唔會太重口味，食完唔會口渴口乾。《燒鮮白鱔》$68最鍾意嘅串燒之一，燒白鱔都幾厚身，咬落去多汁，同埋有魚味，唔會因為過多嘅醬汁而搶走咗個鮮味。《川辣酒煮東風螺》$68東風螺好入味，而且食唔到有沙，所以都新鮮，呢個唔係太辣，所以可以嗌。《燒腐皮黑松露海鮮卷》$42呢個唔係周圍都食到嘅串燒，本身都鍾意黑松露嘅，我覺得幾有新意，好香黑松露味，食落彈牙，唔錯。《燒日本豚肉腸拼盤》$48呢個腸仔比較幼身，但係燒得好似脆皮腸咁，好好味，咬落有汁！《黑松露芝士牛油焗金菇菜》$48食串燒一定要食金菇！除咗牛油之外，仲有黑松露同芝士，而芝士喺鋪喺最底，可以成塊整起佢黎食，好正，金菇綜合晒呢幾大精華，好好味。《日本蟹肉炒飯》$138聽聞呢度嘅炒飯都唔錯，所以試咗呢個蟹肉炒飯，份量都幾多，同埋每一啖都食到蟹肉，足粒，粒粒分明，推介。其實仲有好多串燒，不能盡錄，整體嚟講呢間串燒店質素真係唔錯，有機會會再幫襯。…查看更多

今日因為工作原因過嚟鰂魚涌呢邊，見到呢間好文青嘅coffee shop，跟住就同朋友一齊飲杯嘢食個晚餐。首先個環境真係好好，寧靜而且好靚，好岩聚會。《炸魚卷》$118墨西哥夾餅，配埋即炸魚柳，好好味！仲有乳酪醬，食係黎完全唔會乾身，仲好香口。《青醬雞肉通粉》$99一直好鍾意食青醬整嘅嘢，呢個通粉好creamy，汁夠，雞肉一啲都唔孩仲好入味，高質！《烤雞肉菠蘿配檸檬乳酪醬漢堡》$125呢個漢堡好大個，配料好足，烤雞都好好味，香草味出，微微嘅焦脆口感，配埋乳酪醬，少少清新嘅感覺中和返，好特別。《香蕉蛋糕》$33聽講佢哋嘅蛋糕都唔錯，我都係揀咗香蕉味，估唔到佢咁大份，香蕉味好濃，同埋焗過，所以佢嘅面都好脆，好味。《牛奶朱古力》$38朱古力有拉花，唔會太甜，朱古力味都好濃，所以好好飲。…查看更多

係銅鑼灣呢邊行完街，順便搵野食，朋友搵左呢間係百樂中心嘅西餐廳，水泥風都幾靚，雖然店唔大，但有空間感唔會好窄。餐廳應該定期會做下promotion，如果upgrade佢哋嘅晚市套餐，加一蚊就有慢煮鮑魚，同埋加$28就任食蛋糕，都幾抵《脆炸雞翼配香辣蛋黃醬》$58雞翼一上枱已經非常吸引，表皮炸到好脆，但唔會勁厚粉，配埋辣嘅蛋黃醬，真係好好味，雞翼又嫩又多汁，好正。《關西牛肉燒配牛肝菌意大利飯》$138我哋upgrade咗套餐，有櫻花蝦湯，蝦味好濃，同埋食到粒粒蝦子，口感幾好。而意大利飯做得非常creamy，牛肉燒好薄，份量好多鋪晒喺面，非常自癒，口感亦好好，濃濃嘅燒汁味。《椰香冬陰海鮮意大利粉 》$128好多海鮮！有三大隻青口，仲有好多蝦肉同埋魷魚，最值得一讚係個意粉冬陰味濃，同埋好入味，但又唔會太咸，意粉嘅硬度適中，對我嚟講啱啱好。最後跟餐可以揀一款甜品，我揀咗奶茶海棉蛋糕，超出預期茶味都幾香濃，同埋啲cream都幾滑，雖然$28就食到放題，但係質素都真係幾唔錯。飲品方面，我哋嗌咗杯特飲士多啤梨乳酪，唔太甜啱啱好，果味亦都好出，滿意。…查看更多

今日突然想食泰國菜，於是同男朋友特登走過來九龍城，見到城南道呢度有間價錢親民選擇又多嘅餐廳，於是就決定呢間。《串燒雞腎、牛肉、雞肉、豬肉》串燒份量好足，每一串嘅肉都大大嚿，燒得一啲都唔乾身，仲有肉汁，點埋沙嗲醬好好味，雞腎好爽，必點。《泰式炸蝦餅》$65呢個蝦餅正正常常，外脆內彈牙，唔太油膩，不過就dd乾身。《生菜包》$68佢嘅生菜包好合我口味，辣度、乾濕度啱啱好！而且炒得好香，生菜又新鮮。《椰汁雞湯》$63椰香味夠，同埋夠酸！唔會淡口，又唔會太辣，雖然嗌左細碗，但超多料！好抵。《冬陰功烏頭》$188食泰國嘢點少得明爐魚！冬陰功陪烏頭係我最愛 肉質厚實入味，索晒冬陰公湯，好好味。《泰式海鮮炒粉絲》$68泰國嘅粉麵飯都好吸引，今次試咗呢個炒粉絲，炒得乾身，海鮮量都好足，唔會太油膩，好味！ 總括嚟講，呢間泰國菜真係幾抵食，全部嘢都大大碟，足料，會再幫襯。…查看更多