千金小姐的个人专页

難得淘大開咗間都算出名嘅泰國菜餐廳，咁就試吓啦。平日食午飯，都冇乜人，但食物都上得慢。海南雞飯大部分都鞋口雞胸，唯一件雞搥嘅皮勁肥，肥到我食雞咁耐都未見過咁，似係激素雞。pad Thai 正常發揮，但個柚子沙律好辣又咸，柚子唔鮮甜，唔好話88，28我覺得都唔值另外加錢嗌咗斑斕椰汁同珍多冰，斑爛果杯就Morin 斑蘭糖漿溝椰奶，珍多冰直情冇甜味。。。幾落本裝修但如果keep 咁嘅食物質素，我估一兩年就bye. …查看更多

見佢哋冇得6點後堂食，專登搭車去支持佢哋。明明過咗繁忙食晏時間（2點入去），店內唔算太多客人，但啲店員都做錯嘢，一嚟嗌乜冇乜（冇青咖哩，冇金邊粉，冇白飯得油飯，冇網蝦春卷），咁原本嗌咗個青咖哩飯轉炸蝦餅堂食，點知等好耐，佢哋落單以為係外賣....。我另外嗌海南雞飯拎走，賣單時張單又冇刪到個青咖喱飯，又唔知要轉個海南雞飯俾我拎走（張單完全冇落），要我提話有個雞飯先識即刻整。未完，咁有mee會員做九折優惠，我啱啱dl個app唔識用，賣單問佢哋侍應點用個優惠，幾個都唔識，最後有個在廚房做嘢嘅女仔心水清識用。至於味道，失望，我個豬頸肉飯啲肉竟然唔係熱，涷嘅! 搞到偏硬。個海南雞飯係佢哋招牌（因外賣回家冇影相），但啲雞煮得太熟，變咗啲肉比較死實。椰汁糕冇乜班蘭味，椰汁味亦唔重，但口感唔錯煙煙韌韌。炸蝦餅就有啲辣，同埋唔夾佢個柚子汁。如果有啲人唔食得辣就唔好叫蝦餅啦。結論唔會再嚟，我樓下兩間海南雞飯店仲好食過佢，滑過佢，豬頸肉又熱過佢。發覺次次幫襯黃店同人迫都算，食物水準都不似預期，為何要貼錢買難受？…查看更多

在餐廳出面見到碗好靚嘅牛肉眼丼，5-7成熟, 就嗌咗碗燒肉眼丼，結果係點可以自己自己睇相 我影咗張宣傳相同到手嘅樣。一打開完全認唔出，啲牛肉薄過相嘅嘅一半，仲要全熟啡色嘅！咬落口又鞋又冇味，$30都唔值好嬲！不可一不可再！想告佢違反咗商品説明條例！！！！等我抱有期望！間嘢個名仲叫medium rare, 唔好侮辱自己個名啦！令我更加掛住日本 去親日本嘅餐廳，相同實物唔一樣都唔會相差咁遠。香港人啲錢真係太易呃了。…查看更多

睇openrice食評唔錯，同朋友去食。二人叫左一碟98$ 海南雞，12$油飯。另外仲有沙嗲雞肉豬肉串燒，小食拼盤，木瓜沙律，泰式奶茶。嗌完落左單，侍應唔洗一分鐘就擺低左碗飯，咁我諗碟雞係咪好快黎? 所以由得佢，點知原來唔係等左五分鐘咩都冇得碗飯! 咁我就叫侍應拎返入去等陣再上。我估唔到咁簡單飯同碟雞一齊上呢樣野都要人教飯要熱食先好味。1）首先碟雞因為有半隻，雞脾位滑既唔錯。2）自問平時都食到幾辣，但呢度既木瓜沙律辣到飛起，食左兩啖食碟食唔到!咁就冇左68（+10%）好多紅辣椒碎3）串燒好一般而且好咸, 重口4）小食拼盤有炸蝦餅，雞肉丸同埋春卷，全部都差過出面。5）最差既係碗油飯!!!! 係，我知雞油飯預左油，但我從來冇食過一碗油飯食到一半已見到碗底d油😱😱😱😱😱😱😱 係可以倒出黎咁多!!!!結論: 呢間野，同朋友二人最後用左接近四百食左一間好難食既晚餐!!! 我要上黎打吓食後感。大佬我地賺錢唔易架! 出街食都係想食餐好姐…查看更多

去左食LUNCH, 兩人各自叫一個忌廉蟹肉意大利飯同七成熟既安格斯牛扒配焗薯. 個飯份量只夠一個唔大食既女生, 味道很淡口(平時我都唔算食得濃味) , 意大利飯只是很普通既白汁撈飯, 有很多絲瓜定黃瓜等, 口感都算係OK既。大約75元未加一。個扒幾厚身唔錯, 但7成熟變左九成熟, 擺到明求其, 味道還可, 95元未加一。兩人午餐買單盛惠188元, 個人覺得呢個價錢會有更加好味既選擇!!…查看更多

