因為好朋友生日想試呢間餐廳，所以我提早打電話問左有Window Seats就上網俾deposit（$500）訂座，餐廳都有再打電話黎確認預訂成功。到用餐當日，我拎住送俾朋友嘅氣球保鮮花盒去到餐廳門口準備入座，當時有位男職員見到就問我氣球諗住放喺邊度，我隨口就答左放喺枱面（因為係諗住送俾我朋友影相打卡），然後男職員就表示個氣球放喺枱面會影響其他客人嘅用餐體驗，有balloon係要包場，言下之意係我唔能夠進入餐廳用餐，我當時係覺得十分驚訝😨，因為食過咁多間餐廳未聽過有餐廳因為帶氣球而唔俾入，亦表示因為呢個氣球係一盒保鮮花，係送俾我朋友嘅生日禮物，可以放喺櫈上面，同埋其實都係諗住拎出嚟影幾張相姐，加上我喺訂枱嘅時候並無收到任何電話或電郵通知我唔可以帶氣球，然後職員先表示要入去幫我問一問。最後我被安排坐左喺門口附近嘅枱，於是我問佢因為我預訂時講左係訂window seats，可唔可以坐圓枱果邊，佢再次表示果邊main dining area有其他客人會影響到佢哋，果刻我真係有啲唔高興，因為覺得自己好似做錯啲咩事或者帶左違禁品而俾人隔離咁🥲，然後我打電話俾我朋友同佢講發生左咩事，問下要唔要轉另一間餐廳食，因為我怕座位唔係佢理想中嘅Window Seats，始終係同佢慶祝生日都想佢食得開開心心，最後大家覺得因為俾咗deposit唔想浪費就冇去到第二間餐廳食。然後男職員聽到我講電話，佢再向我提出可以安排返坐返圓枱果邊因為見到我將氣球花盒放喺櫈上面都唔係好高，我就表示等朋友過嚟睇吓需唔需要轉枱。等朋友到左，我地就轉左去圓枱，因為覺得景觀靚啲，職員亦不忘提醒我哋唔可以拎盒花出嚟，影相時先可以拎出嚟。餐廳做緊Italian x Asian嘅菜式，我哋叫左4個course - $680/per person1️⃣Italian tomatoes - 幾特別有三種蕃茄，但我個人本身麻麻地蕃茄2️⃣Semini pasta - pasta 上面嘅炸菜心幾好食3️⃣Veal fillet - 牛肉部分煮得岩岩好，吞拿魚都唔錯，配埋唔同嘅醬汁食幾新鮮4️⃣Fruit tomato sorbet - 味道有啲咸咸地，唔知係個sauce定芝士，個人覺得麻麻地坦白講，食物方面味道就一般，要注意食物portion 比較細，女仔係夠食嘅，如果男仔就可以叫多幾個course ，個人覺得比較好食嘅係份牛肉。環境方面係靚嘅，好適合打卡影相，但係如果要慶祝生日或者特別日子嘅朋友就要注意下份禮物，避免影響到其他客人嘅用餐體驗，唔講我真係以為自己帶左個熱氣球去餐廳。🥲服務態度方面一般，如果餐廳唔歡迎客人帶氣球類禮物，建議餐廳可以喺預訂網頁上面列明同埋電話提醒返客人可能需要包場，咁就可以避免不必要嘅麻煩。總結，原本諗住開開心心請朋友食餐生日飯，明白餐廳可能有佢嘅考慮，我都唔知有冇影響到其他客人嘅用餐體驗，如果有我喺度講返句唔好意思，但係我嘅用餐體驗就真係俾佢影響咗，今次午餐體驗真係不太愉快。兩個人食左千五蚊，值唔值得就見仁見智，老實講午餐俾得呢個價錢真係會對餐廳期望高少少，呢個價錢亦有好多其他餐廳可以選擇，所以今次用餐真係比較失望，如無意外亦無下次。最後，祝我好朋友生日快樂😊❤️🎂第一次寫食評，多多包涵，謝謝您們花時間收看❤️🙇🏻♀️…Read More
