CoffeeAndTea的个人专页

又到大閘食季節！食食食⋯又想食大閘蟹，又想食火鍋，今次揀咗哩間，一次過滿足2個願望。點餐形式，海鮮（鮑魚、生蠔、大頭蝦、藍蝦、帶子、蜆、鑽石蜆、扇貝）、小食用紙點大閘蟹、豬、牛肉向職員點蔬菜、丸丸、醬油、飲品、雪糕自助（從頭到尾6步可以行完）大閘蟹好細隻，多數都多膏，偶然1～2隻比較差（蟹高灰灰黃黃，肉質霉霉地），蟹膏蟹肉都無乜蟹鮮味。但我心中任食係咁上下，有咁嘅質素都ok啦。起碼唔係死蟹臭蟹。是公是乸由廚房出無得揀。火鍋豬肉、牛肉各只有1款，肉質軟滑唔嚡，但就無乜肉味，比預期好，食得過。火鍋海鮮一般般唔太新鮮，但d蝦全部好大隻，大頭蝦好多膏，藍蝦、蠔有d腥，鮑魚有咬口，貝類全無味。好多人攞咗蟹醋以為喺豉油，瓶身大大隻字寫住蟹醋，睇清楚至攞。蟹醋無落薑又無落糖味道又淡，薑茶又淡又無薑味又唔熱。蔬菜好新鮮，粟米好嚡，丸丸、腸仔急凍貨無特別。㨂咗3小時放題，我哋食得比較慢，最後連雪條都食唔到。環境衛生麻麻，出餐快，點完幾分鐘後出到，座位好窄，座正轉角位，出入都好易撞到隔離枱張凳。本身OpenRice 已訂了座，前幾日心血來潮睇吓細節，條款及細則寫明「經OpenRice 訂座不可享用大閘放題」，即刻打電話訂座，打咗成日都無人接聽，WhatsApp 訂座好快就有回應。唔明點解OpenRice訂座不可享用，建議Whatsapp 訂座。…查看更多

細細個已經好鍾意飲鮮榨椰汁，但哩幾年越嚟越少地方有得買鮮榨椰汁。每次想飲鮮榨椰汁，都會去另一間旺角椰汁店買嚟飲。睇OpenRice食評啲人話土瓜灣哩間老子號，店舖開咗幾十年，所以好想試下，但真係一直無去開嗰邊，疫情唔知會捱到幾耐，終於今次特登專程坐車去幫襯。期望越大失望越大，一飲就得糖水奶味，完全蓋過晒椰子味，味道又淡好似加咗好多水咁，一啲都唔好飲，顏色偏淺米黃色唔係純白色，仲買咗2支～唉～超失望！無下次！…查看更多

近哩年好多餐廳結業，但就多咗好多冰室開業。午餐諗住求求其其食過餐，揀咗間門口望落企企理理茶餐廳（當時連招牌都無睇），其實唔覺門面有招牌，入去有條走廊左邊仲擺放櫃枱賣面包，再行入去，嘩～好似去咗第二度，簡直久違感覺，樓底高，唔噪唔煙，乾乾淨淨，裝修柔和金光暖意～舒服，地方大座位大，2人座6人枱都無搭枱，無歧視無面色無趕客～正。先望望其他座客食緊果碟，又望望職員送餐手攞位果碟質素，感覺好得，碟頭滿滿，色澤鮮明，香氣四散，隔離飯香，見到樣樣都想食。食物種類多，炒粉面焗飯、燒味、湯粉、面包。叫咗個油雞瀨粉，雞嫩滑，連我最憎食嘅雞胸都好滑，分量多，好大碗，湯底唔會太咸，啱我口味，瀨粉彈牙，唔會軟爛爛好食。燒餓湯河，朋友話得。加$9轉飲奶茶紅豆冰第一次飲，紅豆粒粒分明，略甜已起晒沙，奶茶香滑，好味好大杯扺飲。朋友杯熱檸檬茶，檸檬有6片，份量十足。茶餐廳價錢，餐廳格局，酒樓質數，好耐無食過咁好食又咁有質數茶餐廳。…查看更多

上個月某日心思思去方太買糕，點知舖頭無咗，仲以為又多間老店敵不過疫情。心灰灰搜尋到佢新舖今個月開，新址位置比舊址方便。擇日不如撞日晚上急急腳行去都係6點啫，見到無乜人棑以為自己好lucky，點知原來係unlucky，架上1件糕點都無梗係無人棑隊啦！吓～乜唔係營業時間至晚上10點架咩⋯下次要早d去。新舖門面和舊舖無甚麼大分別，價錢預咗搬咗就會貴咗21元3個。…查看更多

哩棑好忙好耐無出街食飯，難得約朋友輕輕鬆鬆食完飯，想食下糖水滿足下諗住錦上添花，同朋友向食店附近睇到哩間糖水店啲相都ok，入去坐，店內半數枱有人坐。打開menu 無乜嘢選擇。落單個阿姐又木無表情之如又串，合桃糊無合桃味，芝麻糊無芝麻味，啲熱糖水係用微波爐叮番熱，真係想鬧人。腐竹雞蛋糖水仲加差，同個名一樣「腐竹」「雞蛋」「糖水」，料還料，糖水還糖水，雞蛋還雞蛋，啲腐竹仲係一片片，好似浸完水無煲過，再加糖水加雞蛋，仲要睇住阿姐將啲糖水用微波爐叮番熱，仲有好清脆叮一聲。真係嚇死人！簡直係趕客。有位朋友之前食飯食到好飽，所以已經食唔落糖水，佢無叫糖水，但阿姐指住出面話哩度有最底消費，其實唔係好知阿姐指住邊度，搵咗好耐見到牆身有好多大大張海報咁大張糖水相之中，有幾張好似手掌咁大０既紙仔之中有一張寫住有＂最底消費＂，但無寫最底消費係幾多～唔明！以乜嘢單位計算～唔明！完全係趕客態度。一定一定一定⋯唔會再黎食。完完全全唔ok之如仲好pk。唔好意思，我真係好嬲。H.K.係美食天堂，唔係垃圾地獄！唔該～真係唔好影衰HK兩個字！！！…查看更多

尋晚同幾位朋友去咗試一間位於觀塘「山姆大叔廚房」樓上私房菜，地點比較穩閉，但地方好大，枱與枱之間唔會好近好迫。開業至今只有4個月。上到去門口位置放咗好多咖啡機&咖啡&酒...，原來老闆係咖啡師。我好鐘意個磨菇清湯，話就話清湯仲以為好清，一飲之下有股濃郁菇菇味，正！48°C低溫三文魚好嫩滑，仲要放到好似游緊水0既魚咁樣。西冷唔鞋口有牛味，碟碟攞出黎個擺置都好靚，老闆每道菜都會講解食物來源和煮法。食物都好好味，我地連伴菜都食埋，甜品仲係我至愛0既焦糖燉蛋，但用牛肝菌0既焦糖燉蛋都係第一次食咋，味道都好特別，不過稀咗啲。之後仲有十幾類咖啡和花果茶葉，咖啡仲係老闆親手沖，可選手沖、虹吸、機沖。真係喜出望外地好食，價錢唔使$300蚊就食到，因為有折呀！仲即時Whatsapp咗比其他朋友，約佢地下次再黎 。巴馬火腿沙律磨菇清湯配黑松露48°C低溫三文魚燒美國天然極黑安格斯西冷牛肝菌焦糖燉蛋…查看更多