我好多年冇在openrice寫食評，但呢次經驗好差，點都想食下。我今日下午約兩點黎到，有兩三人在前面等，咁我專登黎食（炸薯條粉絲）就等左一陣。見佢員工都好似响入面炸緊，咁諗住應該同傳聞一樣即叫即炸。點知。。。。。。第一口係又涷又咸，咸到痴線，味精好似唔洗錢咁，我專登搭車黎俾左三十四元浪費左我人生幾個字等候黎食劣食。食到上面咁上下就成杯掉左落垃圾筒了。幾廿元薯條香港人唔係食唔起，但想要返相對的質素姐。涷既薯條我真係唔知食黎做咩。…查看更多

雜誌介紹而去, 叫左雞鮮蛋鮮麵 ( 即係手撕雞+温泉蛋麵 ) 同埋重溫鴛鴦飯個]雞鮮蛋鮮麵 , 隻温泉蛋個樣望落好靚, 但比起出面的蛋反而冇蛋味手撕雞就幾dry 下麵條就幾硬下, 因本人喜歡吃硬麵唔中意食稔麵, 所以我幾欣賞, 但始終太淡口啦.... 我屋企煮都好味過佢.成碗麵好清淡, d 湯好似清水咁完全無味, 要落士油調味 , 勁"健康 "盛惠$68重溫鴛鴦飯比起碗麵叫做入得下口, 茄汁果邊係白飯底, 白汁果邊係炒飯底, 都幾特別. 汁的話白汁好味d d 河蝦都好爽口! 雖然係細隻左好似係$58/ $68 其實味道都同出面茶餐廳食到的冇話特別好呢度d waiters 全部都好有禮服好好笑容 , 環境寧靜, 這是比起其他茶餐廳好好多的地方. 我不會再過海來食呢度的了 …查看更多

嗌左餃子, 粟米牛油拉面同咖哩吉列炸蠔飯, 仲有芝士年糕餃子 - 有水準之作, 外皮脆粟米牛油拉面 - 拉面味道好一般, 少許諗, 不太彈牙咖哩吉列炸蠔飯 - 咖哩同普通買返黎果d日清咖哩湯包一樣味道, 你自己話好唔好味. 炸蠔層炸漿勁厚, 好似食緊面粉咁芝士年糕 - $28兩舊, 唯到$14一舊, 價錢不算抵, 但味道不錯的, 幾軟, 芝士味淡淡地不太重總括來說, 餃子比較出色以外, 其他的都冇乜特別話特別令人留下深刻印象P.S. 男老闆(經理?) 成日會問人好不好吃, 覺得佢好鬼賣力 …查看更多

有抵讚亦有彈的地方先講抵讚先啦- 三文魚刺身厚切! 有口感! - 劍魚腩好好食! 帶子刺身亦都鮮甜- 海鮮粥雖然係落急涷海鮮果D, 但個粥整体黎講都幾好味- 汁煮牛舌GOOD!彈: - 甜蝦營養不良, 係平時JUSCO急涷櫃最細SIZE果D- 刺身永遠最遲上, 要等好耐, 但D平野就會極速上! 好明顯係想等我地食左D成本平的野食先, 咁你就不會叫好多刺身 ........ 所以建議去食時立即遞左刺身同SUSHI的紙先, 有排等!- 甜品只有3款口味的雪糕, 雖然幾好食, 但對自助餐黎講單調左D- 炸蠔未食過咁難食 厚粉都不得了, 又冇蠔味- 西冷又薄又咸, 差過茶餐廳- 芝士煙肉燒蠔: 賣相VERY GOOD, 但食落是SOUR CREAM的沙律醬味不是芝士味....- 水都冇杯, 要叫WAITER/ WAITRESS先會給你是次賣單每人$173加一= $190 ; 下次再食放題未必會黎呢間... 寧願給多幾十蚊食尖沙咀金田…查看更多

慕名而至, 當然點了幾件8吋長sushi:8吋長三文魚: 不是三文魚腩, 有點失望, 唯有安慰自己當食得健康d, 魚生及飯的味道一般, 但因為魚生份量夠令到口感有分加8吋長劍魚腩: 白雪雪, 因為是腩位, 都幾好食8吋長鱆紅魚: nice, 跟三文魚的感想無異紅豆tiramisu 綠茶包: 火間土都有呢款甜品, 但好食好多, 呢個甜品算係差明太子海鮮烏冬: 忌廉味可能會蓋過左明太子味... 烏冬偏稔炸蠔手卷: 真係特大! 成個手卷好大份, 是平時正常看到的1.5倍大! 炸蠔很juicy, 有蠔味, 非常有水準! 有d肉鬆响手卷入面甜甜地, 食哂炸蠔時就係靠d 肉鬆黎送剩低的飯...水準keep住的話我一定短期內會再黎幫襯!…查看更多

開左間新野, 未食過芝士味雞蛋仔, 走埋黎試下$18 一底芝士味雞蛋仔, 呢個價錢係人都負擔得起的但係芝士味就唔濃郁, 如果再重味道d 就更好蛋漿亦都冇乜蛋香味, 味道只是僅僅合格食一次就唔會點想再黎添食 ( 因為好味的雞蛋仔其他地方都有 )旺角登打士街出名多街邊小食, 但亦是汰弱留強的地方希望老闆在食物質素上再尋求突破…查看更多

見呢排咁hit，專登搭車去九龍城食。夜晚六點去到，間餅店得返４件OPERA細餅，其他細餅已經賣清光，我想吃的款式綠茶OPERA冇哂。專登黎到都試下，買左件OPERA，食落去味道是不能更平凡的平凡，如果是在美心餅店買到的CAKE的話我覺得OK，但是係前帝苑酒店FINE FOODS的總廚的話，我覺得可以更加好食？老實講非常失望～　在其他地方食過更好吃的西餅，因此覺得這種味道賣$32不太值，我不介意給$32，但我想食得開心而已。希望下次來會更好。…查看更多

試左兩款甜品1) 朱古力木糠布甸2) 焗芒果酥皮卷1) 朱古力木糠布甸 --> 我初時以為會係可可粉，驚喜的是用oreo餅味的粉，應該係oreo的甜品。雪太硬，沒有入口即溶的感覺，但味道還是很好。2) 焗芒果酥皮卷　--> 好一般，賣$36有點貴，但旺角租貴這個價錢也可以接受。…查看更多

之前在ｍｅｇａｂｏｘ試過佢ｄ番茄汁虎蝦意大利飯，都幾好食但咸左少少，今次去左新開的淘大入面呢間，叫左個南瓜汁意大利飯，同埋白汁帶子意大利飯，南瓜汁果個好食ｄ因為有ｄ杏仁碎！好咬口～～　另外一碟帶子好少，同埋ｄ白汁好淡味，不過都算幾好！呢度的意大利飯當然唔係正宗啦，但如果只計味道同價錢的話，真係幾值得推介～！…查看更多

在女人街兩旁的很多食肆裡，找到了一間賣中式點心的，我超喜歡吃點心，可是星期六日很難早起去排隊飲茶，香港能飲夜茶的地方又不多，所以看到了這間店真的想進去試。然後一星期都在忙，今晚終於可以去試，點的東西不多，就最愛的蝦餃燒賣各一籠，還有一籠只有兩隻的鮑魚燒賣。上次試過那間所謂五星級中菜館主理的旺角添好運，實在非常難食，今次試試這一間究竟合不合自己口味。因為即叫即蒸的關係，等了約二十分鐘才有得吃，先試試蝦餃，一夾，不像添好運的一夾皮就穿了，放進口裡皮很彈牙，有嚼頭，蝦很足料，不過一隻蝦餃裡面沒有筍尖就像雪糕沒有配華夫筒一樣，有點失色。味道偏淡，最好向老闆要點敲油調味，立即upgrade。再試杞子上湯鮮祝卷，因為鮮祝卷是先煎過，所以ｄ上湯好似幾油下，味道不錯，但下次黎唔會再叫，因為感覺上有點油膩。然後燒賣也來了，看上去比在酒樓吃到的大很多，不過我一向不是以抵食為評分標準，所以還是先試試，非常的熱，這一次比較聰明，先點一下敲油不浪費每一口的美味，太大顆的燒賣，先咬一口，原來真的是極品！燒賣的蝦很大隻，蟹子橙黃色很漂亮，豬肉彈牙有肉汁鎖住，可能是我在這人生裡覺得最鮮、最美味的一次吃燒賣。至於那個鮑魚燒賣，鮑魚大約一吋長，放在燒賣的上面，雖然一籠只有２隻少了一半，不過又比一籠四隻的体積再大一點點，味道其實和一籠四隻的差不多，不過因為真的很大，所以用料也特別豐富，每一口都非常滿足。埋單時給多了幾元貼士，因為一來覺得食物很好吃，二來老闆和老闆娘待客很誠懇，看得出不是裝出來的，很久沒看過這種親切的服務笑容。未試過添好運的人，不要去排隊試了，這裡有一間更好吃又不用等位的. 希望質素能保持下去。…查看更多